Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Nyɔŋmɔ Jieɔ Esuɔmɔ Ní Ekɛsumɔ Wɔ Lɛ Shi Etsɔɔ

Nyɔŋmɔ Jieɔ Esuɔmɔ Ní Ekɛsumɔ Wɔ Lɛ Shi Etsɔɔ

 Nyɔŋmɔ Jieɔ Esuɔmɔ Ní Ekɛsumɔ Wɔ Lɛ Shi Etsɔɔ

‘Duromɔ lɛ baatsɔ jalɛ nɔ aye maŋtsɛ kɛya naanɔ wala mli.’—ROM. 5:21.

1, 2. Mɛɛ nikeenii enyɔ mɛi babaoo susuɔ akɛ sɛɛnamɔ yɛ he waa, shi te nikeenii enyɔ nɛɛ ateŋ nɔ ni sɛɛnamɔ yɔɔ he fe fɛɛ?

‘GBOSHINII ni fe fɛɛ ni Romabii lɛ kɛshi mɛi ni ba yɛ amɛsɛɛ lɛ ji amɛmla lɛ kɛ susumɔ ni ji akɛ esa akɛ mla akudɔ mɛi ashihilɛ lɛ.’ (Dr. David J. Williams ni yɔɔ the University of Melbourne, Australia lɛ) Kɛ́ sane nɛɛ ji anɔkwale po lɛ, gboshinii loo nikeenii ko yɛ ni fe nɔ ni Romabii lɛ shi yɛ amɛsɛɛ lɛ kwraa. Nikeenii nɛɛ ji gbɛjianɔ ni Nyɔŋmɔ eto ni adesai baatsɔ nɔ aná enɔkpɛlɛmɔ ni ebu amɛ jalɔi koni amɛná hiɛnɔkamɔ akɛ abaahere amɛyiwala ni amɛhi shi kɛya naanɔ lɛ.

2 Yɛ gbɛ ko nɔ lɛ, Nyɔŋmɔ tsɔ mla gbɛ nɔ ekɛ nikeenii nɛɛ ha. Bɔfo Paulo gbála enɛ mli yɛ Romabii yitso 5 lɛ mli, shi ekɛ wiemɔi ni shishinumɔ wala gbálaaa mli. Moŋ lɛ, eje eniiamligbalamɔ lɛ shishi kɛ wiemɔi ni shɛjeɔ mɔ mii waa nɛɛ akɛ: “Atsɔ̃ hemɔkɛyeli nɔ abu wɔ bem hewɔ lɛ, wɔkɛ Nyɔŋmɔ teŋ yɛ hejɔlɛ yɛ wɔ-Nuŋtsɔ Yesu Kristo hewɔ.” Kɛ́ mɛi anine shɛ Nyɔŋmɔ nikeenii nɔ lɛ, no tsirɛɔ amɛ ni amɛ hu amɛjieɔ suɔmɔ kpo amɛtsɔɔ lɛ. Paulo fee nakai. Eŋma akɛ: ‘Atsɔ̃ Mumɔ krɔŋkrɔŋ lɛ nɔ afɔse Nyɔŋmɔ suɔmɔ awo wɔtsuii amli.’—Rom. 5:1, 5.

3. Mɛɛ saji eja gbɛ akɛ wɔbiɔ?

 3 Shi mɛni hewɔ ehe bahia ni akɛ nikeenii ni ajɛ suɔmɔ mli akɛha nɛɛ aha lɛ? Mɛɛ gbɛ nɔ Nyɔŋmɔ baanyɛ ekɛ nikeenii nɛɛ aha yɛ gbɛ ni ja nɔ, ni yɛ nakai beaŋ nɔŋŋ lɛ adesai fɛɛ aná he sɛɛ lɛ? Ni mɛni abiɔ ni aŋkroaŋkroi afee koni amɛfee mɛi ni sa nikeenii nɛɛ? Nyɛhaa wɔtaoa sanebimɔi nɛɛ ahetoo ni haa mɔ tsui nyɔɔ emli lɛ, ni wɔkwɛ bɔ ni amɛmaa Nyɔŋmɔ suɔmɔ lɛ nɔ mi.

Nyɔŋmɔ Suɔmɔ lɛ kɛ Esha

4, 5. (a) Mɛɛ gbɛ ni nɔ bɛ nɔ Yehowa tsɔ ejie esuɔmɔ lɛ kpo? (b) Mɛɛ saji haa wɔnuɔ Romabii 5:12 lɛ shishi?

4 Yehowa jie esuɔmɔ lɛ kpo yɛ gbɛ ni nɔ bɛ nɔ beni etsu e-Bi koome lɛ koni ebaye ebua adesai lɛ. Paulo tsɔɔ mli yɛ nɛkɛ gbɛ nɔ akɛ: “Nyɔŋmɔ jieɔ lɛ diɛŋtsɛ esuɔmɔ ní ekɛsumɔ wɔ lɛ shi etsɔ̃ɔ, akɛ be mli ni wɔji eshafeelɔi lɛ beebe ni Kristo bagbo yɛ wɔnajiaŋ.” (Rom. 5:8) “Be mli ni wɔji eshafeelɔi lɛ beebe” lɛ ji sane ko ni sa kadimɔ yɛ ŋmalɛ nɛɛ mli. Esa akɛ adesai fɛɛ ale bɔ ni fee ni wɔbatsɔmɔ eshafeelɔi lɛ.

5 Paulo gbála sane nɛɛ mli, eje shishi kɛ oti nɛɛ akɛ: “Gbɔmɔ kome nɔ esha tsɔ kɛba je lɛŋ, ni gbele tsɔ esha nɔ kɛba, ni no ha gbele lɛ tsɛŋe gbɔmɛi fɛɛ, ejaakɛ amɛ fɛɛ amɛfee esha lɛ.” (Rom. 5:12) Wɔbaanyɛ wɔnu sane nɛɛ shishi, ejaakɛ Nyɔŋmɔ eha aŋma bɔ ni fee ni adesai ba shihilɛ mli lɛ he sane afɔ̃ shi. Yehowa bɔ adesai enyɔ, Adam kɛ Hawa. Bɔlɔ lɛ eye emuu, ni nakai nɔŋŋ no mli lɛ klɛŋklɛŋ adesai ni ji wɔblematsɛmɛi lɛ hu eye emuu. Nyɔŋmɔ gu amɛ nɔ̃ kome pɛ feemɔ, ni ewo amɛ shi akɛ kɛ́ amɛku nakai mla lɛ mli lɛ amɛbaagboi. (1 Mose 2:17) Shi amɛhala akɛ amɛbaafee efɔŋ, ni amɛku Nyɔŋmɔ mla ni nilee yɔɔ mli lɛ mli, ni amɛkɛ nakai feemɔ tsɔɔ akɛ amɛkpoo Nyɔŋmɔ akɛ Mlawolɔ kɛ Nɔyelɔ.—5 Mose 32:4, 5.

6. (a) Mɛni hewɔ Adam shwiei lɛ gboiɔ lɛ, ni beni akɛ Mose Mla lɛ ha lɛ, ani shihilɛ lɛ tsake? (b) Mɛni abaanyɛ akɛ helai komɛi ni yɔɔ fɔlɔi ahe ni amɛkɛhaa amɛbii yɛ fɔmɔ mli lɛ afee he nɔkwɛmɔnɔ?

6 Beni Adam fee esha lɛ sɛɛ dani ebɔi bii fɔmɔ, no hewɔ lɛ ekɛ esha kɛ nɔ ni jɛɔ esha mli kɛbaa lɛ tsɛŋe eshwiei fɛɛ. Eji anɔkwale akɛ Adam shwiei lɛ ekuko Nyɔŋmɔ mla mli tamɔ bɔ ni Adam fee lɛ, no hewɔ lɛ akɛ esha he shwamɔ lɛ fɔ̃ɔ Adam nɔ titri; asaŋ beni Adam bɔi bii fɔmɔ lɛ, no mli lɛ akɛ mla ni tamɔ Mose Mla lɛ hako. (1 Mose 2:17) Fɛɛ sɛɛ lɛ, afɔɔ Adam shwiei lɛ akɛ eshafeelɔi. No hewɔ lɛ, esha kɛ gbele ye maŋtsɛ kɛyashi Nyɔŋmɔ kɛ Mose Mla lɛ ha Israelbii lɛ, ni mla nɛɛ ha efee faŋŋ akɛ amɛji eshafeelɔi. (Nyɛkanea Romabii 5:13, 14.) Abaanyɛ akɛ helai komɛi ni yɔɔ fɔlɔi ahe ni amɛkɛhaa amɛbii yɛ fɔmɔ mli lɛ afee nɔ ni jɛɔ esha ni Adam kɛtsɛŋe wɔ lɛ mli kɛbaa lɛ he nɔkwɛmɔnɔ. Eyɛ mli akɛ gbekɛbii komɛi ni yɔɔ weku ko mli lɛ baaná hela ko kɛjɛ amɛfɔlɔi aŋɔɔ moŋ, shi ekolɛ jeee gbekɛbii lɛ fɛɛ ni yɔɔ weku lɛ mli lɛ baaná nakai hela lɛ eko. Shi jeee nakai eji yɛ esha gbɛfaŋ. Adam kɛ esha etsɛŋe wɔ fɛɛ, ni no hewɔ ni wɔgboiɔ lɛ. Ani be ko baaba ni wɔbaaje shihilɛ gbonyo nɛɛ mli?

Nɔ ni Nyɔŋmɔ Tsɔ Yesu Kristo nɔ Ekɛha

7, 8. Mɛɛ gbɛ nɔ gbɛ ni hii enyɔ ni eye emuu lɛ kɔ lɛ ewo yibii srɔtoi?

7 Yehowa jɛ suɔmɔ mli eto gbɛjianɔ ni baaha adesai aye amɛhe kɛjɛ esha ni akɛfɔ amɛ lɛ mli. Paulo tsɔɔ mli akɛ abaatsɔ nuu ko ni eye emuu ni ba yɛ sɛɛ mli—yɛ gbɛ ko nɔ lɛ Adam ni ji enyɔ—lɛ nɔ aha enɛ aba mli. (1 Kor. 15:45) Shi esoro yibii ni gbɛ ni hii enyɔ ni eye emuu nɛɛ ateŋ mɔ fɛɛ mɔ kɔ lɛ wo. Yɛ mɛɛ gbɛ nɔ?—Nyɛkanea Romabii 5:15, 16.

8 Paulo ŋma akɛ: “Bɔ ni shigbeemɔ lɛ yɔɔ lɛ, jeee nakai duromɔ keenɔ̃ lɛ hu yɔɔ.” Adam ji mɔ ni kɛ shigbeemɔ lɛ ba, ni no hewɔ lɛ esa toigbalamɔ ni enine shɛ nɔ lɛ—egbo. Fɛɛ sɛɛ lɛ, jeee ekome pɛ egbo. Wɔkaneɔ akɛ: “Mɔ kome lɛ shigbeemɔ lɛ hewɔ ni mɛi pii lɛ gboi lɛ.” Yɛ Nyɔŋmɔ jalɛ shishitoo mla naa lɛ, esa akɛ agbala Adam shwiei fɛɛ, ni wɔ hu wɔfata he lɛ, toi taakɛ afee Adam lɛ. Shi le ni wɔle akɛ Yesu, ni ji nuu ni eye emuu lɛ baafo gbele  sɛɛ lɛ baanyɛ aha wɔtsui anyɔ wɔmli. Mɛni ejɛ mli kɛba? Wɔnaa hetoo lɛ yɛ nɔ ni Paulo wie akɛ ‘abaabu gbɔmɛi srɔtoi fɛɛ wala bem’ lɛ mli.—Rom. 5:18.

9. Taakɛ atsĩ tã yɛ Romabii 5:16, 18 lɛ, mɛni Nyɔŋmɔ feɔ lɛ beni ebu gbɔmɛi bem lɛ?

9 Mɛni ji shishinumɔ ni yɔɔ Hela wiemɔ ni atsɔɔ shishi akɛ, ‘abu amɛ bem’ lɛ sɛɛ? Dr. Williams ni atsɛ́ ewiemɔ yisɛɛ yɛ klɛŋklɛŋ kuku lɛ mli lɛ ŋma yɛ he akɛ: “Eji mfonirifeemɔŋ wiemɔi ni maa mla mli oti ko nɔ mi. Ekɔɔ tsakemɔ ni eba yɛ bɔ ni Nyɔŋmɔ naa mɔ ko ehaa lɛ mli lɛ he, shi jeee akɛ bɔ ni mɔ lɛ ji diɛŋtsɛ lɛ etsake . . . Efeɔ Nyɔŋmɔ he mfoniri akɛ kojolɔ ko ni efee eyiŋ akɛ ebaabu mɔ ko ni akɛ lɛ eba ehiɛ akɛ efee efɔŋ lɛ bem. Ni Nyɔŋmɔ ha mɔ ni akɛɛ efee efɔŋ lɛ ye ehe.”

10. Mɛni Yesu fee ni abaanyɛ adamɔ nɔ abu adesai bem?

10 Mɛni “shikpɔŋ fɛɛ nɔ kojolɔ lɛ” ni kojoɔ yɛ jalɛ naa lɛ baanyɛ adamɔ nɔ eha efɔŋfeelɔ ko aye ehe? (1 Mose 18:25) Nɔ̃ klɛŋklɛŋ ni Nyɔŋmɔ fee koni enyɛ efee nakai ji, ejɛ suɔmɔ mli etsu e-Bi koome lɛ kɛba shikpɔŋ lɛ nɔ. Yɛ efɔŋfeemɔ he kai ni Yesu kɛkpe, ehe guɔ ni agbe, kɛ niseniianii ni afee lɛ lɛ fɛɛ sɛɛ lɛ, efee e-Tsɛ lɛ suɔmɔnaa nii kɛmɔ shi. Etee nɔ eye anɔkwa aahu po akɛ agbe lɛ yɛ sɛŋmɔtso nɔ. (Heb. 2:10) Yesu wala akɛ adesa ni eye emuu ni ekɛshã afɔle lɛ ji kpɔ̃mɔnɔ ni baanyɛ aha Adam shwiei lɛ aye amɛhe kɛjɛ esha kɛ gbele mli.—Mat. 20:28; Rom. 5:6-8.

11. Mɛni kpɔ̃mɔnɔ lɛ kɛ lɛ ye egbɔ?

11 Paulo tsɛ́ nɔ ni Yesu fee lɛ yɛ he kroko akɛ “kpɔ̃mɔnɔ” ni yeɔ egbɔ. (1 Tim. 2:6) Mɛni Yesu kpɔ̃mɔnɔ lɛ kɛ lɛ ye egbɔ lɛ? Adam kɛ esha kɛ gbele tsɛŋe mɛi akpekpe toi akpei abɔ ni ji eshwiei lɛ. Eji anɔkwale akɛ, ákɛ nuu ni eye emuu lɛ, kulɛ Yesu baanyɛ awo shwiei ni eye emuu akpekpe toi akpei abɔ. * No hewɔ lɛ, be ko lɛ anu shishi akɛ, Yesu kɛ agbɛnɛ shwiei ni eye emuu ni kulɛ ebaanyɛ ewo lɛ ji mɛi ni feɔ kpɔ̃mɔnɔ ni kɛ Adam kɛ Adam shwiei ni yeee emuu lɛ yeɔ egbɔ. Shi Biblia lɛ ekɛɛɛ akɛ shwiei ni kulɛ Yesu baanyɛ awo lɛ ji kpɔ̃mɔnɔ lɛ fã ko. Romabii 5:15-19 lɛ tsɔɔ akɛ “gbɔmɔ kome” pɛ gbele ji nɔ ni feɔ kpɔ̃mɔnɔ lɛ. Hɛɛ, Yesu wala ni eye emuu lɛ kɛ Adam nɔ̃ lɛ yeɔ egbɔ. Agbala jwɛŋmɔ kɛtee Yesu Kristo pɛ nɔ, ni esa akɛ ákɛ jwɛŋmɔ aya lɛ pɛ enɔ. “Mɔ kome jalɛ,” ni ji toiboo ni Yesu fee lɛ kɛ anɔkwa ni eye kɛtee gbele mli tete lɛ gbele gbɛ kɛha gbɔmɛi srɔtoi fɛɛ koni amɛnine ashɛ nɔkeenɔ lɛ kɛ wala nɔ. (2 Kor. 5:14, 15; 1 Pet. 3:18) Mɛni ha adesai ná hegbɛ nɛɛ?

Kpɔ̃mɔnɔ lɛ Ha Amɛye Amɛhe

12, 13. Mɛni hewɔ ni Nyɔŋmɔ mɔbɔnalɛ kɛ suɔmɔ he miihia mɛi ni abu amɛ jalɔi lɛ?

12 Yehowa Nyɔŋmɔ kpɛlɛ kpɔ̃mɔ afɔle ni e-Bi lɛ shã lɛ nɔ. (Heb. 9:24; 10:10, 12) Shi no haaa Yesu kaselɔi ni yɔɔ shikpɔŋ lɛ nɔ ni ebɔfoi  anɔkwafoi lɛ fata he lɛ atsɔmɔ mɛi ni esha bɛ amɛhe. Eyɛ mli akɛ amɛmia amɛhiɛ koni amɛkafee efɔŋ moŋ, shi jeee be fɛɛ be amɛye omanye. Mɛni hewɔ? Ejaakɛ afɔ amɛ yɛ esha mli. (Rom. 7:18-20) Shi Nyɔŋmɔ baanyɛ afee nɔ ko yɛ he, ni efee hu. Ekpɛlɛ “kpɔ̃mɔnɔ” ni yeɔ egbɔ lɛ nɔ, ni ená he miishɛɛ akɛ ekɛbaatsu nii kɛha etsuji ni ji adesai lɛ.

13 Jeee akɛ esa akɛ Nyɔŋmɔ kɛ kpɔ̃mɔnɔ lɛ atsu nii kɛha bɔfoi lɛ kɛ mɛi krokomɛi yɛ nitsumɔi kpakpai pɔtɛi komɛi ni amɛtsu lɛ hewɔ. Moŋ lɛ, Nyɔŋmɔ mɔbɔnalɛ kɛ esuɔmɔ kpele lɛ hewɔ ekɛ kpɔ̃mɔnɔ lɛ tsu nii kɛha amɛ lɛ. Ehala akɛ ebaajie kojomɔ ni kã bɔfoi lɛ kɛ mɛi krokomɛi lɛ anɔ kɛjɛ amɛnɔ, ni tsɔɔ akɛ ebu amɛ akɛ mɛi ni esha ni akɛfɔ amɛ lɛ bɛ amɛhe dɔŋŋ. Paulo fee enɛ faŋŋ akɛ: “Ejaakɛ duromɔ aŋɔ here nyɛyiwala kɛtsɔ hemɔkɛyeli nɔ, ni enɛ lɛ, jeee nyɛmli ejɛ, Nyɔŋmɔ nɔkeenɔ ni.”—Efe. 2:8.

14, 15. Mɛni mɛi ni Nyɔŋmɔ buɔ amɛ jalɔi lɛ baaná, shi mɛni esa akɛ amɛya nɔ amɛfee?

14 Mɛɛ nikeenii po eji nɛkɛ akɛ Ofe lɛ kɛ esha ni akɛfɔ mɔ ko kɛ eshai ni mɔ lɛ fee lɛ baafa lɛ! Anyɛŋ abu eshai ni aŋkroaŋkroi fee dani amɛbatsɔmɔ Kristofoi lɛ naa, fɛɛ sɛɛ lɛ kpɔ̃mɔnɔ lɛ hewɔ lɛ, Nyɔŋmɔ baanyɛ ekɛ nakai eshai lɛ afa amɛ. Paulo ŋma akɛ: “Duromɔ keenɔ lɛ jɛ shigbeemɔi pii amli etsɔ bembuu.” (Rom. 5:16) Esa akɛ bɔfoi lɛ kɛ mɛi krokomɛi ni nine shɛ nikeenii (ni ji jalɔi ni abu amɛ) ni tsɔɔ suɔmɔ nɛɛ nɔ lɛ kɛ hemɔkɛyeli aya nɔ ajá anɔkwa Nyɔŋmɔ lɛ. Kɛ́ amɛfee nakai lɛ mɛni amɛbaaná wɔsɛɛ? “Mɛi ni ená duromɔ kɛ jalɛ nɔkeenɔ ni fá kɛteke nɔ lɛ aaatsɔ mɔ kome ni ji Yesu Kristo lɛ nɔ aye maŋtsɛ yɛ wala mli.” Hɛɛ, jalɛ nɔkeenɔ lɛ tsuɔ nɔ̃ kroko ni yɔɔ srɔto yɛ shigbeemɔ nɔ̃ lɛ he. Nɔkeenɔ lɛ haa wala.—Rom. 5:17; nyɛkanea Luka 22:28-30.

15 Abuɔ mɛi ni nine shɛɔ nakai nɔkeenɔ lɛ nɔ lɛ akɛ jalɔi, ni amɛbatsɔmɔɔ Nyɔŋmɔ mumɔŋ bii. Ákɛ Kristo nanemɛi niyelɔi lɛ, amɛyɛ hiɛnɔkamɔ akɛ abaatee amɛshi kɛya ŋwɛi akɛ bii ni ji mumɔŋ bɔɔnii diɛŋtsɛ, koni amɛfata Yesu Kristo he ‘kɛye maŋtsɛ.’—Nyɛkanea Romabii 8:15-17, 23.

Nyɔŋmɔ Jie Suɔmɔ Kpo Etsɔɔ Mɛi Krokomɛi

16. Mɛɛ gbɛ nɔ mɛi ni yɔɔ hiɛnɔkamɔ akɛ amɛbaahi shikpɔŋ lɛ nɔ lɛ anine shɛɔ nikeenii ko nɔ?

16 Jeee mɛi fɛɛ ni yɔɔ Nyɔŋmɔ mli hemɔkɛyeli ni amɛsɔmɔɔ lɛ akɛ anɔkwa Kristofoi lɛ kpaa gbɛ akɛ amɛkɛ Kristo ‘baaye maŋtsɛ’ yɛ ŋwɛi. Amɛteŋ mɛi babaoo yɛ hiɛnɔkamɔ ni damɔ Biblia lɛ nɔ tamɔ Nyɔŋmɔ tsuji ni hi shi dani Kristo ba lɛ anɔ̃ lɛ nɔŋŋ. Amɛyɛ hiɛnɔkamɔ akɛ amɛbaahi shi kɛya naanɔ yɛ paradeiso yɛ shikpɔŋ lɛ nɔ. Ani amrɔ nɛɛ po lɛ, amɛnine baanyɛ ashɛ nikeenii ni Nyɔŋmɔ jɛɔ suɔmɔ mli ekɛhaa lɛ nɔ, ni abu amɛ akɛ jalɔi ní baahi shikpɔŋ lɛ nɔ? Yɛ nɔ ni Paulo ŋma kɛha Romabii lɛ naa lɛ, hetoo ni haa mɔ tsui nyɔɔ emli lɛ ji, hɛɛ!

17, 18. (a) Yɛ hemɔkɛyeli ni Abraham jie lɛ kpo lɛ hewɔ lɛ, te Nyɔŋmɔ bu lɛ eha tɛŋŋ? (b) Te fee tɛŋŋ ni Yehowa nyɛ ebu Abraham akɛ jalɔ lɛ?

17 Paulo wie nuu ko ni shihilɛ maa anɔkwa sane nɛɛ nɔ mi jogbaŋŋ lɛ he, lɛ ji Abraham, nuu ni yɔɔ hemɔkɛyeli ni hi shi dani Yehowa kɛ Mose Mla lɛ ha Israelbii lɛ, ni agbɛnɛ hu ehi shi kwraa dani Kristo gbele gbɛ kɛha ŋwɛi shihilɛ lɛ. (Heb. 10:19, 20) Wɔkaneɔ akɛ: “Jeee mla nɔ atsɔ awo Abraham loo eseshi lɛ shi akɛ eeeŋɔ jeŋ eye lɛ; shi moŋ hemɔkɛyeli jalɛ nɔ atsɔ.” (Rom. 4:13; Yak. 2:23, 24) No hewɔ lɛ, Nyɔŋmɔ bu anɔkwafo Abraham akɛ jalɔ.—Nyɛkanea Romabii 4:20-22.

18 No nyɛŋ atsɔɔ akɛ Abraham efeee esha ko yɛ afii nyɔŋmai abɔ ni ekɛsɔmɔ Yehowa lɛ mli. Dabi, jeee nakai shishinumɔ naa abu lɛ jalɔ lɛ. (Rom. 3:10, 23) Shi Yehowa kɛ enilee ni bɛ naagbee lɛ tsu nii kɛyɔse hemɔkɛyeli ni ekaaa ni Abraham yɔɔ, kɛ nitsumɔi ni ehemɔkɛyeli lɛ ha etsu lɛ. Abraham ná hemɔkɛyeli yɛ shiwoo ‘seshi’ ni baaba yɛ ewekutɔkpãa lɛ mli lɛ mli titri. Ebafee faŋŋ akɛ nakai Seshi lɛ ji Mesia, loo Kristo lɛ. (1 Mose 15:6; 22:15-18) No hewɔ lɛ, kɛtsɔ “kpɔmɔ ní yɔɔ Kristo Yesu mli  lɛ nɔ” lɛ, ŋwɛi Kojolɔ lɛ baanyɛ ekɛ eshai ni afee yɛ blema lɛ afa. No hewɔ lɛ, Abraham kɛ anɔkwafoi krokomɛi ni hi shi dani Kristo ba lɛ baaná gbohiiashitee.—Nyɛkanea Romabii 3:24, 25; Lala 32:1, 2.

Ha Abu Bo Jalɔ Amrɔ Nɛɛ

19. Mɛni hewɔ esa akɛ bɔ ni Nyɔŋmɔ na Abraham eha lɛ ashɛje mɛi babaoo amii ŋmɛnɛ lɛ?

19 Esa akɛ anɔkwa sane ni ji akɛ Nyɔŋmɔ ni yɔɔ suɔmɔ lɛ bu Abraham akɛ jalɔ lɛ ashɛje anɔkwa Kristofoi ni yɔɔ ŋmɛnɛ lɛ amii. Esoro jalɔ ni Yehowa bu Abraham lɛ yɛ jalɔi ni ebuɔ mɛi ni ekɛ mumɔ fɔɔ amɛ mu koni amɛtsɔmɔ “Kristo nanemɛi niyelɔi” lɛ anɔ lɛ he. “Atsɛ” nakai kuu lɛ ni mɛi fioo pɛ yɔɔ mli lɛ koni amɛtsɔmɔ “mɛi krɔŋkrɔŋi,” ni abuɔ amɛ akɛ “Nyɔŋmɔ bii.” (Rom. 1:7; 8:14, 17, 33) Nɔ ni tamɔɔɔ nakai lɛ, abu Abraham akɛ Yehowa “Nyɔŋmɔ shieŋtsɛ” dani ashã kpɔ̃mɔ afɔle lɛ. (Yak. 2:23; Yes. 41:8) Ni anɔkwa Kristofoi ni yɔɔ hiɛnɔkamɔ akɛ amɛbaahi shi yɛ shikpɔŋ ni aku sɛɛ aha etsɔ Paradeiso lɛ nɔ lɛ hu?

20. Mɛni Nyɔŋmɔ kpáa mɛi ni ŋmɛnɛ lɛ ebuɔ amɛ jalɔi yɛ shishinumɔ ni ekɛbu Abraham jalɔ lɛ naa lɛ gbɛ ni amɛfee?

20 “Jalɛ nɔkeenɔ” ni mɛi nɛɛ náa ‘kɛtsɔ kpɔmɔ ní yɔɔ Kristo Yesu mli lɛ nɔ’ lɛ haaa amɛná hiɛnɔkamɔ akɛ amɛbaahi shi yɛ ŋwɛi. (Rom. 3:24; 5:15, 17) Shi fɛɛ sɛɛ lɛ, amɛyɛ hemɔkɛyeli ni mli wa yɛ Nyɔŋmɔ kɛ kpɔ̃mɔnɔ ni ekɛha lɛ mli, ni amɛjieɔ amɛhemɔkɛyeli lɛ kpo kɛtsɔ nitsumɔi kpakpai anɔ. Nitsumɔi nɛɛ eko ji ‘Nyɔŋmɔ maŋtsɛyeli lɛ he sane kɛ Nuŋtsɔ Yesu Kristo he saji ni amɛshiɛɔ’ lɛ. (Bɔf. 28:31) No hewɔ lɛ, Yehowa baanyɛ ebu mɛi nɛɛ akɛ jalɔi yɛ shishinumɔ ni ekɛbu Abraham jalɔ lɛ naa. Esoro mɛi nɛɛ anɔkeenɔ—ni ji naanyobɔɔ ni bakãa amɛ kɛ Nyɔŋmɔ teŋ—lɛ yɛ “nɔkeenɔ” ni mɛi ni afɔ amɛ mu lɛ náa lɛ he. Fɛɛ sɛɛ lɛ, amɛhiɛ sɔɔ amɛnɔkeenɔ lɛ waa.

21. Mɛɛ jɔɔmɔi Yehowa suɔmɔ lɛ kɛ ejalɛsaneyeli lɛ baaha adesai aná?

21 Nɔyelɔi ni ji adesai lɛ kɛ shiwoi babaoo haa, shi jeee amɛ amɛha oná hiɛnɔkamɔ akɛ obaahi shi kɛya naanɔ yɛ shikpɔŋ lɛ nɔ. Moŋ lɛ, Jeŋ Fɛɛ Nɔyelɔ lɛ yiŋtoo ni nilee yɔɔ mli lɛ hewɔ oná hiɛnɔkamɔ nɛɛ. Yehowa miifee nibii ni baaha eyiŋtoo lɛ aba mli kɛwula shi. Nifeemɔi nɛɛ damɔ anɔkwa jalɛsaneyeli nɔ. Nɔ ni fe fɛɛ lɛ, nifeemɔi nɛɛ haa anaa Nyɔŋmɔ suɔmɔ kpele lɛ. Belɛ, eja mɔ akɛ Paulo kɛɛ akɛ: “Nyɔŋmɔ jieɔ lɛ diɛŋtsɛ esuɔmɔ ní ekɛsumɔ wɔ lɛ shi etsɔ̃ɔ, akɛ be mli ni wɔji eshafeelɔi lɛ beebe ni Kristo bagbo yɛ wɔnajiaŋ.”—Rom. 5:8.

[Shishigbɛ niŋmaa]

^ kk. 11 Ákɛ nɔkwɛmɔnɔ lɛ, aŋma susumɔ ni kɔɔ shwiei ni kulɛ Yesu baanyɛ awo lɛ he lɛ yɛ Insight on the Scriptures, Kpo 2 lɛ baafa 736, kuku 4 kɛ 5 lɛ, kɛ March 15, 2000 Buu-Mɔɔ lɛ baafa 4 kuku 4 lɛ mli.

Ani Okaiɔ?

• Mɛɛ gboshinii Adam shwiei lɛ nine shɛ nɔ, ni mɛni jɛ mli kɛba?

• Mɛɛ gbɛ nɔ atsɔ akɛ kpɔ̃mɔnɔ ni yeɔ egbɔ ha, ni mɛɛ shishinumɔ naa eji kpɔ̃mɔnɔ ni yeɔ egbɔ lɛ?

• Mɛɛ hiɛnɔkamɔ nɔkeenɔ ni haa abuɔ mɛi jalɔi lɛ eha oná?

[Nikasemɔ lɛ he Sanebimɔi]

[Mfoniri ni yɔɔ baafa 13]

Adam ni ji nuu ni eye emuu lɛ fee esha. Yesu ni ji nuu ni eye emuu lɛ kɛ “kpɔ̃mɔnɔ” ni yeɔ egbɔ ha

[Mfoniri ni yɔɔ baafa 15]

Kɛtsɔ Yesu nɔ lɛ abaanyɛ abu wɔ jalɔi—mɛɛ sanekpakpa po enɛ ji nɛkɛ!