Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Nyɔŋmɔ “ahum” lɛ miitswa kɛmiiba, no hewɔ lɛ, esa akɛ wɔbɔ mɛi kɔkɔ!

Nyɔŋmɔ Kpãtãa Mɛi Fɔji Ahiɛ​—Shi Be Fɛɛ Be Lɛ, Ebɔɔ Amɛ Kɔkɔ Yɛ Be Naa Dã

Nyɔŋmɔ Kpãtãa Mɛi Fɔji Ahiɛ​—Shi Be Fɛɛ Be Lɛ, Ebɔɔ Amɛ Kɔkɔ Yɛ Be Naa Dã

KƐ́ MƐI ni tsuɔ nii yɛ he ko ni ajɛɔ ahãa mɛi leɔ bɔ ni kɔɔyɔɔ lɛ mli baafee lɛ na akɛ ahum ko hiɛ foi kɛmiiba he ko ni mɛi pii yɔɔ lɛ, mɛni amɛfeɔ? Amɛtsɔɔ gbɛ fɛɛ gbɛ ni amɛbaanyɛ nɔ amɛbɔɔ mɛi lɛ kɔkɔ shii abɔ, ejaakɛ mɛi lɛ asane kã amɛtsui nɔ.

Yehowa miifee nɔ ko ni tamɔ nakai nɔŋŋ yɛ wɔgbii nɛɛ amli. Eebɔ mɛi kɔkɔ yɛ nɔ ko ni yɔɔ oshãra kwraa fe ahum fɛɛ ahum ni etswa pɛŋ lɛ he. Shi mɛɛ gbɛ nɔ eetsɔ eefee nakai? Ni mɛni hewɔ wɔbaanyɛ wɔkɛɛ akɛ ehã mɛi be ni fa bɔ ni sa koni amɛkɛfee nɔ ko yɛ ekɔkɔbɔɔ lɛ he? Hã wɔsusu bɔ ni Yehowa bɔ mɛi kɔkɔ yɛ blema lɛ he koni no aye abua wɔ ni wɔhã sanebimɔi nɛɛ ahetoo.

NYƆŊMƆ BƆ AMƐ KƆKƆ

Biblia lɛ hãa wɔleɔ mfonirifeemɔŋ ahum srɔtoi ni Yehowa to eyiŋ akɛ ebaahã etswa ni ekɛkpãtã mɛi ni jeɔ gbɛ amɛgboɔ efamɔi anɔ toi lɛ ahiɛ lɛ ahe sane. (Abɛi 10:25; Yer. 30:23) Be fɛɛ be ni Yehowa baato eyiŋ nakai lɛ, ebɔɔ mɛi ni hiɛkpatamɔ lɛ baanyɛ asa amɛhe lɛ kɔkɔ, etsɔɔ amɛ tsakemɔi ni esa akɛ amɛfee koni amɛhiɛ akakpãtã, ni ehãa amɛ be ni amɛkɛfee tsakemɔi nɛɛ. (2 Maŋ. 17:12-15; Neh. 9:29, 30) Bei pii lɛ, ekɛ kɔkɔbɔɔ nɛɛ tsuɔ etsuji anɔkwafoi ni yɔɔ shikpɔŋ lɛ nɔ lɛ, ni etsɔɔ amɛnɔ ehãa mɛi lɛ leɔ akɛ esa akɛ amɛtsu kɔkɔbɔɔ lɛ he nɔ ko oya nɔŋŋ. Efeɔ nakai koni no atsirɛ mɛi lɛ ni amɛtsake.​—Amos 3:7.

Nyɔŋmɔ tsuji anɔkwafoi nɛɛ ateŋ mɔ kome ji Noa. Noa fee ekãa ni ekɛ afii pii bɔ eyinɔbii awuiyelɔi ni jeŋba ekpɔtɔ lɛ kɔkɔ akɛ, Nyɔŋmɔ kɛ Nu Afua baaba shikpɔŋ lɛ nɔ fɛɛ. (1 Mo. 6:9-13, 17) Kɛfata he lɛ, etsɔɔ amɛ nɔ ni ehe miihia ni amɛfee koni akakpãtã amɛhiɛ yɛ Nu Afua lɛ mli. Hiɛdɔɔ kɛ ekãa ni Noa kɛshiɛ lɛ hewɔ lɛ, sɛɛ mli po lɛ, atsɛ lɛ akɛ “jalɛ shiɛlɔ.”​—2 Pet. 2:5.

Kɛ̃lɛ, mɛi lɛ booo kɔkɔ ni Nyɔŋmɔ tsɔ Noa nɔ ebɔ amɛ lɛ toi. Amɛkɛ amɛnifeemɔ tsɔɔ akɛ amɛbɛ hemɔkɛyeli kwraa. No hewɔ lɛ, amɛgboi; “Nu Afua lɛ ba ebabɛɛ amɛ fɛɛ kɛtee.” (Mat. 24:39; Heb. 11:7) Be ni Nyɔŋmɔ kɛ Nu Afua lɛ ba lɛ, amɛteŋ mɔ ko mɔ ko nyɛɛɛ ashwa lɛ akɛ ebɔɔɔ amɛ kɔkɔ.

Shi jeee be fɛɛ be Yehowa kɛ afii pii bɔɔ mɛi kɔkɔ. Bei komɛi lɛ, ebɔɔ mɛi kɔkɔ be ni eshwɛ fioo ni hiɛkpatamɔ lɛ baaba. Ni kɛ̃lɛ, yɛ bei ni tamɔ nakai lɛ amli po lɛ, mɛi lɛ náa be ni fa bɔ ni sa ni amɛkɛbaafee nɔ ko yɛ kɔkɔbɔɔ lɛ he. Akɛ nɔkwɛmɔnɔ lɛ, Haomɔi Nyɔŋma ni ekɛba blema Ejipt maŋ lɛ nɔ lɛ ateŋ eko kwraa bɛ ni etsɔɔɔ hiɛ ebɔɔɔ mɛi kɔkɔ yɛ he dani ekɛba. Bo lɛ, susumɔ haomɔ ni ji kpawo lɛ, ni ji nyɔŋmɔŋtɛi ni ehã enɛ ni efite nii waa lɛ he okwɛ. Gbi ni enɔ jetsɛremɔ lɛ Yehowa kɛ haomɔ nɛɛ baaba lɛ, etsu Mose kɛ Aaron ni amɛyabɔ Farao kɛ etsuji lɛ kɔkɔ yɛ he. Ani kɔkɔbɔɔ nɛɛ ba mra bɔ ni sa, ni kɛ́ mɔ ko miitao ejo nyɔŋmɔŋtɛi lɛ anaa foi lɛ ebaaná be efee nakai? Biblia lɛ kɛɔ akɛ: “Farao tsuji lɛ ateŋ mɔ fɛɛ mɔ ní yashe Yehowa wiemɔ lɛ gbeyei lɛ he fee oya ni eyaŋɔ lɛ diɛŋtsɛ etsuji kɛ ekooloi kɛba shĩa, shi mɔ fɛɛ mɔ ní ebuuu Yehowa wiemɔ lɛ shi etsuji kɛ ekooloi yɛ ŋa lɛ mli.” (2 Mo. 9:18-21) Enɛ hãa wɔnaa faŋŋ akɛ, Yehowa bɔ amɛ kɔkɔ mra bɔ ni sa, ni mɛi fɛɛ ni tsu nɔ ko yɛ he oya lɛ enaaa nɔ babaoo tamɔ mɛi ni efeee nakai lɛ.

Dani Yehowa kɛ haomɔ ni ji nyɔŋma lɛ hu baaba lɛ, ebɔ Farao kɛ etsuji lɛ kɔkɔ yɛ he. Shi amɛfee buulu; amɛbooo toi. (2 Mo. 4:22, 23) Enɛ hewɔ lɛ, amɛkromɔbii hii lɛ gboi mɔbɔmɔbɔ. (2 Mo. 11:4-10; 12:29) Ani amɛná be ni fa bɔ ni sa ni amɛbaabo kɔkɔbɔɔ lɛ toi ni amɛtsu nɔ ko yɛ he? Hɛɛ! Yehowa hã Mose bɔ Israelbii lɛ hu kɔkɔ amrɔ nɔŋŋ yɛ haomɔ ni baa lɛ he, ni etsɔɔ amɛ  nɔ ni amɛfee koni amɛ kɛ amɛwekui lɛ ayi aná wala. (2 Mo. 12:21-28) Mɛi enyiɛ bo nakai kɔkɔbɔɔ lɛ toi? Israelbii kɛ “futufutu gbɔmɛi babaoo,” ni ji, Ejiptbii kɛ mɛi srɔtoisrɔtoi ni jeee Israelbii. Yɛ akɔntaa ko ni abu lɛ naa lɛ, mɛi akpekpei etɛ kɛ sɛɛ bo toi ni amɛná wala, ni sɛɛ mli lɛ, amɛshi Ejipt.​—2 Mo. 12:38; shn.

Saji ni wɔsusu he nɛɛ hãa wɔnaa akɛ, yɛ blema lɛ, be fɛɛ be ni Yehowa kɛ hiɛkpatamɔ ko baaba lɛ, ebɔɔ mɛi kɔkɔ, ni ehãa amɛ be ni fa bɔ ni sa ni amɛfee nɔ ko yɛ kɔkɔbɔɔ lɛ he. (5 Mo. 32:4) Mɛni hewɔ efee nakai? Efee nakai ejaakɛ mɛi lɛ asane kã etsui nɔ. Ená kulɛ, amɛbaatsake amɛtsui ni amɛkɛ egbɛtsɔɔmɔi atsu nii koni amɛhiɛ akakpãtã. (Yes. 48:17, 18; Rom. 2:4) Bɔfo Petro wie akɛ, Yehowa ‘sumɔɔɔ akɛ akpãtã mɔ ko mɔ ko hiɛ, shi moŋ eesumɔ ni mɛi fɛɛ atsake amɛtsui.’​—2 Pet. 3:9.

ŊMƐNƐ HU LƐ NYƆŊMƆ MIIBƆ MƐI KƆKƆ

Ŋmɛnɛ hu lɛ, akɛ hiɛdɔɔ miibɔ mɛi fɛɛ ni yɔɔ shikpɔŋ lɛ nɔ lɛ kɔkɔ yɛ hiɛkpatamɔ ko ni baa lɛ he, ni esa akɛ amɛbo toi. Be ni Yesu yɔɔ shikpɔŋ lɛ nɔ lɛ, ebɔ kɔkɔ akɛ “amanehulu kpeteŋkpele” ko baaba ni je nɛɛ hiɛ baakpãtã. (Mat. 24:21) Yesu gba nibii ni esɛɛnyiɛlɔi lɛ baana kɛ bɔ ni shihilɛ baafee be ni eshwɛ fioo ni hiɛkpatamɔ nɛɛ baaba lɛ fitsofitso efɔ̃ shi. Yesu gbalɛ lɛ miiba mli ŋmɛnɛ, ni wɔmiina.​—Mat. 24:3-12; Luka 21:10-13.

Hiɛkpatamɔ ni Yesu egba akɛ ebaaba lɛ hewɔ lɛ, ŋmɛnɛ lɛ, Yehowa miiwo mɛi fɛɛ hewalɛ ni amɛbasɔmɔ lɛ ni amɛbo lɛ toi. Mɛi ni baabo lɛ toi lɛ baaná shihilɛ kpakpa ŋmɛnɛ, ni wɔsɛɛ hu lɛ, amɛbaaná jɔɔmɔi pii yɛ ejalɛ jeŋ hee lɛ mli. (2 Pet. 3:13) Yehowa miisumɔ ni eye ebua mɛi ni amɛhe amɛye akɛ, nibii ni ewo shi lɛ baaba mli. Enɛ hewɔ lɛ, ehã aashiɛ sane ko ni baanyɛ ahere mɛi ayiwala. Sane nɛɛ ji “Maŋtsɛyeli lɛ he sane kpakpa” lɛ ni Yesu kɛɛ abaashiɛ “yɛ shikpɔŋ lɛ nɔ fɛɛ koni akɛye jeŋmaji lɛ fɛɛ odase” lɛ. (Mat. 24:14) Nyɔŋmɔ eto mɛi ni jáa lɛ lɛ ahe gbɛjianɔ, ni ŋmɛnɛ lɛ, amɛmiishiɛ sane nɛɛ yɛ maji aaafee 240 anɔ. Yehowa miisumɔ ni mɛi babaoo abo ekɔkɔbɔɔ lɛ toi koni amɛje hiɛkpatamɔ ni baa mɛi fɔji lɛ anɔ lɛ mli, aloo kɛ́ wɔɔwie lɛ, koni “ahum” ni tswaa kɛbaa lɛ akabɛɛ amɛ kɛtee.​—Zef. 1:14, 15; 2:2, 3.

Yɛ nibii ni wɔsusu he lɛ ahewɔ lɛ, wɔbaanyɛ wɔwie kɛ nɔmimaa akɛ, be fɛɛ be ni Yehowa kɛ hiɛkpatamɔ ko baaba lɛ, ebɔɔ mɛi kɔkɔ ni ehãa amɛ be ni fa bɔ ni sa ni amɛtsu nɔ ko yɛ he. Nɔ moŋ ni shwɛɔ ji, kɛji mɛi baabo kɔkɔbɔɔ lɛ toi dani ekpe sɛɛ tsɔ. Nyɛhãa wɔ, ni ji mɛi ni Nyɔŋmɔ kɛ kɔkɔbɔɔ nɛɛ etsu lɛ, afee nɔ fɛɛ nɔ ni wɔbaanyɛ kɛye wɔbua mɛi babaoo ni amɛje hiɛkpatamɔ ni baa je nɛɛ nɔ lɛ mli.