Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

‘Wɔ-Nyɔŋmɔ lɛ Aaanyɛ Ajie Wɔ’

‘Wɔ-Nyɔŋmɔ lɛ Aaanyɛ Ajie Wɔ’

 “Esa Akɛ Aboɔ Nyɔŋmɔ Moŋ Toi Fe Gbɔmɛi”

‘Wɔ-Nyɔŋmɔ lɛ Aaanyɛ Ajie Wɔ’

ATO nifeemɔ lɛ he gbɛjianɔ koni nɔ fɛɛ nɔ aya nɔ jogbaŋŋ. Akɛ shika amaga ko ma Dura ŋa ní ekã shi faŋŋ akɛ ekɛ Babilon maŋtiase lɛ jɛkɛɛɛ lɛ nɔ. Eji nifeemɔ krɛdɛɛ ko ni ato he gbɛjianɔ koni akɛjie nakai amaga lɛ kpo atsɔɔ maŋbii, ni mɛi ni ba shishi ji maŋ onukpai, ni gbɛkpamɔ ji akɛ kɛji maŋ onukpai nɛɛ nu nibii tamɔ bɛlɛ, saŋku, kɛ jooi srɔtoi agbɛɛmɔ lɛ, amɛbaakula shi amɛjá amaga lɛ. Babilon Maŋtsɛ Nebukadnezar wo akpɔ akɛ mɔ fɛɛ mɔ ni kulaaa shi ejaaa amaga lɛ, abaashɛ lɛ afɔ̃ flɔnɔɔ ni aha edɔ fe nine lɛ mli. Namɔ po aaaka akɛ eeeku maŋtsɛ lɛ akpɔ lɛ mli?

Shi mɛi ni naa ebakpe shi lɛ anaa kpɛ amɛhe beni amɛna hii etɛ komɛi—Shadrak, Meshak, kɛ Abednego ni amɛji Yehowa jálɔi ni sheɔ Nyɔŋmɔ gbeyei lɛ—kulaaa shi amɛjáaa amaga lɛ. Hii etɛ nɛɛ le akɛ kɛ́ amɛjá nakai amaga lɛ, no baate shi awo amɛhe ni amɛtu amɛha Yehowa Nyɔŋmɔ akɛ lɛ pɛ amɛbaajá lɛ lɛ. (5 Mose 5:8-10) Beni Nebukadnezar bi amɛ nɔ hewɔ ni amɛkɛ shiŋŋfeemɔ kɔ shidaamɔ ni tamɔ nakai lɛ, amɛkɛ ekãa ha lɛ hetoo akɛ: “Kɛji nakai lɛ, wɔ-Nyɔŋmɔ lɛ ní wɔsɔmɔɔ lɛ aaanyɛ ajie wɔ yɛ la kɛ flɔnɔɔ ní tsoɔ grigri lɛ mli, ni eeejie wɔ yɛ odɛŋ, maŋtsɛ. Shi kɛ́ jeee nakai hu lɛ, maŋtsɛ, ná ole akɛ wɔsɔmɔŋ onyɔŋmɔi lɛ, ni wɔjáŋ shika amaga ní okɛma shi lɛ.”—Daniel 3:17, 18.

Beni ashɛrɛ Hebribii etɛ lɛ ashwie la kɛ flɔnɔɔ ni tsoɔ lɛ mli lɛ, ahere amɛyiwala yɛ naakpɛɛ gbɛ nɔ. Nyɔŋmɔ tsu ŋwɛibɔfo ko ni eyabu E-tsuji lɛ ahe. Shi no mli lɛ, amɛkpɛ amɛyiŋ momo akɛ amɛbaasumɔ koni amɛgboi moŋ fe nɔ ni amɛaagbo Yehowa nɔ toi. * Afii 600 komɛi asɛɛ lɛ, Yesu Kristo bɔfoi lɛ hu kɔ shidaamɔ ko ni tamɔ nakai nɔŋŋ beni amɛyapue yɛ Yudafoi akojomɔhe wulu lɛ hiɛ ní amɛkɛɛ kojolɔi lɛ akɛ: “Esa akɛ aboɔ nyɔŋmɔ moŋ toi fe gbɔmɛi” lɛ.—Bɔfoi lɛ Asaji 5:29.

Nibii ni He Hiaa Waa ní Wɔkaseɔ Kɛjɛɔ Mli

Shadrak, Meshak, kɛ Abednego fee hemɔkɛyeli, toiboo, kɛ anɔkwayeli he nɔkwɛmɔnɔ kpakpa amɛfɔ̃ shi amɛha wɔ. Hebribii etɛ lɛ ná hemɔkɛyeli yɛ Yehowa mli. Amɛhenilee ni amɛkɛ Ŋmalɛi lɛ tsɔse lɛ lɛ eŋmɛɛɛ amɛ gbɛ koni amɛkɛ amɛhe awo apasa jamɔ loo maŋ hedɔɔ nifeemɔ ko mli. Kristofoi ni yɔɔ ŋmɛnɛ lɛ hu kɛ amɛhe fɛɛ fɔ̃ɔ anɔkwa Nyɔŋmɔ lɛ nɔ. Amɛhenilee ni amɛkɛ Biblia lɛ etsɔse lɛ lɛ kudɔɔ amɛ, ni amɛkɛ amɛhe wooo apasa jamɔ loo nifeemɔi ni teɔ shi woɔ Nyɔŋmɔ mlai kɛ eshishitoo mlai lɛ amli.

Hebribii etɛ lɛ kɛ amɛhe fɔ̃ Yehowa nɔ, ni amɛhaaa nibii tamɔ amɛhiɛ ni ba nyam yɛ Babilon Maŋtsɛyeli lɛ mli, hegbɛ loo woo ni amɛná yɛ mli lɛ ateŋ eko kwraa aha amɛfɔ̃ɔ Yehowa toiboo. Nakai oblahii lɛ sumɔ akɛ amɛná nɔ̃ ni amɛgboi moŋ fe nɔ ni amɛaafite wekukpãa ni kã amɛ kɛ Nyɔŋmɔ teŋ lɛ. Taakɛ Mose ni hi shi afii komɛi dani afɔ́ amɛ lɛ fee lɛ, ‘amɛmɔ mɔ ni anaaa lɛ lɛ mli tamɔ nɔ ni amɛmiina lɛ.’ (Hebribii 11:27) Oblahii etɛ lɛ tswa amɛfai shi akɛ kɛ́ Yehowa baahere amɛyiwala jio, ehereee amɛyiwala jio, amɛbaaya nɔ amɛye lɛ anɔkwa fe nɔ ni amɛaaŋmɛɛ saji ahe kɛsaa koni amɛkɛbaa amɛwala  yi. Ekã shi faŋŋ akɛ beni bɔfo Paulo wie anɔkwafoi komɛi ni “amɛgbe la hewalɛ” lɛ ahe lɛ, no mli lɛ nɔkwɛmɔnɔ kpakpa ni mɛi etɛ lɛ fee lɛ ahe ewieɔ lɛ. (Hebribii 11:34) Kɛ́ Yehowa tsuji ni yɔɔ wɔbei nɛɛ amli lɛ kɛ anɔkwa ni amɛyeɔ lɛ lɛ he kaa kpe lɛ, amɛjieɔ hemɔkɛyeli ni tamɔ nakai kpo, ni amɛfeɔ toiboo hu taakɛ nakai hii lɛ fee lɛ.

Shadrak, Meshak, kɛ Abednego niiashikpamɔ lɛ hu haa wɔnaa akɛ, Nyɔŋmɔ woɔ anɔkwa ni ayeɔ lɛ lɛ he nyɔmɔ. Lalatsɛ lɛ lá akɛ: “Yehowa kwaaa mɛi ni yeɔ lɛ anɔkwa lɛ.” (Lala 37:28, NW) Eyɛ mli akɛ ŋmɛnɛ lɛ, wɔkpaaa gbɛ akɛ Nyɔŋmɔ baatsɔ naakpɛɛ gbɛ nɔ ebaa wɔyi taakɛ efee eha Hebribii etɛ lɛ moŋ, shi kɛlɛ, wɔbaanyɛ wɔná nɔmimaa akɛ wɔ-Tsɛ ni yɔɔ ŋwɛi lɛ baaye ebua wɔ yɛ amanehului fɛɛ ni wɔkɛkpeɔ lɛ amli. Ekolɛ, Nyɔŋmɔ baajie naagba ni wɔkɛkpeɔ lɛ kɛya, loo ebaaha wɔ hewalɛ koni wɔnyɛ naa wɔdamɔ, aloo ebaatee wɔ shi kɛji wɔye lɛ anɔkwa kɛtee gbele mli. (Lala 37:10, 11, 29; Yohane 5:28, 29) Be fɛɛ be ni aaaka wɔ-emuuyeli lɛ akwɛ ní wɔɔhala akɛ wɔɔbo Nyɔŋmɔ moŋ toi fe gbɔmɛi lɛ, hemɔkɛyeli, toiboo, kɛ anɔkwayeli yeɔ buaa wɔ ni wɔyeɔ kunim.

[Shishigbɛ niŋmaa]

^ kk. 5 Kwɛmɔ afi 2006 Calendar of Jehovah’s Witnesses, July kɛ August lɛ mli.

[Akrabatsa/Mfoniri ni yɔɔ baafa 9]

ANI OLE?

• Beni Hebribii etɛ lɛ kɛ anɔkwayeli he kaa lɛ kpe lɛ, no mli lɛ eshwɛ fioo ni amɛteŋ mɔ fɛɛ mɔ baaye afii 30.

• Aje gbɛ aha flɔnɔɔ lɛ dɔ jogbaŋŋ.—Daniel 3:19.