Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

 NIKASEMƆ 48

‘Gbee Nɔ Ni Oje Efeemɔ Shishi Lɛ Naa’

‘Gbee Nɔ Ni Oje Efeemɔ Shishi Lɛ Naa’

‘Nyɛgbea nɔ ni nyɛje efeemɔ shishi lɛ naa.’​—2 KOR. 8:11.

LALA 35 “Nyɛkwɛa Ní Nyɛna Nibii Ni He Hiaa Waa Lɛ”

NƆ NI ABAASUSU HE *

1. Mɛɛ hegbɛ Yehowa ehã wɔ?

YEHOWA ehã wɔ hegbɛ ni wɔ diɛŋtsɛ wɔkpɛ wɔyiŋ yɛ saji ahe. Etsɔɔ wɔ bɔ ni wɔbaafee wɔkpɛ yiŋ kpakpai, ni kɛ́ wɔkpɛ yiŋ ni sa ehiɛ lɛ, eyeɔ ebuaa wɔ koni wɔnyɛ wɔtsu he nii. (Lala 119:173) Kɛ́ wɔkɛ nibii ni wɔkaseɔ yɛ Nyɔŋmɔ Wiemɔ lɛ mli lɛ tsu nii lɛ, wɔhiɛ baakã shi, ni ewaŋ tsɔ kɛhãŋ wɔ akɛ wɔbaakpɛ yiŋ kpakpai.​—Heb. 5:14.

2. Kɛ́ wɔnyɛ wɔkpɛ yiŋ kpakpa po lɛ, bei pii lɛ, mɛni baa?

2 Shi be ni wɔkpɛ yiŋ kpakpa po lɛ, eshwɛɔ bɔ ni wɔbaafee ni wɔtsu he nii, ni jeee be fɛɛ be wɔnyɛɔ wɔfeɔ nakai. Naa enɛ he nɔkwɛmɔnii komɛi: Nyɛmi nuu oblanyo ko kpɛ eyiŋ akɛ ebaakane Biblia muu lɛ fɛɛ. Ebɔ mɔdɛŋ eje shishi ni ekane otsii fioo komɛi, shi be ni ebaahɛle shi lɛ, ekpa kanemɔ. Nyɛmi yoo ko kpɛ eyiŋ akɛ ebaatsɔ daa gbɛgbalɔ, shi kɛ́ be ni eto akɛ ebaaje shishi lɛ shɛ lɛ, kɛkɛ lɛ etsi eto. Onukpai akuu ko kpɛ amɛyiŋ akɛ amɛbaafɔ nyɛmimɛi ni yɔɔ amɛsafo lɛ mli lɛ saramɔ, shi nyɔji pii baho ni amɛfeko nakai. Eyɛ mli akɛ esoro mɛi ni wɔwie amɛhe nɛɛ ateŋ mɔ fɛɛ mɔ shihilɛ moŋ, shi amɛ fɛɛ amɛyɛ naagba kome. Amɛkpɛ yiŋ lɛ pɛpɛɛpɛ, shi amɛtsuuu he nii. Nɔ ko nakai ba yɛ blema Korinto asafo lɛ mli. Te eba lɛ tɛŋŋ? Ni mɛni wɔbaanyɛ wɔkase yɛ mli?

3. Mɛɛ yiŋ Korintobii lɛ kpɛ? Shi mɛni ba?

3 Yɛ aaafee afi 55 Ŋ.B. lɛ, Korinto asafo lɛ kpɛ yiŋ ko ni he hiaa waa. No mli lɛ, amɛnu akɛ asafoi komɛi miitsu onia koni akɛyaye abua nyɛmimɛi ni yɔɔ Yerusalem kɛ Yudea lɛ, ejaakɛ amɛhe efi amɛ ni amɛmiiye ohia. Korintobii lɛ amli hi ni amɛfeɔ ejurɔ waa. No hewɔ lɛ, amɛkpɛ mli akɛ, amɛ hu amɛbaatsu onia koni akɛfata asafoi krokomɛi lɛ anɔ lɛ he, ni amɛbi bɔfo Paulo bɔ ni amɛbaafee amɛto he gbɛjianɔ. Paulo hã amɛ  gbɛtsɔɔmɔi, ni ekɛɛ Tito ni eye ebua amɛ ni amɛto he gbɛjianɔ. (1 Kor. 16:1; 2 Kor. 8:6) Shi nyɔji fioo komɛi asɛɛ lɛ, Paulo nu akɛ nyɛmimɛi lɛ tsuko nɔ ni amɛkpɛ amɛyiŋ akɛ amɛbaafee lɛ he nii. Ena akɛ, kɛ́ amɛfeee he nɔ ko oya lɛ, ekolɛ nine shɛŋ amɛ onia lɛ nɔ mra ni akɛfata asafoi krokomɛi lɛ anɔ lɛ he ni akɛya Yerusalem.​—2 Kor. 9:4, 5.

4. Tamɔ bɔ ni wɔnaa yɛ 2 Korintobii 8:7, 10, 11 lɛ, mɛni Paulo wo Korintobii lɛ hewalɛ ni amɛfee?

4 Yiŋ ni Korintobii lɛ kpɛ lɛ ji yiŋ kpakpa, ni Paulo jie amɛyi yɛ hemɔkɛyeli kpele ni amɛyɔɔ kɛ bɔ ni amɛshweɔ waa akɛ amɛfee amɛnyɛmimɛi lɛ ejurɔ lɛ hewɔ. Shi ewo amɛ hewalɛ ni amɛgbe nɔ ni amɛje efeemɔ shishi lɛ naa. (Kanemɔ 2 Korintobii 8:7, 10, 11.) Amɛsane lɛ hãa wɔnaa akɛ, bei komɛi lɛ, Kristofoi anɔkwafoi po náaa lɛ mlɛo akɛ amɛbaatsu yiŋ kpakpa ko ni amɛkpɛ lɛ he nii.

5. Mɛɛ sanebimɔi wɔbaahã hetoo yɛ nikasemɔ nɛɛ mli?

5 Tamɔ bɔ ni eba lɛ yɛ Korintobii lɛ agbɛfaŋ lɛ, bei komɛi lɛ, wɔ hu wɔnáaa lɛ mlɛo akɛ wɔbaatsu wɔyiŋkpɛi ahe nii. Mɛni hewɔ? Nɔ kome ji akɛ, emuu ni wɔyeee lɛ hewɔ lɛ, bei komɛi lɛ, wɔtsiɔ be wɔwoɔ be mli. Bei komɛi hu lɛ, nibii ni baa be ni wɔkpaaa gbɛ lɛ woɔ wɔnajiaŋ. (Jaj. 9:11; Rom. 7:18) Te wɔbaafee tɛŋŋ wɔna kɛji esa akɛ wɔtsake yiŋ ko ni wɔkpɛ lɛ? Ni mɛni baaye abua wɔ ni wɔtsu yiŋ ni wɔkpɛɔ lɛ ahe nii wɔgbe naa kwraa?

NƆ NI ESA AKƐ OFEE DANI OKPƐ OYIŊ YƐ SANE KO HE

6. Mɛni hewɔ ekolɛ ehe baahia ni wɔtsake yiŋ ko ni wɔkpɛ lɛ?

6 Yiŋ komɛi ni wɔkpɛɔ yɛ shihilɛ mli lɛ ahe miihia waa, ni esaaa akɛ wɔtsakeɔ kɔkɔɔkɔ. Akɛ nɔkwɛmɔnɔ lɛ, wɔkpɛ wɔyiŋ akɛ wɔbaasɔmɔ Yehowa, ni kɛ́ wɔbote gbalashihilɛ mli lɛ, wɔkpɛ wɔyiŋ akɛ wɔbaaye wɔhefatalɔ lɛ anɔkwa. Esaaa akɛ wɔtsakeɔ yiŋ ni wɔkpɛ nɛɛ kɔkɔɔkɔ. (Mat. 16:24; 19:6) Shi yiŋkpɛi lɛ ekomɛi yɛ ni ekolɛ ehe baahia ni wɔtsake. Mɛni hewɔ? Ejaakɛ nibii tsakeɔ. Mɛni baaye abua wɔ ni wɔnyɛ wɔkpɛ wɔyiŋ jogbaŋŋ?

7. Mɛni esa akɛ wɔsɔle wɔbi? Ni mɛni hewɔ?

7 Sɔlemɔ obi Nyɔŋmɔ hiɛshikamɔ. Yehowa kɛ emumɔ lɛ tsirɛ Yakobo ni eŋma akɛ: “Kɛ́ hiɛshikamɔ ehia nyɛteŋ mɔ ko lɛ, eya nɔ ebi Nyɔŋmɔ, ejaakɛ ejɛɔ etsui mli ekɛhãa mɛi fɛɛ ni etekeɔ nɔ.” (Yak. 1:5) Wɔteŋ mɔ ko mɔ ko bɛ ni baanyɛ akɛɛ akɛ ‘hiɛshikamɔ ehiaaa lɛ.’ No hewɔ lɛ, dani obaakpɛ yiŋ ko lɛ, okɛ ohiɛ afɔ̃ Yehowa nɔ, ni kɛ́ ookwɛ kɛji esa akɛ otsake yiŋ ko ni okpɛ lɛ hu, feemɔ nakai nɔŋŋ. Kɛ́ ofee nakai lɛ, Yehowa baaye abua bo ni ofee onii yɛ nilee mli.

8. Dani wɔbaakpɛ wɔyiŋ yɛ sane ko he lɛ, mɛni esa akɛ wɔfee? Ni te wɔbaafee tɛŋŋ wɔfee nakai?

8 Taomɔ nibii amli fitsofitso. Kwɛmɔ nɔ ni Nyɔŋmɔ Wiemɔ lɛ kɛ Yehowa asafo lɛ woji lɛ yɔɔ kɛɛmɔ yɛ sane lɛ he, ni okɛ mɛi ni ole akɛ amɛbaanyɛ amɛwo bo ŋaa kpakpa yɛ he lɛ agba sane. (Abɛi 20:18) Ehe miihia waa ni otao nii amli, titri lɛ, kɛ́ ootao otsake nitsumɔ ni otsuɔ lɛ, ofã oyahi he kroko, loo ootao ole nitsumɔ ni kɛ́ okase loo skul ni kɛ́ otee lɛ, obaaná nɔ ko otsu kɛkwɛ ohe be ni otsuɔ sɔɔmɔ nitsumɔ lɛ.

9. Kɛ́ wɔye wɔhe anɔkwa lɛ, mɛɛ gbɛ nɔ wɔbaaná he sɛɛ?

9 Susumɔ nɔ hewɔ ni otaoɔ okpɛ nakai yiŋ lɛ he. Yehowa le nɔ hewɔ ni wɔfeɔ nibii ni wɔfeɔ lɛ. (Abɛi 16:2) Eesumɔ ni wɔye anɔkwa yɛ nibii fɛɛ mli. No hewɔ lɛ, dani wɔbaakpɛ yiŋ ko lɛ, esa akɛ wɔbi wɔhe nɔ pɔtɛɛ hewɔ ni wɔtaoɔ wɔkpɛ nakai yiŋ lɛ. Agbɛnɛ hu, kɛ́ mɛi bi wɔ he sane lɛ, esa akɛ wɔwie anɔkwale. Kɛ́ wɔyeee wɔ diɛŋtsɛ wɔhe kɛ mɛi krokomɛi anɔkwa lɛ, ebaawa kɛhã wɔ akɛ wɔbaatsu yiŋ ni wɔkpɛ lɛ he nii. Akɛ nɔkwɛmɔnɔ lɛ, ŋɔɔ lɛ akɛ nyɛmi nuu ko kɛɛ Yehowa hiɛ ni etaoɔ esa lɛ hewɔ lɛ, ebaatsɔ daa gbɛgbalɔ. No hewɔ lɛ, ebaje shishi. Shi be ko sɛɛ lɛ, enyɛɛɛ eshɛ  eŋmɛlɛtswaa lɛ he dɔŋŋ, ni enáaa miishɛɛ yɛ shiɛmɔ nitsumɔ lɛ mli. Ekolɛ ehe baahia ni epɛi emli ekwɛ. Ani eeenyɛ efee akɛ, efɔlɔi loo nyɛmi ko ni esumɔɔ esane waa lɛ hiɛ ni etaoɔ esa lɛ moŋ hewɔ ebɔi gbɛgbamɔ nitsumɔ lɛ?

10. Kɛ́ wɔyɛ jeŋba gbonyo ko ni wɔmiitao wɔtsake lɛ, mɛni baaye abua wɔ?

10 Susumɔ shihilɛ nɛɛ hu he okwɛ: Biblia mli nikaselɔ ko ni shɛreɔ zigareti lɛ kpɛ eyiŋ akɛ ebaakpa shɛremɔ. Shishijee lɛ, enáaa lɛ mlɛo kwraa. Enyɛɔ ehiɔ shi otsi loo otsii enyɔ ni eshɛreee, kɛkɛ lɛ, esaa eyashɛre ekoŋŋ. Shi fiofio lɛ, enyɛ ekpa kwraa. Mɛni ye ebua lɛ? Esumɔɔ Yehowa waa, ni eesumɔ ni esa ehiɛ, ni no ji nɔ ni ye ebua lɛ.​—Kol. 1:10; 3:23.

11. Mɛni hewɔ esa akɛ okɛ oti pɔtɛɛ ko ama ohiɛ?

11 Okɛ oti pɔtɛɛ ko ama ohiɛ. Kɛ́ okɛ oti pɔtɛɛ ko, tamɔ ekolɛ be pɔtɛɛ ni okɛbaatsu oyiŋkpɛɛ lɛ he nii emaaa ohiɛ lɛ, ebaawa kɛhã bo akɛ obaatsu oyiŋkpɛɛ lɛ he nii. Akɛ nɔkwɛmɔnɔ lɛ, kɛ́ okpɛ oyiŋ akɛ obaakane Biblia lɛ daa gbi, shi otoko be pɔtɛɛ ni okɛbaakane lɛ, ekolɛ okɛbaayawa gbɛteŋ. * Nakai nɔŋŋ kɛ́ asafoŋ onukpai ni yɔɔ asafo ko mli lɛ kpɛ amɛyiŋ akɛ amɛbaafɔ nyɛmimɛi lɛ saramɔ, shi amɛleee mɛi pɔtɛi ni amɛbaasumɔ ni amɛfɔ saramɔ kɛ be pɔtɛɛ ni amɛbaasumɔ ni amɛfee nakai lɛ, ekolɛ nyɔji abɔ baaho ni amɛnyɛko amɛyasara mɔ ko mɔ ko.

12. Mɛni ekolɛ ehe baahia ni wɔfee? Ni mɛni hewɔ?

12 Hã ehi ojwɛŋmɔ mli akɛ jeee nɔ fɛɛ nɔ obaanyɛ ofee. Jeee nɔ fɛɛ nɔ ni wɔtaoɔ wɔfee lɛ wɔbaaná be, hewalɛ, kɛ nibii ni wɔkɛfee. No hewɔ lɛ, he ni wɔnine baashɛ lɛ, jɛmɛ nii esa akɛ wɔkɔ, ni tsɔɔ akɛ, kɛ́ wɔkɛ oti ko ma wɔhiɛ, ni wɔna akɛ bɔ fɛɛ bɔ ni fee lɛ, wɔnyɛŋ wɔshɛ he lɛ, esa akɛ wɔtsake. (Jaj. 3:6) Shi kɛ́ wɔsusu yiŋ ko ni wɔkpɛ lɛ he, wɔfee tsakemɔi ni he hiaa lɛ, ni wɔmiina faŋŋ akɛ wɔbaanyɛ wɔtsu he nii lɛ, mɛni baaye abua wɔ ni wɔnyɛ wɔtsu he nii? Nyɛhãa wɔkwɛa nibii enumɔ ni baaye abua wɔ.

NIBII NI BAAYE ABUA BO NI OTSU OYIŊKPƐƐ LƐ HE NII

13. Mɛni baaye abua bo ni ‘oná hewalɛ’ kɛtsu oyiŋkpɛi ahe nii?

13 Sɔlemɔ ni Nyɔŋmɔ aye abua bo. Nyɔŋmɔ baanyɛ ahã ‘oná hewalɛ ni ofee’ nɔ ni okpɛ oyiŋ akɛ obaafee lɛ. (Fip. 2:13) No hewɔ lɛ, sɔlemɔ obi Yehowa ni ekɛ emumɔ krɔŋkrɔŋ lɛ aye abua bo. Kɛ́ onu he akɛ osɔlemɔ lɛ hetoo lɛ sɛɛ egbala shi po lɛ, yaa nɔ osɔle. Yesu wie akɛ: “Nyɛyaa nɔ nyɛbia [mumɔ krɔŋkrɔŋ lɛ], ni abaahã nyɛ.”​—Luka 11:9, 13.

14. Mɛɛ gbɛ nɔ shishitoo mla ni yɔɔ Abɛi 21:5 lɛ baanyɛ aye abua bo ni otsu yiŋ ko ni okpɛ lɛ he nii?

14 Too gbɛjianɔ. (Kanemɔ Abɛi 21:5.) Kɛ́ okɛ nɔ ko ma ohiɛ akɛ obaafee lɛ, esa akɛ oto he gbɛjianɔ, ni okɛ gbɛjianɔ ni oto lɛ atsu nii, kɛjeee nakai lɛ, ekolɛ obaaje shishi, shi ogbeŋ naa. Nakai nɔŋŋ kɛ́ okpɛ oyiŋ lɛ, esa akɛ oŋmala nibii pɔtɛi ni esa akɛ ofee koni onyɛ otsu nakai yiŋkpɛɛ lɛ he nii lɛ ofɔ̃ shi. Kɛ́ ofee nakai lɛ, ewaaa akɛ obaana nɔ ni onyɛ otsu, kɛ nɔ ni eshwɛ ni esa akɛ otsu yɛ he. Paulo wo Korintobii lɛ ŋaa akɛ, yɛ nɔ najiaŋ ni amɛbaamɛ ni ebashɛ shi dani amɛbɔi oniatsumɔ lɛ, “otsi fɛɛ otsi mli klɛŋklɛŋ gbi lɛ nɔ lɛ” amɛkɛ nɔ ko ato. (1 Kor. 16:2) Kɛ́ oŋmala nibii bibii ni esa akɛ ofee koni onyɛ otsu nitsumɔ ko ni wa ni okpɛ oyiŋ akɛ obaatsu lɛ he nii ofɔ̃ shi lɛ, ehãŋ ehe nitsumɔ afee bo ahuntoo.

15. Kɛ́ oto nibii ahe gbɛjianɔ jogbaŋŋ, ni oŋma ofɔ̃ shi ogbe naa lɛ, mɛni esa akɛ ofee?

15 Kɛ́ oto nibii ahe gbɛjianɔ jogbaŋŋ, ni oŋma ofɔ̃ shi lɛ, ewaaa akɛ okɛ gbɛjianɔ ni oto lɛ baatsu nii. (1 Kor. 14:40) Akɛ nɔkwɛmɔnɔ lɛ, akɛɛ asafoŋ onukpai akɛ, amɛhala amɛteŋ mɔ kome  ni eŋmala yiŋ srɔtoi fɛɛ ni amɛbaakpɛ, mɔ loo mɛi ni ahala akɛ amɛtsu he nii, kɛ be ni esa akɛ amɛtsu he nii amɛgbe naa lɛ eshwie shi. Kɛ́ asafoŋ onukpai kɛ gbɛtsɔɔmɔ nɛɛ tsu nii lɛ, bei pii lɛ ewaaa akɛ amɛbaatsu amɛyiŋkpɛi ahe nii. (1 Kor. 9:26) Bo hu obaanyɛ ofee nɔ ko ni tamɔ nakai. Akɛ nɔkwɛmɔnɔ lɛ, daa gbi lɛ, obaanyɛ oŋmala nibii ni oyɔɔ tsumɔ yɛ gbi lɛ mli lɛ oshwie shi, ni oto amɛnaa bɔ ni obaasumɔ ni otsu amɛhe nii ohã. Kɛ́ ofee nakai lɛ, ebaanyɛ eye ebua bo ni ogbe nibii ni okpɛ oyiŋ akɛ obaafee lɛ fɛɛ naa ni ofiteee be pii.

16. Mɛni ekoŋŋ baaye abua bo ni onyɛ otsu nɔ ni okpɛ oyiŋ akɛ obaatsu lɛ? Ni mɛɛ gbɛ nɔ Romabii 12:11 lɛ maa enɛ nɔ mi?

16 Bɔɔ ohe mɔdɛŋ waa. Kɛ́ omiaaa ohiɛ lɛ, onyɛŋ otsu nibii ni okpɛ oyiŋ akɛ obaatsu lɛ ahe nii ogbe naa. (Kanemɔ Romabii 12:11.) Paulo kɛɛ Timoteo akɛ, kɛ́ eetao ele nitsɔɔmɔ waa lɛ, esa akɛ eya nɔ efee nibii ni ewo lɛ hewalɛ akɛ efee lɛ. Kɛ́ wɔ hu wɔmiitao wɔshɛ otii ni wɔkɛmamɔ wɔhiɛ yɛ Yehowa sɔɔmɔ lɛ mli lɛ ahe lɛ, esa akɛ wɔya nɔ wɔmia wɔhiɛ.​—1 Tim. 4:13, 16.

17. Mɛɛ gbɛ nɔ wɔbaanyɛ wɔkɛ Efesobii 5:15, 16 lɛ atsu nii kɛ́ wɔmiitsu yiŋ ko ni wɔkpɛ lɛ he nii?

17 Okɛ obe atsu nii jogbaŋŋ. (Kanemɔ Efesobii 5:15, 16.) Too be ni okɛbaatsu oyiŋkpɛɛ lɛ he nii, ni kɛ́ nakai be lɛ shɛ lɛ, kaatsake. Kaakɛɛ akɛ oomɛ ni oná dekã dani otsu nɔ ni okpɛ oyiŋ akɛ obaatsu lɛ; ekolɛ onáŋ nakai dekã lɛ. (Jaj. 11:4) Kwɛmɔ jogbaŋŋ ni okahã nibii ni he ehiaaa tsɔ lɛ he obe bɔ ni onáŋ hewalɛ kɛtsu nibii ni he hiaa lɛ. (Fip. 1:10) Kɛ́ ebaahi lɛ, taomɔ be ko ni mɛi kɛ nibii pii gbalaŋ ojwɛŋmɔ, ni ohã mɛi ale akɛ oofee nɔ ko ni he miihia, ni no hewɔ lɛ, osumɔŋ ni nɔ ko nɔ ko agbala ojwɛŋmɔ. Kɛ́ oosumɔ lɛ, obaanyɛ ogbe ofoŋ, ni ofee nɔ ni otaoɔ ofee lɛ ogbe naa dani okwɛ mɛseji ni mɛi esɛndi bo. *

18-19. Mɛni baanyɛ aye abua wɔ ni wɔgbe nibii ni wɔjeɔ amɛfeemɔ shishi lɛ anaa kɛ́ wɔkɛ naagbai kpe po?

18 Okɛ ojwɛŋmɔ ama sɛɛnamɔi ni obaaná lɛ anɔ. Wɔbaanyɛ wɔkɛ yiŋkpɛɛ ato gbɛfãa he. Kɛ́ oofã gbɛ, ni ootao oyashɛ he ni oyaa lɛ lɛɛlɛŋ lɛ, no lɛ, kɛ́ atsĩ gbɛ lɛ po lɛ, obaatao he kroko otsɔ. Yɛ gbɛ ni tamɔ nakai nɔŋŋ nɔ lɛ, kɛ́ okɛ ojwɛŋmɔ ma sɛɛnamɔi ni baajɛ oyiŋkpɛɛ lɛ mli kɛba lɛ anɔ lɛ, no lɛ, kɛ́ okɛ naagbai kpe po lɛ, obaamia ohiɛ otsu oyiŋkpɛɛ lɛ he nii kɛyashi obaagbe naa.​—Gal. 6:9.

19 Ebɛ mlɛo akɛ wɔbaakpɛ yiŋ kpakpa, ni kɛ́ wɔnyɛ wɔkpɛ yiŋ kpakpa hu lɛ, ebɛ mlɛo akɛ wɔbaatsu he nii. Shi Yehowa baanyɛ aye abua wɔ. Ebaanyɛ edro wɔ hiɛshikamɔ kɛ hewalɛ ni wɔkɛgbe nɔ ni wɔje efeemɔ shishi lɛ naa.

LALA 65 Yaa Ohiɛ!

^ kk. 5 Ani bei komɛi lɛ oshwaa ohe yɛ yiŋ komɛi ni okpɛ lɛ ahewɔ? Ani bei komɛi lɛ, ewa kɛhã bo akɛ obaakpɛ yiŋ kpakpa ni otsu yiŋ ni okpɛ lɛ he nii? Nikasemɔ nɛɛ baaye abua bo ni onyɛ okpɛ yiŋ kpakpai, ni otsu amɛhe nii.

^ kk. 11 Kɛ́ ootao oto gbɛjianɔ ni okane Biblia lɛ daa lɛ, kwɛmɔ sane ni yɔɔ jw.org® lɛ nɔ, ni yitso ji, “Biblia Kanemɔ He Gbɛjianɔtoo” lɛ.

^ kk. 17 Kɛ́ ootao ole nibii komɛi ni obaanyɛ ofee koni onyɛ okɛ obe atsu nii jogbaŋŋ lɛ, kwɛmɔ sane ni je kpo yɛ April 2010 Awake! lɛ mli, ni yitso ji, “20 Ways to Create More Time” (Nibii 20 Ni Obaanyɛ Ofee Koni Oná Be Pii).