Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Oyɛ Yiŋtoo Hewɔ ni Esa akɛ Oná Miishɛɛ

Oyɛ Yiŋtoo Hewɔ ni Esa akɛ Oná Miishɛɛ

 Oyɛ Yiŋtoo Hewɔ ni Esa akɛ Oná Miishɛɛ

KƐJƐ walayibii ni ji bibioo fe fɛɛ lɛ nɔ kɛyashi ŋulamii kushai amli ŋulamii kushai wujiwuji anɔ lɛ, anaa akɛ ato adebɔɔ nii ahe gbɛjianɔ jogbaŋŋ. Enɛ bɛ naakpɛɛ, ejaakɛ Bɔlɔ lɛ ‘jeee sakasakafeemɔ Nyɔŋmɔ.’ (1 Kor. 14:33) Bɔ ni Nyɔŋmɔ eto ewebii lɛ ahe gbɛjianɔ kɛha jamɔ lɛ hu yɛ naakpɛɛ. Susumɔ bɔ ni Yehowa efee enɛ eha lɛ he okwɛ. Ebua ŋwɛi bɔfoi kɛ adesai akpekpei ohai abɔ ni nyɛɔ amɛkpɛɔ yiŋ amɛhaa amɛhe, ní efee ekome yɛ jamɔ krɔŋŋ mli lɛ, anaa ewo jeŋ fɛɛ asafo kome mli. Kwɛ bɔ ni enɛ yɔɔ fɛo waa!

Yɛ blema Israel lɛ, akɛ Yerusalem, he ni Yehowa sɔlemɔtsu lɛ yɔɔ ni maŋtsɛ ni efɔ lɛ mu lɛ hi lɛ, fee Nyɔŋmɔ asafo lɛ fã ni yɔɔ shikpɔŋ lɛ nɔ lɛ he okadi. Israelnyo ko ni aŋɔ lɛ nom kɛtee Babilon lɛ tsɔɔ bɔ ni enuɔ he ehaa yɛ maŋ krɔŋkrɔŋ lɛ he lɛ mli akɛ: “Kɛ mikaiii bo, ni mibuuu Yerusalem fe mimiishɛɛnɔ̃ titri lɛ, ha mililɛi akpɛtɛ midaaŋ!”—Lala 137:6.

Ani nakai onuɔ he yɛ Nyɔŋmɔ asafo lɛ he ŋmɛnɛ? Ani no haa onáa miishɛɛ fe nɔ fɛɛ nɔ? Ani obii lɛ le Nyɔŋmɔ asafo lɛ fã ni yɔɔ shikpɔŋ lɛ nɔ lɛ he yinɔsane kɛ bɔ ni etsuɔ nii ehaa lɛ? Ani amɛhiɛ sɔɔ akɛ amɛfata nyɛmimɛi ni ji Yehowa Odasefoi ni yɔɔ jeŋ muu lɛ fɛɛ lɛ ahe? (1 Pet. 2:17) Mɛni hewɔ okɛ ŋaawoi ni nyiɛ sɛɛ nɛɛ tsuuu nii yɛ gbɛkɛ Weku Jamɔ ni nyɛfeɔ lɛ mli bɔni afee ni oweku lɛ hiɛ asɔ Yehowa asafo lɛ babaoo?

Gbaa “Blema” Saji Lɛ

Daa afi lɛ, Israelbii lɛ yabuaa amɛhe naa kɛyeɔ Hehoo lɛ. Beni ato gbijurɔyeli nɛɛ shishi lɛ, Mose fã Israelbii lɛ akɛ: “Kɛji wɔ́ loo wɔsɛɛ ni obi bio akɛ: Mɛni ji enɛ? lɛ, okɛɛ lɛ akɛ: Nineshiwalɛ naa Yehowa jie wɔ kɛjɛ Mizraim, yɛ nyɔji awe lɛ.” (2 Mose 13:14) Esaaa akɛ Israelbii lɛ hiɛ kpaa bɔ ni Yehowa kɛ amɛye eha lɛ nɔ. Ekã shi faŋŋ akɛ, tsɛmɛi ni ji Israelbii lɛ ateŋ babaoo ye Mose famɔ lɛ nɔ. Yinɔi asɛɛ lɛ, Israelnyo ko sɔle akɛ: “Nyɔŋmɔ, wɔnu kɛ wɔtoii, wɔtsɛmɛi egba wɔ, nɔ̃ nii ni otsu yɛ amɛyinɔ, blema lɛ.”—Lala 44:2.

Yɛ gbekɛbii ni yɔɔ ŋmɛnɛ lɛ hu agbɛfaŋ lɛ, nibii ni Yehowa Odasefoi tsɔmɔ mli yɛ nɔ ni fe afii 100 ní eho lɛ amli lɛ tamɔ “blema” saji. Te obaafee tɛŋŋ ogbala obii lɛ ajwɛŋmɔ kɛba yinɔsaji nɛɛ anɔ yɛ gbɛ ni baaha amɛhe amɛye akɛ eba mli lɛɛlɛŋ lɛ nɔ? Fɔlɔi komɛi kɛ Jehovah’s Witnesses—Proclaimers of God’s Kingdom, Yearbook lɛ, wala shihilɛ mli saji ni aŋmala yɛ wɔwoji lɛ amli, kɛ amaniɛbɔi krokomɛi ni kɔɔ teokrase he yinɔsaji ahe ni wɔ-DVD hee ni kɔɔ Nyɔŋmɔ webii ni yɔɔ ŋmɛnɛ lɛ ahe lɛ fata he lɛ tsuɔ yiŋtoo nɛɛ he nii. Vidioi ni tsɔɔ bɔ ni awa wɔnyɛmimɛi lɛ ayi yɛ tsutsu Soviet Union kɛ beni Nazibii lɛ yeɔ Germany nɔ lɛ haa wekui leɔ bɔ ni akɛ he fɔ̃ɔ Yehowa nɔ yɛ jaramɔ shihilɛi amli. Okɛ saji ni tamɔ nɛkɛ afata gbɛkɛ Weku Jamɔ ni nyɛfeɔ lɛ he. No baawaje obii lɛ ahemɔkɛyeli lɛ koni kɛ́ amɛkɛ amɛnɔkwayeli lɛ he kaa kpe lɛ amɛnyɛ amɛye nɔ.

Shi kɛ́ owie yinɔsane lɛ he kɛkɛ lɛ, ekolɛ etsɛŋ ni gbekɛbii lɛ ajwɛŋmɔ baaje nikasemɔ lɛ nɔ. No hewɔ lɛ, ha obii lɛ kɛ amɛhe awo mli. Ákɛ nɔkwɛmɔnɔ lɛ, obaanyɛ oha obinuu ahala maŋ ko ni esumɔɔ, ni ekase nakai maŋ lɛ teokrase yinɔsane he nii, koni ebagba nyɛweku lɛ. Kɛ́ Kristofoi komɛi ni kɛ afii babaoo esɔmɔ yɛ anɔkwayeli mli yɛ nyɛsafo lɛ mli lɛ, obaanyɛ ofɔ̃ amɛnine ni amɛbafata nyɛhe gbɛkɛ ko kɛ́ nyɛmiifee weku jamɔ lɛ.  Obaanyɛ oha obiyoo abi amɛ saji yɛ gbɛ ni baaha amɛgba nyɛ amɛniiashikpamɔi lɛ nɔ. Aloo obaanyɛ oha obi lɛ atɛŋ teokrase yinɔsaji komɛi ni sa kadimɔ tamɔ nitsumɔhe nine ko maa, majimaji ateŋ kpee ko, loo bɔ ni akɛ phonograph tsu nii yɛ shĩa kɛ shĩa sɔɔmɔ nitsumɔ lɛ mli.

Le Bɔ ni ‘Henɔ Fɛɛ Henɔ Tsuɔ Nii’ Ehaa

Bɔfo Paulo kɛ Kristofoi asafo lɛ to ‘gbɔmɔtso muu ni mɔmɔɔ ehe shimɔshimɔɔ ehe nɔ ni etsɔ̃ɔ nɔ ni jɛɔ talɔ fɛɛ talɔ mli lɛ nɔ etsaratsaraa ehe nɔ yɛ henɔ fɛɛ henɔ nitsumɔ susumɔ lɛ naa, ni ehaa gbɔmɔtso lɛ daa, ni emaa ehe yɛ suɔmɔ mli’ lɛ he. (Efe. 4:16) Kɛ́ wɔkase bɔ ni adesa gbɔmɔtso lɛ tsuɔ nii ehaa lɛ he nii lɛ, ehaa wɔhiɛ sɔɔ wɔ-Bɔlɔ lɛ babaoo ni bulɛ ni wɔyɔɔ kɛha lɛ lɛ mli kwɔɔ. Nakai nɔŋŋ kɛ́ wɔpɛi bɔ ni Kristofoi asafo lɛ tsuɔ nii ehaa lɛ mli lɛ, wɔnaa kpɛɔ wɔhe yɛ “Nyɔŋmɔ nilee ni fá babaoo lɛ” he.—Efe. 3:10.

Yehowa tsɔɔ wɔ bɔ ni esafo lɛ, ní fã ni yɔɔ ŋwɛi lɛ fata he lɛ tsuɔ nii ehaa. Ákɛ nɔkwɛmɔnɔ lɛ, ekɛɔ wɔ akɛ Nyɔŋmɔ jie ninaa ko kpo etsɔɔ Yesu Kristo klɛŋklɛŋ, ni Kristo hu ‘kɛtsu ebɔfo lɛ ni ekɛbatsɔɔ etsulɔ Yohane, mɔ ni ye odase lɛ.’ (Kpoj. 1:1, 2) Kɛ́ Nyɔŋmɔ haa wɔleɔ bɔ ni esafo lɛ fã ni yɔɔ ŋwɛi lɛ tsuɔ nii ehaa lɛ, ani esumɔŋ ni wɔle bɔ ni esafo lɛ fã ni yɔɔ shikpɔŋ lɛ nɔ lɛ ‘henɔ fɛɛ henɔ tsuɔ nii’ ehaa lɛ?

Ákɛ nɔkwɛmɔnɔ lɛ, kɛ́ etsɛŋ ni kpokpaa nɔkwɛlɔ lɛ baabasara nyɛsafo lɛ, mɛni hewɔ okɛ oweku lɛ susuuu nɔkwɛlɔi gbɛfalɔi anitsumɔi kɛ jɔɔmɔi ni amɛnáa yɛ amɛsɔɔmɔ nitsumɔ lɛ mli lɛ he? Mɛɛ gbɛ nɔ amɛyeɔ amɛbuaa wɔteŋ mɔ fɛɛ mɔ? Sanebimɔi krokomɛi ni nyɛbaanyɛ nyɛsusu he nɛ: Mɛni hewɔ esa akɛ wɔbu wɔshiɛmɔyaa he akɔntaa lɛ? Te Nyɔŋmɔ asafo lɛ feɔ tɛŋŋ enáa shika kɛtsuɔ saji ahe nii? Te ato Nɔyeli Kuu lɛ he gbɛjianɔ aha tɛŋŋ, ni mɛɛ gbɛ nɔ etsɔɔ ekɛ mumɔŋ niyenii haa wɔ?

Kɛ́ wɔle bɔ ni ato Yehowa webii lɛ ahe gbɛjianɔ aha lɛ, kɛ́ hooo lɛ wɔnáa he sɛɛ yɛ gbɛi etɛ anɔ: Wɔhiɛ baasɔ mɛi ni kɛ amɛhe shãa afɔle amɛhaa wɔ lɛ babaoo. (1 Tes. 5:12, 13) No baatsirɛ wɔ koni wɔfi teokrase gbɛjianɔtoi asɛɛ. (Bɔf. 16:4, 5) Kɛfata he lɛ, kɛ́ wɔna akɛ mɛi ni nyiɛɔ wɔhiɛɔ lɛ jɛɔ Ŋmalɛi lɛ amli ni amɛkpɛɔ amɛyiŋ ni amɛtoɔ gbɛjianɔ kɛhaa wɔ lɛ, ebaaha hekɛnɔfɔ̃ɔ ni wɔyɔɔ yɛ amɛmli lɛ mli awa.—Heb. 13:7.

“Nyɛkpaa Emli Mɔji lɛ Amli”

“Nyɛnyiɛa Zion he ni nyɛbɔlea lɛ kpula; nyɛkanea emli mɔji ni kwɔlɔ lɛ; nyɛtɛ̃jea nyɛhiɛ nyɛkwɛa egbogboi lɛ, nyɛkpaa emli mɔji lɛ amli, koni nyɛgba yinɔbii ni baa yɛ sɛɛ lɛ.” (Lala 48:13, 14) Lalatsɛ lɛ kɛ elala nɛɛ wo Israelbii lɛ hewalɛ ni amɛkpa Yerusalem fɛɛ koni amɛle Yerusalem shikamɔ jogbaŋŋ. Ani obaanyɛ ofee bɔ ni Israel wekui ni afi fɛɛ afi lɛ amɛfãa gbɛ kɛyaa maŋ krɔŋkrɔŋ lɛ mli kɛha gbijurɔyelii ni amɛnaa bɔ ni sɔlemɔtsu lɛ yɔɔ fɛo waa lɛ nu he amɛha lɛ he mfoniri yɛ ojwɛŋmɔ mli? Ŋwanejee ko bɛ he akɛ, no tsirɛ amɛ ‘ni amɛgba yinɔbii ni ba yɛ sɛɛ lɛ.’

Susumɔ Sheba maŋnyɛ, mɔ ni shishijee beni abɔ lɛ amaniɛ akɛ Salomo nɔyeli lɛ nɔ bɛ, ni ákɛ Salomo yɛ nilee babaoo lɛ eheee eyeee lɛ hu he okwɛ. Mɛni ha eyiŋ tsɔ akɛ amaniɛ ni abɔ lɛ lɛ ji anɔkwale lɛ? Ekɛɛ akɛ: “Miheee amɛwiemɔi lɛ miyeee, kɛyashi miba ní mibana kɛ mihiŋmɛii nɛɛ.” (2 Kron. 9:6) Hɛɛ, nɔ ni wɔnaa kɛ ‘wɔhiŋmɛii’ lɛ baanyɛ aná wɔnɔ hewalɛ waa.

Mɛɛ gbɛ nɔ obaanyɛ oha obii lɛ kɛ ‘amɛhiŋmɛii’ ana Yehowa asafo lɛ mli nibii ni yɔɔ naakpɛɛ lɛ? Kɛ́ Yehowa Odasefoi anitsumɔhe nine ko bɛŋkɛ nyɛshĩa lɛ, nyɛbɔa mɔdɛŋ nyɛyasaraa jɛmɛ. Ákɛ nɔkwɛmɔnɔ lɛ, heni Mandy kɛ Bethany da yɛ lɛ kɛ Betel shĩa ni yɔɔ amɛmaŋ lɛ mli lɛ teŋ jɛkɛmɔ ji kilomitai 1,500. Fɛɛ sɛɛ lɛ, amɛfɔlɔi toɔ gbɛjianɔ ni amɛkɛ amɛ yasaraa jɛmɛ, titri lɛ beni amɛbiyei lɛ daraa lɛ. Mandy kɛ Bethany tsɔɔ mli akɛ: “Dani wɔbaayasara Betel lɛ, no mli lɛ wɔsusuɔ akɛ jɛmɛ jeee he ko ni yɔɔ miishɛɛ, ni ákɛ mɛi ni edara pɛ ni yaa jɛmɛ. Shi wɔna oblahii kɛ oblayei ni kɛ miishɛɛ miitsu nii dɛŋdɛŋ kɛmiiha Yehowa yɛ jɛmɛ! Wɔna akɛ Yehowa asafo lɛ kɔɔ nibii  babaoo he fe shikpɔŋkuku bibioo ni wɔyɔɔ mli lɛ pɛ he, ni be fɛɛ be ni wɔyasaraa Betel lɛ ewoɔ wɔ hewalɛ yɛ mumɔŋ.” Akɛni Mandy kɛ Bethany na bɔ ni ato Nyɔŋmɔ asafo lɛ he gbɛjianɔ lɛ kɛ amɛhiŋmɛii hewɔ lɛ, no tsirɛ amɛ ni amɛkɛ amɛhe wo gbɛgbamɔ nitsumɔ lɛ mli, ni afɔ̃ amɛ nine po ni amɛyasɔmɔ yɛ Betel be kukuoo.

Gbɛ kroko yɛ ni wɔbaanyɛ wɔtsɔ nɔ ‘wɔna’ bɔ ni Yehowa asafo lɛ tsuɔ nii ehaa, shi blema Israelbii lɛ náaa nakai hegbɛ. Nyɛsɛɛ nɛɛ, afee vidioi kɛ DVD srɔtoi ní haa aleɔ bɔ ni Nyɔŋmɔ asafo lɛ fãi srɔtoi lɛ tsuɔ nii amɛhaa lɛ aha Nyɔŋmɔ webii lɛ, nomɛi ji: Jehovah’s Witnesses—Organized to Share the Good News, Our Whole Association of Brothers, To the Ends of the Earth, United by Divine Teaching. Kɛ́ bo kɛ oweku lɛ na bɔ ni Betelbii, mɛi ni yeɔ amɛbuaa mɛi ni oshara enina amɛ, maŋsɛɛ sanekpakpa shiɛlɔi, kɛ nyɛmimɛi ni toɔ kpokpaa nɔ kpeei ahe gbɛjianɔ lɛ tsuɔ nii dɛŋdɛŋ lɛ, ekã shi faŋŋ akɛ hiɛsɔɔ ni oyɔɔ yɛ otsuiŋ kɛha Kristofoi asafo lɛ fáa babaoo.

Yehowa Odasefoi asafo fɛɛ asafo yeɔ ebuaa ni ashiɛɔ sanekpakpa lɛ yɛ shikpɔŋkuku ni nakai asafo lɛ yɔɔ mli lɛ mli, ni eyeɔ ebuaa Odasefoi ni yɔɔ nakai shikpɔŋkuku lɛ mli hu. Shi ŋɔɔ be ni okɛ oweku lɛ asusu ‘nyɛmimɛi ni yɔɔ je lɛŋ’ fɛɛ lɛ ahe. Enɛ baaye abua bo kɛ obii lɛ koni nyɛya nɔ ‘nyɛdamɔ shi shiŋŋ yɛ hemɔkɛyeli lɛ mli,’ ni nyɛna akɛ nyɛyɛ yiŋtoo hewɔ ni esa akɛ nyɛná miishɛɛ.—1 Pet. 5:9.

 [Akrabatsa/Mfoniri ni yɔɔ baafa 18]

Nyɔŋmɔ Asafo Lɛ Saneyitso ko ni Sa Kasemɔ

Wɔyɛ nibii babaoo ni baaye abua wɔ ni wɔkase Yehowa asafo lɛ yinɔsane kɛ bɔ ni ato he gbɛjianɔ aha lɛ he nii babaoo. Sanebimɔi ni nyiɛ sɛɛ nɛɛ baanyɛ aye abua nyɛ ni nyɛna nibii ni nyɛbaanyɛ nyɛkase yɛ Yehowa asafo lɛ he:

Mɛɛ gbɛ nɔ nɔkwɛlɔi gbɛfalɔi anitsumɔ lɛ je shishi yɛ wɔŋmɛnɛŋmɛnɛ beaŋ? Jehovah’s Witnesses—Proclaimers of God’s Kingdom, baafa 222-227.

Mɛni sa kadimɔ yɛ afi 1941 Theocratic Assembly kpee lɛ “Gbekɛbii Agbi” lɛ he?Jehovah’s Witnesses—Proclaimers of God’s Kingdom, baafa 86, 88.

Mɛɛ gbɛ nɔ Nɔyeli Kuu lɛ tsɔɔ ekpɛɔ eyiŋ?“Bearing Thorough Witness” About God’s Kingdom, baafa 108-114.