Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Nyɛsaraa Taakɛ Yesu Fee Lɛ

Nyɛsaraa Taakɛ Yesu Fee Lɛ

 Nyɛsaraa Taakɛ Yesu Fee Lɛ

“Nyɛshia kpe ni nyɛsɔlea.”—MAT. 26:41.

TE OBAAHA HETOO OHA TƐŊŊ?

Mɛɛ gbɛ nɔ wɔsɔlemɔi baanyɛ atsɔɔ akɛ wɔmiisara?

Mɛɛ gbɛi anɔ wɔbaanyɛ wɔtsɔɔ akɛ wɔmiisara yɛ wɔsɔɔmɔ nitsumɔ lɛ mli?

Mɛni hewɔ esa akɛ wɔya nɔ wɔsara kɛ́ wɔkɛ kai miikpe, ni te wɔɔfee tɛŋŋ wɔfee enɛ?

1, 2. (a) Mɛɛ saji abaanyɛ abi yɛ bɔ ni Yesu sara eha lɛ he? (b) Ani adesai eshafeelɔi baanyɛ aná Yesu nɔkwɛmɔnɔ ni eye emuu lɛ he sɛɛ? Okɛ enɛ he nɔkwɛmɔnɔ aha.

EKOLƐ obaabi akɛ: ‘Ani mɔ ko baanyɛ akase bɔ ni Yesu sara eha lɛ? Ekolɛ obaasusu akɛ akɛni Yesu eye emuu hewɔ lɛ mɔ ko nyɛŋ akase bɔ ni esara eha lɛ. Kɛfata he lɛ, bei komɛi lɛ Yesu le nɔ ni baaba wɔsɛɛ—afii akpei abɔ sɛɛ po! No hewɔ lɛ, ani ehe miihia ni esara?’ (Mat. 24:37-39; Heb. 4:15) Klɛŋklɛŋ lɛ, ha wɔsusu nakai sanebimɔi lɛ ahe, koni aha no wɔna nɔ hewɔ ni ehe hiaa waa akɛ wɔ hu wɔsara lɛ.

2 Ani adesai eshafeelɔi baanyɛ aná mɔ ko ni eye emuu nɔkwɛmɔnɔ he sɛɛ? Hɛɛ, ejaakɛ anyɛɔ akaseɔ tsɔɔlɔ ko ni he esa jogbaŋŋ. Ákɛ nɔkwɛmɔnɔ lɛ, susumɔ mɔ ko ni miikase gãitsɛ̃mɔ he okwɛ. Shishijee mli lɛ, enyɛɛɛ etsɛ̃ gãi lɛ jogbaŋŋ kɛyashɛ oti ni ma ehiɛ lɛ he, shi eyaa nɔ emiaa ehiɛ, ni etsɛ̃ɔ shii abɔ. Bɔni afee ni ehe asa lɛ, ekwɛɔ bɔ ni etsɔɔlɔ ni he esa jogbaŋŋ lɛ tsɛ̃ɔ gãi lɛ ehaa lɛ. Ekwɛɔ etsɔɔlɔ lɛ shidaamɔ, bɔ ni efeɔ eniji ehaa, kɛ bɔ ni ekɛ ewaobii mɔmɔɔ gãi kpãa lɛ mli ehaa lɛ. Fiofio lɛ, nikaselɔ hee ni miisumɔ ni ele gãitsɛ̃mɔ nɛɛ kaseɔ he ni esa akɛ egbala kpãa lɛ mli kɛyashi; ekwɛɔ he ni kɔɔyɔɔ lɛ tswaa kɛyaa, ni etsɛ̃ɔ shii abɔ. Kɛ́ etee nɔ ekase etsɔɔlɔ lɛ, fiofio lɛ, ebaanyɛ etsɛ̃rɛ gãimlibii lɛ kɛbɛŋkɛ oti lɛ he. Nakai nɔŋŋ wɔ hu wɔbɔɔ mɔdɛŋ koni wɔya wɔhiɛ akɛ Kristofoi, kɛtsɔ Yesu fãmɔi lɛ atoiboo kɛ enɔkwɛmɔnɔ ni eye emuu lɛ kasemɔ nɔ.

3. (a) Mɛɛ gbɛ nɔ Yesu tsɔɔ akɛ ehe miihia ni esara? (b) Mɛni he wɔbaasusu yɛ nikasemɔ nɛɛ mli?

3 Ni kɛ́ wɔmiiwie saramɔ he hu? Ani ehe miihia kwraa ni Yesu asara? Hɛɛ, esa akɛ esara. Ákɛ nɔkwɛmɔnɔ lɛ, gbi gbɛkɛ ni enɔ jetsɛremɔ lɛ abaagbe Yesu lɛ, ekɛɛ ebɔfoi anɔkwafoi lɛ akɛ: ‘Nyɛkɛ mi ashia  kpe!’ Ekɛfata he akɛ: “Nyɛshia kpe ni nyɛsɔlea, koni nyɛkabote kaa mli.” (Mat. 26:38, 41) Eyɛ mli akɛ Yesu etee nɔ esara moŋ, shi yɛ shihilɛ ni jaraa nɛɛ mli lɛ, eesumɔ ni esara, ni ebɛŋkɛ eŋwɛi Tsɛ lɛ kpaakpa fe bei fɛɛ ni eho. Ele akɛ esa akɛ esɛɛnyiɛlɔi lɛ hu asara nakai nɔŋŋ—jeee yɛ nakai be lɛ mli pɛ, shi yɛ be ni kã amɛhiɛ lɛ mli hu. No hewɔ lɛ, nyɛhaa wɔsusua nɔ hewɔ ni Yesu sumɔɔ ni wɔshi kpe lɛ he wɔkwɛa. No sɛɛ lɛ, wɔbaasusu gbɛi etɛ ni wɔbaanyɛ wɔtsɔ nɔ wɔsara daa yɛ wɔshihilɛ mli taakɛ Yesu fee lɛ he.

NƆ HEWƆ NI YESU TAOƆ NI WƆSARA LƐ

4. Mɛɛ tsakpaa yɔɔ nɔ ni wɔleee yɛ wɔsɛɛ be he kɛ nɔ hewɔ ni esa akɛ wɔsara lɛ teŋ?

4 Yɛ kukufoo mli lɛ, Yesu miitao ni wɔya nɔ wɔsara ejaakɛ eyɛ mli akɛ wɔle wɔsɛɛ be he nibii babaoo moŋ, shi jeee nɔ fɛɛ nɔ wɔle. Beni Yesu yɔɔ shikpɔŋ lɛ nɔ akɛ adesa lɛ, ani ele wɔsɛɛ be mli nɔ fɛɛ nɔ? Dabi, ejaakɛ ekɛ heshibaa wie akɛ: “No gbi lɛ kɛ no ŋmɛlɛtswaa lɛ mɔ ko mɔ ko leee he eko, bɔfoi ni yɔɔ ŋwɛi lɛ tete leee, [ni bi lɛ tete leee,] ja mitsɛ kome kɛkɛ.” (Mat. 24:36) No beaŋ lɛ, Yesu, ni ji “bi lɛ” leee be tuuntu ni jeŋ fɔŋ nɛɛ baaba enaagbee. Ni wɔ mɛi ni wɔyɔɔ ŋmɛnɛ lɛ hu? Ani wɔle nɔ fɛɛ nɔ ni baaba wɔsɛɛ? Kɔkɔɔkɔ! Wɔleee be pɔtɛɛ ni Yehowa baatsu e-Bi lɛ koni ebafo nibii agbɛjianɔtoo fɔŋ nɛɛ sɛɛ. Eji wɔle kulɛ, ani ehe baahia ni wɔya nɔ wɔshi kpe? Taakɛ Yesu tsɔɔ mli lɛ, naagbee lɛ baaba trukaa, be ni akpaaa gbɛ; no hewɔ lɛ esa akɛ wɔsara be fɛɛ be.—Nyɛkanea Mateo 24:43.

5, 6. (a) Mɛɛ gbɛ nɔ nɔ ni wɔle yɛ wɔsɛɛ be kɛ Nyɔŋmɔ yiŋtoi ahe lɛ saa bɔ ni wɔsaraa wɔhaa lɛ he? (b) Mɛni hewɔ esa akɛ Satan he nilee ni wɔyɔɔ lɛ awaje wɔfai shi ni wɔtswa akɛ wɔbaaya nɔ wɔsara lɛ?

5 Nɔ ni tamɔɔɔ nakai lɛ, Yesu le wɔsɛɛ be he nibii babaoo ni yɔɔ miishɛɛ—anɔkwalei ni mɛi ni bɛŋkɛ lɛ lɛ ateŋ mɛi babaoo leee kwraa. Wɔleee nibii pii tamɔ Yesu, shi kɛtsɔ enɔ lɛ, amrɔ nɛɛ wɔbale Nyɔŋmɔ Maŋtsɛyeli lɛ kɛ nɔ ni ebaafee wɔsɛɛ lɛ he nii babaoo. Kɛ́ wɔkwɛ mɛi ni wɔkɛshãraa yɛ skul, nitsumɔhei, kɛ wɔshikpɔŋkukuji lɛ amli lɛ, ani wɔnaaa akɛ mɛi babaoo leee anɔkwalei ni yɔɔ miishɛɛ nɛɛ ahe nɔ ko kwraa? Enɛ haa wɔnaa yiŋtoo kroko hewɔ ni esa akɛ wɔsara lɛ. Taakɛ Yesu fee lɛ, esa akɛ wɔha wɔhiɛ ahi wɔhe nɔ be fɛɛ be kɛtao hegbɛi ní wɔkɛaaha mɛi krokomɛi ale Nyɔŋmɔ Maŋtsɛyeli lɛ he sane. Hegbɛi nɛɛ anɔ bɛ, no hewɔ lɛ esaaa akɛ wɔkɛshwɛɔ kwraa. Mɛi awala yɛ oshara mli!—1 Tim. 4:16.

6 Nɔ kroko hu ni Yesu le lɛ ye ebua lɛ ni etee nɔ esara. Ele akɛ Satan etswa efai shi akɛ ebaaka lɛ, ebaawa lɛ yi, ní eha eŋmɛɛ enɔkwayeli lɛ he. Be fɛɛ be nɛ lɛ, nakai henyɛlɔ ni yitsoŋ wa lɛ miitao “be kroko ni sa” koni eka Yesu. (Luka 4:13, NW) Yesu ha ehiɛ hi ehe nɔ be fɛɛ be. Esumɔɔɔ akɛ nɔ ko nɔ ko yeɔ enɔ, kɛ́ eji kaa, shiteekɛwoo, loo yiwaa jio. Wɔ hu wɔyɛ shihilɛ ni tamɔ nakai nɔŋŋ mli. Wɔle akɛ Satan kã he enyiɛ “tamɔ jata ni hũuɔ eetao mɔ ni eeemi.” No hewɔ ni Nyɔŋmɔ Wiemɔ lɛ woɔ Kristofoi fɛɛ hewalɛ akɛ: “Nyɛhiɛ akãa shi, nyɛsaraa” lɛ. (1 Pet. 5:8) Shi te wɔɔfee tɛŋŋ wɔfee nakai lɛ?

BƆ NI WƆƆFEE WƆSARA YƐ SƆLEMƆ GBƐFAŊ

7, 8. Mɛɛ ŋaa Yesu wo yɛ sɔlemɔ he, ni mɛɛ nɔkwɛmɔnɔ efee yɛ enɛ gbɛfaŋ?

7 Biblia lɛ tsɔɔ akɛ tsakpaa kpaakpa yɛ mɔ hiɛ ni aaahi ehe nɔ, loo ní eeesara yɛ mumɔŋ lɛ kɛ sɔlemɔ teŋ. (Kol. 4:2; 1 Pet. 4:7) Beni Yesu bi ekaselɔi lɛ ni amɛkɛ lɛ ashi kpe lɛ sɛɛ etsɛɛɛ lɛ, ekɛɛ akɛ: “Nyɛshia kpe ni nyɛsɔlea, koni nyɛkabote kaa mli.” (Mat. 26:41) Ani eetao ni amɛshi kpe yɛ nakai be ni jaraa lɛ pɛ mli? Dabi,  eji ŋaawoo ni esa akɛ wɔhi shi yɛ naa be fɛɛ be.

8 Yesu fee nɔkwɛmɔnɔ ni nɔ bɛ yɛ sɔlemɔ gbɛfaŋ. Ekolɛ obaakai akɛ be ko lɛ, eshi kpe nyɔɔŋnyɔɔŋ fɛɛ esɔle etsɛ́ e-Tsɛ lɛ. Nyɛhaa wɔfea shihilɛ lɛ he mfoniri wɔkwɛa. (Nyɛkanea Luka 6:12, 13.) Eeenyɛ efee akɛ Yesu bɛŋkɛ Kapernaum, ni ji wolɛi amaŋ, he ni ehiɔ kɛ́ etee Galilea kpokpaa lɛ nɔ lɛ. Beni jenamɔ yi waa lɛ, Yesu kwɔ kɛtee gɔji ni bɛŋkɛ Galilea Ŋshɔ lɛ ateŋ ekome nɔ. Beni ekwɛɔ ni duŋ woɔ yɛ kpokpaa lɛ nɔ lɛ, ekolɛ ebaana ni mu kanei miitso hɛrɛbii yɛ Kapernaum kɛ ehewɔŋ akrowai lɛ amli. Kɛlɛ, beni Yesu kɛ Yehowa bɔi sane gbaa lɛ, ekɛ ejwɛŋmɔ ma sɔlemɔ lɛ nɔ. Minitii ho, ni ŋmɛlɛtswai hu ho, fɛɛ lɛ ekã he eesɔle. Eyɔseee be ni kanei ni yɔɔ akrowai lɛ amli lɛ bɔi gboimɔ ekomekomei lɛ, loo beni nyɔɔŋtsere lɛ jeɔ fiofio lɛ, loo bɔ ni kooloi ni nyiɛɔ gbɛkɛ lɛ taoɔ niyenii yɛ jwɛiaŋ lɛ. Ekã shi faŋŋ akɛ nɔ titri ni esɔlemɔ lɛ kɔ he ji yiŋkpɛɛ wulu ni kã ehiɛ lɛ—ebɔfoi 12 lɛ ahalamɔ lɛ. Wɔbaanyɛ wɔfee Yesu he mfoniri ní eekɛɛ e-Tsɛ lɛ nɔ fɛɛ nɔ ní ele yɛ kaselɔi lɛ eko fɛɛ eko he, ní eekpa lɛ fai koni eha lɛ nilee, ní etsɔɔ lɛ gbɛ hu.

9. Mɛni wɔbaanyɛ wɔkase kɛjɛ bɔ ni Yesu sɔle nyɔɔŋ muu fɛɛ lɛ mli?

9 Mɛni Yesu nɔkwɛmɔnɔ lɛ tsɔɔ wɔ? Ákɛ wɔkɛ ŋmɛlɛtswai babaoo asɔle? Dabi, ejaakɛ enu ekaselɔi lɛ ashishi, ni ewie yɛ amɛhe akɛ: “Mumɔ lɛ miikpɛlɛ moŋ, shi heloo lɛ egbede.” (Mat. 26:41) Kɛlɛ, wɔbaanyɛ wɔkase Yesu. Ákɛ nɔkwɛmɔnɔ lɛ, ani wɔkɛ wɔŋwɛi Tsɛ lɛ gbaa sane dani wɔkpɛɔ yiŋ ni baanyɛ asa wɔ, wɔweku lɛ, loo wɔnyɛmimɛi héyelilɔi lɛ amumɔŋ shidaamɔ he? Ani wɔsɔleɔ wɔhaa wɔnyɛmimɛi hii kɛ yei Kristofoi lɛ? Ani wɔjɛɔ wɔtsuiŋ wɔsɔleɔ moŋ fe ni wɔɔtĩ wiemɔi pɔtɛi komɛi amli be fɛɛ be? Kadimɔ hu akɛ, Yesu toɔ be ni ekɛ eŋwɛi Tsɛ lɛ gbaa etsuiŋ sane. Ŋmɛnɛ lɛ, bɔ ni dekã bɛ kwraa hewɔ lɛ, ewaaa kwraa akɛ daa gbi shihilɛ mli nifeemɔi aaaha wɔhiɛ aje nibii ni he hiaa titri lɛ anɔ. Kɛ́ wɔhe be babaoo ni wɔkɛ Yehowa gba sane jogbaŋŋ kɛjɛ wɔtsuiŋ lɛ, ebaaha wɔhiɛ ahi wɔhe nɔ waa yɛ mumɔŋ. (Mat. 6:6, 7) Wɔbaatsi wɔbɛŋkɛ Yehowa kpaakpa, ni wɔbaafee nɔ fɛɛ nɔ ni wɔɔnyɛ kɛwaje wɔkɛ lɛ teŋ wekukpaa lɛ, ni wɔbaatsi wɔhe kɛjɛ nɔ fɛɛ nɔ ni baanyɛ afite nakai wekukpaa lɛ he.—Lala 25:14.

BƆ NI WƆƆFEE WƆSARA YƐ SHIƐMƆ NITSUMƆ LƐ GBƐFAŊ

10. Mɛɛ nɔkwɛmɔnɔ tsɔɔ akɛ Yesu ha ehiɛ hi ehe nɔ kɛtao hegbɛi kɛye odase?

10 Yesu sara yɛ nitsumɔ ni Yehowa etu ewo edɛŋ lɛ he. Yɛ nitsumɔi komɛi agbɛfaŋ lɛ, nitsulɔ lɛ hiɛ baanyɛ aje ehe nɔ ni oshara ko baaa. Kɛlɛ, nitsumɔi babaoo biɔ ni mɔ jwɛŋmɔŋ akã lɛ shi ni ehiɛ ahi ehe nɔ, nakai ji bɔ ni Kristofoi asɔɔmɔ nitsumɔ lɛ yɔɔ. Yesu ha ehiɛ hi ehe nɔ be fɛɛ be yɛ enitsumɔ lɛ mli, ni etao hegbɛi ni ekɛaashiɛ sanekpakpa lɛ. Ákɛ nɔkwɛmɔnɔ lɛ, beni ekɛ ekaselɔi lɛ enyiɛ leebi leebi ni amɛyashɛ Sikar maŋ lɛ mli lɛ, ekaselɔi lɛ tee niyenii hemɔ. Yesu mɛ amɛ yɛ maŋ lɛ nubu lɛ he koni ejɔɔ ehe fioo, shi ehiɛ yɛ ehe nɔ, ni eyɔse hegbɛ ni ebaanyɛ ekɛye odase. Samaria yoo ko ba nuyɛɛ. Kulɛ Yesu baanyɛ ekpã emli fioo. Ni eyɛ yiŋtoi ni kulɛ ebaanyɛ edamɔ nɔ ekɛ yoo lɛ akagba sane. Kɛlɛ, egbele enaa ni ekɛ yoo lɛ bɔi sane gbaa, eye odase ni mɔ shi waa, ni enɛ sa nakai maŋ lɛ mli bii lɛ ateŋ mɛi babaoo ashihilɛ he. (Yoh. 4:4-26, 39-42) Ani wɔbaanyɛ wɔkase bɔ ni Yesu sara eha lɛ jogbaŋŋ fe bɔ ni wɔfeɔ amrɔ nɛɛ, ekolɛ kɛtsɔ wɔhiɛ ni wɔɔha ehi wɔhe nɔ waa kɛtao hegbɛi kɛwie sanekpakpa lɛ he wɔtsɔɔ mɛi ni wɔkɛkpeɔ yɛ wɔdaa gbi nifeemɔi amli lɛ?

11, 12. (a) Mɛni Yesu kɛɛ mɛi ni bɔ mɔdɛŋ akɛ amɛgbala ejwɛŋmɔ kɛjɛ enitsumɔ lɛ nɔ lɛ? (b) Mɛɛ gbɛ nɔ Yesu ŋmɛ pɛpɛɛpɛ yɛ enitsumɔ lɛ mli?

 11 Bei komɛi lɛ, aŋkroaŋkroi komɛi ni ehiɛɛɛ Yesu he jwɛŋmɔ fɔŋ lɛ bɔɔ mɔdɛŋ akɛ amɛgbala ejwɛŋmɔ kɛjɛ enitsumɔ lɛ nɔ. Helai ni etsa yɛ naakpɛɛ gbɛ nɔ beni eyɔɔ Kapernaum lɛ ha asafoi lɛ ná ehe miishɛɛ aahu akɛ kulɛ amɛmiitao amɛtsĩ enaa koni ekashi amɛ. Enɛ bɛ naakpɛɛ. Shi kɛlɛ, Yesu ba koni ebashiɛ eha “Israel we tooi ni elaaje lɛ” fɛɛ, jeee maŋtiase kome mli bii pɛ. (Mat. 15:24) No hewɔ lɛ, ekɛɛ nakai mɛi lɛ akɛ: “Esa akɛ miyajajeɔ Nyɔŋmɔ maŋtsɛyeli lɛ he sanekpakpa lɛ mitsɔɔ maji krokomɛi hu, ejaakɛ no hewɔ atsu mi.” (Luka 4:40-44) Eyɛ faŋŋ akɛ, shiɛmɔ nitsumɔ lɛ ji oti yɛ Yesu shihilɛ mli. Ehaaa nɔ ko nɔ ko agbala ejwɛŋmɔ.

12 Ani Yesu kɛ ejwɛŋmɔ ma enitsumɔ lɛ nɔ aahu akɛ enáaa ehewɔŋ miishɛɛ? Ani ekɛ ehe wo enitsumɔ lɛ mli aahu akɛ eku ehiɛ eshwie mɛi ahiamɔ nii anɔ? Dabi, Yesu ŋmɛ pɛpɛɛpɛ, ni enɛ ji nɔkwɛmɔnɔ ni nɔ bɛ. Ekɛ enanemɛi jie amɛhiɛtserɛ ni ekɛná ehewɔŋ miishɛɛ. Esusu wekui ahe, enu he eha amɛ waa yɛ amɛhiamɔ nii kɛ amɛnaagbai ahe, ni ejie suɔmɔ babaoo kpo etsɔɔ gbekɛbii.—Nyɛkanea Marko 10:13-16.

13. Mɛɛ gbɛ nɔ wɔbaanyɛ wɔkase nɔkwɛmɔnɔ ni Yesu fee yɛ bɔ ni esara ni eŋmɛ pɛpɛɛpɛ yɛ Maŋtsɛyeli shiɛmɔ nitsumɔ lɛ mli lɛ?

13 Be mli ni wɔkaseɔ bɔ ni Yesu sara eha lɛ, te wɔɔfee tɛŋŋ wɔŋmɛ pɛpɛɛpɛ taakɛ efee lɛ? Wɔhaaa je lɛ agbala wɔjwɛŋmɔ kɛjɛ wɔnitsumɔ lɛ nɔ. Ekolɛ wɔnanemɛi kɛ wɔwekumɛi ni ehiɛɛɛ wɔhe jwɛŋmɔ fɔŋ lɛ po baawo wɔ hewalɛ koni wɔgbɔjɔ wɔsɔɔmɔ nitsumɔ lɛ mli fioo, loo wɔhi shi tamɔ bɔ ni mɛi fɛɛ hiɔ shi lɛ. Shi kɛ́ wɔkase Yesu lɛ, wɔbaana wɔsɔɔmɔ nitsumɔ lɛ tamɔ niyenii. (Yoh. 4:34) Wɔnitsumɔ lɛ haa wɔnáa hewalɛ yɛ mumɔŋ, ni ehaa wɔmii shɛɔ wɔhe hu. Kɛlɛ, wɔsumɔŋ akɛ wɔfee nii kɛteke nɔ, ni wɔbu wɔhe jalɔi tuutu, loo wɔha wɔshihilɛ afee kpɛŋŋ. Taakɛ Yesu fee lɛ, wɔmiisumɔ ni wɔfee “miishɛɛ Nyɔŋmɔ lɛ” tsuji ni mii shɛɔ amɛhe, ni ŋmɛɔ pɛpɛɛpɛ.—1 Tim. 1:11, NW.

BƆ NI WƆƆFEE WƆSARA KƐ́ WƆKƐ KAA MIIKPE

14. Mɛɛ su esa akɛ wɔkpoo kɛ́ wɔkɛ kai miikpe, ni mɛni hewɔ?

14 Taakɛ wɔna lɛ, Yesu woɔ ekaselɔi lɛ hewalɛ waa koni amɛsara be mli ni ekɛ kai ni naa wawai miikpe. (Nyɛkanea Marko 14:37.) Be ni wɔbaaná enɔkwɛmɔnɔ lɛ he sɛɛ waa ji be mli ni wɔkɛ shihilɛi ni jaraa miikpe. Kɛ́ mɛi kɛ kaa miikpe lɛ, amɛhiɛ kpaa anɔkwa sane ko ni he hiaa waa ni Abɛi awolo lɛ wie he shii enyɔ sɔŋŋ lɛ nɔ akɛ: “Gbɛ ko yɛ ni ja yɛ gbɔmɔ hiɛ, shi enaagbee lɛ, gbele gbɛi ni.” (Abɛi 14:12; 16:25) Kɛ́ wɔkɛ wɔhe kpasa wɔ diɛŋtsɛ wɔjwɛŋmɔ, titri lɛ beni wɔkɛ naagbai ni yɔɔ hiɛdɔɔ miikpe lɛ, kɛ́ wɔkwɛɛɛ ni ahi lɛ  wɔkɛ wɔ diɛŋtsɛ wɔhe, kɛ wɔsuɔlɔi baawo oshara mli.

15. Kɛ́ shihilɛ lɛ mli wa lɛ, mɛɛ kaa weku yitsei baanyɛ amɛkɛkpe?

15 Ákɛ nɔkwɛmɔnɔ lɛ, ebaawa waa kɛha weku yitso ko akɛ eeeha “lɛ diɛŋtsɛ eshiabii lɛ” aheloonaa hiamɔ nii. (1 Tim. 5:8) Ekolɛ ebaasumɔ ni ekpɛlɛ nitsumɔ ko ni baaha efolɔ asafoŋ kpeei amli kɛtsara nɔ, ekɛ eweku lɛ akafee weku jamɔ, loo ekɛ ehe akawo shiɛmɔ nitsumɔ lɛ mli lɛ nɔ. Yɛ adesa susumɔ naa lɛ, ekolɛ ebaafee tamɔ nɔ ni tɔmɔ ko bɛ gbɛ ni tamɔ nɛkɛ lɛ he, ni ebaana lɛ po akɛ eja. Shi kɛlɛ, sɛɛ mli lɛ ebaanyɛ eha wɔhe aye loo wɔgboi yɛ mumɔŋ po. Ebaafee nɔ ni sa jogbaŋŋ akɛ wɔɔbo ŋaawoo ni yɔɔ Abɛi 3:5, 6 lɛ moŋ toi! Salomo wie yɛ jɛmɛ akɛ: “Okɛ ohiɛ afɔ̃ Yehowa nɔ kɛ otsui fɛɛ, ni okɛ ohe akakpasa bo diɛŋtsɛ ojwɛŋmɔ; kaimɔ lɛ yɛ ogbɛi fɛɛ mli, ni lɛ eeejaje otempɔŋi lɛ!”

16. (a) Mɛni wɔbaanyɛ wɔkase kɛjɛ bɔ ni Yesu kɛ ehe fɔ̃ Yehowa nilee nɔ shi jeee lɛ diɛŋtsɛ enɔ lɛ nɔ lɛ mli? (b) Mɛɛ gbɛ nɔ weku yitsei babaoo kaseɔ bɔ ni Yesu kɛ ehe fɔ̃ Yehowa nɔ yɛ jaramɔ beaŋ lɛ?

16 Beni Yesu kɛ kai miikpe lɛ, etswa efai shi akɛ ekɛ ehe kpasaŋ lɛ diɛŋtsɛ ejwɛŋmɔ. Bo lɛ susumɔ he okwɛ! Mɔ ni le nii fe mɛi fɛɛ ni ehi shikpɔŋ lɛ nɔ pɛŋ lɛ kɛ ehe efɔ̃ɔɔ lɛ diɛŋtsɛ enilee nɔ. Ákɛ nɔkwɛmɔnɔ lɛ, beni Satan kaa Yesu lɛ, ekɛ wiemɔ ni ji: “Aŋma akɛ” lɛ tsu nii shii abɔ kɛha lɛ hetoo. (Mat. 4:4, 7, 10) Ekɛ ehe fɔ̃ e-Tsɛ lɛ nilee nɔ kɛkpee kai anaa, ni ekɛtsɔɔ akɛ eyɛ heshibaa, ni ji su ko ni Satan bɛ, ní enyɛ̃ɔ kwraa lɛ. Ani wɔkaseɔ Yesu? Weku yitso ni miisumɔ ni ekase bɔ ni Yesu sara eha lɛ baaha Nyɔŋmɔ Wiemɔ lɛ akudɔ lɛ, titri lɛ yɛ jaramɔ beaŋ. Weku yitsei akpei abɔ miifee nakai pɛpɛɛpɛ yɛ je lɛŋ fɛɛ. Amɛkɛ Nyɔŋmɔ Maŋtsɛyeli lɛ kɛ anɔkwa jamɔ yeɔ amɛheloonaa hiamɔ nii ahiɛ. Enɛ haa amɛnyɛɔ amɛkwɛɔ amɛwekui jogbaŋŋ. Ni taakɛ Yehowa ewo shi yɛ e-Wiemɔ lɛ mli lɛ, ejɔɔ mɔdɛŋ ni amɛbɔɔ koni amɛha amɛweku lɛ amɛhiamɔ nii lɛ anɔ.—Mat. 6:33.

17. Mɛni hewɔ osumɔɔ ni okase bɔ ni Yesu sara eha lɛ?

17 Ŋwanejee ko bɛ he akɛ, Yesu fee nɔkwɛmɔnɔ ni fe fɛɛ yɛ bɔ ni asaraa ahaa lɛ mli. Enɔkwɛmɔnɔ lɛ he yɛ sɛɛnamɔ, abaanyɛ akɛtsu nii, ni ebaa mɔ yi po. Kaimɔ akɛ, Satan efee klalo akɛ ebaawɔle bo ní owɔ yɛ mumɔŋ, ní eha ohemɔkɛyeli lɛ mli agbɔjɔ, ojá Yehowa eko kɛ eko kɛkɛ, ní oŋmɛɛ onɔkwayeli lɛ he. (1 Tes. 5:6) Kaaŋmɛ lɛ gbɛ! Yaa nɔ osara taakɛ Yesu fee lɛ—yɛ osɔlemɔ mli, oshiɛmɔ nitsumɔ lɛ mli, kɛ beni okɛ kai miikpe. Kɛ́ ofee nakai lɛ, obaaná miishɛɛ, ni otsui baanyɔ omli amrɔ nɛɛ po ní nibii agbɛjianɔtoo nɛɛ naagbee lɛ tsɔɔ enaa shi lɛ. Kɛ́ otee nɔ osara lɛ, beni o-Nuŋtsɔ lɛ baaba ebakpata nibii agbɛjianɔtoo nɛɛ hiɛ lɛ, ebaabanina bo ni ohiɛ yɛ ohe nɔ, ni okɛ ekãa miifee e-Tsɛ lɛ suɔmɔnaa nii. Kwɛ bɔ ni ebaaŋɔɔ Yehowa naa akɛ eeejuro bo yɛ anɔkwayeli gbɛ ni okɔ lɛ hewɔ!—Kpoj. 16:15.

[Nikasemɔ lɛ he Sanebimɔi]

[Mfoniri ni yɔɔ baafa 6]

Yesu shiɛ etsɔɔ yoo lɛ yɛ nubu lɛ he. Mɛɛ hegbɛi otaoɔ kɛshiɛɔ daa gbi?

[Mfoniri ni yɔɔ baafa 7]

Kɛ́ otsu oweku lɛ mumɔŋ hiamɔ nii ahe nii lɛ, no tsɔɔ akɛ oosara