Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Okɛ Susumɔi ni Ejaaa Akashishiu Ohe

Okɛ Susumɔi ni Ejaaa Akashishiu Ohe

 Okɛ Susumɔi ni Ejaaa Akashishiu Ohe

“MƐƐBA ofee enɛ?” Enɛ ji sane ni Nyɔŋmɔ bi Hawa beni eye tso ni agu eyeli lɛ nɔ yibii lɛ eko lɛ. Hawa to he akɛ: “Onufu lɛ laka mi, ni miye.” (1 Mose 3:13) Sɛɛ mli lɛ, atsɛ Satan, ni ji onufu ni le ŋaa ni ha Hawa gbo Nyɔŋmɔ nɔ toi lɛ akɛ: “Blema onufu lɛ . . . ní shishiuɔ jeŋ muu lɛ fɛɛ lɛ.”—Kpoj. 12:9.

Amaniɛbɔɔ nɛɛ ni yɔɔ Mose Klɛŋklɛŋ Wolo lɛ mli lɛ wie Satan he akɛ eji akpatsɛ ko ni foɔ sane etãa koni ekɛlaka mɛi ni hiɛ bɛ amɛhe nɔ lɛ. Hawa ha Satan laka lɛ. Fɛɛ sɛɛ lɛ, esaaa akɛ wɔsusuɔ akɛ Satan pɛ ji mɔ ni baanyɛ alaka wɔ. Biblia lɛ hu bɔɔ wɔ kɔkɔ akɛ wɔbaanyɛ wɔkɛ susumɔ ni ejaaa ‘ashishiu wɔ diɛŋtsɛ wɔhe.’—Yak. 1:22.

Ekolɛ wɔbaasusu akɛ ebaawa loo enyɛŋ eba po akɛ wɔ diɛŋtsɛ wɔbaashishiu wɔhe. Shi ekã shi faŋŋ akɛ, yiŋtoo ko hewɔ Nyɔŋmɔ ha abɔ wɔ nakai kɔkɔ lɛ. No hewɔ lɛ, esa akɛ wɔsusu gbɛ nɔ ni wɔbaanyɛ wɔtsɔ wɔshishiu wɔ diɛŋtsɛ wɔhe kɛ susumɔi ni ejaaa ni baanyɛ alaka wɔ lɛ he. Ŋmalɛ mli nɔkwɛmɔnɔ ko baanyɛ aye abua wɔ.

Amɛshishiu Amɛ Diɛŋtsɛ Amɛhe

Yɛ aaafee afi 537 D.Ŋ.B. lɛ, Koresh Kpeteŋkpele ni jɛ Persia lɛ wo akpɔ koni Yudafoi ni aŋɔ amɛ nom kɛtee Babilon lɛ aku amɛsɛɛ kɛya Yerusalem ni amɛyama sɔlemɔtsu lɛ ekoŋŋ. (Ezra 1:1, 2) Yɛ afi ni nyiɛ sɛɛ lɛ mli lɛ, Yudafoi lɛ to sɔlemɔtsu hee lɛ faneshi lɛ shishi taakɛ Yehowa kpaa gbɛ lɛ. Mɛi ni amɛku amɛsɛɛ kɛjɛ nomŋɔɔ mli nɛɛ ná miishɛɛ ni amɛjie Yehowa yi akɛni eha amɛnyɛ amɛto tsu ni he hiaa nɛɛ faneshi lɛ shishi lɛ hewɔ. (Ezra 3:8, 10, 11) Shi etsɛɛɛ ni amɛkɛ sɔlemɔtsu lɛ maa lɛ he shiteekɛwoo kpe, ni amɛnijiaŋ je wui. (Ezra 4:4) Beni amɛku sɛɛ kɛba lɛ sɛɛ aaafee afii 15 lɛ, nɔyelɔi ni yɔɔ Persia lɛ wo akpɔ akɛ akama tsu ko kwraa yɛ Yerusalem. Amralofoi ni kwɛɔ Yerusalem kɛ ehewɔŋ kpokpai lɛ anɔ lɛ tee Yerusalem koni amɛyakwɛ ni akɛ akpɔ nɛɛ atsu nii, ni “amɛtsĩ [Yudafoi lɛ] gbɛ yɛ nɔnyɛɛ kɛ hewalɛ naa.”—Ezra 4:21-24.

Shiteekɛwoo nɛɛ ni Yudafoi lɛ kɛkpe lɛ ha amɛkɛ susumɔ ni ejaaa shishiu amɛ diɛŋtsɛ amɛhe. Amɛkɛɛkɛɛ amɛhe akɛ: “Be lɛ shɛko, be ni akɛaama Yehowa we lɛ!” (Hag. 1:2) Amɛmu sane naa akɛ Nyɔŋmɔ sumɔɔɔ ni amaa sɔlemɔtsu lɛ amrɔ nɔŋŋ. Yɛ nɔ najiaŋ ni amɛaabɔ mɔdɛŋ amɛfee Nyɔŋmɔ suɔmɔnaa nii lɛ, amɛshi amɛsɔɔmɔ nitsumɔ lɛ ni amɛha amɛ diɛŋtsɛ amɛshĩai ni amɛaasaa lɛ hé amɛjwɛŋmɔ fɛɛ. Nyɔŋmɔ gbalɔ Hagai bi amɛ kpoo akɛ: “Aso nyɛ lɛ eshɛ be eha nyɛ, ni nyɛhiɔ nyɛtsui ni asɛŋ nɔ lɛ amli, beni nɛkɛ shĩa [Yehowa sɔlemɔtsu] nɛɛ kã shi amaŋfɔ lɛ lo?”—Hag. 1:4.

Ani oona nikasemɔ ko yɛ nɔkwɛmɔnɔ nɛɛ mli? Kɛ́ wɔyayɔseee nɔ ni Nyɔŋmɔ yiŋtoo lɛ biɔ ni wɔfee yɛ be pɔtɛɛ ko mli lɛ, wɔnaŋ bɔ ni Nyɔŋmɔjamɔ nifeemɔi ahe hia ha, ni wɔ diɛŋtsɛ wɔtaomɔ nii baaha wɔje wɔŋɛlɛ nɔ. Ákɛ nɔkwɛmɔnɔ lɛ, ŋɔɔ lɛ akɛ ookpa gbɔi komɛi agbɛ. Enɛ baanyɛ eha okɛ oyaiyeli atsu nibii komɛi ni he baahia koni onyɛ oto amɛ yɛ oshĩa lɛ ahe nii. Kɛkɛ ni awó otoi nɔ akɛ ogbɔi lɛ asɛɛ baagbala shi fioo. Ani obaakpa nɔ ni ofeɔ koni onyɛ oto amɛ yɛ oshĩa lɛ feemɔ?

Shi kaimɔ akɛ, Hagai kɛ Zakaria ye amɛbua Yudafoi lɛ koni amɛna akɛ loloolo lɛ, Yehowa miisumɔ ni amɛma sɔlemɔtsu lɛ amrɔ nɔŋŋ. Hagai wo amɛ hewalɛ akɛ: “Nyɛ, maŋbii fɛɛ nyɛwajea nyɛhe. . . . Nyɛtsua nii.” (Hag. 2:4,  Ga Biblia hee) Esa akɛ amɛya nɔ amɛma sɔlemɔtsu lɛ, kɛ nɔmimaa akɛ Nyɔŋmɔ mumɔ lɛ baafĩ amɛsɛɛ. (Zak. 4:6, 7) Ani nɔkwɛmɔnɔ nɛɛ baanyɛ aye abua wɔ koni wɔkamu saji anaa yɛ gbɛ ni ejaaa nɔ yɛ Yehowa gbi lɛ he?—1 Kor. 10:11.

Okɛ Susumɔ ni Ja Aye Susumɔ ni Ejaaa Najiaŋ

Bɔfo Petro wie gbɛjianɔ ni Yehowa eto koni ekɛ “ŋwɛi hee kɛ shikpɔŋ hee” aba lɛ he yɛ ewolo ni ji enyɔ lɛ mli. (2 Pet. 3:13) Ekɛɛ hefɛoyelɔi komɛi eha mɛi ayiŋ miifee amɛ kɔshikɔshi akɛ Nyɔŋmɔ kɛ ehe baawo adesai asaji amli loo ekɛ ehe woŋ mli. Hefɛoyelɔi nɛɛ wie yɛ gbɛ ni ejaaa nɔ akɛ nɔ ko nɔ ko baŋ, ni akɛ “bɔ ni nibii yɔɔ kɛjɛ jeŋbɔɔ shishijee mli lɛ, nakai nɔŋŋ amɛyɔɔ.” (2 Pet. 3:4) Petro miisumɔ ni eye ebua Kristofoi koni amɛkaná susumɔ ni ejaaa nɛɛ. Eŋma akɛ: ‘Mikɛ kaimɔ miitsĩɛ nyɛjwɛŋmɔ krɔŋŋ lɛ hiɛ.’ Ekai enyɛmimɛi Kristofoi lɛ akɛ hefɛoyelɔi lɛ asusumɔ lɛ ejaaa. Be ko ni eho lɛ, Nyɔŋmɔ kɛ ehe wo adesai asaji amli kɛtsɔ nu afua ko ni ekɛkpata nibii ahiɛ yɛ jeŋ fɛɛ lɛ nɔ.—2 Pet. 3:1, 5-7.

Yɛ afi 520 D.Ŋ.B. lɛ, Hagai wo Yudafoi ni nijiaŋ eje wui ní amɛkpa sɔlemɔtsu lɛ maa lɛ ekãa yɛ nakai gbɛ nɔŋŋ nɔ. Ebɔ amɛ kɔkɔ akɛ: “Nyɛjwɛŋa nyɛgbɛi lɛ ahe!” (Hag. 1:5) Ekai enyɛmimɛi Nyɔŋmɔjalɔi lɛ yɛ Nyɔŋmɔ yiŋtoi kɛ shiwoi ni kɔɔ Nyɔŋmɔ webii lɛ ahe lɛ he, ni ekɛtsiɛ̃ amɛjwɛŋmɔ lɛ hiɛ. (Hag. 1:8; 2:4, 5) Hewalɛwoo nɛɛ sɛɛ etsɛɛɛ nɔŋŋ lɛ, amɛbɔi sɔlemɔtsu lɛ maa ekoŋŋ yɛ akpɔ ni awo akɛ amɛkama lɛ fɛɛ sɛɛ. Shikome ekoŋŋ lɛ, henyɛlɔi lɛ bɔ mɔdɛŋ akɛ amɛbaatsĩ tsumaa lɛ naa, shi amɛyayeee omanye. Ajie naatsii lɛ kɛjɛ jɛmɛ, ni yɛ afii enumɔ mli lɛ agbe sɔlemɔtsu lɛ maa lɛ naa.—Ezra 6:14, 15; Hag. 1:14, 15.

Bɔ ni Wɔɔfee Wɔjwɛŋ Wɔgbɛi lɛ Ahe

Taakɛ eba lɛ yɛ Yudafoi ni hi shi yɛ Hagai beaŋ lɛ agbɛfaŋ lɛ, ani osusuɔ akɛ kɛ́ wɔkɛ shihilɛi ni mli wawai kpe lɛ, wɔ hu wɔnijiaŋ baanyɛ aje wui? Kɛ́ eba lɛ nakai lɛ, ekolɛ ebaawa kɛha wɔ akɛ wɔbaaya nɔ wɔkɛ hiɛdɔɔ ashiɛ sanekpakpa lɛ. Shi mɛni baanyɛ aha wɔnijiaŋ aje wui? Ojogbaŋŋ, ekolɛ jalɛ sane ni ayeee yɛ nibii agbɛjianɔtoo nɛɛ mli lɛ baanyɛ aha wɔna nɔ̃. Habakuk hu bi akɛ: “[Mɛɛ beyinɔ nɔŋŋ] mabo matsɛo yɛ yiwalɛ hewɔ, ni ohereŋ miyiwala?” (Hab. 1:2) Ekolɛ bɔ ni nibii yaa lɛ lɛ baaha Kristofonyo ko asusu akɛ Yehowa gbi lɛ sɛɛ miigbala shi, ni ehaŋ ekɛ hiɛdɔɔ atsu saji ahe nii, ni yɛ no najiaŋ lɛ ebaatiu ogbɔjɔ shihilɛ sɛɛ. Ani osusuɔ akɛ nɔ ko tamɔ nakai baanyɛ aba onɔ? Kɛ́ wɔsusu nii ahe yɛ nɛkɛ gbɛ nɔ lɛ, belɛ wɔmiishishiu wɔ diɛŋtsɛ wɔhe. Kwɛ bɔ ni ehe hiaa waa akɛ wɔɔbo Ŋmalɛ mli ŋaawoo akɛ ‘wɔjwɛŋ wɔgbɛi ahe,’ ni agbɛnɛ hu lɛ ‘wɔtsĩɛ wɔjwɛŋmɔ krɔŋŋ lɛ hiɛ’ lɛ toi! Wɔbaanyɛ wɔbi wɔhe akɛ, ‘Ani esa akɛ efee mi naakpɛɛ akɛ nibii agbɛjianɔtoo fɔŋ nɛɛ sɛɛ etsɛ fe bɔ ni mikpa gbɛ lɛ?’

Be ko ni Biblia lɛ Gba Fɔ̃ Shi

Agbɛnɛ susumɔ Yesu wiemɔi ni kɔɔ nibii agbɛjianɔtoo nɛɛ naagbee lɛ he lɛ he okwɛ. Amaniɛ ni Marko bɔ yɛ Yesu gbalɛ ni kɔɔ naagbee gbii lɛ ahe lɛ he lɛ haa wɔnaa akɛ, Yesu  bɔ wɔ kɔkɔ shii abɔ koni wɔya nɔ wɔha wɔhiɛ ahi wɔhe nɔ. (Mar. 13:33-37) Wɔnaa kɔkɔbɔɔ ni tamɔ nakai nɔŋŋ yɛ Yehowa gbi wulu ni baaba yɛ Harmagedon lɛ he gbalɛ lɛ mli. (Kpoj. 16:14-16) Mɛni hewɔ abɔ kɔkɔ shii abɔ lɛ? Kaimɔi ni tamɔ nɛkɛ he miihia, ejaakɛ kɛ́ etamɔ nɔ ni mɛi emɛ fe bɔ ni amɛkpaa gbɛ lɛ, ewaaa akɛ amɛkɛ hiɛdɔɔ tsuŋ saji ahe nii dɔŋŋ.

Yesu kɛ bɔ ni ehe hiaa ni wɔya nɔ wɔsara beni wɔmɛɔ nibii agbɛjianɔtoo lɛ naagbee lɛ he abɛbua ko ha. Ewie shĩatsɛ ko ni julɔi yatutua lɛ ye ewe lɛ he sane. Kulɛ mɛni ebaanyɛ efee koni akabaju lɛ? Ja esara nyɔɔŋ muu fɛɛ. Yesu kɛ ŋaawoo ni nyiɛ sɛɛ nɛɛ mu abɛbua lɛ naa akɛ: ‘Nyɛsaa nyɛhe nyɛtoa, ejaakɛ nɔ̃ ŋmɛlɛtswaa ni nyɛsusuuu lɛ nɔ gbɔmɔ bi lɛ baa.’—Mat. 24:43, 44.

Nakai abɛbua lɛ tsɔɔ akɛ esa akɛ wɔsaa wɔhe wɔto akɛ wɔbaamɛ, kɛ́ ebaabi ni wɔmɛ be kplaŋŋ po. Hɛɛ, esaaa akɛ wɔhaoɔ wɔhe tuutu yɛ bɔ ni etamɔ nɔ ni nibii agbɛjianɔtoo fɔŋ nɛɛ sɛɛ etsɛ fe bɔ ni wɔkpa gbɛ lɛ hewɔ. Esaaa akɛ wɔkɛ susumɔ ni ejaaa akɛ ‘Yehowa be lɛ shɛko’ lɛ shishiuɔ wɔ diɛŋtsɛ wɔhe. Susumɔ ni tamɔ nakai lɛ baaha shwelɛ ni wɔyɔɔ akɛ wɔshiɛ Maŋtsɛyeli lɛ he sanekpakpa lɛ naa aba shi.—Rom. 12:11.

Jiemɔ Susumɔ ni Ejaaa Kɛjɛ Ojwɛŋmɔ Mli

Shishitoo mla ni yɔɔ Galatabii 6:7 lɛ baanyɛ aye abua wɔ koni wɔkaná susumɔ ni ejaaa. Aŋma yɛ jɛmɛ akɛ: “Nyɛkalakaa nyɛhe . . . Nɔ̃ pɛ ní gbɔmɔ dũɔ lɛ, no nɔŋŋ ebaakpa hu.” Kɛ́ ŋmɔ ko kã shi efolo lɛ, etsɛɛɛ ni jwɛi kwɛ̃ɔ yɛ mli fɛɛ. Nakai nɔŋŋ, kɛ́ wɔtsiɛ̃ɛɛ wɔjwɛŋmɔ lɛ hiɛ lɛ, susumɔi ni ejaaa baanyɛ ahé shi yɛ wɔjwɛŋmɔ mli. Ákɛ nɔkwɛmɔnɔ lɛ, wɔbaanyɛ wɔkɛɛ wɔhe akɛ, ‘Bɔ fɛɛ bɔ ni fee lɛ Yehowa gbi lɛ baaba—shi jeee bianɛ.’ Kɛ́ wɔná susumɔ ni tamɔ nɛkɛ pɛ lɛ, ebaanyɛ eha wɔkɛ hiɛdɔɔ akatsu wɔteokrase nitsumɔi lɛ. Kɛ́ be shwie mli lɛ, wɔkɛ wɔhe woŋ Nyɔŋmɔjamɔ nifeemɔi komɛi amli dɔŋŋ. Ni no baanyɛ aha Yehowa gbi lɛ abati wɔ shi.—2 Pet. 3:10.

Shi, kɛ́ wɔtee nɔ wɔyoo nii ni ji “Nyɔŋmɔ suɔmɔnaa nii kpakpai ní sa ehiɛ jogbaŋŋ ní hi kɛwula shi lɛ,” susumɔ ni ejaaa heŋ shi yɛ wɔjwɛŋmɔ mli. (Rom. 12:2) Nyɔŋmɔ Wiemɔ lɛ ni wɔɔkane daa lɛ ji gbɛi ni hi jogbaŋŋ ni wɔbaanyɛ wɔtsɔ nɔ wɔshɛ oti nɛɛ he lɛ ateŋ ekome. Ŋmalɛi lɛ baanyɛ awaje hemɔkɛyeli ni wɔyɔɔ akɛ Yehowa feɔ nii yɛ be ni eto lɛ naa pɛpɛɛpɛ lɛ.—Hab. 2:3.

Kɛ́ wɔkaseɔ nii, wɔsɔleɔ, wɔyaa kpeei daa, ni wɔshiɛɔ, ni agbɛnɛ hu wɔjɛɔ suɔmɔ mli wɔfeɔ nibii ni tsɔɔ akɛ wɔmli hi lɛ, ebaaha ‘wɔkwɛ gbɛ ni wɔshwe Yehowa gbi lɛ baa lɛ.’ (2 Pet. 3:11, 12) Yehowa baana bɔ ni wɔfeɔ enɛɛmɛi ni wɔfɔ̃ɔɔ lɛ. Bɔfo Paulo kaiɔ wɔ akɛ: “Nyɛkahaa ekpakpafeemɔ miitɔa wɔ, ejaakɛ kɛ́ wɔnijiaŋ ejeee wui lɛ, wɔbaakpa hu yɛ be ni sa mli.”—Gal. 6:9.

Hɛɛ, be nɛɛ jeee be ni esa akɛ wɔkɛ susumɔ ni ejaaa shishiuɔ wɔhe koni wɔná jwɛŋmɔ akɛ atsi Yehowa gbi lɛ ato. No najiaŋ lɛ, be nɛɛ ji be ni esa akɛ wɔwaje wɔtsuii, ejaakɛ Yehowa gbi lɛ ebɛŋkɛ.

[Mfoniri ni yɔɔ baafa 4]

Hagai kɛ Zakaria wo Yudafoi lɛ hewalɛ ni amɛma tsu lɛ

[Mfoniri ni yɔɔ baafa 5]

Eji shĩatsɛ lɛ le akɛ julɔ lɛ miiba kulɛ, mɛni ebaafee?