Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Jieɔ Nii ni “Sa Akɛ Aba Mli Oya” lɛ Kpo Etsɔɔ

Yehowa Jieɔ Nii ni “Sa Akɛ Aba Mli Oya” lɛ Kpo Etsɔɔ

 Yehowa Jieɔ Nii ni “Sa Akɛ Aba Mli Oya” lɛ Kpo Etsɔɔ

“Yesu Kristo kpojiemɔ ni Nyɔŋmɔ ŋɔha lɛ, ni ekɛtsɔɔ etsuji nii ni sa akɛ aba mli oya.”—KPOJ. 1:1.

TE OBAAHA HETOO OHA TƐŊŊ?

Amaga kpeteŋkpele lɛ nɛgbɛ damɔ shi kɛha Anglo-Amerika Jeŋ Hewalɛ lɛ?

Mɛɛ wekukpaa Yohane tsɔɔ akɛ eyɔɔ Anglo-Amerika Jeŋ Hewalɛ lɛ kɛ Jeŋmaji Ekomefeemɔ lɛ teŋ?

Te Daniel kɛ Yohane tsɔɔ akɛ adesai anɔyeli naagbee baatamɔ aha tɛŋŋ?

1, 2. (a) Mɛni Daniel kɛ Yohane gbalɛi lɛ haa wɔnuɔ shishi? (b) Mɛni kooloo lɛ klɛŋklɛŋ yitsei ekpaa lɛ damɔ shi kɛha?

DANIEL kɛ Yohane gbalɛi lɛ fɛɛ wieɔ nibii ni je amɛhe ni haa wɔnuɔ nibii ni yaa nɔ yɛ je lɛŋ amrɔ nɛɛ kɛ nɔ ni baaya nɔ wɔsɛɛ lɛ pii ashishi. Mɛni wɔbaanyɛ wɔkase kɛ́ wɔkɛ Yohane ninaa ni kɔɔ kooloo lɛ he lɛ to Daniel amaniɛbɔɔ ni kɔɔ kooloo ni he yɔɔ gbeyei ni yɔɔ aklontoi nyɔŋma lɛ he, kɛ bɔ ni Daniel tsɔɔ amaga kpeteŋkpele lɛ mli eha lɛ he lɛ mli? Ni mɛni esa akɛ nakai gbalɛi lɛ ashishi ni wɔɔnu jogbaŋŋ lɛ atsirɛ wɔ ni wɔfee?

2 Nyɛhaa wɔsusua Yohane ninaa ni kɔɔ kooloo lɛ he lɛ he. (Kpoj., yitso 13) Taakɛ wɔna yɛ nikasemɔ ni tsɔ hiɛ lɛ mli lɛ, kooloo lɛ klɛŋklɛŋ yitsei ekpaa lɛ damɔ shi kɛha Mizraim, Ashur, Babilon, Medo-Persia, Hela, kɛ Roma. Amɛ fɛɛ amɛná hetsɛ̃ amɛha yoo lɛ seshi lɛ. (1 Mose 3:15) Roma, ni ji yitso ni ji ekpaa lɛ tee nɔ eye nɔ akɛ maŋkwramɔŋ hewalɛ afii ohai abɔ beni Yohane eŋma eninaa lɛ sɛɛ. Naagbee lɛ, yitso ni ji kpawo lɛ baaba ebaye Roma najiaŋ. Namɔ baafee nakai maŋkwramɔŋ jeŋ hewalɛ lɛ, ni te ekɛ yoo lɛ seshi lɛ baaye eha tɛŋŋ?

BRITAIN KƐ UNITED STATES BANÁ NƆYELI HEWALƐ

3. Mɛni kooloo ni he yɔɔ gbeyei ni hiɛ aklontoi nyɔŋma lɛ damɔ shi kɛha, ni mɛni aklontoi nyɔŋma lɛ feɔ he mfoniri?

3 Kɛ́ wɔkɛ Yohane ninaa lɛ to Daniel ninaa ni kɔɔ kooloo ni he yɔɔ gbeyei ni hiɛ aklontoi nyɔŋma lɛ he lɛ, wɔbaanyɛ wɔyoo kooloo lɛ yitso ni ji kpawo ni awie he yɛ Kpojiemɔ yitso 13 lɛ. * (Nyɛkanea Daniel 7:7, 8, 23, 24.) Kooloo lɛ ni Daniel na lɛ damɔ shi kɛha Roma Jeŋ Hewalɛ lɛ. (Kwɛmɔ akrabatsa ni yɔɔ baafa 12-13 lɛ.)  Yɛ afi 400 Ŋ.B. afii lɛ amli lɛ, Roma Nɔyeli lɛ mli bɔi gbálamɔ. Aklontoi nyɔŋma ní kwɛ̃ yɛ nakai kooloo ni he yɔɔ gbeyei lɛ yiteŋ lɛ damɔ shi kɛha nɔyelii ni jɛ nakai nɔyeli lɛ mli kɛba lɛ.

4, 5. (a) Mɛni aklonto bibioo lɛ fee? (b) Mɛni haa ayɔseɔ kooloo lɛ yitso ni ji kpawo lɛ?

4 Awie aklontoi ejwɛ, ni ji nɔyelii, ni kwɛ̃ yɛ nakai kooloo ni he yɔɔ gbeyei lɛ yiteŋ lɛ he yɛ gbɛ krɛdɛɛ nɔ. Aklonto ‘bibioo ko’ kumɔ amɛmli etɛ eshwie shi. Gbalɛ nɛɛ ba mli beni Britain, ni kulɛ eyɔɔ Roma Nɔyeli lɛ shishi lɛ ná nɔyeli hewalɛ lɛ. Dani afi 1600 afii lɛ baashɛ lɛ, no mli lɛ Britain jeee maŋ ko ni yɔɔ hewalɛ ko tsɔ. No mli lɛ, maji etɛ krokomɛi ni yɔɔ blema Roma Nɔyeli lɛ shishi—Spain, Netherlands, kɛ France—lɛ fɛɛ yɛ hewalɛ kwraa fe lɛ. Britain tsirɛ maji ni abuɔ amɛ waa nɛɛ etswiatswia shi ekomekome kɛjɛ amɛgbɛhei lɛ. Beni shɛɔ afi 1700 afii lɛ teŋgbɛ lɛ, Britain miihe ebatsɔ jeŋ hewalɛ ni fe fɛɛ. Shi kɛlɛ, ebatsɔko kooloo lɛ yitso ni ji kpawo lɛ.

5 Eyɛ mli akɛ Britain baná nɔyeli hewalɛ moŋ, shi maji ni eyeɔ amɛnɔ ni yɔɔ Amerika Kooyigbɛ lɛ tse amɛhe. Fɛɛ sɛɛ lɛ, aŋmɛ United States gbɛ ni etee nɔ ená hewalɛ, akɛni Britain nu hiɛ asraafoi lɛ bu ehe lɛ hewɔ. Beni Nuŋtsɔ lɛ gbi lɛ jeɔ shishi yɛ afi 1914 lɛ, Britain ebatsɔ maŋ ni maji ni yɔɔ enɔyeli hewalɛ shishi lɛ fa fe fɛɛ yɛ yinɔsane mli, ni United States hu ebatsɔ maŋ ní nitsumɔhei fa yɛ mli fe fɛɛ yɛ shikpɔŋ lɛ nɔ. * Yɛ Jeŋ Ta I lɛ mli lɛ, United States kɛ Britain fee ekome yɛ gbɛ krɛdɛɛ ko nɔ. Agbɛnɛ, kooloo lɛ yitso ni ji kpawo lɛ epue akɛ Anglo-Amerika Jeŋ Hewalɛ lɛ. Te yitso nɛɛ kɛ yoo lɛ seshi lɛ ye eha tɛŋŋ?

6. Te yitso ni ji kpawo lɛ kɛ Nyɔŋmɔ webii lɛ eye eha tɛŋŋ?

6 Beni Nuŋtsɔ lɛ gbi lɛ je shishi lɛ sɛɛ etsɛɛɛ lɛ, yitso ni ji kpawo lɛ tutua Nyɔŋmɔ webii lɛ—Kristo nyɛmimɛi ni eshwɛ yɛ shikpɔŋ nɔ lɛ. (Mat. 25:40) Yesu tsɔɔ akɛ abaana seshi lɛ shwɛɛnii ko ní kɛ ekãa miitsu nii yɛ shikpɔŋ lɛ nɔ yɛ ebaa be lɛ mli. (Mat. 24:45-47; Gal. 3:26-29) Anglo-Amerika Jeŋ Hewalɛ lɛ fã ta eshi nakai mɛi krɔŋkrɔŋi lɛ. (Kpoj. 13:3, 7) Yɛ Jeŋ Ta I lɛ mli lɛ, ewa Nyɔŋmɔ webii lɛ ayi, egu amɛwoji lɛ ekomɛi, ni ewo tsulɔ anɔkwafo kuu lɛ najiaŋdamɔlɔi lɛ atsuŋ. Kooloo lɛ yitso ni ji kpawo lɛ bɔ mɔdɛŋ eha afɔ̃ɔ shiɛmɔ nitsumɔ lɛ yɛ be ko mli. Yehowa na nifeemɔ ni sa kadimɔ waa nɛɛ kɛtsɔ hiɛ, ni ejie lɛ kpo etsɔɔ Yohane. Nyɔŋmɔ ha Yohane le hu akɛ abaawaje seshi lɛ fã kroko lɛ ekoŋŋ koni amɛtsu babaoo yɛ mumɔŋ gbɛfaŋ. (Kpoj. 11:3, 7-11) Yehowa tsuji ni yɔɔ ŋmɛnɛŋmɛnɛ beaŋ lɛ ayinɔsane maa nɔ mi akɛ nakai nifeemɔi lɛ ba mli.

ANGLO-AMERIKA JEŊ HEWALƐ LƐ KƐ DADE KƐ SŨ NANE TOKOTAI LƐ

7. Mɛɛ tsakpaa yɔɔ kooloo lɛ yitso ni ji kpawo lɛ kɛ amaga kpeteŋkpele lɛ teŋ?

7 Mɛɛ tsakpaa yɔɔ kooloo lɛ yitso ni ji kpawo lɛ kɛ amaga kpeteŋkpele lɛ teŋ? Britain—ní kɛ wɔɔkɛɛ lɛ, United States hu fata he lɛ—jɛ Roma Nɔyeli lɛ mli kɛba. Ni amaga lɛ nane tokotai lɛ hu? Awie amɛhe akɛ dade kɛ sũ ni efutu. (Nyɛkanea Daniel 2:41-43.) Bɔ ni awie nane tokotai lɛ ahe lɛ kɛ be ni yitso ni ji kpawo lɛ—Anglo-Amerika Jeŋ Hewalɛ lɛ—baahe gbɛ́i lɛ nyiɛ pɛpɛɛpɛ. Tamɔ bɔ ni kɛ́ akɛ sũ futu dade kɛshɔ̃ nɔ ko lɛ enaŋ hewalɛ tamɔ nɔ ni akɛ dade sɔŋŋ fee lɛ, nakai nɔŋŋ Anglo-Amerika Jeŋ  Hewalɛ lɛ he waaa tamɔ nɔyeli hewalɛ ni ejɛ mli lɛ. Yɛ mɛɛ gbɛ nɔ?

8, 9. (a) Mɛɛ gbɛ nɔ yitso ni ji kpawo lɛ jie hewalɛ ni tamɔ dade kpo? (b) Mɛni sũ ni yɔɔ amaga lɛ nane tokotai lɛ amli lɛ damɔ shi kɛha?

8 Bei komɛi lɛ, kooloo lɛ yitso ni ji kpawo lɛ jieɔ hewalɛ ni tamɔ dade kpo. Ákɛ nɔkwɛmɔnɔ lɛ, etsɔ kunim ni eye yɛ Jeŋ Ta I lɛ mli lɛ nɔ eha ana ehewalɛ lɛ. Yɛ Jeŋ Ta II lɛ mli lɛ, ana hewalɛ ni tamɔ dade ní yitso ni ji kpawo lɛ kɛtsuɔ nii lɛ hu. * Yɛ nakai ta lɛ sɛɛ lɛ, yitso ni ji kpawo lɛ kɛ hewalɛ ni tamɔ dade tsuɔ nii lolo bei komɛi. Shi yɛ mra mli beebe lɛ, akɛ sũ efutu nakai dade lɛ.

9 Kɛjɛ jeeŋmɔ beebe lɛ, Yehowa tsuji ebɔ mɔdɛŋ akɛ amɛaanu nɔ ni amaga lɛ nane tokotai lɛ tsɔɔ lɛ shishi. Daniel 2:41 lɛ wie dade kɛ sũ ni efutu lɛ he akɛ “maŋtsɛyeli” kome, shi jeee pii. No hewɔ lɛ, sũ lɛ damɔ shi kɛha gbɛjianɔtoi loo kui ni yɔɔ Anglo-Amerika Jeŋ Hewalɛ lɛ mli ni haaa ená hewalɛ tamɔ Roma Nɔyeli lɛ dade hewalɛ lɛ. Awie sũ lɛ he akɛ “gbɔmɛi aseshibii,” loo mɛi kpɔ̃ji lɛ. (Dan. 2:43) Yɛ Anglo-Amerika Jeŋ Hewalɛ lɛ shishi lɛ, mɛi kɛ amɛhe eyadɔmɔ kui srɔtoi tamɔ kui ni fãa hegbɛ ni maŋbii yɔɔ lɛ he, kui ni damɔɔ mli amɛhaa nitsulɔi, kɛ kui ni miitao heyeli amɛha amɛmaji lɛ ahe kɛtao heyeli. Mɛi kpɔ̃ji lɛ haaa Anglo-Amerika Jeŋ Hewalɛ lɛ anyɛ ekɛ hewalɛ ni tamɔ dade lɛ atsu nii jogbaŋŋ. Kɛfata he lɛ, akɛni esoro mɔ fɛɛ mɔ susumɔ yɛ bɔ ni esa akɛ akwra maŋ lɛ aha, ní mɛi ni yeɔ kunim yɛ oshikifɔɔ mli lɛ kɛ yibɔ fioo pɛ hoɔ mɔ ni amɛkɛshĩɔ akaŋ lɛ he hewɔ lɛ, nɔyelɔi ni ehe gbɛ́i lɛ po nyɛɛɛ atsu amɛyiŋtoi ahe nii bɔ ni amɛtaoɔ. Daniel gba akɛ: “Maŋtsɛyeli lɛ fã mli aaawa, ni fã hu aaajwa.”—Dan. 2:42; 2 Tim. 3:1-3.

10, 11. (a) Mɛni baaba nane tokotai lɛ anɔ wɔsɛɛ? (b) Mɛni wɔbaanyɛ wɔkɛɛ yɛ amaga lɛ nane waobii lɛ afalɛ lɛ he?

10 Yɛ afi 2000 afii nɛɛ amli lɛ, Britain kɛ United States etee nɔ amɛhiɛ wekukpaa krɛdɛɛ ni kã amɛteŋ lɛ mli, ni bei pii lɛ amɛfeɔ ekome yɛ je lɛŋ saji amli. Gbalɛi ni kɔɔ amaga kpeteŋkpele lɛ kɛ kooloo lɛ he lɛ maa nɔ mi akɛ jeŋ hewalɛ ko ebayeŋ Anglo-Amerika Jeŋ Hewalɛ lɛ najiaŋ dɔŋŋ. Ekolɛ naagbee jeŋ hewalɛ nɛɛ naŋ hewalɛ tamɔ nɔ ni dade naji lɛ damɔ shi kɛha lɛ moŋ, shi lɛ diɛŋtsɛ ehiɛ kpataŋ.

11 Ani amaga lɛ nane waobii lɛ ayibɔ lɛ hiɛ shishinumɔ krɛdɛɛ ko? Susumɔ enɛ he okwɛ: Yɛ ninai krokomɛi amli lɛ, Daniel tsĩ yibɔi pɔtɛ̃ɛ atã—tamɔ aklontoi abɔ ni yɔɔ kooloi srɔtoi ayiteŋ lɛ nɛkɛ. Nakai yibɔi lɛ sa kadimɔ. Shi beni Daniel wieɔ amaga lɛ he lɛ, etsĩii waobii lɛ ayibɔ lɛ tã. No hewɔ lɛ, amaga lɛ nane waobii lɛ afalɛ lɛ damɔɔɔ shi kɛhaaa nɔ ko, tamɔ bɔ ni eniji, ewaobii, enaji, kɛ enane tokotai lɛ afalɛ lɛ damɔɔɔ shi kɛhaaa nɔ ko lɛ nɔŋŋ. Daniel tsɔɔ akɛ enane waobii lɛ baafee dade kɛ sũ. Yɛ niiamlitsɔɔmɔ nɛɛ naa lɛ, wɔbaanyɛ wɔmu sane naa akɛ Anglo-Amerika Jeŋ Hewalɛ lɛ baafee jeŋ hewalɛ ni yeɔ nɔ beni “tɛ” lɛ ni damɔ shi kɛha Nyɔŋmɔ Maŋtsɛyeli lɛ baaba ebatswa amaga lɛ nane tokotai lɛ anɔ lɛ.—Dan. 2:45.

ANGLO-AMERIKA KƐ KOOLOO NI YƆƆ AKLONTOI ENYƆ LƐ

12, 13. Mɛni kooloo ni hiɛ aklontoi enyɔ lɛ damɔ shi kɛha, ni mɛni efee?

12 Eyɛ mli akɛ Anglo-Amerika Jeŋ Hewalɛ lɛ fã sũ kɛ fã dade moŋ, shi ninai ni Yesu kɛha Yohane lɛ tsɔɔ akɛ nɛkɛ  nɔyeli nɛɛ baaya nɔ etsu gbɛfaŋnɔ titri ko he nii yɛ naagbee gbii lɛ amli. Yɛ mɛɛ gbɛ nɔ? Yɛ ninaa ko mli lɛ, Yohane na kooloo ko kɛ eklontoi enyɔ ni wieɔ tamɔ drako. Mɛni kooloo ni anako eko dã nɛɛ damɔ shi kɛha? Eyɛ aklontoi enyɔ, no hewɔ lɛ eji nɔyeli hewalɛ ni bɔ he enyɔ. Shikome ekoŋŋ lɛ, Yohane miina Anglo-Amerika Jeŋ Hewalɛ lɛ, shi amrɔ nɛɛ eeetsu yiŋtoo krɛdɛɛ ko he nii.—Nyɛkanea Kpojiemɔ 13:11-15.

13 Kooloo nɛɛ woɔ mɛi hewalɛ koni amɛfee kooloo lɛ he amaga. Yohane ŋma akɛ kooloo lɛ amaga lɛ baapue, ni ebaalaaje, kɛkɛ lɛ ete shi ekoŋŋ. Nakai pɛpɛɛpɛ ji bɔ ni ebalɛ yɛ gbɛjianɔtoo ko ni Britain kɛ United States ha ato shishi, kɛ yiŋtoo akɛ efee shikpɔŋ lɛ nɔ maŋtsɛyelii lɛ fɛɛ ekome, ní edamɔ amɛnajiaŋ lɛ gbɛfaŋ. * Gbɛjianɔtoo nɛɛ pue yɛ Jeŋ Ta I lɛ sɛɛ, ni abale lɛ akɛ Jeŋmaji Akpaŋmɔ lɛ. Elaaje yɛ Jeŋ Ta II lɛ shishijee gbɛ. Beni nakai ta lɛ yaa nɔ lɛ, Nyɔŋmɔ webii lɛ jaje akɛ, yɛ gbalɛ ni yɔɔ Kpojiemɔ wolo lɛ mli lɛ naa lɛ, kooloo lɛ amaga lɛ baate shi ekoŋŋ. Ni ete shi hu lɛɛlɛŋ—akɛ Jeŋmaji Ekomefeemɔ lɛ.—Kpoj. 17:8.

14. Mɛɛ shishinumɔ naa kooloo lɛ amaga lɛ ji “[maŋtsɛ] ni ji kpaanyɔ”?

14 Yohane wie kooloo lɛ amaga lɛ he akɛ “[maŋtsɛ] ni ji kpaanyɔ.” Yɛ mɛɛ shishinumɔ naa? Awieee ehe akɛ klɛŋklɛŋ kooloo lɛ yitso ni ji kpaanyɔ. Eji nakai kooloo lɛ he amaga kɛkɛ. Hewalɛ fɛɛ ni eyɔɔ lɛ jɛ maji ni yɔɔ nakai gbɛjianɔtoo lɛ mli, titri lɛ Anglo-Amerika Jeŋ Hewalɛ ni ji mɔ otu ni fĩɔ esɛɛ lɛ dɛŋ. (Kpoj. 17:10, 11) Shi aha lɛ hegbɛ akɛ etsu nii akɛ maŋtsɛ kɛtsu nitsumɔ krɛdɛɛ ko, nitsumɔ ni baatee shihilɛi komɛi ni baatsake yinɔsane lɛ ashi.

KOOLOO LƐ AMAGA LƐ KPÃTA YOO AJWAMAŊ LƐ HIƐ

15, 16. Mɛni yoo ajwamaŋ lɛ feɔ he mfoniri, ni mɛni eba sɛɛfimɔ ni eyɔɔ lɛ nɔ?

15 Yohane tsɔɔ mli akɛ, mfonirifeemɔŋ yoo ajwamaŋ ko ta kooloo ni tsuɔ tamɔ muneele—kooloo lɛ amaga lɛ—nɔ, ni eeye enɔ. Yoo lɛ gbɛ́i ji “Babilon kpeteŋkpele lɛ.” (Kpoj. 17:1-6) Esa jogbaŋŋ akɛ ajwamaŋ nɛɛ damɔ shi kɛha apasa jamɔi fɛɛ, ní amɛmli otu ji Kristendom sɔlemɔi lɛ. Jamɔ gbɛjianɔtoi ejɔɔ kooloo lɛ amaga lɛ, ni amɛbɔ mɔdɛŋ akɛ amɛbaaná enɔ hewalɛ.

16 Shi yɛ Nuŋtsɔ lɛ gbi lɛ nɔ lɛ, Babilon Kpeteŋkpele lɛ ena akɛ enui, ni ji mɛi ni fĩɔ esɛɛ lɛ, miigbi kwraa. (Kpoj. 16:12; 17:15) Ákɛ nɔkwɛmɔnɔ lɛ, beni kooloo lɛ amaga lɛ pue klɛŋklɛŋ kwraa lɛ, Kristendom sɔlemɔi lɛ—Babilon Kpeteŋkpele lɛ fã ni yɔɔ hewalɛ waa lɛ—ye Yuropa kɛ Amerika maji lɛ anɔ  waa. Ŋmɛnɛ lɛ, mɛi babaoo ebuuu sɔlemɔi lɛ kɛ amɛsɔfoi lɛ, ni amɛfĩii amɛsɛɛ dɔŋŋ. Anɔkwa sane ji akɛ, mɛi babaoo heɔ amɛyeɔ akɛ jamɔi lɛ fata he loo amɛji mɛi ni haa béi baa. Nilelɔi akuu ko ni yɔɔ Yuropa kɛ Amerika maji lɛ amli ni teɔ shi woɔ nɔyelii lɛ miibi ni afo hewalɛ ni jamɔ yɔɔ yɛ maŋbii anɔ lɛ sɛɛ.

17. Mɛni etsɛŋ ni ebaaba apasa jamɔ nɔ, ni mɛni hewɔ?

17 Shi apasa jamɔ hoŋ eyaŋ kɛkɛ. Yoo ajwamaŋ lɛ baakã he efee mɔ ko ni yɔɔ hewalɛ waa, ni ebaabɔ mɔdɛŋ ekudɔ maŋtsɛmɛi koni amɛfee esuɔmɔnaa nii, kɛyashi Nyɔŋmɔ kɛ yiŋtoo ko aaawo nɔyelɔi lɛ atsuiiaŋ. (Nyɛkanea Kpojiemɔ 17:16, 17.) Etsɛŋ, Yehowa baaha maŋkwramɔŋ kui ni yɔɔ Satan gbɛjianɔtoo lɛ mli, ní Jeŋmaji Ekomefeemɔ lɛ damɔ shi kɛha lɛ lɛ atutua apasa jamɔ. Amɛbaafite hewalɛ ni enáa yɛ mɛi anɔ lɛ, ni amɛbaakpata nii babaoo ni ená lɛ hiɛ. Afii nyɔŋmai komɛi ni eho nɛ lɛ, etamɔ nɔ ni nifeemɔ ni tamɔ nɛkɛ lɛ nyɛŋ aba mli. Ŋmɛnɛ lɛ, yoo ajwamaŋ lɛ miikpa kɛmiiya kɛmiiba yɛ kooloo ni tsuɔ tamɔ muneele lɛ sɛɛ. Fɛɛ sɛɛ lɛ, ehewalɛ lɛ ejeŋ edɛŋ fiofio. Eshigbeemɔ lɛ baaba lɛ trukaa, kɛ agbɛnɛ hu yɛ yiwalɛ gbɛ nɔ.—Kpoj. 18:7, 8, 15-19.

KOOLOI LƐ BA AMƐNAAGBEE

18. (a) Mɛni kooloo lɛ baafee, ni mɛni baajɛ mli kɛba? (b) Mɛɛ maŋtsɛyelii Daniel 2:44 lɛ tsɔɔ akɛ Nyɔŋmɔ Maŋtsɛyeli lɛ baakpata amɛhiɛ lɛ? (Kwɛmɔ akrabatsa ni yɔɔ baafa 17 lɛ.)

18 Kɛ́ akpãta apasa jamɔ hiɛ sɛɛ lɛ, abaaha kooloo lɛ, ni ji Satan maŋkwramɔŋ gbɛjianɔtoo ni yɔɔ shikpɔŋ lɛ nɔ lɛ, kɛ mlifu ayatutua Nyɔŋmɔ Maŋtsɛyeli lɛ. Akɛni shikpɔŋ lɛ nɔ maŋtsɛmɛi lɛ nyɛŋ ashɛ ŋwɛi hewɔ lɛ, amɛkɛ mlifu baatutua mɛi ni yɔɔ shikpɔŋ lɛ nɔ ni fĩɔ Nyɔŋmɔ Maŋtsɛyeli lɛ sɛɛ lɛ. Anyɛŋ atsĩ nɔ ni baajɛ mli kɛba lɛ naa. (Kpoj. 16:13-16; 17:12-14) Daniel tsɔɔ naagbee ta lɛ fã ko mli. (Nyɛkanea Daniel 2:44.) Abaakpata kooloo ni atsĩ etã yɛ Kpojiemɔ 13:1 lɛ, emaga lɛ, kɛ kooloo ni yɔɔ aklontoi enyɔ lɛ fɛɛ hiɛ.

19. Mɛɛ nɔmimaa wɔbaanyɛ wɔná, ni mɛni esa akɛ wɔfee amrɔ nɛɛ?

19 Yitso ni ji kpawo lɛ beaŋ wɔyɔɔ lɛ. Kooloo nɛɛ naŋ yitsei krokomɛi dɔŋŋ dani abaakpata ehiɛ. Beni abaakpata apasa jamɔ hiɛ lɛ, no mli lɛ Anglo-Amerika Jeŋ Hewalɛ lɛ baafee jeŋ hewalɛ ni yeɔ nɔ. Daniel kɛ Yohane gbalɛi lɛ fɛɛ kwraa eba mli. Wɔbaanyɛ wɔná nɔmimaa akɛ etsɛŋ ni abaakpata apasa jamɔ hiɛ, ni Harmagedon ta lɛ baafɛ. Nyɔŋmɔ etsɔ hiɛ eha ale saji nɛɛ. Ani wɔbaabo gbalɛ kɔkɔbɔi lɛ atoi? (2 Pet. 1:19) Amrɔ nɛɛ ji be ni esa akɛ wɔhi Yehowa masɛi, ní wɔfi e-Maŋtsɛyeli lɛ sɛɛ.—Kpoj. 14:6, 7.

[Shishigbɛ niŋmai]

^ kk. 3 Yɛ Biblia lɛ mli lɛ, bei pii lɛ yibɔ ni ji nyɔŋma lɛ tsɔɔ kuu ko ni eye emuu—ni yɛ sane nɛɛ mli lɛ, ekɔɔ nɔyelii fɛɛ ni jɛ Roma Nɔyeli lɛ mli kɛba lɛ ahe.

^ kk. 5 Eyɛ mli akɛ maji ni bɔ he enyɔ kɛmiiye nɔ akɛ jeŋ hewalɛ lɛ yɛ shihilɛ mli aŋkroaŋkroi kɛjɛ afi 1700 afii lɛ amli tɔ̃ɔ moŋ, shi Yohane wie bɔ ni amɛbaajie amɛhe kpo amɛha yɛ Nuŋtsɔ lɛ gbi lɛ shishijee mli lɛ he. Yɛ anɔkwale mli lɛ, ninai ni aŋma yɛ Kpojiemɔ wolo lɛ mli lɛ ba mli yɛ “Nuŋtsɔ lɛ gbi lɛ nɔ.” (Kpoj. 1:10) Jeŋ Ta I lɛ mli dani yitso ni ji kpawo lɛ bɔi nitsumɔ akɛ maji enyɔ ni efee ekome kɛmiiye nɔ akɛ jeŋ hewalɛ.

^ kk. 8 Daniel na bɔ ni maŋtsɛ nɛɛ baakpata nii ahiɛ waa yɛ nakai ta lɛ mli lɛ kɛtsɔ hiɛ, ni eŋma akɛ: “Ebaakpata nibii ahiɛ butuu.” (Dan. 8:24, Ga Biblia hee) Ákɛ nɔkwɛmɔnɔ lɛ, United States kpãta nibii ahiɛ gbeyeigbeyei yɛ gbɛ ni da waa nɔ beni eŋmɛɛ nuklea okplɛmii enyɔ he eshwie jeŋ hewalɛ ni bɔ he enyɔ lɛ henyɛlɔ ko nɔ lɛ.

^ kk. 13 Kwɛmɔ Kpojiemɔ—Enaagbee Kwraa lɛ Ebɛŋkɛ! wolo lɛ baafa 240, 241, 253 lɛ.

[Nikasemɔ lɛ he Sanebimɔi]

[Akrabatsa ni yɔɔ baafa 17]

NAMƐI FEƆ “MAŊTSƐMƐI NƐƐ FƐƐ” LƐ?

Gbalɛ ni yɔɔ Daniel 2:44 lɛ kɛɔ akɛ Nyɔŋmɔ Maŋtsɛyeli lɛ ‘baajwara maŋtsɛyelii nɛɛ fɛɛ wɔtsɔwɔtsɔ, ni eeekpata amɛhiɛ.’ Nakai gbalɛ lɛ kɔɔ maŋtsɛyelii ni amaga lɛ fãi srɔtoi lɛ feɔ amɛhe mfoniri lɛ ahe.

Ni adesai anɔyelii krokomɛi fɛɛ hu? Gbalɛ lɛ fã kroko ni yɔɔ Kpojiemɔ wolo lɛ mli lɛ haa wɔnaa nɔ ni atsɔɔ lɛ diɛŋtsɛ. Ehaa wɔnaa akɛ “maŋtsɛmɛi ni yɔɔ jeŋ muu lɛ fɛɛ lɛ” baabua amɛhe naa kɛte shi amɛshi Yehowa yɛ “Nyɔŋmɔ Ofe lɛ gbi wulu lɛ nɔ ta lɛ” mli. (Kpoj. 16:14; 19:19-21) No hewɔ lɛ, jeee nɔyelii ni amaga lɛ damɔ shi kɛha lɛ pɛ hiɛ abaakpata lɛ, shi moŋ abaakpata adesai anɔyelii krokomɛi fɛɛ hiɛ yɛ Harmagedon.