Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Sanebimɔi ni Jɛ Kanelɔi Adɛŋ

Sanebimɔi ni Jɛ Kanelɔi Adɛŋ

Sanebimɔi ni Jɛ Kanelɔi Adɛŋ

Mɛɛ gbɛ nɔ Yehowa mɛi krɔŋkrɔŋi loo enɔkwafoi lɛ agbele “jara wa yɛ ehiɛ”?

▪ Akɛ mumɔ tsirɛ lalatsɛ ko ni ela akɛ: “Yehowa mɛi krɔŋkrɔŋi lɛ [loo enɔkwafoi lɛ] agbele jara wa yɛ ehiɛ.” (Lala 116:15) Yehowa anɔkwa jálɔi lɛ fɛɛ ateŋ mɔ fɛɛ mɔ wala jara wa yɛ ehiɛ. Shi, shishinumɔ ni yɔɔ wiemɔi ni atsɛ yisɛɛ kɛjɛ Lala 116 lɛ asɛɛ lɛ yaa shɔŋŋ fe mɔ aŋkro ko gbele.

Kɛ́ mɔ ko miiha Kristofonyo ko ni egbo lɛ yarafeemɔ he wiemɔ lɛ, efeŋ nɔ ni sa akɛ ekɛ Lala 116:15 lɛ baato mɔ ni egbo lɛ he, kɛ́ eyɛ mli po akɛ mɔ lɛ gbo akɛ Yehowa anɔkwa tsulɔ. Mɛni hewɔ? Ejaakɛ lalatsɛ lɛ wiemɔi lɛ hiɛ shishinumɔ ni yaa shɔŋŋ fe no. Lalatsɛ lɛ wiemɔi lɛ tsɔɔ akɛ Nyɔŋmɔ eŋmɛŋ gbɛ ni enɔkwafoi lɛ fɛɛ agboi ejaakɛ amɛjara wa yɛ ehiɛ.—Kwɛmɔ Lala 72:14; 116:8.

Lala 116:15 lɛ woɔ wɔ shi akɛ, Yehowa eŋmɛŋ gbɛ ni abule enɔkwa tsuji lɛ ashishi akɛ kuu yɛ shikpɔŋ lɛ nɔ. Anɔkwa, odaseyelii babaoo yɛ ŋmɛnɛ ni tsɔɔ akɛ wɔfi shi shiŋŋ yɛ shihilɛi ni mli wawai kɛ yiwai amli; ni enɛ tsɔɔ faŋŋ akɛ Nyɔŋmɔ eŋmɛŋ gbɛ kɔkɔɔkɔ ni abule wɔshishi.

Akɛni anyɛɛɛ Yehowa hewalɛ sɛɛ mo aja, ni bɔ fɛɛ bɔ ni fee lɛ eyiŋtoo lɛ baaba mli hewɔ lɛ, eŋmɛŋ gbɛ ni abule wɔshishi akɛ kuu. Nyɔŋmɔ eŋmɛŋ gbɛ kɔkɔɔkɔ ni abule wɔshishi akɛ kuu, ejaakɛ no baanyɛ atsɔɔ akɛ ehenyɛlɔi lɛ yɛ hewalɛ kwraa fe lɛ! Kɛ́ eba lɛ nakai lɛ Yehowa yiŋtoo akɛ mɛi ni yeɔ lɛ anɔkwa lɛ baahi shikpɔŋ nɛɛ nɔ lɛ baŋ mli—ni no nyɛŋ aba lɛ nakai kɔkɔɔkɔ. (Yes. 45:18; 55:10, 11) Hɛɛ, kɛ́ adesai komɛi eshwɛɛɛ ni baajá lɛ yɛ mfonirifeemɔŋ sɔlemɔwe kpele lɛ kpo ni yɔɔ shikpɔŋ lɛ nɔ lɛ nɔ lɛ, kulɛ sɔɔmɔ krɔŋŋ ni akɛhaa Yehowa yɛ shikpɔŋ lɛ nɔ lɛ sɛɛ baafo! Kulɛ anaŋ mɛi ni akɛbaato “shikpɔŋ hee” lɛ shishi—adesai ni feɔ jalɛ nii ni baahi shikpɔŋ lɛ nɔ yɛ “ŋwɛi hee” lɛ shishi lɛ. (Kpoj. 21:1) Kɛfata he lɛ, kulɛ Kristo Afii Akpe Nɔyeli lɛ nyɛŋ aba mli kɛ́ eshishibii ni ji adesai bɛ shikpɔŋ lɛ nɔ.—Kpoj. 20:4, 5.

Kɛ́ Nyɔŋmɔ ŋmɛ gbɛ ni ehenyɛlɔi lɛ bule ewebii ni yɔɔ shikpɔŋ lɛ nɔ lɛ ashishi lɛ, kulɛ sane baaba egbɛhe lɛ kɛ bɔ ni ale lɛ aha lɛ he. Kɛ́ Yehowa ŋmɛ ehenyɛlɔi lɛ agbɛ ni amɛbule ewebii lɛ ashishi lɛ, kulɛ no baagbe egbɛhe akɛ Jeŋ Muu Fɛɛ Nɔyelɔ lɛ he guɔ. Kɛfata he lɛ, bulɛ ni Yehowa yɔɔ kɛha lɛ diɛŋtsɛ ehe kɛ egbɛ́i krɔŋkrɔŋ lɛ hewɔ lɛ, eŋmɛŋ gbɛ ni enɔkwafoi lɛ ahiɛ akpata akɛ kuu. Susumɔ enɛ hu he okwɛ: Akɛni “nɔ̃ sha bɛ” Nyɔŋmɔ hewɔ lɛ, bɔ fɛɛ bɔ ni fee lɛ, ebaabaa adesai ni yeɔ lɛ anɔkwa lɛ ayi akɛ kuu. (5 Mose 32:4; 1 Mose 18:25) Kɛfata he lɛ, kɛ́ Nyɔŋmɔ ŋmɛ gbɛ ni abule etsuji lɛ ashishi akɛ kuu lɛ, no kɛ nɔ ni e-Wiemɔ lɛ kɛɔ akɛ: “Yehowa gbɛ́i kpeteŋkpele lɛ hewɔ lɛ ekwaŋ emaŋ [loo ewebii] lɛ” kpaŋ gbee. (1 Sam. 12:22) Hɛɛ, “Yehowa shɛŋ emaŋ [loo ewebii] lɛ efɔŋ, ni ekwaŋ egbɛfaŋnɔ lɛ.”—Lala 94:14.

Kwɛ bɔ ni le ni wɔle akɛ abuleŋ Yehowa webii lɛ ashishi yɛ shikpɔŋ lɛ nɔ lɛ haa wɔtsui nyɔɔ wɔmli! Belɛ, nyɛhaa wɔnáa hekɛnɔfɔɔ yɛ Nyɔŋmɔ naashiwoo lɛ mli, ni wɔye lɛ anɔkwa daa, ejaakɛ ekɛɛ akɛ: “Tawuu nii ní asɔ̃ɔ ashiɔo lɛ eko eko nyɛŋ nɔ ko afee, ni lilɛi fɛɛ lilɛi ní aaate shi ní ekɛo akojo lɛ, ooobu lɛ fɔ́. Enɛ ji Yehowa tsuji lɛ agboshinii, kɛ amɛjalɛ ní jɛ midɛŋ.”—Yes. 54:17.

[Wiemɔ ni akɔ ni akɛmiitsu nii ni yɔɔ baafa 22]

Nyɔŋmɔ eŋmɛŋ gbɛ kɔkɔɔkɔ ni abule ewebii lɛ ashishi