Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

 NIKASEMƆ 40

Tsu Babaoo Yɛ “Naagbee Gbii Lɛ” Anaagbee Gbii Lɛ Amli

Tsu Babaoo Yɛ “Naagbee Gbii Lɛ” Anaagbee Gbii Lɛ Amli

“Nyɛfia shi shiŋŋ, nyɛkagbugbaa, ni be fɛɛ be lɛ, nyɛtsua babaoo yɛ Nuŋtsɔ lɛ nitsumɔ lɛ mli.”​—1 KOR. 15:58.

LALA 58 Nyɛhãa Wɔtaoa Toiŋjɔlɛ Bii

NƆ NI ABAASUSU HE *

1. Mɛni hãa wɔnaa faŋŋ akɛ “naagbee gbii lɛ” amli wɔyɔɔ lɛ?

BIBLIA lɛ hãa wɔleɔ akɛ, “naagbee gbii lɛ” je shishi yɛ afi 1914. (2 Tim. 3:1) No hewɔ lɛ, etamɔ nɔ ni afɔ wɔ mɛi ni wɔyɔɔ wala mli ŋmɛnɛ lɛ ateŋ mɛi pii yɛ naagbee gbii lɛ amli. Wɔ fɛɛ wɔle nibii ni Yesu gba akɛ ebaaya nɔ yɛ be nɛɛ mli. Ekomɛi ji, tai, hɔmɔ, shikpɔŋhosomɔi, kɛ tsɛŋemɔ helai ni gbeɔ mɔ. Agbɛnɛ hu, egba akɛ mɛi baafee nibii babaoo ni mla eŋmɛɛɛ gbɛ, ni abaawa Yehowa tsuji ayi. (Mat. 24:3, 7-9, 12; Luka 21:10-12) Wɔmiina hu akɛ, mɛi ajeŋba etsake waa, tamɔ bɔ ni bɔfo Paulo gba efɔ̃ shi lɛ. (Kwɛmɔ akrabatsa ni yitso ji, “ Bɔ Ni Mɛi Baa Amɛjeŋ Amɛhãa Ŋmɛnɛ.”) Nibii nɛɛ fɛɛ hãa mɛi fɛɛ ni jáa Yehowa lɛ naa faŋŋ akɛ, “gbii lɛ anaagbee lɛ mli” wɔyɔɔ lɛ.​—Mika 4:1.

2. Mɛɛ sanebimɔi esa akɛ wɔle amɛhetoo?

2 Nɔ ni fe afii 100 sɔŋŋ eho kɛjɛ be ni naagbee gbii lɛ je shishi yɛ afi 1914 lɛ. No hewɔ lɛ, wɔbaanyɛ wɔkɛɛ akɛ, “naagbee gbii lɛ” anaagbee gbii amli wɔyɔɔ lɛ. Akɛni naagbee lɛ ebɛŋkɛ waa hewɔ lɛ, ekolɛ obaabi akɛ: Kɛ́ “naagbee gbii lɛ” ba naagbee lɛ, mɛni baaba? Ni kɛyashi nakai be lɛ baashɛ lɛ, mɛni Yehowa miisumɔ ni wɔfee? Sanebimɔi nɛɛ ahe miihia waa, ni esa akɛ wɔle amɛhetoo.

KƐ́ “NAAGBEE GBII LƐ” BA NAAGBEE LƐ, MƐNI BAABA?

3. Yɛ gbalɛ ni yɔɔ 1 Tesalonikabii 5:1-3 lɛ naa lɛ, mɛni je lɛŋ hiɛnyiɛlɔi lɛ baakɛɛ?

3 Kanemɔ 1 Tesalonikabii 5:1-3. “Yehowa gbi” ni Paulo tsĩ tã yɛ ŋmalɛ nɛɛ mli lɛ baaje shishi kɛji je lɛŋ hiɛnyiɛlɔi lɛ tutua  “Babilon Kpeteŋkpele lɛ,” ni ji amale jamɔi fɛɛ ni yɔɔ je lɛ mli lɛ, ni ebaaba naagbee kɛ Harmagedon ta lɛ. (Kpo. 16:14, 16; 17:5) Mɛni baahã wɔna akɛ nakai “gbi” lɛ yaaje shishi? No ji kɛɛmɔ ni je lɛŋ hiɛnyiɛlɔi lɛ baakɛɛ akɛ, “Toiŋjɔlɛ kɛ shweshweeshwe!” lɛ. (Biblia shishitsɔɔmɔi komɛi kɛɔ akɛ: “Hejɔlɛ yɛ ni wɔyɛ shweshweeshwe!”) Nɔ ni enɛ tsɔɔ ji akɛ, je lɛŋ hiɛnyiɛlɔi lɛ baakɛɛ akɛ toiŋjɔlɛ eba je lɛ mli ni mɛi yɛ shweshweeshwe. Bei komɛi lɛ, amɛwieɔ nibii ni tamɔ nakai kɛ́ béi loo ta te shi yɛ maji ateŋ ni amɛmiisaa. * Shi “toiŋjɔlɛ kɛ shweshweeshwe” ni Biblia lɛ egba akɛ amɛbaakɛɛ lɛ baafee srɔto kwraa. Mɛni hewɔ? Ejaakɛ mɛi pii baahe amɛye, ni amɛbaanu he akɛ je lɛŋ hiɛnyiɛlɔi lɛ enyɛ amɛkɛ toiŋjɔlɛ eba, ni agbɛnɛ lɛ, mɛi baahi shi shweshweeshwe. Shi jeee nakai kwraa nibii baaya lɛ. Moŋ lɛ, “hiɛkpatamɔ baabati amɛ shi trukaa,” no ji, “amanehulu kpeteŋkpele” lɛ baaje shishi.​—Mat. 24:21.

Kɛ́ je lɛŋ hiɛnyiɛlɔi lɛ tswa adafi akɛ toiŋjɔlɛ eba ni mɛi yɛ shweshweeshwe lɛ, kaahe oye! (Kwɛmɔ kuku 3-6) *

4. (a) Mɛni wɔleee yɛ kɛɛmɔ ni je lɛŋ hiɛnyiɛlɔi lɛ baakɛɛ akɛ, “Toiŋjɔlɛ kɛ shweshweeshwe” lɛ he amrɔ nɛɛ? (b) Shi mɛni wɔle momo yɛ nakai sane lɛ he?

4 Jeee nɔ fɛɛ nɔ wɔle yɛ kɛɛmɔ ni je lɛŋ hiɛnyiɛlɔi lɛ baakɛɛ akɛ, “Toiŋjɔlɛ kɛ shweshweeshwe” lɛ he. Akɛ nɔkwɛmɔnɔ lɛ, wɔleee nɔ ni baahã amɛwie nakai loo gbɛ ni amɛbaatsɔ nɔ amɛwie. Agbɛnɛ hu, wɔleee kɛji amɛbaatswa “toiŋjɔlɛ kɛ shweshweeshwe” nɛɛ he adafi shi kome pɛ, aloo amɛbaatswa he adafi shii abɔ. Bɔ fɛɛ bɔ ni nibii baaya lɛ ahã lɛ, nɔ kome yɛ ni wɔle yɛ nɔ ni amɛbaawie lɛ he. No ji akɛ: Esaaa akɛ wɔheɔ nɔ ni amɛbaawie lɛ wɔyeɔ, ejaakɛ je lɛŋ hiɛnyiɛlɔi lɛ nyɛŋ amɛkɛ toiŋjɔlɛ aba je lɛŋ fɛɛ kɔkɔɔkɔ. Moŋ lɛ, esa akɛ wɔyɔse akɛ no ji okadi ni wɔmɛɔ lɛ, okadi ni Biblia lɛ ewie akɛ no baatsɔɔ akɛ “Yehowa gbi” lɛ yaaje shishi lɛ!

5. Mɛni 1 Tesalonikabii 5:4-6 lɛ kɛɛ kɛ́ wɔfee lɛ “Yehowa gbi” lɛ ebatiŋ wɔ shi trukaa? Ni mɛni baatsɔɔ akɛ wɔkɛ ŋaawoo nɛɛ miitsu nii?

5 Kanemɔ 1 Tesalonikabii 5:4-6. Paulo wiemɔi nɛɛ tsɔɔ wɔ nɔ ni esa akɛ wɔfee koni “Yehowa gbi” lɛ akabati wɔ shi trukaa. Ekɛɛ ‘wɔkawɔ tamɔ mɛi ni eshwɛ lɛ feɔ lɛ, shi moŋ wɔya nɔ wɔshi kpe.’ Akɛ nɔkwɛmɔnɔ lɛ, esa akɛ wɔkwɛ jogbaŋŋ ni wɔkɛ wɔhe akawo pɔlitis loo maŋ saji amli yɛ gbɛ ko kwraa nɔ. Kɛ́ wɔkɛ wɔhe wo pɔlitis kɛ maŋ saji amli lɛ, ewaaa akɛ ‘wɔbaayafata je lɛ he.’ (Yoh. 15:19) Nyɔŋmɔ Maŋtsɛyeli lɛ pɛ baanyɛ ahã toiŋjɔlɛ aba jeŋ fɛɛ, ni wɔle enɛ.

6. Mɛni esa akɛ wɔye wɔbua mɛi ni amɛfee? Ni mɛni hewɔ?

6 Be mli ni wɔyaa nɔ wɔshiɔ kpe lɛ, esa akɛ wɔye wɔbua mɛi ni amɛ hu amɛte shi kɛjɛ mfonirifeemɔŋ wɔ ni amɛwɔ lɛ mli, ni tsɔɔ akɛ, wɔhã amɛle nɔ ni Biblia lɛ egba akɛ ebaaba je lɛ nɔ lɛ. Kɛ́ amanehulu kpeteŋkpele lɛ je shishi lɛ, wɔnáŋ hegbɛ wɔfee nakai. No hewɔ lɛ, amrɔ nɛɛ ji be ni esa akɛ wɔye wɔbua mɛi ni  amɛbasɔmɔ Yehowa. Enɛ hewɔ esaaa akɛ wɔkɛ shiɛmɔ nitsumɔ lɛ shwɛɔ kwraa lɛ! *

OKƐ SHIƐMƆ NITSUMƆ LƐ AKASHWƐ KWRAA

Wɔshiɛmɔ nitsumɔ lɛ hãa mɛi leɔ akɛ, Nyɔŋmɔ Maŋtsɛyeli lɛ pɛ kɛ toiŋjɔlɛ baaba jeŋ fɛɛ ni ehã mɛi ahi shi shweshweeshwe (Kwɛmɔ kuku 7-9)

7. Mɛni Yehowa miisumɔ ni wɔfee amrɔ nɛɛ?

7 Yɛ be fioo nɛɛ ni eshwɛ dani “Yehowa gbi” lɛ baaje shishi lɛ mli lɛ, Yehowa miisumɔ ni wɔkɛ hiɛdɔɔ ashiɛ waa. Esa akɛ wɔtsu babaoo “yɛ Nuŋtsɔ lɛ nitsumɔ lɛ mli.” (1 Kor. 15:58) Be ni Yesu gbaa nibii ni sa kadimɔ ni baaya nɔ yɛ naagbee gbii lɛ amli lɛ efɔ̃ɔ shi lɛ, egba akɛ: “Agbɛnɛ hu, abaashiɛ sane kpakpa lɛ yɛ jeŋmaji fɛɛ amli klɛŋklɛŋ.” (Mar. 13:4, 8, 10; Mat. 24:14) No hewɔ lɛ, be fɛɛ be ni obaaya shiɛmɔ lɛ, oowo gbalɛ obɔ̃. Ani osusu he nakai pɛŋ?

8. Mɛni hãa wɔnaa akɛ shiɛmɔ nitsumɔ lɛ eshwere waa ni eeya nɔ eeshwere?

8 Ani shiɛmɔ nitsumɔ lɛ eshwere? Hɛɛ, eshwere waa, ni amaniɛbɔɔ ni wɔnáa daa afi lɛ tsɔɔ nakai. Bo lɛ, susumɔ bɔ ni mɛi abɔ ni shiɛɔ Maŋtsɛyeli lɛ he sane yɛ jeŋ fɛɛ lɛ etee hiɛ yɛ naagbee gbii lɛ amli lɛ he okwɛ. Yɛ afi 1914 lɛ, no mli lɛ ayɛ shiɛlɔi 5,155 yɛ maji 43 pɛ anɔ. Shi ŋmɛnɛ lɛ, ayɛ shiɛlɔi aaafee 8,500,000 yɛ maji 240 sɔŋŋ anɔ! Kɛ̃lɛ, nitsumɔ pii yɛ lolo. Esa akɛ wɔya nɔ wɔshiɛ ni wɔhã mɛi ale akɛ, Nyɔŋmɔ Maŋtsɛyeli lɛ pɛ baanyɛ atsu adesai anaagbai fɛɛ ahe nii.​—Lala 145:11-13.

9. Mɛni hewɔ esa akɛ wɔya nɔ wɔshiɛ Maŋtsɛyeli lɛ he sane lɛ?

9 Wɔbaaya nɔ wɔshiɛ Maŋtsɛyeli lɛ he sane kɛyashi Yehowa diɛŋtsɛ baakɛɛ akɛ efa. Be enyiɛ wɔyɔɔ ni wɔkɛbaaye wɔbua mɛi ni amɛbale Yehowa Nyɔŋmɔ kɛ Yesu Kristo? (Yoh. 17:3) Wɔleee. Shi nɔ kome ni wɔle ji akɛ, kɛyashi amanehulu kpeteŋkpele lɛ baafɛ lɛ, wɔbaanyɛ wɔye wɔbua “mɛi fɛɛ ni yɔɔ anɔkwale lɛ ni baanyɛ ahã amɛná naanɔ wala lɛ he tsui kpakpa lɛ” ni amɛbasɔmɔ Yehowa. (Bɔf. 13:48) Shi te wɔbaafee tɛŋŋ wɔfee nakai dani be lɛ atã?

10. Mɛɛ gbɛ nɔ Yehowa tsɔɔ eyeɔ ebuaa wɔ koni wɔtsɔɔ mɛi anɔkwale lɛ?

10 Yehowa miitsɔ esafo lɛ nɔ eehã wɔ nibii fɛɛ ni baaye abua wɔ ni wɔtsɔɔ mɛi anɔkwale lɛ. Akɛ nɔkwɛmɔnɔ lɛ, daa otsi lɛ, atsɔɔ wɔ nii yɛ otsi teŋ kpee lɛ shishi. Kpee nɛɛ yeɔ ebuaa wɔ koni wɔle nɔ ni wɔbaawie kɛ́ wɔkɛ mɛi kpe klɛŋklɛŋ kwraa kɛ be ni wɔku wɔsɛɛ wɔyaasara amɛ. Agbɛnɛ hu, yɛ kpee nɛɛ shishi lɛ, atsɔɔ wɔ bɔ ni afeɔ Biblia mli nikasemɔ ahãa. Yehowa asafo lɛ ehã wɔ Nibii Ni Wɔkɛtsuɔ Nii Kɛtsɔɔ Mɛi Nii. Wɔnyɛɔ wɔkɛ nibii nɛɛ . . .

  •   jeɔ sanegbaa shishi,

  • yeɔ wɔbuaa mɛi koni amɛná Biblia lɛ he miishɛɛ,

  • kanyaa mɛi koni amɛkase Biblia lɛ,

  • tsɔɔ mɛi anɔkwale lɛ,

  • woɔ mɛi hewalɛ ni amɛya wɔwɛbsaiti lɛ nɔ, ni wɔkɛfɔ̃ɔ amɛ nine ni amɛba Maŋtsɛyeli Asa lɛ nɔ.

Kɛ́ wɔyɛ Nibii Ni Wɔkɛtsuɔ Nii Kɛtsɔɔ Mɛi Nii lɛ shi wɔkɛtsuuu nii lɛ, amɛhe baŋ sɛɛnamɔ. * Akɛ nɔkwɛmɔnɔ lɛ, kɛ́ oshiɛ ohã mɔ ko ni ona akɛ eyɛ sane lɛ he miishɛɛ lɛ, obaanyɛ ohã lɛ trati loo magazin koni ehi kanemɔ kɛyashi obaaku osɛɛ oya eŋɔɔ. Esa akɛ wɔto wɔnibii ahe gbɛjianɔ koni wɔnyɛ wɔkɛ ekãa ashiɛ Maŋtsɛyeli lɛ he sane lɛ daa nyɔɔŋ nɔ.

11. Mɛɛ yiŋtoo hewɔ afee Online Bible Study Lessons lɛ?

11 Gbɛ kroko ni Yehowa miitsɔ nɔ eeye eebua mɛi koni amɛkase anɔkwale lɛ ji kɛtsɔ Online Bible Study Lessons ni yɔɔ jw.org® lɛ nɔ lɛ anɔ. Mɛɛ yiŋtoo hewɔ akɛ nikasemɔi nɛɛ wo wɛbsaiti lɛ nɔ? Daa nyɔɔŋ nɔ lɛ, mɛi akpei abɔ yaa Intanɛt lɛ nɔ koni amɛyakase Biblia lɛ. Kɛ́ mɛi tee wɔwɛbsaiti lɛ nɔ lɛ, nibii ni amɛbaakase lɛ baanyɛ ahã amɛná anɔkwale lɛ he miishɛɛ. Mɛi komɛi yɛ ni kɛ́ wɔshiɛ wɔhã amɛ ni wɔkɛɛ amɛ akɛ wɔbaasumɔ ni wɔkɛ amɛ akase Biblia lɛ, amɛnyaaa he. No hewɔ lɛ, wɔbaanyɛ wɔgbala amɛjwɛŋmɔ kɛya nikasemɔi nɛɛ ni yɔɔ wɔwɛbsaiti lɛ nɔ lɛ anɔ, loo wɔkɛ amɛhe link amaje amɛ. *

12. Mɛɛ saji awie he yɛ Online Bible Study Lessons lɛ amli?

12 Nikasemɔi etɛ yɔɔ Online Bible Study Lessons lɛ mli. Amɛyitsei ji: “The Bible and Its Author” (Biblia Lɛ Kɛ Mɔ Ni Hã Aŋma), “The Bible’s Main Characters” (Mɛi Titrii Ni Awie Amɛhe Yɛ Biblia Lɛ Mli), kɛ “The Bible’s Message of Hope” (Hiɛnɔkamɔ Ni Biblia Lɛ Hãa Wɔnáa). Nikasemɔi nɛɛ wieɔ saji ni nyiɛ sɛɛ nɛɛ ahe:

  • Bɔ ni Biblia lɛ baanyɛ aye abua wɔ

  • Mɔ ni Yehowa, Yesu, kɛ ŋwɛibɔfoi lɛ ji

  • Nɔ hewɔ ni Nyɔŋmɔ bɔ adesai

  • Nɔ hewɔ ni wɔpiŋɔ ni nibii gbohii yaa nɔ

Kɛ agbɛnɛ hu, bɔ ni Yehowa . . .

  • baafo piŋmɔ kɛ gbele sɛɛ,

  • etee mɛi ni egboi lɛ shi, ni

  • ejie adesai anɔyelii ni ekɛ e-Maŋtsɛyeli lɛ aba.

13. Kɛ́ mɔ ko kase nikasemɔi ni yɔɔ wɛbsaiti lɛ nɔ lɛ egbe naa lɛ, ani ehe miihia lolo ni akɛ lɛ afee Biblia mli nikasemɔ? Tsɔɔmɔ mli.

13 Kɛ́ mɔ ko kase nikasemɔi ni yɔɔ wɛbsaiti lɛ nɔ lɛ, no etsɔɔɔ akɛ ehe ehiaaa ni akɛ lɛ feɔ Biblia mli nikasemɔ. Biblia mli nikasemɔi anɔ wɔtsɔɔ wɔyeɔ famɔ ni Yesu kɛhã wɔ akɛ wɔfee mɛi kaselɔi lɛ nɔ. Nikasemɔi ni yɔɔ wɛbsaiti lɛ nɔ lɛ baahã mɛi aná he miishɛɛ akɛ amɛbaakase Biblia lɛ, ni no baanyɛ ahã amɛkpɛlɛ ni wɔkɛ amɛ akase nii. No hewɔ lɛ, yɛ nikasemɔi lɛ ateŋ eko fɛɛ eko naagbee lɛ, awoɔ nikaselɔ lɛ hewalɛ ni ebi ni ahã mɔ ko aba eŋɔɔ ni ekɛ lɛ abakase Biblia lɛ. Daa gbi lɛ, mɛi aaafee 230 ni yɔɔ je lɛŋ hei srɔtoisrɔtoi tsɔɔ wɔwɛbsaiti lɛ nɔ amɛbiɔ ni akɛ amɛ abakase Biblia lɛ! Ehe miihia waa ni akɛ mɛi afee Biblia mli nikasemɔ!

YE OBUA MƐI NI AMƐBATSƆMƆ KRISTO KASELƆI

14. Yɛ famɔ ni Yesu kɛhã ni abɔ he amaniɛ yɛ Mateo 28:19, 20 lɛ naa lɛ, mɛni esa akɛ wɔmia wɔhiɛ wɔfee? Ni mɛni hewɔ?

14 Kanemɔ Mateo 28:19, 20. Kɛ́ wɔkɛ mɛi kase Biblia lɛ, esa akɛ wɔfee bɔ fɛɛ bɔ ni wɔbaanyɛ kɛye wɔbua amɛ ni ‘amɛbatsɔmɔ kaselɔi, ni wɔtsɔɔ amɛ ni amɛye nii fɛɛ ni Yesu efã wɔ lɛ nɔ.’ Esa akɛ wɔye wɔbua amɛ ni amɛna akɛ, ehe miihia waa ni amɛbasɔmɔ Yehowa ni amɛfi e-Maŋtsɛyeli lɛ sɛɛ. Nɔ ni enɛ biɔ ni wɔfee ji, ni wɔwo amɛ hewalɛ ni amɛkɛ nibii ni amɛkaseɔ lɛ atsu  nii, amɛjɔɔ amɛhe nɔ amɛhã Yehowa, ni amɛhã abaptisi amɛ. Ja amɛfee nibii nɛɛ dani amɛyi baaná wala yɛ Yehowa gbi lɛ nɔ.​—1 Pet. 3:21.

15. Mɛni esaaa akɛ wɔfeɔ? Ni mɛni hewɔ?

15 Tamɔ bɔ ni wɔwie kɛtsɔ hiɛ lɛ, be ni eshwɛ dani naagbee lɛ baaba lɛ faaa kwraa. Enɛ hewɔ lɛ, kɛ́ wɔna akɛ mɔ ko ni wɔkɛkaseɔ Biblia lɛ efeko klalo akɛ ebaatsɔ Kristo kaselɔ lɛ, esaaa akɛ wɔfiteɔ be yɛ ehe. (1 Kor. 9:26) Be ni eshwɛ lɛ faaa dɔŋŋ, ni nitsumɔ ma shi! Mɛi pii yɛ ni nuko sane lɛ, ni esa akɛ wɔbɔ mɔdɛŋ wɔshiɛ wɔhã amɛ dani naagbee lɛ aba.

TSI OHE KWRAA KƐJE AMALE JAMƆ HE

16. Yɛ nɔ ni awie yɛ Kpojiemɔ 18:2, 4, 5, 8 lɛ naa lɛ, mɛni esa akɛ wɔ fɛɛ wɔfee? (Kwɛmɔ shishigbɛ niŋmaa lɛ hu.)

16 Kanemɔ Kpojiemɔ 18:2, 4, 5, 8. Ŋmalɛ nɛɛ tsɔɔ wɔ nɔ kroko ni Yehowa miisumɔ ni etsuji afee. Eesumɔ ni anɔkwa Kristofoi fɛɛ atsi amɛhe kwraa kɛje Babilon Kpeteŋkpele lɛ he. Akɛ nɔkwɛmɔnɔ lɛ, kɛ́ mɔ ko ni okɛkaseɔ Biblia lɛ miitao etsɔ shiɛlɔ ni abaptisiko lɛ lɛ, esa akɛ ekɛ amale jamɔi fɛɛ afo tako mli. Ekolɛ, be ni okɛ lɛ bɔiko Biblia lɛ kasemɔ lɛ, eyɛ amale jamɔ ko mli, ekɛ amɛ feɔ ekome kɛjáa, ni nɔ fɛɛ nɔ ni amɛbaafee yɛ jamɔ lɛ mli lɛ, ekɛ ehe woɔ mli. Aloo ekolɛ, etsuɔ oniai srɔtoi ehãa amɛ. Kɛ́ nakai ni lɛ, belɛ esa akɛ eŋma wolo eyahã nakai jamɔ lɛ ni ekɛɛ amɛ akɛ, efataaa amɛhe dɔŋŋ, aloo etsɔ gbɛ kroko nɔ ehã amɛle faŋŋ akɛ, efataaa amɛhe dɔŋŋ. Nakai nɔŋŋ esa akɛ efee kɛ́ eyɛ gbɛjianɔtoo kroko ni kɛ Babilon Kpeteŋkpele lɛ yɔɔ tsakpãa lɛ mli. *

17. Mɛɛ heloonaa nitsumɔ esaaa akɛ Kristofonyo tsuɔ? Ni mɛni hewɔ?

17 Esa akɛ anɔkwa Kristofoi akwɛ jogbaŋŋ ni amɛkatsu heloonaa nitsumɔ ko ni kɛ Babilon Kpeteŋkpele lɛ yɔɔ tsakpãa bibioo po. (2 Kor. 6:14-17) Akɛ nɔkwɛmɔnɔ lɛ, esaaa akɛ anɔkwa Kristofonyo yabiɔ nitsumɔ yɛ sɔlemɔ ko. Nakai nɔŋŋ esaaa akɛ eyatsuɔ nii be kplaŋŋ loo eyatsuɔ nitsumɔ wulu ko yɛ sɔlemɔtsũ loo tsũ kroko ni mɛi ni jeee anɔkwa Kristofoi lɛ kpeɔ kɛjáa yɛ mli lɛ mli. Kɛ́ eyɛ lɛ diɛŋtsɛ enitsumɔ lɛ, esaaa akɛ eheɔ kɔntrati loo eŋmaa egbɛ́i kɛhã nitsumɔ ko yɛ gbɛjianɔtoo ko ni kɛ Babilon Kpeteŋkpele lɛ yɔɔ tsakpãa lɛ mli. Mɛni hewɔ esa akɛ wɔbu sane nɛɛ akɛ eji hiɛdɔɔ sane lɛ? Ejaakɛ wɔsumɔɔɔ ni wɔnáa gbɛfaŋnɔ ko kwraa yɛ jamɔi ni he tseee yɛ Nyɔŋmɔ hiɛ lɛ anitsumɔi kɛ eshai lɛ amli.​—Yes. 52:11. *

18. Te nyɛmi nuu ko kɛ Biblia mli shishitoo mlai tsu nii ehã tɛŋŋ?

 18 Afii komɛi ni eho nɛ lɛ, kɔntrata ko yana asafoŋ onukpa ko ni ji kapintafonyo lɛ koni eyatsu nitsumɔ fioo ko ehã lɛ yɛ sɔlemɔtsũ ko ni yɔɔ nyɛmi lɛ akutso lɛ mli lɛ he. Hefimɔ naa kɔntrata nɛɛ yana nyɛmi lɛ, ejaakɛ wɔnyɛmi lɛ ekɛɛ lɛ shii abɔ akɛ etsuuu nii yɛ sɔlemɔtsũi ahe. Shi wɔnyɛmi lɛ eŋmɛɛɛ saji ahe kɛsaaa; ekɛ Biblia mli shishitoo mlai tsu nii, ni emɔɔɔ nitsumɔ lɛ mli. Enɔ otsi lɛ, naa kapintafonyo ko he mfoniri yɛ adafitswaa woji amli ni eeka krɔɔs kɛmiikpɛtɛ sɔlemɔtsũ lɛ he. Eji nyɛmi nuu lɛ mɔ nakai nitsumɔ lɛ mli kulɛ, namɔ he mfoniri osusuɔ akɛ abaana yɛ adafitswaa wolo lɛ mli? Ni kɛ́ eyafee nyɛmi nuu asafoŋ onukpa lɛ he mfoniri lɛ, te enyɛmimɛi Kristofoi lɛ baana lɛ amɛhã tɛŋŋ? Ni te Yehowa hu baanu he ehã tɛŋŋ?

MƐNI WƆKASE?

19-20. (a) Mɛni wɔkase? (b) Ni mɛni wɔbaakase?

19 Nibii ni sa kadimɔ ni agba afɔ̃ shi yɛ Biblia lɛ mli lɛ ateŋ nɔ ni wɔmiikpa gbɛ akɛ etsɛŋ kwraa ebaaba mli ji, kɛɛmɔ ni je lɛŋ hiɛnyiɛlɔi lɛ baakɛɛ akɛ toiŋjɔlɛ eba ni mɛi yɛ shweshweeshwe lɛ. Dromɔ naa lɛ, Yehowa etsɔɔ wɔ nii, ni no hewɔ lɛ, wɔle akɛ je lɛŋ hiɛnyiɛlɔi lɛ nyɛŋ amɛkɛ anɔkwa toiŋjɔlɛ ni hiɔ shi daa aba kɔkɔɔkɔ. Shi dani nakai nifeemɔ lɛ kɛ hiɛkpatamɔ ni baanyiɛ sɛɛ kɛba lɛ baaba lɛ, mɛni Yehowa miikpa gbɛ akɛ wɔfee? Eekpa gbɛ akɛ wɔbaashiɛ Maŋtsɛyeli lɛ he sane lɛ kɛ ekãa ni wɔbɔ mɔdɛŋ wɔfee mɛi kaselɔi. Nakai beiaŋ nɔŋŋ lɛ, esa akɛ wɔtsi wɔhe kwraa kɛje amale jamɔi fɛɛ ahe. Ni tsɔɔ akɛ, kɛ́ wɔkɛ wɔhe edɔmɔ kuu ko loo gbɛjianɔtoo ko ni kɛ Babilon Kpeteŋkpele lɛ yɔɔ tsakpãa lɛ, loo wɔŋma wɔgbɛ́i yɛ eko mli lɛ, esa akɛ wɔkɛ amɛ afo tako mli. Agbɛnɛ hu, esaaa akɛ wɔtsuɔ nitsumɔi ni kɛ amale jamɔi yɔɔ tsakpãa.

20 Nibii krokomɛi hu baaya nɔ yɛ “naagbee gbii lɛ” anaagbee gbii lɛ amli. Nakai nɔŋŋ nibii krokomɛi hu yɛ ni Yehowa miisumɔ ni wɔfee. Mɛni ji nibii nɛɛ? Ni te wɔbaafee tɛŋŋ wɔsaa wɔhe wɔto nibii fɛɛ ni etsɛŋ ebaaba lɛ? Nikasemɔ ni nyiɛ sɛɛ lɛ baatsɔɔ wɔ.

LALA 71 Yehowa Asraafoi Ji Wɔ!

^ kk. 5 Etsɛŋ, je lɛŋ hiɛnyiɛlɔi baakɛɛ akɛ toiŋjɔlɛ eba ni mɛi yɛ shweshweeshwe. Kɛ́ wɔnu nakai sane lɛ pɛ, esa akɛ wɔna akɛ amanehulu kpeteŋkpele lɛ yaaje shishi. Shi kɛyashi nakai be lɛ baashɛ lɛ, mɛni Yehowa miisumɔ ni wɔfee? Nikasemɔ nɛɛ baaye abua wɔ ni wɔhã sanebimɔ nɛɛ hetoo.

^ kk. 3 Akɛ nɔkwɛmɔnɔ lɛ, Jeŋmaji Ekomefeemɔ lɛ ewie yɛ amɛwɛbsaiti lɛ nɔ akɛ, “amɛhãa toiŋjɔlɛ baa majimaji ateŋ, ni mɛi hiɔ shi shweshweeshwe.”

^ kk. 23 Kɛ́ ootao ole bɔ ni akɛ Nibii Ni Wɔkɛtsuɔ Nii Kɛtsɔɔ Mɛi Nii lɛ eko fɛɛ eko tsuɔ nii ahãa lɛ, kanemɔ sane ni yitso ji, “Tsɔɔmɔ Mɛi Anɔkwale Lɛ,” ni je kpo yɛ October 2018 Buu-Mɔɔ lɛ mli lɛ.

^ kk. 11 Amrɔ nɛɛ, nikasemɔi nɛɛ yɛ Blɔfo kɛ Portuguese pɛ mli, shi sɛɛ mli lɛ, abaatsɔɔ shishi kɛya wiemɔi krokomɛi amli.

^ kk. 16 Gbɛjianɔtoi ni buaa oblahii kɛ oblayei anaa kɛhã hiɛtserɛjiemɔ, gbɛjianɔtoi ni buaa mɛi anaa kɛhã kpɔiaŋgbɔlemɔ, kɛ gbɛjianɔtoi krokomɛi ni tamɔ nakai lɛ ekomɛi kɛ amale jamɔi yɛ tsakpãa, tamɔ YMCA (Young Men’s Christian Association) lɛ, kɛ YWCA (Young Women’s Christian Association) lɛ nɛkɛ, ni esaaa akɛ wɔkɛ wɔhe dɔmɔɔ nakai gbɛjianɔtoi lɛ. Kui komɛi ni kɛ gbɛjianɔtoi nɛɛ yɔɔ tsakpãa lɛ kɛɔ akɛ amɛnifeemɔi lɛ kɛ jamɔ bɛ nɔ ko feemɔ tsɔ. Shi yɛ anɔkwale mli lɛ, otii ni mamɔ gbɛjianɔtoi nɛɛ ahiɛ, kɛ nibii ni amɛtsɔɔ mɛi lɛ hãa anaa akɛ, amɛkɛ jamɔi komɛi yɛ tsakpãa.

^ kk. 17 Ajɛ Biblia lɛ mli agbala bɔ ni esa akɛ Kristofoi ana nitsumɔi ni kɛ amale jamɔi yɔɔ tsakpãa lɛ amɛhã lɛ mli fitsofitso yɛ “Sanebimɔi Ni Jɛ Kanelɔi Adɛŋ” ni je kpo yɛ April 15, 1999 Buu-Mɔɔ lɛ mli lɛ mli.

^ kk. 83 MFONIRI LƐ HE SANE: Nyɛmi nuu ko kɛ eŋa nyiɛ shiɛmɔ nɔ ni amɛmiiwo amɛtsui fioo yɛ he ko ni ahɔ̃ɔ kɔfi yɛ. Trukaa lɛ, atswa adafi yɛ TV lɛ nɔ akɛ je lɛŋ hiɛnyiɛlɔi lɛ kɛɛ toiŋjɔlɛ eba ni mɛi yɛ shweshweeshwe. Mɛi ni yɔɔ jɛmɛ lɛ ahiɛ efee amɛ yaa, shi nyɛmi nuu lɛ kɛ eŋa lɛ le nɔ tuuntu ni baanyiɛ sɛɛ kɛba.