Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Mɛni Ji Nyɔŋmɔ Maŋtsɛyeli Lɛ?

Mɛni Ji Nyɔŋmɔ Maŋtsɛyeli Lɛ?

 Mɛni Ji Nyɔŋmɔ Maŋtsɛyeli Lɛ?

KWƐ oshara ni yɔɔ gbeyei ni adesai kɛkpe beni amɛba shihilɛ mli etsɛɛɛ lɛ! Bɔ ni eba lɛ ji akɛ, bɔfo ko tse Mɔ tuuntu ni bɔ lɛ lɛ hiɛ atũa. Atũatselɔ nɛɛ laka Hawa ni ji klɛŋklɛŋ yoo ni abɔ lɛ ni eye tso yibii ni agu eyeli lɛ. Beni nakai bɔfo lɛ kɛ yoo nɛɛ kɛ ewu Adam wieɔ lɛ, ekɛɛ amɛ akɛ: “Jeee gboimɔ nyɛaagboi; shi moŋ le Nyɔŋmɔ le akɛ gbi nɔ ni nyɛaaye eko lɛ, nyɛhiŋmɛii aaagbele, ni nyɛaatsɔmɔ tamɔ Nyɔŋmɔ, ni nyɛaale ekpakpa kɛ efɔŋ.” (1 Mose 2:16, 17; 3:1-5) Abale nakai bɔfo atũatselɔ lɛ akɛ Satan Abonsam.—Kpojiemɔ 12:9.

Ani Hawa bo Satan toi? Biblia lɛ kɛɔ wɔ akɛ: “Yoo lɛ na akɛ tso lɛ hi ha yeli, ni efeɔ hiŋmɛii akɔnɔ, ni tso lɛ baa mɔ tsine, ni etsɔɔ mɔ nii lɛ, etse enɔ yibii lɛ eko ni eye, ni eha ewu ni kɛ lɛ yɔɔ lɛ hu eko, ni eye.” (1 Mose 3:6) Hɛɛ, Adam kɛ Hawa ni amɛji klɛŋklɛŋ adesai ni abɔ lɛ yafata Satan he ni amɛtse atũa. Nɔ ni jɛ mli ba ji akɛ, Paradeiso shihilɛ mli ni amɛyɔɔ lɛ ŋmɛɛ amɛ kɛ amɛshwiei fɛɛ. Kɛfata he lɛ, yɛ nɔ najiaŋ ni kulɛ bii ni amɛaafɔ́ lɛ aaafee mɛi ni eye emuu ni amɛhi shi kɛya naanɔ lɛ, amɛfɔ́ amɛ kɛwo esha kɛ gbele mli.—Romabii 5:12.

Mɛni Yehowa Nyɔŋmɔ ni ji Jeŋ Muu Fɛɛ Nɔyelɔ lɛ fee yɛ sane nɛɛ he? Eto gbɛjianɔ kɛha eshaifaa. (Romabii 5:8) Yehowa Nyɔŋmɔ to maŋtsɛyeli ko hu he gbɛjianɔ bɔni afee ni ekɛtsu naagba ni eba lɛ he nii. Atsɛ́ɔ maŋtsɛyeli nɛɛ akɛ “Nyɔŋmɔ maŋtsɛyeli lɛ.” (Luka 21:31) Nyɔŋmɔ jeŋ muu fɛɛ nɔyeli lɛ mli ajɛ ato Maŋtsɛyeli nɛɛ, ni akɛbaatsu yiŋtoo pɔtɛɛ ko he nii.

Mɛni hewɔ ato Nyɔŋmɔ Maŋtsɛyeli lɛ shishi? Mɛni ji ehewɔ nibii komɛi, ni te nibii nɛɛ je adesai anɔyelii anɔ̃ lɛ ha tɛŋŋ? Mɛɛ be Maŋtsɛyeli lɛ je nɔyeli shishi? Wɔbaasusu sanebimɔi nɛɛ ahe yɛ sane ni nyiɛ sɛɛ lɛ mli.