Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Nibii Komɛi ni Abaanyɛ Afee yɛ Weku Jamɔ loo Aŋkro Nikasemɔ Mli

Nibii Komɛi ni Abaanyɛ Afee yɛ Weku Jamɔ loo Aŋkro Nikasemɔ Mli

 Nibii Komɛi ni Abaanyɛ Afee yɛ Weku Jamɔ loo Aŋkro Nikasemɔ Mli

KƐJƐ 2009 shishijee gbɛ kɛbaa lɛ, afee tsakemɔ yɛ be ni Yehowa Odasefoi ni yɔɔ jeŋ fɛɛ lɛ kɛyaa amɛsafoŋ kpeei lɛ mli. Aŋɔ gbi kome pɛ koni akɛfee kpeei srɔtoi ni afeɔ yɛ otsi lɛ teŋ lɛ, ni awo wɔ fɛɛ hewalɛ ni wɔkɛ gbɛkɛ ni ebakã shi lɛ afee weku jamɔ loo aŋkro nikasemɔ. Ani okɛ gbɛjianɔtoo hee nɛɛ miitsu nii? Ani ooná he sɛɛ jogbaŋŋ kɛmiimɔ shi?

Mɛi komɛi leee nɔ pɔtɛɛ ni esa akɛ amɛsusu he yɛ amɛweku jamɔ lɛ mli. Nɔyeli Kuu lɛ ekɛko akɛ wekui fɛɛ afee nɔ kome too lɛ nɔŋŋ yɛ amɛweku jamɔ lɛ mli daa otsi. Akɛni esoro mɔ fɛɛ mɔ shihilɛ hewɔ lɛ, esa akɛ weku yitsei loo aŋkroaŋkroi fɛɛ akwɛ gbɛ ni hi fe fɛɛ ni amɛbaanyɛ amɛtsɔ nɔ amɛfee daa otsi nifeemɔ nɛɛ.

Mɛi komɛi kɛ weku jamɔ be lɛ saa amɛhe kɛha asafoŋ kpeei, shi esaaa ákɛ akɛ be nɛɛ feɔ enɛ pɛ. Mɛi krokomɛi kaneɔ Biblia lɛ loo wɔwoji lɛ ekomɛi ni amɛsusuɔ he, ni bei komɛi po lɛ, amɛkɛ Ŋmalɛ mli saji komɛi feɔ drama, titri lɛ koni ehe aba sɛɛnamɔ kɛha gbekɛbii lɛ. Jeee be fɛɛ be ehe baahia loo ebaahi akɛ afee nikasemɔ lɛ sanebimɔ kɛ hetoo, taakɛ afeɔ yɛ asafoŋ kpeei ashishi lɛ. Kɛ́ aha nikasemɔ lɛ fee nɔ ni yɔɔ miishɛɛ lɛ, ebaakanya mɛi fɛɛ koni amɛwie nɔ ni yɔɔ amɛtsui mli. Shihilɛ ni tamɔ nɛkɛ lɛ hu haa mɛi kɛ susumɔ hei baa, ni enɛ baanyɛ eha mɔ fɛɛ mɔ aná nikasemɔ lɛ he miishɛɛ, ni hiɛ kpaŋ nɔ.

Tsɛ ko ni yɔɔ bii etɛ lɛ kɛɛ akɛ: “Nibii ni wɔfeɔ lɛ damɔ Biblia kanemɔ kɛha otsi lɛ nɔ titri. Wɔteŋ mɔ fɛɛ mɔ tsɔɔ hiɛ ekaneɔ yitsei lɛ amli, ni gbekɛbii lɛ halaa emli otii komɛi ni amɛyataoɔ saji babaoo ni kɔɔ he, kɛkɛ lɛ amɛbagba nibii ni amɛna lɛ. Bei pii lɛ, Michael [eye afii kpawo] tɛŋɔ nibii ni ekaneɔ lɛ loo eŋmaa nɔ ko fioo yɛ he. David kɛ Kaitlyn [amɛye afii 13 kɛ 15] hu ŋmalaa Biblia mli saji komɛi oookɛɛ nɔ ni amɛyɛ jɛmɛ ni sane lɛ ba. Ákɛ nɔkwɛmɔnɔ lɛ, beni wɔkaneɔ Farao abolooshãlɔ lɛ kɛ edãawolɔ lɛ lamɔi ni Yosef tsɔɔ shishi lɛ he sane lɛ, Kaitlyn ŋma nɔ ko yɛ he oookɛɛ eji gboklɛfonyo ni na nɔ ni tee nɔ lɛ.”—1 Mose, yitso 40.

Yɛ anɔkwale mli lɛ, esoro mɔ fɛɛ mɔ shihilɛ. Ekolɛ nɔ ni baahi aha aŋkro loo weku ko lɛ ehiŋ kɛhaŋ mɔ kroko. Akrabatsa ni fata sane nɛɛ he lɛ tsɔɔ nibii komɛi ni abaanyɛ afee yɛ weku jamɔ loo aŋkro nikasemɔ mli. Nyɛ hu nyɛbaanyɛ nyɛsusu nibii krokomɛi ni nyɛbaanyɛ nyɛfee lɛ he kɛfata he.

[Akrabatsa/Mfoniri ni yɔɔ baafa 6, 7]

 Kɛha wekui ni oblahii kɛ oblayei bibii yɔɔ mli:

• Nyɛkanea Questions Young People Ask—Answers That Work wolo lɛ ni nyɛsusua he.

• Nyɛkɛ “Ni kɛji . . . ?” shihilɛi komɛi afea nɔkwɛmɔnɔ. (Kwɛmɔ May 15, 1996 Buu-Mɔɔ lɛ, baafa 14, kuku 17-18 lɛ.)

• Nyɛwiea otii ni abaanyɛ ashɛ he yɛ be kukuoo mli, kɛ otii ni abaanyɛ ashɛ he yɛ be kplaŋŋ mli lɛ he.

• Nyɛkwɛa asafo lɛ vidioi lɛ eko yɛ be kɛ beaŋ, ni nyɛsusua he.

• Nyɛsusua sane ni ji “Kɛha Oblahii kɛ Oblayei” ni jeɔ kpo yɛ Buu-Mɔɔ lɛ mli lɛ he.

Kɛha gbalashihilɛ mli hefatalɔi ni bɛ bii:

• Nyɛsusua Nɔ̃ Diɛŋtsɛ ni Kɛ Weku Miishɛɛ Baa wolo lɛ yitso 1, 3, 11-16 lɛ he.

• Nyɛgbaa nibii ni nyɛna yɛ niiamlitaomɔ ni nyɛfee yɛ Biblia kanemɔ lɛ mli otii komɛi lɛ ahe lɛ he sane.

• Nyɛfea ekome kɛsaa nyɛhe kɛha Asafoŋ Biblia Nikasemɔ lɛ loo Buu-Mɔɔ Nikasemɔ lɛ.

• Nyɛsusua bɔ ni nyɛaafee nyɛlɛɛ nyɛsɔɔmɔ nitsumɔ lɛ mli akɛ gbalashihilɛ mli hefatalɔi lɛ he.

Kɛha nyɛmimɛi hii kɛ yei oshijafoi loo mɛi ni yɔɔ weku ni mlibii lɛ yɔɔ jamɔi srɔtoi amli lɛ mli:

• Kasemɔ woji hei ni ajie lɛ kpo yɛ kpokpaa wuji anɔ kpeei ashishi lɛ.

• Kanemɔ Yearbook hei kɛ ememeji ni yɔɔ lɛ.

• Taomɔ saji ni afɔɔ bimɔ yɛ nyɛshikpɔŋkuku lɛ mli lɛ amli.

• Saamɔ ohe kɛ shiɛmɔ wiemɔi komɛi ni okɛbaatsu nii yɛ shiɛmɔ nitsumɔ lɛ mli.

Kɛha wekui ni gbekɛbii bibii yɔɔ mli:

• Nyɛfea Biblia mli saji komɛi ahe drama.

• Nyɛkɛ nibii ni baaha nyɛkai Biblia mli saji ajiea nyɛhiɛtserɛ, tamɔ nɔ ni akɛwoɔ Awake! lɛ baafa 30 kɛ 31 lɛ nɛkɛ.

• Nyɛ diɛŋtsɛ nyɛkaa nyɛyiŋ nyɛfea nɔ ko yɛ be kɛ beaŋ. (Kwɛmɔ “Studying the Bible—In the Zoo!” ni yɔɔ March 8, 1996 Awake! lɛ mli lɛ, baafa 16-19 lɛ.)

• Nyɛsusua sane ni ji “Tsɔɔmɔ Obii lɛ Anii” ni jeɔ kpo yɛ Buu-Mɔɔ lɛ mli lɛ he.