Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

 NIKASEMƆ 41

Ye Yehowa Anɔkwa Yɛ “Amanehulu Kpeteŋkpele” Lɛ Mli

Ye Yehowa Anɔkwa Yɛ “Amanehulu Kpeteŋkpele” Lɛ Mli

Nyɛsumɔa Yehowa, nyɛ mɛi fɛɛ ni nyɛyeɔ lɛ anɔkwa lɛ! Yehowa buɔ anɔkwafoi ahe.”​—LALA 31:23.

LALA 129 Wɔbaaya Nɔ Wɔfi Shi Shiŋŋ

NƆ NI ABAASUSU HE *

1-2. (a) Mɛni etsɛŋ je lɛŋ hiɛnyiɛlɔi lɛ baakɛɛ? (b) Mɛɛ sanebimɔi esa akɛ wɔná amɛhetoo?

ŊƆƆ lɛ akɛ, gbalɛ ni kɔɔ “toiŋjɔlɛ kɛ shweshweeshwe” ni abaakɛɛ lɛ he lɛ eba mli. Wɔkɛ be kplaŋŋ ekpa gbɛ akɛ gbalɛ nɛɛ baaba mli, ni amrɔ nɛɛ ená eba mli. Je lɛŋ hiɛnyiɛlɔi lɛ miigbee fuu akɛ, toiŋjɔlɛ eba, mɛi yɛ shweshweeshwe bianɛ fe bei fɛɛ ni eho, ni akɛ, amɛbaanyɛ amɛtsu adesai anaagbai fɛɛ ahe nii. Shi ehiŋ amɛ nɔ ko kwraa feemɔ yɛ hiɛkpatamɔ ni baanyiɛ sɛɛ kɛba lɛ he! Mɛni hewɔ? Ejaakɛ Biblia lɛ egba akɛ ‘ebaabati amɛ shi trukaa, ni amɛjeŋ mli kɔkɔɔkɔ.’​—1 Tes. 5:3.

2 Ekolɛ obaabi akɛ: ‘Kɛ́ “amanehulu kpeteŋkpele” lɛ fɛ lɛ, mɛni baaba? Te Yehowa baasumɔ ni wɔfee wɔnii wɔhã tɛŋŋ yɛ nakai be lɛ mli? Ni mɛni wɔbaanyɛ wɔfee bianɛ kɛsaa wɔhe wɔto nakai be lɛ koni wɔnyɛ wɔye Yehowa anɔkwa?’ Sanebimɔi nɛɛ ahe miihia waa, ni esa akɛ wɔtao amɛhetoo.​—Mat. 24:21.

KƐ́ “AMANEHULU KPETEŊKPELE” LƐ FƐ LƐ, MƐNI BAABA?

3. Yɛ nɔ ni aŋma yɛ Kpojiemɔ 17:5, 15-18 lɛ naa lɛ, mɛɛ gbɛ nɔ Nyɔŋmɔ baatsɔ ekpãtã “Babilon Kpeteŋkpele lɛ” hiɛ?

3 Kanemɔ Kpojiemɔ 17:5, 15-18. Abaakpãtã “Babilon Kpeteŋkpele lɛ” hiɛ! Tamɔ bɔ ni wɔwie kɛtsɔ hiɛ lɛ, kɛ́ amanehulu kpeteŋkpele lɛ je shishi lɛ, nɔ ko kwraa bɛ ni je lɛŋ hiɛnyiɛlɔi lɛ baanyɛ afee kɛtsake bɔ ni nibii baaya lɛ ahã lɛ. Mɛni hewɔ?  ‘Ejaakɛ Nyɔŋmɔ kɛbaawo amɛtsuiiaŋ koni amɛtsu eyiŋtoo he nii.’ Ni mɛni ji nakai yiŋtoo lɛ? No ji, ni amɛkpãtã Kristendom kɛ amale jamɔi krokomɛi fɛɛ ni yɔɔ je lɛ mli lɛ ahiɛ. * Nyɔŋmɔ kɛ yiŋtoo nɛɛ baawo ‘kooloo awuiyelɔ ni tsuɔ waa’ lɛ “akolontoi nyɔŋma” lɛ atsui mli. Akolontoi nyɔŋma nɛɛ damɔ shi kɛhã nɔyelii fɛɛ ni fiɔ “kooloo awuiyelɔ lɛ,” ni ji Jeŋmaji Ekomefeemɔ lɛ sɛɛ. (Kpo. 17:3, 11-13; 18:8) Kɛ́ nɔyelii nɛɛ tutua amale jamɔi lɛ, no baatsɔɔ akɛ amanehulu kpeteŋkpele lɛ eje shishi. Ebaafee gbeyei diɛŋtsɛ!

4. (a) Mɛni ekolɛ je lɛŋ hiɛnyiɛlɔi lɛ baakɛɛ akɛ no hewɔ amɛkpãtã amale jamɔi ahiɛ lɛ? (b) Mɛni ekolɛ jamɔi ni akpãtã amɛhiɛ lɛ amli bii lɛ baafee?

4 Mɛni je lɛŋ hiɛnyiɛlɔi lɛ baakɛɛ akɛ no hewɔ amɛkpãtãa Babilon Kpeteŋkpele lɛ hiɛ? Wɔleee. Ekolɛ amɛbaakɛɛ akɛ jamɔi lɛ fata he ni toiŋjɔlɛ nyɛɛɛ aba je lɛ mli lɛ, ni akɛ, amɛkɛ amɛhe woɔ pɔlitis kɛ maŋ saji amli tsɔ. Aloo amɛbaakɛɛ akɛ jamɔi lɛ yɛ shika tsɔ ni amɛbua heloonaa nibii babaoo anaa amɛhã amɛhe. (Kpo. 18:3, 7) Eyɛ mli akɛ abaakpãtã jamɔi lɛ ahiɛ moŋ, shi etamɔ nɔ ni wɔbaanyɛ wɔkɛɛ akɛ, akpãtãŋ amɛmli bii lɛ fɛɛ ahiɛ. Kɛ́ akpãtã jamɔi lɛ ahiɛ lɛ, amɛmli bii lɛ baana akɛ, amɛhiɛnyiɛlɔi lɛ efee amɛ buulu, ni ekolɛ no baahã amɛfee amɛnii oookɛɛ amɛhiko nakai jamɔi lɛ amli pɛŋ.

5. Mɛni Yehowa ewo shi akɛ ebaafee yɛ amanehulu kpeteŋkpele lɛ he? Ni mɛni hewɔ?

5 Be enyiɛ ebaahe ni akɛkpãtã Babilon Kpeteŋkpele lɛ hiɛ? Biblia lɛ etsɔɔɔ. Shi wɔle akɛ, eheŋ be pii tsɔ. (Kpo. 18:10, 21) Yehowa ewo shi akɛ, ‘ebaafo amanehulu gbii lɛ anɔ kuku’ koni “mɛi ni ehala lɛ” kɛ anɔkwa jamɔ hiɛ akakpãtã. (Mar. 13:19, 20) Shi mɛni Yehowa baasumɔ ni wɔfee kɛjɛ be ni amanehulu kpeteŋkpele lɛ baaje shishi lɛ aahu kɛyashi abaawu Harmagedon ta lɛ?

KAAKPA YEHOWA JAMƆ

6. Kɛ́ wɔkɛ amale jamɔi fo tako mli lɛ, ani no pɛ kɛkɛ fa? Tsɔɔmɔ mli.

6 Yɛ nikasemɔ ni tsɔ hiɛ lɛ mli lɛ, wɔna akɛ Yehowa miisumɔ ni mɛi fɛɛ ni jáa lɛ lɛ atsi  amɛhe kwraa kɛje Babilon Kpeteŋkpele lɛ he, ni enɛ baabi ni wɔkɛ amale jamɔi fɛɛ afo tako mli. Shi no pɛ kɛkɛ faaa. Esa akɛ wɔtswa wɔfai shi akɛ, wɔbaajá Yehowa, anɔkwa Nyɔŋmɔ lɛ. Naa nibii enyɔ ni baatsɔɔ akɛ wɔmiifee nakai.

Esa akɛ wɔya nɔ wɔkpe kɛjá Yehowa, kɛ́ wɔyaje shihilɛ ni mli wa po mli (Kwɛmɔ kuku 7) *

7. (a) Kɛ́ wɔmiitao wɔfai shi ni wɔtswa akɛ wɔbaahi shi yɛ Yehowa mlai kɛ eshishitoo mlai lɛ anaa lɛ mli awa lɛ, mɛni esaaa akɛ wɔfeɔ? (b) Mɛɛ gbɛ nɔ Hebribii 10:24, 25 lɛ hãa wɔnaa akɛ, ehe miihia waa ni wɔkɛ wɔnyɛmimɛi lɛ akpe ni wɔjá Nyɔŋmɔ, titri lɛ, bianɛ?

7 Klɛŋklɛŋ lɛ, esa akɛ wɔtswa wɔfai shi akɛ, wɔbaahi shi yɛ Yehowa mlai kɛ eshishitoo mlai ni kɔɔ jeŋba he lɛ anaa. Esaaa akɛ wɔnuɔ he kɔkɔɔkɔ akɛ, tɔmɔ ko kwraa bɛ bɔ ni mɛi baa amɛjeŋ amɛhãa yɛ je lɛ mli lɛ he. Akɛ nɔkwɛmɔnɔ lɛ, esa akɛ wɔna hii kɛ hii loo yei kɛ yei ni kɛ amɛhe boteɔ gbalashihilɛ mli loo amɛkɛ amɛhe náa bɔlɛ lɛ, kɛ bɔlɛnamɔ jeŋba sha srɔtoi fɛɛ akɛ amɛji esha. (Mat. 19:4, 5; Rom. 1:26, 27) Nɔ ni ji enyɔ lɛ, esa akɛ wɔya nɔ wɔkɛ wɔnyɛmimɛi Kristofoi lɛ afee ekome kɛjá Nyɔŋmɔ, kɛ́ yɛ Maŋtsɛyeli Asai anɔ jio, shĩai amli jio, teemɔ mli jio. Ekɔɔɔ he eko bɔ ni nibii baafee lɛ, wɔbaaya nɔ wɔkpe ni wɔjá Nyɔŋmɔ. Anɔkwa, ehe miihia waa ni wɔkpe, ‘titri lɛ, akɛni wɔmiina akɛ gbi lɛ miibɛŋkɛ nɛɛ.’​—Kanemɔ Hebribii 10:24, 25.

8. Wɔsɛɛ lɛ, mɛɛ sane ekolɛ wɔbaashiɛ?

8 Kɛ́ amanehulu kpeteŋkpele lɛ je shishi lɛ, ekolɛ sane ni wɔshiɛɔ lɛ baatsake. Amrɔ nɛɛ, wɔmiishiɛ Maŋtsɛyeli lɛ he sane kpakpa lɛ, ni wɔmiibɔ mɔdɛŋ ni wɔfee mɛi kaselɔi. Shi yɛ nakai beiaŋ lɛ, wɔbaashiɛ sane ko ni naa wa waa. Biblia lɛ kɛ nakai sane lɛ to nyɔŋmɔŋtɛi ahe. (Kpo. 16:21) Mɛni pɔtɛɛ wɔbaakɛɛ mɛi lɛ? Wɔleee bianɛ. Shi eeenyɛ efee akɛ, wɔbaakɛɛ mɛi akɛ Nyɔŋmɔ miiba ebakpãtã Satan je lɛ hiɛ kwraa. Wɔleee gbɛ pɔtɛɛ ni wɔbaatsɔ nɔ wɔshiɛ sane nɛɛ, kɛ́ wɔkɛ gbɛi ni wɔtsɔ nɔ wɔshiɛ afii ohai abɔ nɛ lɛ nɔŋŋ baatsu nii jio, wɔbaatsɔ gbɛi krokomɛi anɔ jio. Be lɛ ashɛ ni wɔkwɛ. Kɛ̃lɛ, bɔ fɛɛ bɔ ni nibii baaya lɛ lɛ, etamɔ nɔ ni wɔbaaná hegbɛ wɔkɛ ekãa ajaje Yehowa kojomɔ sane lɛ.​—Eze. 2:3-5.

9. Mɛni ekolɛ je lɛŋ hiɛnyiɛlɔi lɛ baafee yɛ sane ni wɔbaashiɛ lɛ he? Shi mɛni wɔbaanyɛ wɔná nɔmimaa akɛ Nyɔŋmɔ baafee?

9 Kɛ́ sane ni wɔbaashiɛ lɛ hãaa je lɛŋ hiɛnyiɛlɔi lɛ amli afu lɛ, belɛ nɔ ni eshwɛ faaa. Amɛbaabɔ mɔdɛŋ akɛ amɛbaahã wɔkpa shiɛmɔ koni jeŋ ajɔ. Shi tamɔ bɔ ni wɔkɛ wɔhiɛ fɔ̃ɔ Yehowa nɔ yɛ shiɛmɔ nitsumɔ lɛ mli bianɛ lɛ, nakai nɔŋŋ wɔkɛ wɔhiɛ baafɔ̃ enɔ kɛhã yelikɛbuamɔ yɛ nakai beiaŋ. Bɔ fɛɛ bɔ ni fee lɛ, wɔ-Nyɔŋmɔ lɛ baahã wɔ hewalɛ koni wɔfee esuɔmɔnaa nii.​—Mika 3:8.

SAAMƆ OHE OTO TUTUAMƆ NI ABAATUTUA NYƆŊMƆ WEBII LƐ

10. Tamɔ bɔ ni agba yɛ Luka 21:25-28 lɛ, te mɛi baafee amɛnii amɛhã tɛŋŋ yɛ amanehulu kpeteŋkpele lɛ mli?

10 Kanemɔ Luka 21:25-28. Yɛ amanehulu kpeteŋkpele lɛ mli lɛ, nibii kɛ gbɛjianɔtoi ni mɛi kɛ amɛhiɛ fɔ̃ɔ nɔ lɛ fɛɛ baakpa nitsumɔ fiofio, ni enɛ baahã amɛtsui afã waa. Anɔkwa, nɛkɛ be nɛɛ baafee be ni yɔɔ oshãra kɛ gbeyei fe fɛɛ yɛ adesai ayinɔsane mli. Mɛi baahao waa yɛ nibii ni woɔ mɔ wala he gbeyei ni baaya nɔ lɛ ahewɔ. (Zef. 1:14, 15) Nakai beiaŋ lɛ, ekolɛ nibii amli baawa waa kɛhã wɔ, ni ji Yehowa webii lɛ po. Akɛni wɔfataaa je lɛ he hewɔ lɛ, ekolɛ wɔkɛ naagbai komɛi baakpe. Ekolɛ hɔmɔ baaye wɔ, ni nu kɛ nibii krokomɛi ni tamɔ nakai lɛ námɔ baawa.

11. (a) Mɛni hewɔ mɛi baajie amɛhiɛ amɛka wɔ, ni ji, Yehowa Odasefoi lɛ? (b) Mɛni hewɔ esaaa akɛ wɔsheɔ amanehulu kpeteŋkpele lɛ gbeyei?

11 Be ni amanehulu kpeteŋkpele lɛ yaa nɔ lɛ, mɛi ni akpãtã amɛjamɔi lɛ ahiɛ lɛ baana akɛ wɔ, ni ji, Yehowa Odasefoi lɛ, wɔmiijá wɔ-Nyɔŋmɔ lɛ lolo, ni ekolɛ enɛ baahã amɛhe atsɛ̃ wɔ waa. Ŋwanejee ko bɛ he akɛ, amɛbaatsɔ  Intanɛt lɛ kɛ gbɛi krokomɛi anɔ amɛhã mɛi ale bɔ ni wɔhe woɔ amɛmli la. Satan kɛ je lɛŋ hiɛnyiɛlɔi lɛ baanyɛ wɔ waa, ejaakɛ nakai beiaŋ lɛ, akpãtã jamɔi fɛɛ ahiɛ akɛ ja wɔ pɛ. Amɛbaanu he akɛ wɔ hewɔ lɛ, amɛnyɛko amɛshɛ oti ni amɛkɛma amɛhiɛ akɛ amɛbaakpãtã jamɔi fɛɛ ni yɔɔ shikpɔŋ lɛ nɔ lɛ ahiɛ lɛ he. No hewɔ lɛ, amɛkɛ amɛhiɛ baaka wɔ. Nɛkɛ be nɛɛ mli je lɛŋ hiɛnyiɛlɔi lɛ baafee ekome ni amɛkɛ amɛhiɛdɔɔ fɛɛ abatutua wɔ lɛ. Nakai beiaŋ amɛbaatsɔ Gog ni jɛ Magog lɛ. * (Eze. 38:2, 14-16) Ekolɛ wɔsheɔ gbeyei fioo kɛ́ wɔsusu bɔ ni ekolɛ nibii baaya lɛ ahã yɛ amanehulu kpeteŋkpele lɛ mli lɛ he, titri lɛ, akɛni wɔleee ehe saji fɛɛ fitsofitso lɛ hewɔ. Shi, esaaa akɛ wɔsheɔ gbeyei. Kɛ́ be lɛ shɛ lɛ, Yehowa baatsɔɔ wɔ nɔ ni wɔfee koni wɔhiɛ akakpãtã. (Lala 34:19) Nakai beiaŋ lɛ, ‘wɔbaadamɔ shi ni wɔhole wɔyitsei anɔ,’ ejaakɛ wɔbaana akɛ ‘wɔkpɔmɔ lɛ miibɛŋkɛ.’ *

12. Mɛɛ gbɛi anɔ “nyɔŋ anɔkwafo kɛ hiɛshikalɔ lɛ” miitsɔ eesaa wɔ kɛmiihã nɔ ni kã wɔhiɛ lɛ?

12 “Nyɔŋ anɔkwafo kɛ hiɛshikalɔ lɛ” miitsɔ gbɛi srɔtoi anɔ eesaa wɔ koni wɔnyɛ wɔye Nyɔŋmɔ anɔkwa yɛ amanehulu kpeteŋkpele lɛ mli. (Mat. 24:45) Gbɛi nɛɛ ekome ji, kpeei wuji ni wɔtee kɛjɛ afi 2016 kɛyashi afi 2018 lɛ. Saji ni wɔnu yɛ kpeei nɛɛ ashishi lɛ ba yɛ be naa diɛŋtsɛ, ni amɛwo wɔ hewalɛ ni wɔmia wɔhiɛ wɔjie sui komɛi kpo jogbaŋŋ fe bɔ ni wɔfeɔ momo lɛ. Sui nɛɛ baaye abua wɔ ni wɔnyɛ wɔfo Yehowa gbi ni kã wɔhiɛ kpaakpa lɛ. Nyɛhãa wɔkaia wɔhe nɔ ni wɔkase yɛ sui nɛɛ ahe.

YE ANƆKWA, FI SHI SHIŊŊ, NI OFEE EKÃA WAA

Saamɔ ohe oto bianɛ koni onyɛ ofo “amanehulu kpeteŋkpele” lɛ (Kwɛmɔ kuku 13-16) *

13. Mɛni baaye abua wɔ ni wɔye Yehowa anɔkwa yɛ nibii fɛɛ mli? Ni mɛni hewɔ esa akɛ wɔfee nakai bianɛ?

13 Anɔkwayeli: Kpokpaa wulu nɔ kpee ni afee yɛ afi 2016 lɛ yitso ji, “Ye Yehowa Anɔkwa Daa!” Yɛ kpee lɛ shishi lɛ, wɔkase akɛ, kɛ́ wekukpaa kpakpa bɛ wɔ kɛ Yehowa teŋ lɛ, wɔnyɛŋ wɔye lɛ anɔkwa. Wɔna hu akɛ, kɛ́ wɔjɛ wɔtsuiŋ wɔsɔle wɔhã Yehowa, ni wɔhe be kɛkase e-Wiemɔ lɛ jogbaŋŋ lɛ, wekukpaa ni yɔɔ wɔ kɛ lɛ teŋ lɛ mli baawa waa. Enɛ ji nɔ ni baawaje wɔ koni wɔnyɛ wɔkpee naagbai ni naa wala po anaa. Amanehulu kpeteŋkpele lɛ miibɛŋkɛ, ni enɛ hewɔ lɛ, wɔle akɛ kai ni wɔkɛbaakpe lɛ amli baawa, ni ja wɔmia wɔhiɛ waa dani wɔbaanyɛ wɔye Nyɔŋmɔ anɔkwa ni wɔfi e-Maŋtsɛyeli lɛ sɛɛ. Ekolɛ, mɛi baaya nɔ amɛye wɔhe fɛo. (2 Pet. 3:3, 4) Eeenyɛ efee akɛ, fatamɔ ni wɔfataaa Satan je lɛ he lɛ ji nɔ titri ni baahã amɛfee nakai. Esa akɛ wɔye Yehowa anɔkwa yɛ nibii fɛɛ mli bianɛ koni no aye abua wɔ ni wɔnyɛ wɔfee nakai yɛ amanehulu kpeteŋkpele lɛ mli.

14. (a) Ani nyɛmimɛi hii ni nyiɛɔ wɔhiɛ lɛ nɔŋŋ baanyiɛ wɔhiɛ kɛyashi amanehulu kpeteŋkpele lɛ baaba naagbee? Tsɔɔmɔ mli. (b) Mɛni hewɔ ehe baahia ni wɔye Yehowa anɔkwa yɛ nakai beiaŋ?

14 Kɛ́ amanehulu kpeteŋkpele lɛ je shishi lɛ, be ko baashɛ ni nyɛmimɛi hii ni nyiɛɔ Yehowa asafo lɛ hiɛ bianɛ lɛ, jeee amɛ nɔŋŋ amɛbaanyiɛ hiɛ. Mɛni hewɔ? Ejaakɛ abaabua mɛi ni afɔ amɛ mu lɛ ateŋ mɛi ni eshwɛ yɛ shikpɔŋ lɛ nɔ lɛ fɛɛ anaa kɛya ŋwɛi koni amɛyafata Kristo he kɛwu Harmagedon ta lɛ. (Mat. 24:31; Kpo. 2:26, 27) Ni tsɔɔ akɛ, Gbɛtsɔɔmɔ Kuu lɛ mli bii lɛ fɛɛ baaya ŋwɛi yɛ nakai beiaŋ. Kɛ̃lɛ, asafoku babaoo lɛ efeŋ yuyaa. Nyɛmimɛi hii ni sa ni fata gwantɛŋi krokomɛi lɛ ahe lɛ baanyiɛ hiɛ. Ehe baahia ni wɔbo nyɛmimɛi nɛɛ toi, ni wɔkɛ gbɛtsɔɔmɔi fɛɛ ni Yehowa baatsɔ amɛnɔ ekɛhã wɔ lɛ atsu nii, ejaakɛ no baatsɔɔ  akɛ wɔmiiye lɛ anɔkwa. Ja wɔfee nakai dani wɔbaaná wala!

15. Mɛni baaye abua wɔ ni wɔnyɛ wɔfi shi yɛ shihilɛ fɛɛ shihilɛ ni wɔkɛbaakpe lɛ mli? Ni mɛni hewɔ ehe miihia ni wɔfee nakai bianɛ?

15 Shifimɔ: Kpokpaa wulu nɔ kpee ni afee yɛ afi 2017 lɛ yitso ji, “Fi Shi Shiŋŋ!” Kpee nɛɛ hã wɔna nibii ni baaye abua wɔ ni wɔnyɛ wɔdamɔ naagbai ni wɔkɛkpeɔ lɛ anaa. Ahã wɔle akɛ, kɛ́ wɔkɛ shihilɛ ko ni wa kpe, ni etamɔ nɔ ni hiɛnɔkamɔ ko kwraa bɛ akɛ nibii baahi po lɛ, wɔbaanyɛ wɔfi shi kɛji wɔkɛ wɔhiɛ fɔ̃ Yehowa nɔ. (Rom. 12:12) Esa akɛ wɔhã Yesu shiwoo nɛɛ ahi wɔjwɛŋmɔ mli be fɛɛ be, akɛ: “Mɔ ni baafi shi kɛbaaya naagbee lɛ, lɛ eyiwala abaahere.” (Mat. 24:13) Kɛ́ wɔmiitao ni shiwoo nɛɛ aba mli yɛ wɔgbɛfaŋ lɛ, belɛ esa akɛ wɔfi shi ni wɔye Yehowa anɔkwa, ekɔɔɔ he eko naagbai loo kai ni wɔkɛbaakpe. Kɛ́ wɔnyɛ wɔfi shi yɛ kaa fɛɛ kaa ni wɔkɛbaakpe bianɛ lɛ mli lɛ, no baawaje wɔ dani amanehulu kpeteŋkpele lɛ aba.

16. Ja wɔfee mɛni dani wɔbaanyɛ wɔfee ekãa? Ni mɛni baaye abua wɔ ni wɔfee ekãa bianɛ?

16 Ekãa: Kpokpaa wulu nɔ kpee ni afee yɛ afi 2018 lɛ yitso ji, “Feemɔ Ekãa!” Yɛ kpee nɛɛ shishi lɛ, wɔkase akɛ, jeee nyɛmɔi ni wɔyɔɔ lɛ ni baahã wɔfee ekãa, shi moŋ, tamɔ bɔ ni eji yɛ shifimɔ gbɛfaŋ lɛ, ja wɔkɛ wɔhiɛ efɔ̃ Yehowa nɔ dani wɔbaanyɛ wɔfee ekãa. Mɛni baaye abua wɔ ni wɔkɛ wɔhiɛ afɔ̃ Yehowa nɔ waa fe bɔ ni wɔfeɔ bianɛ lɛ? Esa akɛ wɔkane Biblia lɛ daa gbi, ni wɔhe be kɛsusu bɔ ni Yehowa fee ehere ewebii ayiwala yɛ blema lɛ he. (Lala 68:20; 2 Pet. 2:9) Kɛ́ je lɛŋ hiɛnyiɛlɔi lɛ tutua wɔ yɛ amanehulu kpeteŋkpele lɛ mli lɛ, ehe baahia ni wɔfee ekãa ni wɔkɛ wɔhiɛ afɔ̃ Yehowa nɔ waa fe bei fɛɛ ni eho. (Lala 112:7, 8; Heb. 13:6) Kɛ́ wɔkɛ wɔhiɛ fɔ̃ Yehowa nɔ bianɛ lɛ, kɛ́ Gog tutua wɔ lɛ, ŋmiŋmi mɔŋ wɔ; wɔbaafee ekãa. *

WƆKƐ MIISHƐƐ MIIKPA WƆYIWALAHEREMƆ LƐ GBƐ

Etsɛŋ, Yesu kɛ eŋwɛi asraafoi lɛ baakpãtã Nyɔŋmɔ henyɛlɔi lɛ ahiɛ yɛ Harmagedon ta lɛ mli! (Kwɛmɔ kuku 17)

17. Mɛni hewɔ esaaa akɛ wɔsheɔ Harmagedon gbeyei lɛ? (Kwɛmɔ mfoniri ni yɔɔ wolo lɛ hiɛ lɛ.)

17 Tamɔ bɔ ni wɔna yɛ nikasemɔ ni tsɔ hiɛ lɛ mli lɛ, wɔteŋ mɛi pii yɛ ni naagbee gbii lɛ amli afɔ wɔ yɛ. Miishɛɛ sane ji akɛ, wɔyɛ hiɛnɔkamɔ akɛ wɔbaafo amanehulu kpeteŋkpele lɛ.  Harmagedon ta lɛ ji nɔ ni kɛ jeŋ nɛɛ naagbee gbii lɛ baaba naagbee. Shi esaaa akɛ wɔsheɔ gbeyei kwraa, ejaakɛ ta nɛɛ, Nyɔŋmɔ ta ni. (Abɛi 1:33; Eze. 38:18-20; Zak. 14:3) Kɛ́ Yehowa kɛ famɔ lɛ hã lɛ, Yesu Kristo baanyiɛ mɛi ni afɔ amɛ mu lɛ kɛ ŋwɛibɔfoi akpekpei abɔ ahiɛ, ni amɛkɛ Satan, edaimonioi lɛ, kɛ mɛi fɛɛ ni yɔɔ shikpɔŋ lɛ nɔ ni fiɔ esɛɛ lɛ awu.​—Dan. 12:1; Kpo. 6:2; 17:14.

18. (a) Mɛni Yehowa ewo wɔ shi? (b) Mɛɛ gbɛ nɔ Kpojiemɔ 7:9, 13-17 lɛ hãa onáa nɔmimaa akɛ obaafo amanehulu kpeteŋkpele lɛ?

18 Yehowa ewo wɔ shi akɛ, ‘tawuu nii ko bɛ ni asɔ̃ ashi wɔ ni baanyɛ nɔ ko afee.’ (Yes. 54:17) Yehowa tsuji anɔkwafoi babaoo ‘baaje amanehulu kpeteŋkpele lɛ mli’ shweshweeshwe! “Asafoku babaoo” nɛɛ baaya nɔ amɛkɛ sɔɔmɔ krɔŋŋ ahã Nyɔŋmɔ. (Kanemɔ Kpojiemɔ 7:9, 13-17.) Anɔkwa, nibii pii yɛ Biblia lɛ mli ni hãa wɔnáa nɔmimaa akɛ, wɔsɛɛ lɛ, abaabaa wɔyi yɛ amanehulu kpeteŋkpele lɛ mli. Wɔle akɛ “Yehowa buɔ anɔkwafoi ahe.” (Lala 31:23) Kwɛ miishɛɛ ni mɛi fɛɛ ni sumɔɔ Yehowa ni amɛjieɔ eyi lɛ baaná be ni etse egbɛ́i krɔŋkrɔŋ lɛ he!​—Eze. 38:23.

19. Mɛɛ nibii kpakpai wɔbaaná wɔsɛɛ?

19 Eji mɛi ni baahi shi yɛ jeŋ hee lɛ mli, he ni Satan kɛ edaimonioi lɛ bɛ lɛ ahe sane aŋma yɛ 2 Timoteo 3:2-5 lɛ kulɛ, kwɛmɔ nibii kpakpai ni abaawie yɛ amɛhe. (Kwɛmɔ akrabatsa ni ji, “ Bɔ Ni Mɛi Baaba Amɛjeŋ Amɛhã Yɛ Nakai Beiaŋ.”) Naa bɔ ni Nyɛminuu George Gangas, * ni sɔmɔ akɛ Gbɛtsɔɔmɔ Kuu lɛ mli nyo lɛ wie bɔ ni shihilɛ baafee lɛ he ehã. Ewie akɛ: “Kwɛmɔ bɔ ni shihilɛ baaŋɔɔ kɛ́ mɔ fɛɛ mɔ ni yɔɔ je lɛ mli lɛ ji nyɛmi nuu loo nyɛmi yoo! Etsɛŋ, obaaná hegbɛ ohi jeŋ hee lɛ mli. Obaahi shi daa, tamɔ Yehowa. Wɔbaahi shi kɛya naanɔ.” Wɔkɛ miishɛɛ miikpa nakai be lɛ gbɛ waa!

LALA 122 Nyɛfia Shi Shiŋŋ, Nyɛkagbugbaa!

^ kk. 5 Wɔle akɛ, etsɛŋ, “amanehulu kpeteŋkpele” ko baaba mɛi fɛɛ ni yɔɔ je lɛ mli lɛ anɔ. Mɛni baaba wɔnɔ yɛ nakai be lɛ mli? Te Yehowa baasumɔ ni wɔfee wɔnii wɔhã tɛŋŋ? Ni mɛɛ sui esa akɛ wɔmia wɔhiɛ wɔjie lɛ kpo waa bianɛ koni no aye abua wɔ ni wɔye Yehowa anɔkwa yɛ nakai be lɛ mli? Nikasemɔ nɛɛ baahã sanebimɔi nɛɛ hetoo.

^ kk. 3 WIEMƆ NI ATSƆƆ MLI: Kristendom ji jamɔi fɛɛ ni tsɛɔ amɛhe Kristofoi shi amɛjáaa Yehowa yɛ gbɛ ni etsɔɔ akɛ ajá lɛ lɛ nɔ.

^ kk. 11 WIEMƆ NI ATSƆƆ MLI: Gog ni jɛ Magog (ni afoɔ lɛ kuku akɛ, Gog lɛ) damɔ shi kɛhã majimaji akuu ko ni baawu amɛshi anɔkwa jamɔ yɛ amanehulu kpeteŋkpele lɛ mli.

^ kk. 11 Kɛ́ ootao ole nibii fɛɛ ni baaya nɔ dani Harmagedon ta lɛ afɛ lɛ ahe saji babaoo lɛ, kwɛmɔ wolo ni ji, Nyɔŋmɔ Maŋtsɛyeli Lɛ Ebɔi Nɔyeli! lɛ, yitso 21. Kɛ́ ootao ole tutuamɔ ni Gog ni jɛ Magog lɛ baatutua Yehowa webii lɛ kɛ bɔ ni Yehowa baafã ewebii lɛ ahe yɛ Harmagedon lɛ he saji babaoo lɛ, kwɛmɔ wolo ni ji, Ato Yehowa Jamɔ Krɔŋŋ Shishi Ekoŋŋ Agbɛnɛ! lɛ, yitso 17 kɛ 18.

^ kk. 16 Afi 2019 kpokpaa wulu nɔ kpee lɛ yitso ji, “Suɔmɔ Sɛɛ Efooo Kɔkɔɔkɔ!,” ni ehãa wɔnáa nɔmimaa akɛ, Yehowa sumɔɔ wɔ ni ebaabu wɔhe, ekɔɔɔ he eko nɔ ni baaba.​—1 Kor. 13:8.

^ kk. 19 Kwɛmɔ sane ni yitso ji, “Enitsumɔi Lɛ Nyiɛɔ Esɛɛ,” ni je kpo yɛ December 1, 1994 Buu-Mɔɔ lɛ mli lɛ.

^ kk. 65 MFONIRII LƐ HE SANE: Amanehulu kpeteŋkpele lɛ miiya nɔ, ni Odasefoi fioo komɛi efee ekãa ni amɛyakpe yɛ koo ko mli amɛmiifee asafoŋ kpee.

^ kk. 67 MFONIRII LƐ HE SANE: Yehowa tsuji anɔkwafoi babaoo baafo amanehulu kpeteŋkpele lɛ, ni amɛbaaná miishɛɛ waa!