Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

“Wajemɔ Ohe ni Ofee Ekãa Jogbaŋŋ”

“Wajemɔ Ohe ni Ofee Ekãa Jogbaŋŋ”

 “Wajemɔ Ohe ni Ofee Ekãa Jogbaŋŋ”

“Wajemɔ ohe ni ofee ekãa jogbaŋŋ . . . Yehowa, o-Nyɔŋmɔ lɛ, fĩ osɛɛ.”—YOSH. 1:7-9.

TE OBAAHA HETOO OHA TƐŊŊ?

Mɛɛ gbɛi anɔ Henok kɛ Noa jie ekãa kpo?

Mɛɛ gbɛi anɔ yei komɛi ni hi shi yɛ blema lɛ jie hemɔkɛyeli kɛ ekãa ni sa kadimɔ waa kpo?

Mɛɛ ekãa he nɔkwɛmɔnɔ gbekɛbii komɛi fee ní onyaa he waa?

1, 2. (a) Bei komɛi lɛ mɛni ebiɔ ni mɔ aná bɔni afee ni eya nɔ efee nɔ ni ja? (b) Mɛni he wɔbaasusu yɛ nikasemɔ nɛɛ mli?

KƐ́ AKƐƐ mɔ ko ji gbeyeilɔ, ŋmiŋmitsɛ, loo yakagbɔmɔ lɛ, no tsɔɔ akɛ ebɛ ekãa. Ekolɛ wɔbaasusu mɔ ko ni yɔɔ ekãa lɛ he akɛ eyɛ hewalɛ, esheee nɔ ko gbeyei, ni ŋmiŋmi mɔɔɔ lɛ. Shi bei komɛi lɛ, ja wɔyɛ ekãa dani wɔbaanyɛ wɔya nɔ wɔfee nɔ ni ja daa yɛ shihilɛ mli.

2 Mɛi komɛi ni Biblia lɛ wie amɛhe lɛ fee ekãa yɛ shihilɛi ni jaraa po amli. Mɛi krokomɛi hu fee ekãa yɛ shihilɛi ni Yehowa tsuji fɛɛ kɛkpeɔ lɛ amli. Mɛni wɔbaanyɛ wɔkase kɛjɛ mɛi ni Biblia lɛ wie amɛhe akɛ amɛfee ekãa lɛ adɛŋ? Te wɔɔfee tɛŋŋ wɔfee ekãa?

ODASEFOI NI FEE EKÃA YƐ JEŊ FƆŊ KO MLI

3. Mɛni Henok gba yɛ mɛi fɔji lɛ ahe?

3 Ebi ni mɔ aná ekãa dani enyɛ ehi mɛi fɔji ni tsɔ Noa Nu Afua lɛ hiɛ lɛ ateŋ akɛ Yehowa odasefonyo. Kɛlɛ, Henok ni ji “mɔ kpawo kɛjɛ Adam nɔ” lɛ kɛ ekãa gba akɛ: “Naa, Nuŋtsɔ [Yehowa] miiba kɛ ekrɔŋkrɔŋbii akpei-nyɔŋmanyɔŋmai abɔ, ní ebakojo mɛi fɛɛ, ni eeekã nɔshafeelɔi lɛ yɛ amɛnishai anitsumɔi fɛɛ ni amɛtsu lɛ kɛ wiemɔi wawaai fɛɛ ni eshafeelɔi Nyɔŋmɔ kwalɔi ewie yɛ ehe lɛ hewɔ.” (Yuda 14, 15) Henok yɛ hemɔkɛyeli ni mli wa akɛ bɔ fɛɛ bɔ ni fee lɛ gbalɛ nɛɛ baaba mli. Ni lɛɛlɛŋ hu, Nu Afua lɛ kpata mɛi fɔji lɛ ahiɛ!

4. Noa “kɛ Nyɔŋmɔ nyiɛ” yɛ mɛɛ shihilɛi fɛɛ sɛɛ?

4 Nu Afua lɛ ba yɛ afi 2370 D.Ŋ.B., nɔ ni fe afii 650 yɛ Henok gbele sɛɛ. Yɛ nɛkɛ be nɛɛ mli lɛ, afɔ́ Noa, eto weku shishi, ni ekɛ ebihii lɛ kpɛ adeka. Ni bɔfoi fɔ̃ji ŋɔ adesai agbɔmɔtsei, amɛkɛ yei ni he yɔɔ fɛo ná  bɔlɛ, ni amɛfɔfɔɔ oblaŋi. Kɛfata he lɛ, adesai anɔfɔŋfeemɔ bafa, ni yiwalɛ bayi shikpɔŋ lɛ nɔ obɔ. (1 Mose 6:1-5, 9, 11) Yɛ shihilɛi nɛɛ fɛɛ sɛɛ lɛ, “Noa kɛ Nyɔŋmɔ nyiɛ,” ni ekɛ ekãa ye odase akɛ “jalɛ shiɛlɔ.” (Nyɛkanea 2 Petro 2:4, 5.) Ekãa ni tamɔ nakai nɔŋŋ he miihia wɔ yɛ naagbee gbii nɛɛ amli.

AMƐJIE HEMƆKƐYELI KƐ EKÃA KPO

5. Mɛɛ gbɛ nɔ Mose tsɔ ejie hemɔkɛyeli kɛ ekãa kpo?

5 Hemɔkɛyeli kɛ ekãa ni Mose jie lɛ kpo lɛ nɔ bɛ. (Heb. 11:24-27) Kɛjɛ afi 1513 kɛyashi afi 1473 D.Ŋ.B. lɛ, Nyɔŋmɔ kɛ lɛ tsu nii kɛjie Israelbii lɛ kɛjɛ Mizraim, ni ekudɔ amɛ kɛtsɔ ŋa lɛ nɔ. Mose nu he akɛ jeee ehe nitsumɔ kwraa nɛ, shi emɔ mli. (2 Mose 6:12) Ekɛ enyɛmi nuu Aaron tee Mizraim nɔyelɔ Farao ni yitsoŋ wa lɛ ŋɔɔ shii abɔ, ni amɛkɛ ekãa yajaje Haomɔi Nyɔŋma ni Yehowa tsɔ nɔ eha Mizraimbii lɛ awɔji lɛ ahiɛ shwie shi, ni ekɛhere Ewebii lɛ ayiwala lɛ. (2 Mose yitsei 7-12) Mose jie hemɔkɛyeli kɛ ekãa kpo akɛni Nyɔŋmɔ tee nɔ efĩ esɛɛ lɛ hewɔ, ni wɔ hu wɔfeɔ nakai nɔŋŋ.—5 Mose 33:27.

6. Kɛ́ nɔyelɔi miita wɔdaaŋ lɛ, te wɔɔfee tɛŋŋ wɔkɛ ekãa aye odase lɛ?

6 Esa akɛ wɔná ekãa tamɔ Mose, ejaakɛ Yesu wie akɛ: “Lumɛi kɛ maŋtsɛmɛi ahiɛ tete po akɛ nyɛ aaatee yɛ mihewɔ, koni aŋɔye amɛ kɛ jeŋmaji lɛ odase. Shi kɛ́ amɛŋɔ nyɛ kɛtee lɛ, nyɛkahaoa nyɛhe yɛ bɔ ni aloo nɔ ni nyɛaakɛɛ hewɔ; shi aaaŋɔ nɔ ni nyɛaawie aha nyɛ yɛ nakai ŋmɛlɛtswaa lɛ mli nɔŋŋ. Ejaakɛ jeee nyɛ ji mɛi ni wieɔ lɛ, shi moŋ nyɛtsɛ lɛ mumɔ lɛ wieɔ yɛ nyɛmli.” (Mat. 10:18-20) Kɛ́ nɔyelɔi miita wɔdaaŋ lɛ, Yehowa mumɔ lɛ baaye abua wɔ koni wɔjɛ bulɛ mli wɔkɛ hemɔkɛyeli kɛ ekãa aye amɛ odase.—Nyɛkanea Luka 12:11, 12.

7. Mɛni ha Yoshua fee ekãa ni eye omanye lɛ?

7 Nyɔŋmɔ Mla lɛ ni Yoshua, ni ji Mose sɛɛyelɔ lɛ kase daa lɛ waje ehemɔkɛyeli lɛ, ni eha ená ekãa. Beni shɛɔ afi 1473 D.Ŋ.B. lɛ, Israelbii lɛ efee klalo akɛ amɛbaabote Shiwoo Shikpɔŋ lɛ nɔ. Nyɔŋmɔ kɛɛ Yoshua akɛ: “Wajemɔ ohe ni ofee ekãa jogbaŋŋ.” Kɛ́ Yoshua ye Mla lɛ nɔ lɛ, ebaafee nɔbatsɛ kɛ hiɛshikalɔ. Nyɔŋmɔ kɛɛ lɛ akɛ: “Kaaha ŋmiŋmi miimɔo, ni asaŋ otsui akafã; ejaakɛ Yehowa, o-Nyɔŋmɔ lɛ, fĩ osɛɛ yɛ he fɛɛ he ni oyaa.” (Yosh. 1:7-9) Kwɛ bɔ ni wiemɔi nɛɛ baawaje Yoshua aha! Ni lɛɛlɛŋ hu Nyɔŋmɔ fĩ esɛɛ, ejaakɛ yɛ afii ekpaa pɛ mli—beni shɛɔ afi 1467 D.Ŋ.B. lɛ, amɛkpata maji ni yɔɔ Shiwoo Shikpɔŋ lɛ nɔ lɛ ahiɛ.

YEI NI YƆƆ EKÃA NI FĨ SHI YƐ NYƆŊMƆJAMƆ MLI

8. Mɛɛ nɔkwɛmɔnɔ Rahab fee yɛ hemɔkɛyeli kɛ ekãa gbɛfaŋ?

8 Yɛ afii ohai abɔ ni eho lɛ amli lɛ, yei babaoo ni yɔɔ ekãa efĩ shi akɛ Yehowa  jálɔi. Ákɛ nɔkwɛmɔnɔ lɛ, Rahab ni ji yoo ajwamaŋ ni jɛ Yeriko lɛ hé Nyɔŋmɔ nɔ eye, ená ekãa ni ekɛ shikpálɔi enyɔ ni Yoshua tsu lɛ yatee, ni eha maŋtsɛ lɛ sapatei lɛ wó he kroko gbɛ amɛtere. Abaa lɛ kɛ ewe lɛ fɛɛ yi beni Israelbii lɛ ŋɔ Yeriko lɛ. Rahab kpa ejwamaŋbɔɔ lɛ, ekɛ anɔkwayeli já Yehowa, ni ebatsɔ Mesia lɛ blemanyɛ. (Yosh. 2:1-6; 6:22, 23; Mat. 1:1, 5) Ajɔɔ lɛ yɛ hemɔkɛyeli kɛ ekãa ni ejie lɛ kpo lɛ hewɔ!

9. Mɛɛ gbɛ nɔ Debora, Barak, kɛ Yael fee ekãa?

9 Yɛ Yoshua gbele sɛɛ aaafee afi 1450 D.Ŋ.B. lɛ, kojolɔi baye Israel nɔ. Beni Maŋtsɛ Yabin ni eji Kanaannyo lɛ kɛ afii 20 ewa Israelbii lɛ ayi dɛŋdɛŋ sɛɛ lɛ, Nyɔŋmɔ ha gbalɔyoo Debora kanya Kojolɔ Barak koni efee sane lɛ he nɔ ko. Barak bua hii 10,000 naa yɛ Tabor Gɔŋ lɛ nɔ, ni esaa ehe koni ekɛ Yabin tatsɛ Sisera, ní kɛ etabilɔi kɛ dade shwiilii 900 lɛ ekpeleke shi kɛtee Kishon jɔɔ lɛŋ lɛ ayawu. Beni Israelbii lɛ kpeleke shi kɛtee jɔɔ lɛŋ lɛ, Nyɔŋmɔ ha faa ko tue trukaa ni ebawo tagbamɔhe lɛ ŋmɔtɔ, ni no ha Kanaanbii lɛ ashwiilii lɛ fũ. Barak hii lɛ ye kunim, ni “Sisera ta lɛ fɛɛ nyɔnyɔɔ yɛ klante naa.” Sisera diɛŋtsɛ yaba abo yɛ Yael buu lɛ mli, shi Yael gbe lɛ beni wɔ nyɔ enɔ lɛ. Taakɛ Debora gba lɛ, akɛ kunimyeli nɛɛ mli “anunyam lɛ” ha yoo, ni ji Yael. Akɛni Debora, Barak, kɛ Yael fee ekãa hewɔ lɛ, Israel “shikpɔŋ lɛ nɔ jɔ afii nyɔŋmai ejwɛ.” (Koj. 4:1-9, 14-22; 5:20, 21, 31) Hii kɛ yei ni jáa Nyɔŋmɔ lɛ babaoo ejie hemɔkɛyeli kɛ ekãa ni tamɔ nakai kpo.

WƆWIEMƆI BAANYƐ AKANYA MƐI KROKOMƐI

10. Mɛni hewɔ abaanyɛ akɛɛ akɛ wɔwiemɔi baanyɛ akanya mɛi krokomɛi lɛ?

10 Wɔwiemɔi baanyɛ awo Yehowa jálɔi krokomɛi ekãa. Yɛ afi 1000 D.Ŋ.B. afii lɛ amli lɛ, Maŋtsɛ David kɛɛ ebi Salomo akɛ: “Wajemɔ ohe ní ofee ekãa; kaashe gbeyei ni otsui akafã! ejaakɛ Yehowa Nyɔŋmɔ, ni ji mi-Nyɔŋmɔ lɛ, kɛo yɛ; ekwaŋo ni esaa eshiŋo kɛyashi beyinɔ ní ooogbe Yehowa we lɛ sɔɔmɔ lɛ he nitsumɔ lɛ fɛɛ naa.” (1 Kron. 28:20) Salomo fee ekãa ni ema Yehowa sɔlemɔtsu kpeteŋkpele lɛ yɛ Yerusalem.

11. Mɛɛ gbɛ nɔ ekãa ni Israel gbekɛ yoo ko kɛwie lɛ tsake nuu ko shihilɛ?

11 Yɛ afi 900 D.Ŋ.B. afii lɛ amli lɛ, ekãa ni Israel gbekɛ yoo fioo ko kɛwie lɛ ha ajɔɔ kpitiyelɔ ko. No mli lɛ gbekɛ yoo lɛ yɛ nomŋɔɔ mli, ni eesɔmɔ yɛ Siria tatsɛ Naeman ni yeɔ kpiti lɛ shĩa. Gbekɛ yoo lɛ le naakpɛɛ nibii ni Yehowa tsɔ Elisha nɔ efee lɛ, ni eha Naeman ŋa lɛ le akɛ kɛ́ ewu lɛ tee Nyɔŋmɔ gbalɔ ni yɔɔ Israel lɛ ŋɔɔ lɛ, abaatsa lɛ. Naeman tee  Israel, atsa lɛ yɛ naakpɛɛ gbɛ nɔ, ni ebatsɔ Yehowa jálɔ. (2 Maŋ. 5:1-3, 10-17) Kɛ́ oji gbekɛ fioo ni sumɔɔ Nyɔŋmɔ tamɔ nakai gbekɛ yoo lɛ, Yehowa baanyɛ aha oná ekãa kɛye otsɔɔlɔi, oklasbii, kɛ mɛi krokomɛi odase.

12. Te Maŋtsɛ Hezekia wiemɔi lɛ ná ewebii lɛ anɔ hewalɛ eha tɛŋŋ?

12 Kɛ́ wɔkɛ wiemɔi ni sa tsu nii beni mɔ ko kɛ haomɔi miikpe lɛ, ebaanyɛ ekanya lɛ. Beni Ashurbii lɛ baa ní amɛbatutua Yerusalem yɛ afi 700 D.Ŋ.B. afii lɛ amli lɛ, Maŋtsɛ Hezekia kɛɛ ewebii lɛ akɛ: “Nyɛwajea nyɛhe ní nyɛfea ekãa! Nyɛkashea gbeyei ni nyɛtsui akafãa yɛ Ashur maŋtsɛ lɛ kɛ asafo babaoo ní kɛ lɛ nyiɛ lɛ hewɔ! Shi mɔ ni kɛ wɔ yɔɔ lɛ da fe mɔ ni kɛ lɛ yɔɔ lɛ: Lɛ lɛ heloo nine kɛ lɛ yɔɔ lɛ; shi wɔ lɛ, Yehowa, wɔ-Nyɔŋmɔ lɛ, kɛ wɔ yɔɔ, koni eye ebua wɔ, ní ewu wɔtai eha wɔ!” Te maŋbii lɛ fee amɛnii yɛ ewiemɔi lɛ ahe amɛha tɛŋŋ? Eha amɛfee ekãa. Ejaakɛ Biblia lɛ kɛɔ akɛ, ‘Maŋ lɛ ŋɔ amɛhiɛ amɛfɔ̃ Hezekia wiemɔi lɛ anɔ’! (2 Kron. 32:7, 8) Wiemɔi ni tamɔ nakai nɔŋŋ baanyɛ aha wɔ kɛ Kristofoi krokomɛi afee ekãa beni yiwalɔi miisu wɔtsui.

13. Mɛɛ nɔkwɛmɔnɔ Maŋtsɛ Ahab tsulɔ Obadia fee yɛ ekãa gbɛfaŋ?

13 Bei komɛi lɛ wɔkɛ wɔnifeemɔi tsɔɔ akɛ wɔyɛ ekãa, shi jeee wɔwiemɔi pɛ. Yɛ afi 900 D.Ŋ.B. afii lɛ amli lɛ, Maŋtsɛ Ahab tsulɔ Obadia fee ekãa, ni eŋɔ Yehowa gbalɔi oha etee “tɛkploi amli mɛi nyɔŋmai-enumɔ-enumɔ,” bɔni afee ni akagbe amɛ yɛ Maŋnyɛ Yezebel, yiwalɔ lɛ fãmɔ naa. (1 Maŋ. 18:4) Taakɛ Obadia ní sheɔ Nyɔŋmɔ gbeyei lɛ fee lɛ, Yehowa anɔkwa tsuji babaoo ni yɔɔ ŋmɛnɛ lɛ kɛ ekãa ebaa amɛnyɛmimɛi héyelilɔi lɛ ayi, kɛtsɔ amɛhe saji ni amɛhaaa yiwalɔi ale lɛ nɔ.

ESTER—MAŊNYƐ NI YƆƆ EKÃA

14, 15. Mɛɛ gbɛ nɔ Maŋnyɛ Ester jie hemɔkɛyeli kɛ ekãa kpo, ni mɛni jɛ mli kɛba?

14 Yɛ afi 400 D.Ŋ.B. afii lɛ amli beni yiwalɔ Haman tsɔ ŋaa koni ebule Yudafoi ni yɔɔ Persia Nɔyelihe lɛ mli ni no ha amɛwala yaje oshara mli lɛ, Maŋnyɛ Ester jie hemɔkɛyeli kɛ ekãa kpele kpo. Yudafoi lɛ ye ŋkɔmɔ, ni amɛhi ŋmaa, ni ekã shi faŋŋ akɛ amɛjɛ amɛtsuiŋ fɛɛ amɛsɔle! (Ester 4:1-3) No mli lɛ Maŋnyɛ Ester ehao waa. Etsɛkwɛ̃ bi Mordekai ha akɛ mla ni awo akɛ akpata Yudafoi lɛ ahiɛ lɛ he wolo lɛ eko yaha lɛ, ni efã Ester koni eyana maŋtsɛ lɛ ni ekpá fai eha enyɛmimɛi Yudafoi lɛ. Shi mɔ fɛɛ mɔ ni yaa maŋtsɛ lɛ hiɛ beni atsɛko lɛ lɛ, agbeɔ lɛ.—Ester 4:4-11.

15 Fɛɛ sɛɛ lɛ, Mordekai kɛɛ Ester akɛ: ‘Kɛ́ obu onaa lɛ, no lɛ walaheremɔ aaajɛ he kroko ate shi. Shi nɛkɛ be nɛɛ hewɔ nɔŋŋ onine shɛ maŋnyɛyeli lɛ nɔ jiŋŋ, namɔ le?’ Ester wo Mordekai hewalɛ koni eyabua Yudafoi ni yɔɔ Shushan lɛ fɛɛ naa, ní amɛhi ŋmaa amɛha lɛ. Ester wie akɛ: ‘Mi hu mahi ŋmaa nakai nɔŋŋ. Kɛkɛ ní maya maŋtsɛ lɛ ŋɔɔ tsɛ jeee mla lɛ naa ni; ni kɛji milaaje hu, belɛ milaaje!’ (Ester 4:12-17) Ester fee ekãa, ni taakɛ wolo ni egbɛ́i kã nɔ lɛ tsɔɔ lɛ, Nyɔŋmɔ kpɔ̃ ewebii lɛ. Ŋmɛnɛ lɛ, Kristofoi ni afɔ amɛ mu lɛ kɛ amɛnanemɛi ni ejɔɔ amɛhe nɔ lɛ jieɔ ekãa ni tamɔ nakai nɔŋŋ kpo kɛ́ amɛkɛ kai miikpe—ni ‘Mɔ ni boɔ sɔlemɔi atoi lɛ’ fĩɔ amɛsɛɛ daa.—Nyɛkanea Lala 65:3; 118:6.

“HA OTSUI ANYƆ OMLI”

16. Mɛni gbekɛbii ni yɔɔ Kristofoi asafo lɛ mli lɛ baanyɛ akase kɛjɛ Yesu nɔkwɛmɔnɔ lɛ mli?

16 Be ko yɛ klɛŋklɛŋ afii 100 Ŋ.B. lɛ, ayana Yesu ní no mli lɛ eye afii 12 lɛ yɛ sɔlemɔtsu lɛ mli, “ni eta shi yɛ tsɔɔlɔi  lɛ ateŋ eebo amɛ toi ni eebibii amɛ nii.” Ni “mɛi fɛɛ ni boɔ lɛ toi lɛ naa kpɛ amɛhe yɛ enilee kɛ ehetoi ni ehaa lɛ ahewɔ.” (Luka 2:41-50) Yesu edako moŋ, shi eyɛ hemɔkɛyeli kɛ ekãa bɔ ni ha ebibii tsɔɔlɔi ni hiɛ efã ni yɔɔ sɔlemɔtsu lɛ mli lɛ saji. Kɛ́ gbekɛbii ni yɔɔ Kristofoi asafo lɛ mli ŋmɛnɛ lɛ ha Yesu nɔkwɛmɔnɔ lɛ hi amɛjwɛŋmɔ mli lɛ, ebaaha amɛŋɔ hegbɛ fɛɛ hegbɛ kɛha ‘mɛi fɛɛ ni biɔ amɛ hiɛnɔkamɔ ní yɔɔ amɛmli lɛ shishi lɛ hetoo.’—1 Pet. 3:15.

17. Mɛni hewɔ Yesu wo ekaselɔi lɛ hewalɛ ni ‘amɛha amɛtsui anyɔ amɛmli’ lɛ, ni mɛni hewɔ esa akɛ wɔ hu wɔfee ekãa lɛ?

17 Yesu wo mɛi hewalɛ ni ‘amɛha amɛtsui anyɔ amɛmli.’ (Mat. 9:2, 22) Ekɛɛ ekaselɔi lɛ akɛ: “Naa, ŋmɛlɛtswaa lɛ miiba ni eshɛ po, ni nyɛbaagbɛ nyɛshwã ni mɔ fɛɛ mɔ aaakɔ egbɛ, ni nyɛaashi mi kome; shi jeee mi kome ni, ejaakɛ tsɛ lɛ kɛ mi yɛ. Miikɛɛ nyɛ nii nɛɛ, koni nyɛwo nyɛtsui yɛ mimli. Je lɛŋ lɛ, hejaramɔ nyɛnáa, shi kɛlɛ nyɛtsui anyɔa nyɛmli: miye je lɛ nɔ kunim.” (Yoh. 16:32, 33) Taakɛ ebalɛ yɛ Yesu mra be mli sɛɛnyiɛlɔi lɛ agbɛfaŋ lɛ, je lɛ nyɛ̃ɔ wɔ, shi nyɛkahaa wɔfea tamɔ je lɛ. Kɛ́ wɔjwɛŋ bɔ ni Nyɔŋmɔ Bi lɛ fee ekãa lɛ nɔ lɛ, no baawaje wɔ koni wɔkaha je nɛɛ miiwo wɔhe muji. Eye je lɛ nɔ kunim, ni wɔ hu wɔbaanyɛ wɔfee nakai nɔŋŋ.—Yoh. 17:16; Yak. 1:27.

18, 19. Mɛɛ hemɔkɛyeli kɛ ekãa he nɔkwɛmɔnɔ Paulo fee?

18 Bɔfo Paulo damɔ kai srɔtoi anaa. Be ko lɛ, kɛjeee Roma asraafoi lɛ ni yaje jɛmɛ lɛ, kulɛ Yudafoi ni yɔɔ Yerusalem lɛ tserɛ emli. Nyɔɔŋ lɛ, “Nuŋtsɔ lɛ badamɔ emasɛi ni ekɛɛ: Paulo, ha otsui anyɔ omli, ejaakɛ bɔ ni oye mihe odase yɛ Yerusalem nɛɛ, ja oyaye odase nakai nɔŋŋ yɛ Roma hu.” (Bɔf. 23:11) Nakai pɛpɛɛpɛ Paulo fee.

19 Paulo kã “bɔfoi agboi” lɛ ni tao akɛ amɛfite asafo ni yɔɔ Korinto lɛ ahiɛ waa ní esheee gbeyei. (2 Kor. 11:5; 12:11) Ákɛ mɔ ni tamɔɔɔ mɛi nɛɛ, Paulo yɛ odaseyelii ni tsɔɔ akɛ eji bɔfo—awo lɛ tsuŋ, ayi lɛ, ena nɔ̃ yɛ gbɛfai amli, ena nɔ̃ yɛ hei krokomɛi, hɔmɔ ye lɛ, kumai ye lɛ, eshi kpe, ni asafoi lɛ hu ahe susumɔ hao lɛ. (Nyɛkanea 2 Korintobii 11:23-28.) Mɛɛ hemɔkɛyeli kɛ ekãa he nɔkwɛmɔnɔ po nɛ—ni fɛɛ tsɔɔ akɛ Nyɔŋmɔ ji mɔ ni waje lɛ!

20, 21. (a) Okɛ nɔkwɛmɔnɔ ni tsɔɔ akɛ esa akɛ wɔya nɔ wɔfee ekãa lɛ aha. (b) Mɛɛ shihilɛi amli esa akɛ wɔfee ekãa, ni mɛɛ nɔmimaa wɔbaanyɛ wɔná?

20 Jeee Kristofoi fɛɛ kɛ yiwaa ni naa wa baakpe. Kɛlɛ, ekãa he miihia wɔ fɛɛ koni wɔnyɛ wɔdamɔ shihilɛi ni mli wawai anaa. Naa nɔkwɛmɔnɔ ko: Oblanyo ko ni yɔɔ Brazil lɛ kɛ ehe yadɔmɔ yiwalɔi akuu ko he. Beni ekase Biblia lɛ, eyɔse akɛ ehe miihia ni efee tsakemɔi, shi bei pii lɛ agbeɔ mɔ fɛɛ mɔ ni shiɔ kuu lɛ mli lɛ. Esɔle, ni ejɛ ŋmalɛi lɛ amli egbála nɔ hewɔ ni enyɛŋ eya nɔ ekɛ kuu lɛ abɔ lɛ mli etsɔɔ amɛhiɛnyiɛlɔ lɛ. Amɛŋmɛ oblanyo lɛ gbɛ ni eshi ní amɛyeee lɛ awui ko, ni ebatsɔ Maŋtsɛyeli shiɛlɔ.

21 Ebiɔ ekãa dani wɔbaanyɛ wɔshiɛ sanekpakpa lɛ. Su nɛɛ he miihia Kristofoi oblahii kɛ oblayei bɔni afee ni amɛya nɔ amɛye anɔkwa yɛ skul. Ekolɛ ebaabi ni mɔ aná ekãa koni enyɛ ebi gbɛ yɛ nitsumɔhe, bɔni afee ni enyɛ eya kpokpaa wulu nɔ kpee ko fãi srɔtoi lɛ fɛɛ. Wɔyɛ enɛ he nɔkwɛmɔnii babaoo. Ekɔɔɔ he eko naagba ni wɔkɛkpeɔ lɛ, Yehowa baabo ‘wɔhemɔkɛyeli sɔlemɔ’ lɛ toi. (Yak. 5:15) Ni wɔyɛ nɔmimaa akɛ ebaanyɛ eha wɔ emumɔ krɔŋkrɔŋ lɛ koni no aha ‘wɔwaje wɔhe ni wɔfee ekãa jogbaŋŋ’!

[Nikasemɔ lɛ he Sanebimɔi]

[Mfoniri ni yɔɔ baafa 11]

Henok kɛ ekãa shiɛ yɛ jeŋ fɔŋ ko mli

[Mfoniri ni yɔɔ baafa 12]

Yael waje ehe ni efee ekãa