Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

‘Ani Manyɛ Mashiɛ Kɛ̃?’

‘Ani Manyɛ Mashiɛ Kɛ̃?’

 ‘Ani Manyɛ Mashiɛ Kɛ̃?’

Yɛ je lɛŋ fɛɛ lɛ, wɔyɛ nyɛmimɛi hii kɛ yei babaoo ni yaa nɔ amɛshiɛɔ yɛ gbɔmɔtsoŋ naagbai ni mli wawai ni amɛkɛkpeɔ lɛ fɛɛ sɛɛ, ni amɛnɔkwɛmɔnɔ lɛ sa kadimɔ waa. Bo lɛ ha wɔsusu nyɛmi yoo ko ni atsɛɔ lɛ Dalia ni yɔɔ Vilnius, ni ji Lithuania maŋtiase lɛ mli lɛ he wɔkwɛ.

Dalia eye aaafee afii 35. Eeye hela ko (cerebral apoplexy) ni ji stroki henɔ ko kɛjɛ efɔmɔ mli tɔ̃ɔ. Hela nɛɛ ekumɔ lɛ, ni ehaaa enyɛ ewie jogbaŋŋ. Enɛ hewɔ lɛ, ewekumɛi pɛ nuɔ lɛ shishi jogbaŋŋ. Dalia kɛ enyɛ Awo ni atsɛɔ lɛ Galina, ni kwɛɔ lɛ lɛ yɔɔ. Eyɛ mli akɛ Dalia shihilɛ mli eyi tɔ kɛ naagbai kɛ piŋmɔi moŋ, shi eyɛ miishɛɛ be fɛɛ be. Mɛni hewɔ?

Galina tsɔɔ mli akɛ: “Yɛ afi 1999 lɛ, miwekunyo ko bi yoo ni atsɛɔ lɛ Apolonija lɛ basara wɔ. Wɔyɔse akɛ Apolonija, ni eji Yehowa Odasefonyo lɛ le Biblia lɛ mli jogbaŋŋ, no hewɔ lɛ Dalia bibii lɛ saji babaoo. Etsɛɛɛ kɛkɛ ni akɛ Dalia bɔi Biblia lɛ kasemɔ. Yɛ be kɛ beaŋ lɛ, mitáa nikasemɔ lɛ mli koni matsɔɔ Dalia wiemɔi lɛ ashishi. Shi miyɔse akɛ, eená nɔ ni ekaseɔ lɛ he sɛɛ waa. Etsɛɛɛ ni mi hu mibi ní akɛ mi akase Biblia lɛ.”

Beni Dalia bɔi Biblia mli anɔkwalei lɛ ashishinumɔ lɛ, sanebimɔ ko bɔi enaa gbamɔ waa. Naagbee lɛ, ebi Apolonija akɛ: “Te aaafee tɛŋŋ ni mɔ ko ni tamɔ mi—ni mikumɔ nɛɛ—aaanyɛ eshiɛ lɛ?” (Mat. 28:19, 20) Apolonija ha Dalia tsui akɛ: “Kaashe gbeyei. Yehowa baaye abua bo.” Ni lɛɛlɛŋ, Yehowa ye ebua lɛ.

No hewɔ lɛ, te Dalia feɔ tɛŋŋ eshiɛɔ lɛ? Etsɔɔ gbɛi srɔtoi anɔ. Nyɛmimɛi yei yeɔ amɛbuaa lɛ kɛŋmalaa woji ni Biblia mli shɛɛ sane yɔɔ mli. Klɛŋklɛŋ lɛ, Dalia kɛɔ nyɛmimɛi yei lɛ nɔ ni etaoɔ eŋma lɛ. No sɛɛ lɛ, amɛŋmaa nɔ ni ekɛɛ lɛ. Dalia tsɔɔ tɛs mɛsejii ni ekɛ emobail foŋ lɛ ŋmalaa lɛ hu nɔ eshiɛɔ. Ni kɛ́ kɔɔyɔɔŋ tsakemɔ lɛ hi lɛ, asafoŋ bii lɛ kɛ lɛ jeɔ kpo koni ekɛ mɛi ni amɛkɛkpeɔ yɛ shwɛmɔhei kɛ gbɛjegbɛi lɛ anɔ lɛ agba sane.

Dalia kɛ emami miiya amɛhiɛ yɛ anɔkwale lɛ mli lolo. Amɛ fɛɛ amɛjɔɔ amɛhe nɔ amɛha Yehowa, ni abaptisi amɛ November 2004. Yɛ September 2008 lɛ, ato shiɛlɔi akuu ko ni kɛ Polish wiemɔ tsuɔ nii lɛ shishi yɛ Vilnius. Akɛni Maŋtsɛyeli shiɛlɔi babaoo he miihia kuu nɛɛ hewɔ lɛ, Dalia kɛ emami yafata amɛhe. Dalia kɛɛ akɛ: “Kɛ́ nyɔɔŋ ko miihe agbó ni minyɛko maya shiɛmɔ lɛ, egbaa minaa waa. Shi kɛ́ misɔle miha Yehowa yɛ he lɛ, etsɛɛɛ kɛkɛ lɛ mɔ ko kɛ mi eto gbɛjianɔ kɛha shiɛmɔyaa.” Te wɔsuɔmɔ nyɛmi yoo Dalia nuɔ eshihilɛ lɛ he ehaa tɛŋŋ? Ekɛɛ akɛ: “Hela lɛ ekumɔ migbɔmɔtso, shi jeee mijwɛŋmɔ. Eŋɔɔ minaa waa akɛ minyɛɔ migbaa mɛi krokomɛi Yehowa he sane!”