Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Sanebimɔi ni Jɛ Kanelɔi Adɛŋ

Sanebimɔi ni Jɛ Kanelɔi Adɛŋ

 Sanebimɔi ni Jɛ Kanelɔi Adɛŋ

Beni Yesu Kristo tsu bɔfoi 12 lɛ ni amɛyashiɛ lɛ, ani ekɛɛ amɛ akɛ amɛhiɛ tsei ni amɛwo tokotai?

Mɛi komɛi wieɔ akɛ amaniɛbɔi ni yɔɔ Sanekpakpai etɛ lɛ amli ni kɔɔ tsumɔ ni Yesu tsu bɔfoi lɛ ni amɛyashiɛ lɛ he lɛ kɛ amɛhe kpãaa gbee. Shi kɛ́ wɔsusu amaniɛbɔi etɛ nɛɛ fɛɛ he jogbaŋŋ lɛ, wɔbaanyɛ wɔmu sane naa yɛ gbɛ kroko nɔ kwraa. Klɛŋklɛŋ lɛ, okɛ nɔ ni Marko ŋma lɛ ato Luka nɔ lɛ he. Marko bɔ amaniɛ akɛ: “[Yesu] wo amɛ akpɔ akɛ amɛkahiɛ nɔ ko yɛ gbɛ lɛ nɔ, ákɛ ja tso kɛkɛ; amɛkahiɛ kotoku loo aboloo loo shika yɛ amɛhɛfiinii amli; shi amɛwo tokotai, ni amɛkawo flakai enyɔ.” (Mar. 6:7-9) Luka ŋma akɛ: “Nyɛkaŋɔa nɔ ko nyɛhiɛa nyɛdɛ yɛ nyɛgbɛfãa lɛ mli, nyɛkahiɛa tso loo kotoku loo aboloo loo shika loo atadei enyɔ.” (Luka 9:1-3) Bɔ ni abɔ amaniɛ lɛ yɛ ŋmalɛi enyɔ nɛɛ mli lɛ ni haa mɛi muɔ sane naa akɛ ŋmalɛi nɛɛ kɛ amɛhe kpãaa gbee lɛ. Marko bɔ amaniɛ akɛ, akɛɛ bɔfoi lɛ ni amɛhiɛ tso ni amɛwo tokotai, shi Luka ŋma akɛ esaaa akɛ amɛhiɛɔ nɔ ko nɔ ko, amɛkahiɛ tso po. Marko tsĩ tokotai atã, shi Luka etsĩii tokotai atã kwraa.

Bɔni afee ni onu nɔ ni Yesu taoɔ etsɔɔ yɛ sane nɛɛ mli lɛ shishi lɛ, kadimɔ wiemɔi ni Sanekpakpai etɛ lɛ fɛɛ kɛtsu nii lɛ. Yɛ Luka kɛ Marko amaniɛbɔi lɛ amli, kɛ agbɛnɛ yɛ Mateo 10:5-10 lɛ, akɛɛ bɔfoi lɛ ni amɛkawo loo amɛkatao “flakai [loo atadei] enyɔ.” Ekã shi faŋŋ akɛ, bɔfoi lɛ ateŋ mɔ fɛɛ mɔ wo atade komekome. No hewɔ lɛ, esaaa akɛ amɛtaoɔ atade kroko kɛha gbɛfãa lɛ. Nakai nɔŋŋ amɛteŋ mɔ fɛɛ mɔ wo tokota momo. No hewɔ lɛ, esaaa akɛ amɛyataoɔ ekroko kɛha gbɛfãa lɛ. Ni tsei lɛ hu? Aŋma yɛ The Jewish Encyclopedia lɛ mli akɛ: “Etamɔ nɔ ni blema Hebribii lɛ hu fɔɔ tso hiɛmɔ.” (1 Mose 32:11) Marko tsi tã akɛ bɔfoi lɛ ‘akahiɛ nɔ ko yɛ gbɛ lɛ nɔ’ ákɛ ja tso ni amɛhiɛ beni Yesu kɛ famɔ lɛ ha amɛ lɛ kɛkɛ. No hewɔ lɛ, mɛi ni ŋmala Sanekpakpai lɛ miima Yesu gbɛtsɔɔmɔ akɛ bɔfoi lɛ akaha amɛsɛɛ gbala shi, kɛtsɔ nibii krokomɛi ni amɛaatao kɛha gbɛfãa lɛ nɔ lɛ nɔ mi.

Mateo, ni nu Yesu famɔ nɛɛ yɛ etoiiaŋ ní eŋma efɔ̃ shi lɛ wiemɔi lɛ ma oti nɛɛ nɔ mi. Yesu kɛɛ akɛ: ‘Nyɛkataoa shika loo jwiɛtɛi loo akɔɔble nyɛwoa nyɛhɛfĩinii amli; asaŋ nyɛkataoa gbɛfãa kotoku, loo flakai enyɔ, loo tokotai, loo tso tete; shi nitsulɔ lɛ eŋmaa sa lɛ.’ (Mat. 10:9, 10) Ni tokotai ni bɔfoi lɛ wo kɛ tsei ni amɛhiɛ yɛ amɛdɛŋ lɛ hu? Yesu ekɛɛɛ amɛ akɛ amɛshɛrɛ nɔ ni amɛyɔɔ momo lɛ amɛshwie, shi no mli lɛ eekɛɛ amɛ ni amɛkatao nibii nɛɛ ekrokomɛi. Mɛni hewɔ ekɛ famɔ ni tamɔ nakai ha lɛ? Ejaakɛ “nitsulɔ lɛ eŋmaa sa lɛ.” No ji sane oti ni yɔɔ Yesu famɔ lɛ mli, ni enɛ kɛ hewalɛwoo ni ekɛha yɛ Gɔŋ nɔ Shiɛmɔ lɛ mli akɛ amɛkafee yeyeeye yɛ nɔ ni amɛaanu, nɔ ni amɛaaye, loo nɔ ni amɛaawo lɛ hewɔ lɛ kpãa gbee.—Mat. 6:25-32.

Eyɛ mli akɛ kɛ́ mɔ ko kane Sanekpakpai lɛ mli amaniɛbɔi nɛɛ klɛŋklɛŋ kwraa lɛ etamɔ nɔ ni amɛkɛ amɛhe kpãaa gbee moŋ, shi fɛɛ miiwie oti kome too lɛ he. Esa akɛ bɔfoi lɛ kɛ nɔ ni amɛyɔɔ lɛ nɔŋŋ afã gbɛ lɛ, ni esaaa akɛ amɛgbaa amɛhe naa yɛ nibii krokomɛi ní amɛaatao lɛ he. Mɛni hewɔ? Ejaakɛ Yehowa baakwɛ amɛ.

 Namɛi ji “awula, kɛ awulai tete” ni Salomo tsi amɛtã lɛ?—Jaj. 2:8, NW.

Wɔnyɛŋ wɔwie kɛ nɔmimaa moŋ, shi ebaanyɛ efee akɛ amɛji yei hiɛnaanɔbii ni kɛ Salomo ná sharamɔ yɛ emaŋtsɛ shĩa lɛ.

Jajelɔ yitso 2 lɛ mli lɛ, Salomo tsĩ nibii srɔtoi ni enyɛ efee, ní tsũi babaoo ni emamɔ lɛ fata he lɛ tã. Ekɛfata he akɛ: “Mibua jwiɛtɛi kɛ shika hu naa miha mihe, kɛ maŋtsɛmɛi kɛ shikpɔji anɔ jwetrii. Miná hii lalɔi kɛ yei lalɔi, kɛ gbɔmɛi abii atsuinaa nii, awula, kɛ awulai tete.”—Jaj. 2:8, NW.

Mɛi ni tsɔɔ Biblia mli lɛ ateŋ mɛi babaoo susuɔ akɛ “awulai” ni Salomo tsĩ tã lɛ ji maŋsɛɛ ŋamɛi kɛ hemɛi ni ená yɛ afii komɛi asɛɛ lɛ, yei ni ha ekɛ ehe wo apasa jamɔ mli lɛ. (1 Maŋ. 11:1-4) Shi naagba yɛ niiamlitsɔɔmɔ nɛɛ he. Beni Salomo ŋma wiemɔi nɛɛ lɛ, no mli lɛ ekɛ “awula, kɛ awulai tete” lɛ eshara momo. Ni yɛ nakai beaŋ lɛ, Yehowa kpɛlɛɔ enɔ lolo, ejaakɛ no mli lɛ Nyɔŋmɔ kɛ emumɔ lɛ miitsirɛ lɛ koni eŋma Biblia mli woji lɛ ekomɛi. Enyɛŋ ekɔ sɛɛ mli beni ená maŋsɛɛ ŋamɛi kɛ hemɛi ohai abɔ ni no ha ekɛ ehe wo apasa jamɔ mli lɛ he.

Salomo wie yɛ Jajelɔ wolo lɛ mli akɛ, ‘etao ní ena wiemɔi ni ŋɔɔ, ni nɔ ni eŋma nɛɛ, jalɛ kɛ anɔkwale wiemɔi ni.’ (Jaj. 12:10) Ŋwanejee ko bɛ he akɛ ele Hebri wiemɔi kɛha “ŋa,” “maŋnyɛ,” kɛ “hemɔ,” ejaakɛ ekɛ wiemɔi nɛɛ tsu nii yɛ woji ni akɛ mumɔ tsirɛ lɛ ni eŋmala lɛ amli. (Abɛi 5:18; 12:4; 18:22; Jaj. 9:9; Salomo Lala 6:8, 9) Shi ekɛ wiemɔi ni ele nɛɛ tsuuu nii yɛ Jajelɔ 2:8 lɛ.

Akɛ Hebri wiemɔ ko ní afɔɔɔ kɛnitsumɔ tsu nii yɛ Hebri wiemɔi ni atsɔɔ shishi akɛ “awula, kɛ awulai tete” lɛ mli, ni yɛ Biblia lɛ mli lɛ, anaa wiemɔ nɛɛ (bɔ ni aŋmaa lɛ kɛ́ ekɔɔ nɔ̃ kome he kɛ bɔ ni aŋmaa lɛ kɛ́ ekɔɔ nibii pii ahe lɛ) yɛ Jajelɔ 2:8 lɛ pɛ. Woloŋlelɔi kpɛlɛɔ nɔ akɛ aleee shishinumɔ tuuntu ni yɔɔ wiemɔ nɛɛ sɛɛ. Biblia shishitsɔɔlɔi babaoo muɔ sane naa akɛ wiemɔi ni yɔɔ Jajelɔ 2:8 lɛ kɔɔ yei ahe—yoo ko, kɛ agbɛnɛ yei krokomɛi loo yoo ko agbojee he. Bɔ ni atsɔɔ shishi yɛ New World Translation lɛ mli akɛ, “awula, kɛ awulai tete” lɛ kɛ susumɔ nɛɛ kpãa gbee.

Salomo fee gbɛ́i aahu akɛ maŋnyɛ ko ni jɛ Sheba, ni ji maŋ ko ni yɔɔ nii babaoo lɛ nu ehe, eyasara lɛ, ni maŋnyɛ lɛ naa kpɛ ehe waa. (1 Maŋ. 10:1, 2) Sane nɛɛ haa wɔnaa shishinumɔ ko ni baanyɛ ahi Salomo wiemɔi ni ji “awula, kɛ awulai tete” lɛ sɛɛ. Ekolɛ ewiemɔi lɛ kɔɔ yei hiɛnaanɔbii ni ekɛ amɛná sharamɔ yɛ emaŋtsɛ we lɛ yɛ afii babaoo ni no mli lɛ Nyɔŋmɔ kpɛlɛɔ enɔ lɛ amli lɛ he.