Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Okɛ Ohiɛ Afɔ̃ Yehowa Nɔ Beni Naagbee Lɛ Bɛŋkɛɔ Nɛɛ

Okɛ Ohiɛ Afɔ̃ Yehowa Nɔ Beni Naagbee Lɛ Bɛŋkɛɔ Nɛɛ

 Okɛ Ohiɛ Afɔ̃ Yehowa Nɔ Beni Naagbee Lɛ Bɛŋkɛɔ Nɛɛ

“Nyɛŋɔa nyɛhiɛ nyɛfɔ̃a Yehowa nɔ daa.”—YES. 26:4.

1. Mɛɛ gbɛ nɔ esoro Nyɔŋmɔ tsuji yɛ mɛi ni yɔɔ je nɛŋ lɛ ahe?

AKƐNI afee mɛi babaoo nidɔɔnii loo aha amɛnine enyɛ shi shii abɔ yɛ je nɛŋ hewɔ lɛ, amɛleee mɔ ni esa akɛ amɛná hekɛnɔfɔ̃ɔ yɛ emli loo nɔ ni esa akɛ amɛná hekɛnɔfɔ̃ɔ yɛ mli. Shi jeee nakai kwraa eji yɛ Yehowa tsuji agbɛfaŋ. Akɛni Nyɔŋmɔ nilee ni kudɔɔ amɛ hewɔ lɛ, amɛkɛ amɛhe efɔ̃ɔɔ je nɛŋ nibii loo emli “lumɛi” lɛ anɔ. (Lala 146:3) Moŋ lɛ, amɛkɛ amɛhe fɔ̃ɔ Yehowa nɔ yɛ amɛwala kɛ amɛwɔsɛɛ he, ejaakɛ amɛle akɛ esumɔɔ amɛ ni eyeɔ e-Wiemɔ nɔ be fɛɛ be.—Rom. 3:4; 8:38, 39.

2. Mɛɛ gbɛ nɔ Yoshua ma nɔ mi akɛ Nyɔŋmɔ ji mɔ ni abaanyɛ akɛ he afɔ̃ enɔ?

2 Yoshua ni hi shi yɛ blema lɛ ma nɔ mi akɛ Nyɔŋmɔ ji mɔ ni abaanyɛ akɛ he afɔ̃ enɔ. Beni eshwɛ fioo ni ebaagbo lɛ, ekɛɛ enyɛmimɛi Israelbii lɛ akɛ: “Nyɛle yɛ nyɛtsui mli fɛɛ kɛ nyɛsusuma mli fɛɛ akɛ nibii kpakpai fɛɛ ni Yehowa, nyɛ-Nyɔŋmɔ lɛ, wie yɛ nyɛhewɔ  lɛ, emli ekome folo ekaaa shi, fɛɛ eba mli eha nyɛ, emli ekome folo ekaaa shi.”—Yosh. 23:14.

3. Mɛni Nyɔŋmɔ gbɛ́i lɛ haa wɔleɔ yɛ ehe?

3 Jeee suɔmɔ ni Yehowa yɔɔ kɛha etsuji lɛ kɛkɛ hewɔ eyeɔ eshiwoi anɔ lɛ, shi moŋ egbɛ́i lɛ hewɔ titri. (2 Mose 3:14; 1 Sam. 12:22) J. B. Rotherham wie Nyɔŋmɔ gbɛ́i lɛ he yɛ Biblia ni ji The Emphasized Bible lɛ hiɛkpamɔ wiemɔ lɛ mli akɛ: “Gbɛ́i lɛ damɔ shi kɛha shiwoo ni nɔ bɛ; etsɔɔ hewalɛ ni Nyɔŋmɔ yɔɔ akɛ eeetsake ehe ewo shihilɛ fɛɛ shihilɛ, naagba fɛɛ naagba, hiamɔ fɛɛ hiamɔ ni baanyɛ aba lɛ mli . . . Eji shiwoo, . . . nɔ̃ ko ni aleee kpojiemɔ, kaimɔnɔ, kitakamɔ. Nyɔŋmɔ baafee enii yɛ e-Gbɛ́i lɛ shishinumɔ naa be fɛɛ be; E-hiɛ gboŋ yɛ egbɛ́i lɛ he kɔkɔɔkɔ.”

4. (a) Mɛni Yesaia 26:4 lɛ woɔ wɔ hewalɛ ni wɔfee? (b) Mɛni he wɔbaasusu yɛ nikasemɔ nɛɛ mli?

4 Bi ohe akɛ: ‘Ani mile Yehowa jogbaŋŋ bɔ ni manyɛ mikɛ mihe afɔ̃ enɔ kwraa? Ani mikɛ nɔmimaa kwɛɔ wɔsɛɛ gbɛ, akɛni mile akɛ Nyɔŋmɔ baakudɔ nɔ fɛɛ nɔ jogbaŋŋ lɛ hewɔ?’ Yesaia 26:4 lɛ kɛɔ akɛ: “Nyɛŋɔa nyɛhiɛ nyɛfɔ̃a Yehowa nɔ daa; ejaakɛ Nuŋtsɔ Yehowa ji naanɔ tɛsaa.” Anɔkwa sane ji akɛ, amrɔ nɛɛ Nyɔŋmɔ tsɔɔɔ naakpɛɛ gbɛ nɔ ekɛ ehe wooo mɛi ashihilɛ mli taakɛ efee bei komɛi yɛ Biblia beaŋ lɛ. Fɛɛ sɛɛ lɛ, akɛni eji “naanɔ tɛsaa” hewɔ lɛ, abaanyɛ akɛ he afɔ̃ enɔ “daa.” Mɛɛ gbɛ nɔ wɔ-Nyɔŋmɔ ni abaanyɛ akɛ he afɔ̃ enɔ nɛɛ yeɔ buaa enɔkwa jálɔi ŋmɛnɛ? Nyɛhaa wɔsusua gbɛi etɛ komɛi ahe: Ewajeɔ wɔ kɛ́ wɔbi lɛ ni eye ebua wɔ ni wɔnyɛ wɔdamɔ kaa naa, eyeɔ ebuaa wɔ kɛ́ mɛi booo wɔ toi loo amɛte shi amɛwo wɔ tɛ̃ɛ, kɛ agbɛnɛ ehaa wɔ hewalɛ hee kɛ́ je nɛŋ shihilɛ su wɔtsui. Beni wɔsusuɔ gbɛi etɛ nɛɛ ahe lɛ, jwɛŋmɔ bɔ ni ooofee owaje hekɛnɔfɔ̃ɔ ni oyɔɔ yɛ Yehowa mli lɛ he.

Okɛ Ohe Afɔ̃ Nyɔŋmɔ nɔ kɛ́ Okɛ Efɔŋfeemɔ he Kaa ko Kpe

5. Mɛɛ be ebaanyɛ efee nɔ ni wa waa akɛ wɔkɛ wɔhe aaafɔ̃ Nyɔŋmɔ nɔ?

5 Ewaaa akɛ nibii tamɔ Paradeiso kɛ gbohiiashitee ni Yehowa ewo he shi lɛ baaha wɔná hekɛnɔfɔ̃ɔ yɛ Yehowa mli. Shi be ni ebaanyɛ efee nɔ ni wa kɛha wɔ akɛ wɔɔná hekɛnɔfɔ̃ɔ yɛ emli ji, be mli ni wɔmiikpɛ wɔyiŋ yɛ jeŋba he saji ahe—be mli ni ehe bahiaa ni wɔtsɔɔ akɛ wɔyɛ nɔmimaa kwraa akɛ, kɛ́ wɔhi shi yɛ egbɛi kɛ eshishitoo mlai lɛ anaa lɛ, wɔbaaná miishɛɛ ni fe fɛɛ lɛ. Maŋtsɛ Salomo kɛ ŋaawoo ni he hiaa waa nɛɛ ha akɛ: “Okɛ ohiɛ afɔ̃ Yehowa nɔ kɛ otsui fɛɛ, ni okɛ ohe akakpasa bo diɛŋtsɛ ojwɛŋmɔ; kaimɔ lɛ yɛ ogbɛi fɛɛ mli, ni lɛ eeejaje otempɔŋi lɛ!” (Abɛi 3:5, 6) Kadimɔ wiemɔi ni ji ‘gbɛi’ kɛ ‘tempɔŋi’ lɛ. Hɛɛ, esa akɛ wɔshihilɛ gbɛ fɛɛ—jeee wɔ-Kristofoi ahiɛnɔkamɔ lɛ pɛ—atsɔɔ akɛ wɔkɛ wɔhe fɔ̃ɔ Nyɔŋmɔ nɔ. Kɛ́ wɔkɛ efɔŋfeemɔ he kaa ko kpe lɛ, te wɔɔfee tɛŋŋ wɔjie hekɛnɔfɔ̃ɔ nɛɛ kpo lɛ?

6. Te wɔɔfee tɛŋŋ wɔha wɔyiŋ ni wɔkpɛ akɛ wɔsusuŋ nibii fɔji ahe lɛ mli awa?

6 Ja wɔkudɔ nibii ni wɔsusuɔ he lɛ dani wɔbaanyɛ wɔtsi wɔhe kɛjɛ efɔŋ he. (Nyɛkanea Romabii 8:5; Efesobii 2:3.) Belɛ, te ooofee tɛŋŋ oha oyiŋ ni okpɛ akɛ osusuŋ nibii  fɔji ahe lɛ mli awa? Susumɔ gbɛi enumɔ nɛɛ ahe: 1. Sɔlemɔ kɛbi Nyɔŋmɔ yelikɛbuamɔ. (Mat. 6:9, 13) 2. Jwɛŋmɔ mɛi ni bo Yehowa toi kɛ mɛi ni booo lɛ toi lɛ ahe saji ni yɔɔ Biblia lɛ mli lɛ anɔ. No sɛɛ lɛ, kadimɔ bɔ ni nibii anaa yakpa kɛha amɛ. * (1 Kor. 10:8-11) 3. Jwɛŋmɔ bɔ ni kɛ́ ofee efɔŋ lɛ no baanyɛ aye bo kɛ osuɔlɔi awui yɛ jwɛŋmɔŋ kɛ henumɔŋ lɛ nɔ. 4. Susumɔ bɔ ni Nyɔŋmɔ baanu he eha kɛ́ etsuji lɛ ateŋ mɔ kome fee esha ni yɔɔ hiɛdɔɔ lɛ he. (Nyɛkanea Lala 78:40, 41.5. Feemɔ bɔ ni Yehowa tsui baanyɔ emli eha kɛji yɛ faŋŋ mli jio, yɛ teemɔŋ jio lɛ, enɔkwa jálɔi lɛ ateŋ mɔ ko fee nɔ ni ja ni ekpoo akɛ eeefee esha lɛ he mfoniri yɛ ojwɛŋmɔŋ okwɛ. (Lala 15:1, 2; Abɛi 27:11) Bo hu obaanyɛ otsɔɔ akɛ oyɛ hekɛnɔfɔ̃ɔ yɛ Yehowa mli.

Okɛ Ohe Afɔ̃ Nyɔŋmɔ nɔ kɛ́ Abooo Bo Toi loo Ate Shi Awo Bo

7. Mɛɛ kai Yeremia kɛkpe, ni bei komɛi lɛ te enuɔ he ehaa tɛŋŋ?

7 Wɔnyɛmimɛi lɛ ateŋ mɛi babaoo miisɔmɔ yɛ shikpɔŋkukuji ni mli wala amli. Gbalɔ Yeremia sɔmɔ yɛ shihilɛ ni tamɔ nakai mli—yɛ Yuda maŋtsɛyeli lɛ naagbee gbii ni jaraa lɛ mli. Akɛni ebo famɔ ni Nyɔŋmɔ kɛha lɛ akɛ ejaje kojomɔ shɛɛ saji lɛ toi hewɔ lɛ, ekɛ shihilɛi ni ka ehemɔkɛyeli lɛ kpe daa gbi. Be ko lɛ, Baruk ni ji ewoloŋmalɔ ni ye lɛ anɔkwa lɛ ye ŋkɔmɔ akɛ etɔ lɛ. (Yer. 45:2, 3) Ani Yeremia nijiaŋ je wui? Be ko lɛ ehao. Ejaje akɛ: “Alomɔ gbi ní afɔ́ mi yɛ nɔ lɛ.” Ekɛɛ hu akɛ: “Mɛɛ hewɔ po ni mijɛ musuŋ mije kpo, ní mibana deŋmegbomɔ kɛ awerɛho, ní migbii atã kwraa kɛ hiɛgbele nɛɛ?”—Yer. 20:14, 15, 18.

8, 9. Yɛ Yeremia 17:7, 8 kɛ Lala 1:1-3 lɛ kɛ gbeekpãmɔ naa lɛ, mɛni esa akɛ wɔfee koni wɔya nɔ wɔwo yibii kpakpai?

8 Fɛɛ sɛɛ lɛ, Yeremia nijiaŋ ejeee wui. Etee nɔ ekɛ ehe fɔ̃ Yehowa nɔ. No hewɔ lɛ, Yehowa diɛŋtsɛ naawiemɔi ni nyiɛ sɛɛ nɛɛ ba mli yɛ anɔkwa gbalɔ nɛɛ nɔ taakɛ aŋma yɛ Yeremia 17:7, 8 lɛ akɛ: “Ajɔɔ gbɔmɔ ní ŋɔɔ ehiɛ efɔ̃ɔ Yehowa nɔ, ní Yehowa ji ehiɛnɔkamɔ lɛ! Ejaakɛ eeetamɔ tso ní atɛo yɛ nui ahe ní lɛɛɔ eshishifãi amli kɛyaa fai atoi; ni kɛ́ latsaa ba lɛ, esheŋ gbeyei, shi eyi bai lɛ aaahi frɔ̃frɔ̃; nu hɔmɔ afi mli hu ehaoŋ, ni asaŋ efɔ̃ŋ yibiiwoo.”

9 Taakɛ tso ni “atɛo yɛ nui ahe” loo ŋmɔ ni agbála nu awo mli ji lɛ, Yeremia “efɔ̃ŋ yibiiwoo.” Ehaaa hefɛoyelɔi ni feɔ efɔŋ ni ebɔle lɛ lɛ aná enɔ hewalɛ. No najiaŋ lɛ, ekɛ ehe kpɛtɛ ‘faa’ ni báa wala yi lɛ Jɛɛhe lɛ he, ni eha nɔ fɛɛ nɔ ni Yehowa kɛɛ lɛ lɛ kã etsui nɔ. (Nyɛkanea Lala 1:1-3; Yer. 20:9) Kwɛ bɔ ni Yeremia efee nɔkwɛmɔnɔ kpakpa eha wɔ, titri lɛ wɔ mɛi ni wɔsɔmɔɔ Nyɔŋmɔ yɛ shikpɔŋkukuji ni mli wala lɛ amli lɛ! Kɛ́ nakai shihilɛ mli oyɔɔ lɛ, yaa nɔ ojɛ otsuiŋ fɛɛ okɛ ohe afɔ̃ Yehowa, mɔ ni baaha onyɛ ofi shi beni ‘ojajeɔ egbɛ́i lɛ’ nɔ.—Heb. 13:15.

10. Mɛɛ nibii akɛduro wɔ, ni mɛni esa akɛ wɔbi wɔhe?

10 Yehowa eha wɔ nibii pii ni baaha wɔnyɛ wɔdamɔ jaramɔ shihilɛi ni wɔkɛkpeɔ yɛ naagbee gbii nɛɛ amli lɛ anaa. Amɛteŋ ekome ji Nyɔŋmɔ Wiemɔ tso muu lɛ fɛɛ ní amrɔ nɛɛ aatsɔɔ shishi jogbaŋŋ kɛmiiya wiemɔi babaoo amli lɛ. Etsɔɔ tsulɔ anɔkwafo kɛ nilelɔ kuu lɛ nɔ ehaa wɔnáa mumɔ niyenii babaoo yɛ be ni sa nɔ. Ni eha wɔ nyɛmimɛi babaoo ni ji heyelilɔi ni fiɔ wɔsɛɛ, ni wɔkɛ amɛ kpeɔ yɛ asafoŋ kpeei kɛ kpeei wuji ashishi. Ani okɛ nibii ni ekɛduro wɔ nɛɛ tsuɔ nii jogbaŋŋ? Mɛi fɛɛ ni feɔ nakai lɛ “aaalá kɛ tsuijurɔ.” Shi mɛi ni booo Nyɔŋmɔ toi lɛ ‘aaabolɔ kɛ tsuiŋdɔlɛ, ni amɛkɛ mumɔ ní ekumɔ aaafó yoo!’—Yes. 65:13, 14.

Okɛ Ohe Afɔ̃ Nyɔŋmɔ nɔ kɛ́ Okɛ Naagbai Miikpe

11, 12. Yɛ naagbai ni yɔɔ je nɛŋ lɛ hewɔ lɛ, mɛni ji gbɛ ni nilee yɔɔ mli ni esa akɛ wɔkɔ?

11 Taakɛ agba afɔ̃ shi lɛ, adesai kɛ naagbai babaoo miikpe. (Mat. 24:6-8; Kpoj. 12:12) Kɛ́  nu afua ba lɛ, nɔ ni mɛi fɔɔ feemɔ ji akɛ amɛjoɔ foi kɛyaa shikpɔŋ ni nɔ kwɔ nɔ loo amɛkwɔɔ kɛyaa tsu yiteŋ—amɛyaa he fɛɛ he ni kwɔ ni amɛbaanyɛ amɛya lɛ. Nakai nɔŋŋ beni je nɛŋ naagbai lɛ faa babaoo lɛ, mɛi akpekpei abɔ kɛ amɛhe fɔ̃ɔ nibii ni etamɔ nɔ ni amɛnɔ kwɔlɔ tamɔ shika, maŋkwramɔŋ loo jamɔŋ gbɛjianɔtoi kɛ agbɛnɛ hu adebɔɔ nibii ahe nilee nɔ. Shi enɛɛmɛi ateŋ eko bɛ ni baaha wɔhi shi shweshweeshwe. (Yer. 17:5, 6) Shi Yehowa tsuji yɛ abobaahe ko ni yɔɔ shweshweeshwe—“naanɔ tɛsaa.” (Yes. 26:4) Lalatsɛ lɛ kɛɛ akɛ: ‘Yehowa ji mitɛsaa kɛ miyiwalaheremɔ kɛ mimɔɔ.’ (Nyɛkanea Lala 62:7-10.) Mɛɛ gbɛ nɔ wɔhaa Tɛsaa nɛɛ tsɔɔ wɔbobaahe?

12 Wɔkpɛtɛɔ Yehowa he kɛtsɔ e-Wiemɔ ní bei pii lɛ ekɛ adesai anilee kpãaa gbee lɛ ni wɔkɛtsuɔ nii lɛ nɔ. (Lala 73:23, 24) Ákɛ nɔkwɛmɔnɔ lɛ, mɛi ni kɛ adesai anilee tsuɔ nii lɛ baanyɛ akɛɛ akɛ: ‘Wala kome pɛ oyɔɔ; kɛtsu nii jogbaŋŋ kɛmɔ shi.’ ‘Taomɔ nitsumɔ kpakpa.’ ‘Buamɔ shika babaoo naa.’ ‘Hemɔ nɔ fɛɛ nɔ.’ ‘Fãa gbɛ; ye wala.’ Nɔ ni tamɔɔɔ nakai lɛ, ŋaawoo ni ji ‘Mɛi ni tsuɔ je nɛɛ he nii lɛ afee tamɔ mɛi ni tsuuu he nii: ejaakɛ je nɛŋ subaŋ lɛ hoɔ yaa’ lɛ kɛ Nyɔŋmɔ nilee kpãa gbee. (1 Kor. 7:31) Yesu hu wo wɔ hewalɛ akɛ wɔkɛ Maŋtsɛyeli lɛ he nibii lɛ aye klɛŋklɛŋ gbɛhe be fɛɛ be, ní wɔkɛ nakai feemɔ abɔ ‘jwetrii yɛ ŋwɛi,’ he ni nɔ ko nɔ ko nyɛŋ afite lɛ yɛ lɛ.—Mat. 6:19, 20.

13. Beni 1 Yohane 2:15-17 lɛ yɔɔ wɔjwɛŋmɔ mli lɛ, mɛɛ saji esa akɛ wɔbi wɔhe?

13 Ani bɔ ni ofeɔ onii yɛ “je lɛ” kɛ ‘nibii ni yɔɔ je lɛŋ’ lɛ he lɛ tsɔɔ akɛ okɛ ohe fɔ̃ɔ Nyɔŋmɔ nɔ kwraa? (1 Yoh. 2:15-17) Ani osumɔɔ mumɔŋ jɔɔmɔi kɛ sɔɔmɔ hegbɛi, ni amɛhe hiaa bo kwraa fe nibii ni yɔɔ je nɛŋ lɛ? (Fil. 3:8) Ani obɔɔ mɔdɛŋ akɛ obaaha ‘ohiŋmɛi nɔ atse’ daa? (Mat. 6:22) Nyɔŋmɔ miisumɔ ni okɛ hiɛshikamɔ atsu nii, titri lɛ kɛ́ oyɛ weku ni ookwɛ. (1 Tim. 5:8) Shi Nyɔŋmɔ biɔ ni etsuji aná hekɛnɔfɔ̃ɔ kwraa yɛ emli—jeee Satan je lɛ ni etsɛŋ ni ebaaba naagbee lɛ.—Heb. 13:5.

14-16. Mɛɛ sɛɛ mɛi komɛi ni tee nɔ amɛha ‘amɛhiŋmɛi nɔ tse’ ni amɛkɛ Maŋtsɛyeli lɛ he nibii ye klɛŋklɛŋ gbɛhe lɛ ená?

14 Susumɔ Richard kɛ Ruth ni ji fɔlɔi ni yɔɔ bii bibii etɛ lɛ anɔkwɛmɔnɔ lɛ he okwɛ. Richard kɛɛ akɛ: “Minuɔ he yɛ mitsui mli akɛ manyɛ mafee babaoo maha Yehowa fe bɔ ni mifeɔ lɛ. No mli lɛ mishihilɛ yɛ bɔ ni sa, shi minu he akɛ yɛ gbɛ ko nɔ lɛ nɔ ni miná ni eteke nɔ lɛ ni mikɛhaa Nyɔŋmɔ lɛ. Beni mikɛ Ruth sɔle yɛ sane nɛɛ he, ni wɔsusu nɔ ni enɛ baabi ni wɔkɛshã afɔle lɛ he lɛ, wɔkpɛ wɔyiŋ akɛ, mayabi mɔ ni kwɛɔ minɔ yɛ minitsumɔhe lɛ koni eha matsu nii gbii ejwɛ yɛ otsi mli—eyɛ mli po akɛ nakai beaŋ lɛ maŋ lɛ kɛ shika he naagbai miikpe. Akpɛlɛ minibimɔ lɛ nɔ, ni no sɛɛ nyɔɔŋ kome lɛ mibɔi nitsumɔ gbii ejwɛ yɛ otsi mli.” Amrɔ nɛɛ te Richard nuɔ he ehaa tɛŋŋ?

15 Ekɛɛ akɛ: “Minyɔmɔwoo lɛ nɔ egbɔ oha mlijaa nyɔŋmai enyɔ, shi amrɔ nɛɛ daa afi lɛ mináa gbii 50 krokomɛi ni haa mináa be mihaa miweku lɛ ni mikɛtsɔseɔ mibii lɛ. Bei ni miyeɔ yɛ shiɛmɔ nitsumɔ lɛ mli lɛ ebɔ he toi enyɔ, mɛi ni mikɛkaseɔ Biblia lɛ ebɔ he toi etɛ, ni minyɛɔ miyeɔ mibuaa asafo lɛ babaoo. Ni akɛni mináa bei babaoo ni haa minyɛɔ  miyeɔ mibuaa kɛkwɛɔ gbekɛbii lɛ hewɔ lɛ, Ruth nyɛɔ ekɛ ehe woɔ gbɛgbalɔi awamɔ nitsumɔ lɛ mli yɛ be kɛ beaŋ. Mitswa mifai shi akɛ mafee bɔ fɛɛ bɔ ni manyɛ koni mahiɛ gbɛjianɔtoo nɛɛ mli.”

16 Roy kɛ Petina ni yɛ biyoo ni kɛ amɛ yɛ shĩa lolo lɛ enyɛ amɛtse be ni amɛkɛtsuɔ heloonaa nitsumɔ lɛ nɔ koni amɛkɛ amɛhe awo be fɛɛ sɔɔmɔ nitsumɔ lɛ mli. Roy kɛɛ akɛ: “Mitsuɔ nii gbii etɛ yɛ otsi mli, ni Petina tsuɔ nii gbii enyɔ. Kɛfata he lɛ, wɔfã yɛ shĩa ni wɔyɔɔ mli lɛ mli kɛyahi tsu bibioo ni emli kwramɔ waaa mli. Wɔtsu gbɛgbamɔ nitsumɔ lɛ dani wɔfɔ wɔbinuu kɛ wɔbiyoo lɛ, ni shwelɛ ni wɔyɔɔ kɛha gbɛgbamɔ nitsumɔ lɛ gbooo. No hewɔ lɛ, beni wɔbii lɛ dara lɛ, wɔkɛ wɔhe wo be fɛɛ sɔɔmɔ nitsumɔ lɛ mli ekoŋŋ. Anyɛŋ akɛ shika ko kwraa ato jɔɔmɔi ni wɔná lɛ he.”

Ha “Nyɔŋmɔ hejɔlɛ” lɛ Abu Otsui He

17. Akɛni wɔleee nɔ ni baanyɛ aba wɔ́ hewɔ lɛ, mɛɛ gbɛ nɔ Ŋmalɛi lɛ eshɛje omii?

17 Wɔteŋ mɔ ko mɔ ko leee nɔ ni baanyɛ aba wɔ́, ejaakɛ “be kɛ nibii ni aleee ni baa trukaa” lɛ ninaa wɔ fɛɛ. (Jaj. 9:11, NW) Shi esaaa akɛ nɔ ni baaba wɔ́ ni wɔleee lɛ haa wɔfeɔ yeyeeye tuutu taakɛ bei pii lɛ ebaa lɛ yɛ mɛi ni wekukpãa ni mli wa bɛ amɛ kɛ Nyɔŋmɔ teŋ ni no hewɔ lɛ amɛbɛ shweshweeshwe lɛ agbɛfaŋ lɛ. (Mat. 6:34) Bɔfo Paulo ŋma akɛ: ‘Nyɛkahaoa yɛ nɔ ko nɔ ko he, shi moŋ nɔ fɛɛ nɔ mli lɛ nyɛkɛ sɔlemɔ kɛ faikpamɔ kɛ shidaa atsia nyɛtutɔmɔi lɛ atã yɛ Nyɔŋmɔ hiɛ; ni Nyɔŋmɔ hejɔlɛ ni fe jwɛŋmɔi fɛɛ lɛ aaato nyɛtsuii kɛ nyɛjwɛŋmɔi.’—Fil. 4:6, 7.

18, 19. Mɛɛ gbɛi anɔ Nyɔŋmɔ tsɔɔ eshɛjeɔ wɔmii? Okɛ enɛ he nɔkwɛmɔnɔ aha.

18 Nyɛmimɛi hii kɛ yei ni yajeɔ shihilɛi ni jaraa amli lɛ ateŋ mɛi babaoo nuɔ he akɛ Yehowa hejɔlɛ lɛ shɛjeɔ amɛmii. Nyɛmi yoo ko kɛɛ akɛ: “Datrɛfonyo ko ni feɔ opireshɛn lɛ bɔ mɔdɛŋ shii abɔ akɛ ebaawo mihe gbeyei koni makpɛlɛ ni aha mi la. Wiemɔi ni ekɛkpeɔ mi lɛ eko ji, ‘Mɛɛ kwashiai asane ji oheee la lɛ?’ No sɛɛ, kɛ agbɛnɛ bei krokomɛi lɛ, misɔleɔ dioo mihaa Yehowa, ni minuɔ Yehowa hejɔlɛ lɛ he. Minuɔ he akɛ ewaje mi tamɔ tɛsaa. Eyɛ mli akɛ mila ni ba shi lɛ ha minu tɔlɛ he moŋ, shi minyɛ mikɛ Ŋmalɛ mli saji ni mli kã shi faŋŋ tsɔɔ mishidaamɔ lɛ mli.”

19 Bei komɛi lɛ, Nyɔŋmɔ baanyɛ atsɔ nyɛmi heyelilɔ ko miishɛjemɔ nifeemɔ nɔ loo mumɔŋ niyenii yɛ be ni sa nɔ ekɛ yelikɛbuamɔ ni ehia wɔ lɛ aha wɔ. Eeenyɛ efee akɛ onu ni nyɛmi nuu loo nyɛmi yoo ko ekɛɛ akɛ: “Sane nɛɛ ji nɔ tuuntu ni baatsu minaagba lɛ he nii. Aŋma kɛha mi!” Hɛɛ, ekɔɔɔ he eko shihilɛ mli ni wɔyɔɔ loo wɔhiamɔ nii lɛ, kɛ́ wɔkɛ wɔhe fɔ̃ Yehowa nɔ lɛ, ebaajie suɔmɔ ni eyɔɔ kɛha wɔ lɛ kpo etsɔɔ wɔ. Kɛfata he lɛ, ‘etooi’ ji wɔ, ni ekɛ egbɛ́i lɛ efɔ̃ wɔnɔ.—Lala 100:3; Yoh. 10:16; Bɔf. 15:14, 17.

20. Mɛni hewɔ Yehowa tsuji baahi shi shweshweeshwe beni Satan je lɛ eba naagbee lɛ?

20 Abaakpata nibii fɛɛ ni Satan je lɛ kɛ ehe fɔ̃ɔ nɔ lɛ hiɛ yɛ “Yehowa mlifu gbi” ni etsɛŋ ni ebaaba lɛ nɔ. Shika, jwiɛtɛi, kɛ nibii krokomɛi ni jara wa lɛ nyɛŋ abaa mɔ ko yi yɛ nakai beaŋ. (Zef. 1:18; Abɛi 11:4) ‘Wɔ-Naanɔ tɛsaa’ lɛ pɛ baafee abobaahe. (Yes. 26:4) Belɛ amrɔ nɛɛ, nyɛhaa wɔkɛ anɔkwayeli anyiɛa yɛ Yehowa jalɛ gbɛi lɛ anɔ, wɔjaje Maŋtsɛyeli shɛɛ sane lɛ kɛ́ abooo wɔ toi, loo ate shi awo wɔ po, ni wɔŋɔ wɔnaagbai fɛɛ wɔfɔ̃ enɔ, ni wɔkɛtsɔɔ akɛ wɔyɛ emli hekɛnɔfɔ̃ɔ kwraa. Beni wɔyaa nɔ wɔfeɔ enɛɛmɛi lɛ, ‘wɔbaahi shi shweshweeshwe, ni wɔhe baajɔ wɔ, ni wɔsheŋ efɔŋ ko gbeyei.’—Abɛi 1:33.

[Shishigbɛ niŋmaa]

Ani Obaanyɛ Otsɔɔ Mli?

Te wɔɔfee tɛŋŋ wɔkɛ wɔhe afɔ̃ Nyɔŋmɔ nɔ

• kɛ́ wɔkɛ efɔŋfeemɔ he kaa ko kpe?

• kɛ́ abooo wɔ toi loo ate shi awo wɔ?

• kɛ́ wɔkɛ naagbai miikpe?

[Nikasemɔ lɛ he Sanebimɔi]

[Mfoniri ni yɔɔ baafa 13]

Kɛ́ wɔkɛ Nyɔŋmɔ shishitoo mlai lɛ tsu nii lɛ, wɔbaaná miishɛɛ

[Mfoniri ni yɔɔ baafa 15]

“Yehowa ji naanɔ tɛsaa”