Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Ohiɛ Sɔɔ Nyɔŋmɔ Nikeenii ni Ji Gbalashihilɛ Lɛ?

Ohiɛ Sɔɔ Nyɔŋmɔ Nikeenii ni Ji Gbalashihilɛ Lɛ?

 Ohiɛ Sɔɔ Nyɔŋmɔ Nikeenii ni Ji Gbalashihilɛ Lɛ?

“Eba akɛ Yehowa aaake nyɛ nii, ni nyɛteŋ mɔ fɛɛ mɔ aná hejɔɔmɔ yɛ ewu we.”—RUT 1:9, NW.

TAOMƆ HETOI LƐ:

Mɛni hewɔ wɔbaanyɛ wɔkɛɛ akɛ Nyɔŋmɔ tsuji ni hi shi yɛ blema lɛ hiɛ sɔ enikeenii ni ji gbalashihilɛ lɛ?

Te wɔfeɔ tɛŋŋ wɔleɔ akɛ mɛi ni wɔhalaa akɛ gbalashihilɛ mli hefatalɔi lɛ he hiaa Yehowa lɛ?

Mɛɛ Biblia mli ŋaawoo ni kɔɔ gbalashihilɛ he oto oyiŋ akɛ okɛbaatsu nii yɛ oshihilɛ mli?

1. Beni Adam nine shɛ eŋa lɛ nɔ lɛ, te efee enii eha tɛŋŋ?

“AGBƐNƐ enɛ ji wu ni jɛ miwui lɛ amli kɛ loo ni jɛ miheloo lɛ mli; aaatsɛ́ mɔ nɛ yoo, ejaakɛ nuu mli ajie lɛ kɛjɛ.” (1 Mose 2:23) Kwɛ bɔ ni Adam, klɛŋklɛŋ nuu lɛ, ná miishɛɛ eha akɛ ená ŋa! Ebɛ naakpɛɛ mɔ akɛ efo lalawiemɔ yɛ no hewɔ! Yehowa ha wɔ ni tsii nyɔ Adam nɔ, ni ejie Adam ŋmawui lɛ eko eŋɔbɔ yoo fɛfɛo nɛɛ. Sɛɛ mli lɛ, Adam wo yoo nɛɛ gbɛ́i akɛ Hawa. Nyɔŋmɔ fee amɛ ekome akɛ wu kɛ ŋa. Akɛni Yehowa jie Adam ŋmawui lɛ eko eŋɔbɔ Hawa hewɔ lɛ, Adam kɛ Hawa bɛŋkɛ amɛhe kpaakpa yɛ heloo gbɛfaŋ fe bɔ ni eji yɛ gbalashihilɛ mli hefatalɔi agbɛfaŋ ŋmɛnɛ.

2. Mɛni hewɔ hii kɛ yei náa suɔmɔ amɛhaa amɛhe lɛ?

2 Yehowa jɛ nilee mli edu nuu kɛ yoo teŋ suɔmɔ ewo adesai amli—suɔmɔ nɛɛ kpɛɔ wu ekpɛtɛɔ eŋa he. Wolo ko (The World Book Encyclopedia) kɛɛ akɛ: “Kɛ́ nuu kɛ yoo bote gbalashihilɛ mli lɛ, amɛgbɛkpamɔ ji akɛ nuu kɛ yoo teŋ suɔmɔ ni amɛná amɛha amɛhe lɛ baahi shi daa.” Yehowa webii lɛ ateŋ mɛi babaoo ená enɛ mli niiashikpamɔ.

AMƐNÁ BULƐ AMƐHA NIKEENII NI JI GBALASHIHILƐ LƐ

3. Te fee tɛŋŋ Isak ná ŋa?

3 Anɔkwafo Abraham ná bulɛ kpele eha gbalashihilɛ. No hewɔ lɛ, etsu etsuji lɛ ateŋ mɔ ni eda fe fɛɛ lɛ kɛtee Mesopotamia koni eyaŋɔ ŋa ebaha Isak. Etsulɔ nɛɛ sɔlemɔ lɛ wo yibii kpakpai. Nyɔŋmɔ gbeyeishelɔ Rebeka batsɔ Isak ŋa ni esumɔɔ, ni Rebeka ná gbɛfaŋnɔ yɛ gbɛjianɔ ni Yehowa eto ni ekɛaabaa Abraham seshi lɛ yi lɛ mli. (1 Mose 22:18; 24:12-14, 67) Esaaa akɛ enɛ haa wɔmuɔ sane naa akɛ mɔ ko baanyɛ aye abua mɛi ni amɛná gbalashihilɛ mli  hefatalɔi be mli ni abiko lɛ ni efee nakai, kɛ́ ehiɛɛɛ yiŋtoo fɔŋ po. Ŋmɛnɛ lɛ, mɛi babaoo sumɔɔ ni amɛ diɛŋtsɛ amɛhala amɛgbalashihilɛ mli hefatalɔi. Anɔkwa, Nyɔŋmɔ halaaa gbalashihilɛ mli hefatalɔi ehaaa mɛi, moŋ lɛ, kɛ́ Kristofonyo ko miisusu gbalashihilɛ kɛ shihilɛ mli nibii krokomɛi ahe ni esɔle kɛbi gbɛtsɔɔmɔ, ni eha Nyɔŋmɔ mumɔ lɛ kpala lɛ lɛ, Nyɔŋmɔ baatsɔɔ lɛ gbɛ.—Gal. 5:18, 25.

4, 5. Mɛni haa onáa nɔmimaa akɛ Shulam yoo lɛ kɛ tookwɛlɔ lɛ sumɔɔ amɛhe?

4 Yoo fɛfɛo ko ni jɛ Shulam yɛ blema Israel lɛ sumɔɔɔ ni mɛi nyɛɔ enɔ koni etsɔ Maŋtsɛ Salomo ŋamɛi babaoo lɛ ateŋ mɔ kome. Ekɛɛ akɛ: “Nyɛ Yerusalem biyei, mikã nyɛ kitã, akɛ nyɛkahosoa ni nyɛkatsĩɛa misuɔmɔ lɛ hĩɛ, kɛyashi be ni lɛ diɛŋtsɛ esumɔɔ!” (Sal. Lal. 8:4) Shulam yoo nɛɛ kɛ tookwɛlɔ ko ená suɔmɔ amɛha amɛhe momo. Ejɛ heshibaa mli ekɛɛ akɛ: “Mi lɛ Sharon fɔfɔi kɛ jɔi amli oflɔ́ fɔfɔi ji mi.” Tookwɛlɔ lɛ jɛ suɔmɔ mli eto he akɛ: “Bɔ ni oflɔ́ fɔfɔi yɔɔ yɛ ŋmei ateŋ lɛ, nakai mishienyɛ lɛ tamɔ yɛ bi yei lɛ ateŋ”! (Sal. Lal. 2:1, 2) Amɛsumɔɔ amɛhe lɛɛlɛŋ.

5 Akɛni Shulam yoo lɛ kɛ tookwɛlɔ lɛ sumɔɔ Nyɔŋmɔ fe nɔ fɛɛ nɔ hewɔ lɛ, amɛgbãla lɛ baasɔ waa. Anɔkwa, Shulam yoo lɛ kɛɛ esuɔlɔ ni ji tookwɛlɔ lɛ akɛ: “Ŋɔɔmi okpɛtɛ otsui nɔ tamɔ wolo naasɔomɔnɔ̃, ŋɔɔmi okpɛtɛ onine nɔ tamɔ wolo naasɔomɔnɔ̃. Ejaakɛ suɔmɔ he wa tamɔ gbele, awuŋãyeli hu tamɔ gbohiiaje, esrãmãŋi lɛ la osrãmãŋi kɛ Yehowa lalilɛi po [ejaakɛ eŋɔɔ ejɛ]! Nu babaoo nyɛɛɛ suɔmɔ agbe, ni fai nyɛɛɛ enɔ aha. Kɛji moɔ ko ŋɔ eshĩa nii fɛɛ ehã ní ekɛhe suɔmɔ lɛ, ŋmɔ abaaŋmɔ lɛ.” (Sal. Lal. 8:6, 7) Kɛ́ Yehowa tsulɔ ko miisusu gbalashihilɛ he lɛ, ani esaaa akɛ ekpaa nɔ ko ni tamɔ enɛ nɔŋŋ gbɛ kɛjɛɔ ehefatalɔ lɛ dɛŋ?

OYIŊKPƐƐ HE HIAA NYƆŊMƆ

6, 7. Te wɔfeɔ tɛŋŋ wɔleɔ akɛ mɔ ni wɔhalaa akɛ gbalashihilɛ mli hefatalɔ lɛ he hiaa Nyɔŋmɔ?

6 Mɔ ni obaahala akɛ ogbalashihilɛ mli hefatalɔ lɛ he hiaa Yehowa. Awo Israelbii lɛ kita yɛ Kanaanbii lɛ ahe akɛ: “Okɛ amɛ akaye yoowɛɛ; kaaŋɔ obi yoo oha ebi nuu gbãla, ni kaawɛ ebi yoo oha obi nuu. Ejaakɛ amɛaaha obii lɛ akpale yɛ misɛɛ, ní amɛyasɔmɔ nyɔŋmɔi krokomɛi, ni Yehowa mli aaawo nyɛ la, ni eeekpatã nyɛhiɛ oya.” (5 Mose 7:3, 4) Afii ohai abɔ sɛɛ lɛ, osɔfo Ezra jaje akɛ: “Nyɛtɔ̃, ejaakɛ nyɛyawɛ maŋsɛɛ yei, ní nyɛkɛha Israel fɔyeli lɛ afá.” (Ezra 10:10) Bɔfo Paulo hu kɛɛ enyɛmimɛi Kristofoi lɛ akɛ: ‘Yoo lɛ, gbii abɔ ni ewu hiɛ kã nɛɛ, akɛ mla efi lɛ; shi kɛji ewu lɛ gbo lɛ, eyɛ hegbɛ akɛ eeegbã mɔ ni esumɔɔ, shi ja afee yɛ Nuŋtsɔ lɛ mli.’1 Kor. 7:39.

7 Kɛ́ Yehowa tsulɔ ni ejɔɔ ehe nɔ eha lɛ lɛ kɛ mɔ ko ni heee yeee bote gbalashihilɛ mli lɛ, eji Nyɔŋmɔ nɔ toigbele. Ezra beaŋ Israelbii lɛ gbo Nyɔŋmɔ nɔ toi beni ‘amɛyawɛ maŋsɛɛ yei’ lɛ, ni esaaa akɛ mɔ ko kuɔ ehiɛ eshwieɔ Ŋmalɛ mli wiemɔi ni mli kã shi faŋŋ lɛ anɔ. (Ezra 10:10; 2 Kor. 6:14, 15) Anyɛŋ akɛɛ akɛ, Kristofonyo ni kɛ mɔ ko ni heee yeee (loo mɔ ni abaptisiko lɛ) ebote gbalashihilɛ mli lɛ feɔ nɔkwɛmɔnɔ kpakpa, ni enifeemɔ lɛ hu tsɔɔ akɛ ebɛ bulɛ kɛha Nyɔŋmɔ nikeenii ni ji gbalashihilɛ lɛ. Kɛ́ Kristofonyo ko ni abaptisi lɛ kɛ mɔ ko ni abaptisiko lɛ bote gbalashihilɛ mli lɛ, no baaha hegbɛi komɛi ni eyɔɔ yɛ Nyɔŋmɔ webii lɛ ateŋ lɛ aŋmɛɛ lɛ. Kɛfata he lɛ, kɛ́ mɔ lɛ shwako ehe yɛ etoigbele lɛ he lɛ, nilee bɛ mli akɛ eeebi ni Yehowa ajɔɔ lɛ.

YEHOWA JI MƆ NI SA AKƐ ETSƆƆ WƆ GBƐ

8. Tsɔɔmɔ nɔ hewɔ ni esa akɛ wɔkɛ gbalashihilɛ he gbɛtsɔɔmɔ ni Nyɔŋmɔ kɛha lɛ atsu nii.

8 Tsɔnefeelɔ fɛɛ tsɔnefeelɔ le bɔ ni tsɔne  ni efee lɛ tsuɔ ni ehaa. Lɛ ji mɔ ni baanyɛ ekɛ gbɛtsɔɔmɔ aha yɛ bɔ ni esa akɛ atsara tsɔne lɛ koni etsu nii jogbaŋŋ. Kɛ́ wɔku wɔhiɛ wɔshwie gbɛtsɔɔmɔi lɛ anɔ ni wɔtsara tsɔne lɛ bɔ ni wɔsumɔɔ hu? Kɛ́ tsɔne lɛ aaatsu nii po lɛ, etsuŋ lɛ jogbaŋŋ, ni nɔ ni baajɛ mli kɛba lɛ baanyɛ afe oshara. Ojogbaŋŋ, ja wɔkɛ gbɛtsɔɔmɔi ni Yehowa, gbalashihilɛ Shishitolɔ lɛ kɛha lɛ etsu nii dani wɔgbãla lɛ baasɔ.

9. Mɛni hewɔ wɔbaanyɛ wɔkɛɛ akɛ, kɛ́ mɔ ko he fee shoo lɛ, Yehowa nuɔ shishi, ni akɛ eesumɔ ni gbalashihilɛ mli hefatalɔi aná miishɛɛ lɛ?

9 Yehowa le adesai kɛ gbalashihilɛ he nɔ fɛɛ nɔ. Edu bɔlɛnamɔ henumɔ ewo adesai amli koni ‘amɛfɔ ni amɛyi afá.’ (1 Mose 1:28) Kɛ́ mɔ ko he fee shoo lɛ, Nyɔŋmɔ nuɔ bɔ ni mɔ lɛ nuɔ he ehaa lɛ shishi, ejaakɛ dani ebaabɔ klɛŋklɛŋ yoo lɛ, ekɛɛ akɛ: “Ehiii akɛ gbɔmɔ lɛ kome hiɔ shi; mafee hefatalɔ ko ni sa lɛ maha lɛ.” (1 Mose 2:18) Kɛfata he lɛ, Yehowa miisumɔ ni gbalashihilɛ mli hefatalɔi aná miishɛɛ.—Nyɛkanea Abɛi 5:15-18.

10. Mɛɛ anɔkwa saji esa akɛ ekudɔ bɔlɛnamɔ ni yaa nɔ yɛ gbalashihilɛ mli hefatalɔi ni ji Kristofoi lɛ ateŋ?

10 Akɛni wɔji eshafeelɔ Adam shwiei hewɔ lɛ, afɔɔ wɔ yɛ esha mli ni wɔyeee emuu, ni no hewɔ lɛ, gbãla ko bɛ ŋmɛnɛ ni yeɔ emuu. Shi, kɛ́ Yehowa tsuji kɛ Nyɔŋmɔ Wiemɔ lɛ tsu nii lɛ, amɛbaanyɛ amɛná anɔkwa miishɛɛ yɛ gbalashihilɛ mli. Akɛ nɔkwɛmɔnɔ lɛ, susumɔ gbalashihilɛ mli bɔlɛnamɔ he ŋaawoo ni mli kã shi faŋŋ ni Paulo kɛha lɛ he okwɛ. (Nyɛkanea 1 Korintobii 7:1-5.) Ŋmalɛi lɛ etsɔɔɔ akɛ biiafɔmɔ pɛ hewɔ gbalashihilɛ mli hefatalɔi kɛ amɛhe náa bɔlɛ. Nifeemɔ ni tamɔ nɛkɛ lɛ hu tsuɔ gbalashihilɛ mli hefatalɔi lɛ ahenumɔŋ kɛ gbɔmɔtsoŋ hiamɔ nii hu ahe nii. Shi, ekã shi faŋŋ akɛ, bɔlɛnamɔ mli nifeemɔi ni yɔɔ nyaŋemɔ lɛ esaaa Nyɔŋmɔ hiɛ. Esa akɛ wumɛi kɛ ŋamɛi Kristofoi kɛ mɔhesusumɔ atsu amɛshihilɛ mli nifeemɔ ni he hiaa nɛɛ he nii koni no aha amɛjie suɔmɔ krɔŋŋ kpo amɛtsɔɔ amɛhe. Kɛfata he lɛ, esa akɛ amɛtsi amɛhe kɛjɛ nifeemɔi ni esaaa Yehowa hiɛ lɛ ahe.

11. Akɛni Rut fee nibii ni saa Yehowa hiɛ lɛ hewɔ lɛ, te ajɔɔ lɛ aha tɛŋŋ?

11 Esa akɛ gbãla mli ayi kɛ miishɛɛ, jeee awerɛho kɛ tɔlɛ. He titri ni esa akɛ toiŋjɔlɛ ahi, ni mɛi ahi shi shweshweeshwe ji Kristofoi ashĩai. Susumɔ nɔ ko ni ba aaafee afii 3,000 nɛ lɛ he okwɛ; no mli lɛ, Naomi kɛ eshayeimɛi, Orpa kɛ Rut, nyiɛ gbɛ kɛjɛ Moab kɛmiiya Yuda. Naomi ni egbɔ lɛ wo yei nɛɛ hewalɛ koni amɛku amɛsɛɛ amɛya amɛmaŋbii  lɛ aŋɔɔ. Moab yoo Rut kpɛtɛ Naomi he, eye anɔkwa Nyɔŋmɔ lɛ anɔkwa, ni awo Rut shi akɛ, ‘Yehowa, mɔ fiji ashishi abo ni ebaa lɛ baato lɛ najiaŋ shishiishi.’ (Rut 1:9; 2:12) Rut ná bulɛ kpele kɛha Nyɔŋmɔ nikeenii ni ji gbalashihilɛ lɛ, ni etsɔ nuu onukpa Boaz ni ji Yehowa jálɔ anɔkwafo lɛ ŋa. Yɛ Nyɔŋmɔ jeŋ hee lɛ mli lɛ, kɛ́ atee Rut shi yɛ shikpɔŋ lɛ nɔ lɛ, ni ená ele akɛ ewekutɔkpaa lɛ mli ajɛ afɔ Yesu Kristo lɛ, ebaaná miishɛɛ naakpa. (Mat. 1:1, 5, 6; Luka 3:23, 32) Mɛɛ jɔɔmɔi po Rut ná nɛkɛ akɛni efee nibii ni saa Yehowa hiɛ lɛ hewɔ!

ŊAAWOO KPAKPA NI HAA GBÃLA YEƆ OMANYE

12. Nɛgbɛ abaanyɛ aná gbalashihilɛ he ŋaawoo kpakpa yɛ?

12 Gbalashihilɛ Shishitolɔ lɛ kɛɔ wɔ nibii ni baaha gbãla aye omanye. Adesa ko bɛ ni le nii tamɔ lɛ. Biblia mli ŋaawoi lɛ ja ni amɛbe hooo, no hewɔ lɛ kɛ́ mɔ ko miiwo ŋaa yɛ gbalashihilɛ he lɛ, esa akɛ eha edamɔ shishitoo mlai ni yɔɔ Ŋmalɛi lɛ amli lɛ anɔ. Akɛ nɔkwɛmɔnɔ lɛ, akɛ mumɔ tsirɛ bɔfo Paulo ni eŋma akɛ: “Sa akɛ . . . nyɛteŋ mɔ fɛɛ mɔ asumɔ lɛ diɛŋtsɛ eŋa nakai, tamɔ lɛ diɛŋtsɛ ehe; koni ŋa lɛ hu ashé ewu.” (Efe. 5:33) Kristofoi ni edara yɛ mumɔŋ lɛ baanyɛ anu Biblia mli ŋaawoo ni mli kã shi faŋŋ nɛɛ shishi. Sanebimɔ lɛ moŋ ji akɛ, Ani amɛkɛ Yehowa Wiemɔ lɛ baatsu nii? Kɛ́ amɛhiɛ sɔɔ nikeenii ni ji gbalashihilɛ lɛ lɛɛlɛŋ lɛ, amɛbaafee nakai. *

13. Kɛ́ akɛ ŋaawoo ni yɔɔ 1 Petro 3:7 lɛ tsuuu nii lɛ, mɛni baanyɛ ajɛ mli kɛba?

13 Esa akɛ wu ni ji Kristofonyo lɛ kɛ enifeemɔi atsɔɔ akɛ esumɔɔ eŋa. Bɔfo Petro ŋma akɛ: “Nakai nɔŋŋ kɛ̃ nyɛ wumɛi, nyɛkɛ amɛ ahia shi yɛ nilee naa, ni nyɛkɛ woo awoa yoo akɛ nɔ ni he waaa tuutu ko, akɛni amɛkɛ nyɛ fɛɛ ji wala duromɔ lɛ wɔfasei lɛ, koni akatsimɔ nyɛsɔlemɔi lɛ agbɛ.” (1 Pet. 3:7) Kɛ́ wu ko kɛ Yehowa ŋaawoo tsuuu nii lɛ, abaanyɛ atsimɔ esɔlemɔi agbɛ. Ebaanyɛ esa amɛ kɛ Yehowa teŋ wekukpaa lɛ he, ni ebaanyɛ eha amɛhao waa, amɛkɛ amɛhe ataa saji anaa, ni amɛfee amɛhe niseniianii.

14. Mɛɛ hewalɛ ŋa ni yɔɔ suɔmɔ lɛ náa yɛ eweku nɔ?

14 Ŋa ni haa Yehowa Wiemɔ lɛ kɛ emumɔ krɔŋkrɔŋ lɛ tsɔɔ lɛ gbɛ lɛ baanyɛ afee babaoo koni eshĩa afee shweshweeshwe, ni miishɛɛ ahi mli. Ekã shi faŋŋ akɛ, wu ni sheɔ Nyɔŋmɔ gbeyei lɛ baasumɔ eŋa ni ebaabu ehe yɛ gbɔmɔtsoŋ kɛ mumɔŋ fɛɛ. Ŋa ni ji Kristofonyo lɛ miisumɔ ni ajie suɔmɔ kpo atsɔɔ lɛ, ni no biɔ ni efee nibii ni baaha asumɔ lɛ jogbaŋŋ. Abɛi 14:1 (Ga Biblia hee) lɛ kɛɔ akɛ: “Yoo nilelɔ kpɛɔ eshĩa; shi yoo kwashia jwaa eshĩa.” Ŋa nilelɔ ni yɔɔ suɔmɔ lɛ yeɔ ebuaa babaoo koni eweku lɛ ahi shi shweshweeshwe, ni miishɛɛ ahi mli. Kɛfata he lɛ, etsɔɔ akɛ ehiɛ sɔɔ Nyɔŋmɔ nikeenii ni ji gbalashihilɛ lɛ lɛɛlɛŋ.

15. Mɛɛ ŋaawoo yɔɔ Efesobii 5:22-25 lɛ?

15 Kɛ́ wumɛi kɛ ŋamɛi kase bɔ ni Yesu kɛ esafo lɛ yeɔ ehaa, ni amɛkɛtsu nii yɛ amɛgbalashihilɛi lɛ amli lɛ, no tsɔɔ akɛ amɛyɛ bulɛ kɛha Nyɔŋmɔ nikeenii ni ji  gbalashihilɛ lɛ. (Nyɛkanea Efesobii 5:22-25.) Kwɛ bɔ ni Yehowa jɔɔ wumɛi kɛ ŋamɛi ni jieɔ suɔmɔ krɔŋŋ kpo amɛtsɔɔ amɛhe, ni amɛhaaa henɔwomɔ, he ní akɛwieee ni ji gbekɛbii anifeemɔ, loo sui gbohii krokomɛi afite amɛgbãla lɛ!

AKAHA MƆ KO GBALA AMƐMLI

16. Mɛni hewɔ Kristofoi komɛi yaa nɔ amɛyeɔ oshija lɛ?

16 Eyɛ mli akɛ mɛi babaoo toɔ amɛyiŋ akɛ amɛbaabote gbalashihilɛ mli gbi ko kɛ̃ yɛ amɛshihilɛ mli moŋ, shi Yehowa tsuji lɛ ateŋ mɛi komɛi yaa nɔ amɛyeɔ oshija akɛni amɛnáko hefatalɔi ni baasa amɛ kɛ Yehowa hiɛ lɛ hewɔ. Mɛi krokomɛi yɛ ni akɛ Nyɔŋmɔ nikeenii ni ji oshijayeli lɛ eduro amɛ, ni no hewɔ lɛ amɛnyɛɔ amɛkɛ amɛhe woɔ Yehowa sɔɔmɔ mli vii ni amɛnáaa naagbai ni mɛi ni ebote gbalashihilɛ mli lɛ náa lɛ eko. Anɔkwa, esa akɛ aye oshija bɔ ni kɛ Yehowa taomɔ nii lɛ baakpã gbee.—Mat. 19:10-12; 1 Kor. 7:1, 6, 7, 17.

17. (a) Mɛɛ Yesu wiemɔi ni kɔɔ gbalashihilɛ he esa akɛ wɔha ehi wɔjwɛŋmɔŋ? (b) Kɛ́ Kristofonyo ko hiɛ kɔ̃ mɔ ko ŋa loo wu nɔ lɛ, mɛni esa akɛ efee amrɔ nɔŋŋ?

17 Wɔji oshijafoi jio, wɔbote gbalashihilɛ mli jio, esa akɛ wɔteŋ mɔ fɛɛ mɔ aha Yesu wiemɔi nɛɛ ahi ejwɛŋmɔŋ akɛ: “Ani nyɛkaneko akɛ, [Nyɔŋmɔ] mɔ ni bɔ gbɔmɔ yɛ shishijee lɛŋ lɛ, “nuu kɛ yoo ebɔ amɛ”? Ni ekɛɛ: “Enɛ hewɔ ni nuu aaashĩ etsɛ kɛ enyɛ ni eeekpɛtɛ eŋa he, ni amɛyi enyɔ lɛ fɛɛ amɛaatsɔ heloo kome lɛ.” Belɛ agbɛnɛ amɛjeee mɛi enyɔ dɔŋŋ, shi moŋ heloo kome; no hewɔ lɛ, nɔ ni Nyɔŋmɔ eŋɔtsa lɛ, akaha gbɔmɔ miigbala mli.” (Mat. 19:4-6) Kɛ́ mɔ ko hiɛ kɔ̃ mɔ ko ŋa loo wu nɔ lɛ, esha ji no. (5 Mose 5:21) Kɛ́ Kristofonyo ko hiɛ kɔ̃ mɔ ko ŋa loo wu nɔ lɛ, esa akɛ amrɔ nɔŋŋ lɛ ejie nakai shwelɛ lɛ kɛjɛ etsuiŋ, kɛ́ nakai feemɔ po baaha epiŋ waa yɛ henumɔŋ, akɛni eŋmɛ gbɛ ni pɛsɛmkunya shwelɛi ená enɔ hewalɛ lɛ hewɔ. (Mat. 5:27-30) Ehe hiaa waa ni ajaje shwelɛi ni tamɔ nakai, ni aye esha he shwelɛi ni yɔɔ tsui ni yeɔ kutumpɔo lɛ mli lɛ nɔ.—Yer. 17:9.

18. Te osusuɔ akɛ esa akɛ wɔna Nyɔŋmɔ nikeenii ni ji gbalashihilɛ lɛ wɔha tɛŋŋ?

18 Mɛi ni leee Yehowa Nyɔŋmɔ kɛ enikeenii ni yɔɔ naakpɛɛ, ni ji gbalashihilɛ, lɛ he nɔ ko loo mɛi ni le enɛɛmɛi ahe nɔ ko fioo lɛ po ateŋ mɛi babaoo ejie bulɛ kpo amɛtsɔɔ gbalashihilɛ yɛ gbɛ ko nɔ. Enyiɛ nɔŋŋ ni wɔ mɛi ni wɔjɔɔ wɔhe nɔ wɔha Yehowa ni ji “miishɛɛ Nyɔŋmɔ lɛ,” naŋ nibii ni ekɛduroɔ wɔ lɛ fɛɛ he miishɛɛ ni wɔkɛ wɔnifeemɔi atsɔɔ akɛ wɔhiɛ sɔɔ Nyɔŋmɔ nikeenii ni ji gbalashihilɛ lɛ lɛɛlɛŋ!—1 Tim. 1:11, NW.

[Shishigbɛ niŋmai]

^ kk. 12 Kɛ́ ootao ole gbalashihilɛ he saji fitsofitso lɛ, kwɛmɔ ‘Nyɛhia Nyɔŋmɔ Suɔmɔ lɛ Mli’ wolo lɛ yitso 1011 lɛ.

[Nikasemɔ lɛ he Sanebimɔi]

[Wiemɔ ni akɔ ni akɛmiitsu nii ni yɔɔ baafa 6]

Gbãla kpakpa woɔ Yehowa hiɛ nyam ni ebaanyɛ eha weku lɛ mli bii lɛ fɛɛ aná miishɛɛ naakpa

[Mfoniri ni yɔɔ baafa 5]

Rut hiɛ sɔ Nyɔŋmɔ nikeenii ni ji gbalashihilɛ lɛ

[Mfoniri ni yɔɔ baafa 7]

Ani okɛ onifeemɔi tsɔɔ akɛ ohiɛ sɔɔ Yehowa nikeenii ni ji gbalashihilɛ lɛ lɛɛlɛŋ?