Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

 NIKASEMƆ 19

Wɔjieɔ Suɔmɔ Kpo Ni Wɔyeɔ Jalɛ Sane Be Ni Wɔbuɔ Gbekɛbii Ahe Kɛjeɔ Awuiyelɔi Ahe

Wɔjieɔ Suɔmɔ Kpo Ni Wɔyeɔ Jalɛ Sane Be Ni Wɔbuɔ Gbekɛbii Ahe Kɛjeɔ Awuiyelɔi Ahe

“Ojeee Nyɔŋmɔ ni náa efɔŋfeemɔ he miishɛɛ; mɔ fɔŋ ko kɛ bo ehiŋ shi.”​—LALA 5:4.

LALA 142 Nyɛhãa Wɔmɔa Wɔhiɛnɔkamɔ Lɛ Mli Kpɛŋŋ

NƆ NI ABAASUSU HE *

1-3. (a) Mɛɛ gbɛ nɔ Lala 5:4-6 lɛ hãa wɔnaa bɔ ni Yehowa naa efɔŋfeemɔ ehãa? (b) Mɛni hewɔ wɔbaanyɛ wɔkɛɛ akɛ niseniianii ni afeɔ gbekɛbii lɛ teɔ shi ewoɔ “Kristo lɛ mla lɛ”?

YEHOWA NYƆŊMƆ nyɛɔ efɔŋfeemɔ srɔtoi fɛɛ. (Kanemɔ Lala 5:4-6.) Kɛ́ mɔ ko kɛ gbekɛ ko fee bɔlɛnamɔ nifeemɔ ko lɛ, eji efɔŋfeemɔ ni yɔɔ nyaŋemɔ diɛŋtsɛ, ni Yehowa miihi kwraa! Wɔ, ni ji Yehowa Odasefoi lɛ, kaseɔ Yehowa, ni no hewɔ lɛ, wɔ hu wɔmiihi nifeemɔ ni yɔɔ taŋ nɛɛ, ni wɔhãaa mɛi ni kɛ amɛhe woɔ mli lɛ hiɛ kwraa yɛ asafo lɛ mli.​—Rom. 12:9; Heb. 12:15, 16.

2 Niseniianii srɔtoi fɛɛ ni afeɔ gbekɛbii lɛ teɔ shi ewoɔ “Kristo lɛ mla lɛ” waa diɛŋtsɛ! (Gal. 6:2) Nɔ hewɔ ni wɔkɛɔ nakai ji akɛ, tamɔ bɔ ni atsɔɔ wɔ yɛ nikasemɔ ni tsɔ hiɛ lɛ mli lɛ, nibii fɛɛ ni Yesu wie kɛ nibii fɛɛ ni efee lɛ, suɔmɔ ji nɔ ni tsirɛ lɛ ni efee. Ni wɔle akɛ, nibii ni Yesu wie kɛ nibii ni efee lɛ ni feɔ Kristo lɛ mla lɛ. Agbɛnɛ hu, wɔna akɛ Kristo lɛ mla lɛ woɔ mɛi hewalɛ ni amɛye jalɛ sane. Anɔkwa Kristofoi hiɔ shi yɛ Kristo lɛ mla lɛ naa, ni no hewɔ lɛ, amɛbuɔ gbekɛbii ahe, ni amɛjieɔ suɔmɔ kpo amɛtsɔɔ amɛ. Shi mɛi ni feɔ gbekɛbii niseniianii lɛ susuɔ amɛ pɛ amɛhe. Efɔŋ nɛɛ ni amɛfeɔ gbekɛbii lɛ hãa gbekɛbii lɛ nuɔ he akɛ asumɔɔɔ amɛsane, ni asusuuu amɛhe.

3 Dɔlɛ sane ji akɛ, ŋmɛnɛ lɛ, mɛi kɛ gbekɛbii feɔ bɔlɛnamɔ nifeemɔi yɛ jeŋ fɛɛ, ni eko esa anɔkwa Kristofoi komɛi po ahe. Mɛni hewɔ? Ejaakɛ “gbɔmɛi fɔji kɛ shishiulɔi” ayi efa waa yɛ je lɛ mli, ni amɛteŋ mɛi komɛi po eju shi kɛbote asafo lɛ mli. (2 Tim. 3:13) Kɛfata he lɛ, mɛi komɛi ni kɛɛ nyɛmimɛi ji amɛ lɛ eŋmɛɛ amɛhe amɛhã heloo lɛ akɔnɔi lɛ ni amɛkɛ gbekɛbii efee bɔlɛnamɔ nifeemɔi. Mɛni hewɔ eji esha kpele akɛ mɔ ko baafee gbekɛ ko niseniianii? Ni  kɛ́ mɔ ko fee gbekɛ ko niseniianii loo esha kroko ni yɔɔ hiɛdɔɔ lɛ, te asafoŋ onukpai lɛ tsuɔ he nii amɛhãa tɛŋŋ? Mɛni fɔlɔi baanyɛ afee kɛbu amɛbii ahe? Wɔbaahã sanebimɔi nɛɛ ahetoo yɛ nikasemɔ nɛɛ mli. *

EJI ESHA KPELE AKƐ MƆ KO BAAFEE GBEKƐ KO NISENIIANII

4-5. Mɛni hewɔ wɔkɛɔ akɛ kɛ́ mɔ ko fee gbekɛ ko niseniianii lɛ efee lɛ esha lɛ?

4 Kɛ́ afee gbekɛ ko niseniianii lɛ, eyeɔ awui be kplaŋŋ. Eyeɔ gbekɛ lɛ, gbekɛ lɛ wekumɛi, enyɛmimɛi Kristofoi, kɛ mɛi fɛɛ ni sumɔɔ esane lɛ awui. Kɛ́ mɔ ko fee gbekɛ ko niseniianii lɛ, efee esha kpele diɛŋtsɛ.

5 Efee gbekɛ lɛ esha. Kɛ́ mɔ ko hã mɔ ko piŋ loo ena nɔ yakatswaa lɛ, efee lɛ esha. Yɛ nikasemɔ ni nyiɛ sɛɛ lɛ mli lɛ, wɔbaana akɛ mɛi ni kɛ gbekɛbii feɔ bɔlɛnamɔ nifeemɔi lɛ hãa gbekɛbii lɛ piŋɔ waa. Bei pii lɛ, mɛi nɛɛ ji mɛi ni gbekɛbii lɛ muɔ amɛfɔ̃ɔ amɛnɔ. No hewɔ lɛ, nyɛ ni amɛnyɛɔ gbekɛbii lɛ anɔ koni amɛfee nibii ni esaaa akɛ amɛfeɔ lɛ hãa gbekɛbii lɛ nuɔ he akɛ mɔ ko kwraa bɛ ni amɛbaanyɛ amɛmu amɛfɔ̃ enɔ akɛ ebaabu amɛhe. Enɛ ji yitsoŋwalɛ sane diɛŋtsɛ, ni esa akɛ abu gbekɛbii ahe kɛje he, ni ashɛje mɛi ni afee amɛ niseniianii lɛ amii ni aye abua amɛ.​—1 Tes. 5:14.

6-7. Kɛ́ mɔ ko yafee gbekɛ ko niseniianii lɛ, mɛni hewɔ wɔbaanyɛ wɔkɛɛ akɛ efee esha eshi asafo lɛ kɛ amralofoi lɛ?

6 Efee asafo lɛ esha. Kɛ́ mɔ ko ni yɔɔ Kristofoi asafo lɛ mli lɛ yafee gbekɛ ko niseniianii lɛ, egbe asafo lɛ he guɔ. (Mat. 5:16; 1 Pet. 2:12) Ebaahã mɛi awie akɛ asafo lɛ mli bii lɛ feɔ gbekɛbii niseniianii, tsɛbelɛ ebɛ mli nakai, ejaakɛ nyɛmimɛi akpekpei abɔ miimia amɛhiɛ waa ‘kɛmiiwu hemɔkɛyeli lɛ he ta’ lɛ! (Yuda 3) Kɛ́ mɔ ko ni yɔɔ asafo lɛ mli lɛ fee nibii gbohii lɛ, eegbe asafo lɛ he guɔ, ni kɛ́ etsakeee etsui lɛ, abaashwie lɛ kɛje asafo lɛ mli.

7 Efee esha eshi amralofoi lɛ. Esa akɛ Kristofonyo fɛɛ Kristofonyo “aba ehe shi awo hegbɛi ni yeɔ nɔ lɛ ashishi.” (Rom. 13:1) Kɛ́ wɔye mlai ni amralofoi lɛ ewo lɛ anɔ lɛ, no tsɔɔ akɛ wɔmiiba wɔhe shi wɔmiiwo amɛshishi. Amralofoi lɛ ewo mlai srɔtoi, ni eko ji akɛ akafee gbekɛbii niseniianii. No hewɔ lɛ, kɛ́ mɔ ko ni yɔɔ asafo lɛ mli lɛ ku mla nɛɛ loo ekroko ni tamɔ nakai lɛ mli lɛ, efee esha eshi amralofoi lɛ. (Okɛto Bɔfoi 25:8 lɛ he.) Asafoŋ onukpai lɛ bɛ hegbɛ ni amɛgbalaa mɔ ko toi yɛ amralofoi lɛ amla ko mli ni eku lɛ hewɔ, shi amralofoi lɛ yɛ nakai hegbɛ lɛ, ni asafoŋ onukpai lɛ ebuŋ mɔ ko ni eyafee gbekɛ ko niseniianii lɛ he kɛjeŋ toigbalamɔ ni amralofoi lɛ kɛbaaba enɔ lɛ he. (Rom. 13:4) Nɔ ni eshafeelɔ lɛ edu lɛ, no nɔŋŋ ebaakpa.​—Gal. 6:7.

8. Kɛ́ mɔ ko tɔ̃ enyɛmi gbɔmɔ nɔ lɛ, mɛɛ gbɛ nɔ esaa Yehowa hu he?

8 Nɔ ni fe fɛɛ lɛ, efee esha eshi Nyɔŋmɔ. (Lala 51:4) Kɛ́ mɔ ko fee gbekɛ ko niseniianii lɛ, etɔ̃ gbekɛ lɛ, ni ji enyɛmi gbɔmɔ lɛ nɔ, ejaakɛ kɛjɛ nakai be lɛ kɛyaa lɛ, gbekɛ lɛ baanu he akɛ ebɛ shweshweeshwe. Ni kɛ́ mɔ ko tɔ̃ enyɛmi gbɔmɔ nɔ lɛ, etɔ̃ Yehowa hu nɔ. Akɛ nɔkwɛmɔnɔ lɛ, awie yɛ Mose Mla lɛ mli akɛ, kɛ́ mɔ ko ju enaanyo ko nɔ ko loo eshishiu lɛ lɛ, “eyeee Yehowa anɔkwa.” (3 Mo. 6:2-4) No hewɔ lɛ, wɔbaanyɛ wɔkɛɛ akɛ, kɛ́ mɔ ko ni yɔɔ asafo lɛ mli lɛ fee gbekɛ ko niseniianii lɛ, eyeee Nyɔŋmɔ anɔkwa. Agbɛnɛ hu, mɔ lɛ ewo Yehowa gbɛ́i lɛ he muji kpɔtɔɔ. Anɔkwa, mɛi ni kɛ gbekɛbii feɔ bɔlɛnamɔ nifeemɔi lɛ miifee esha kpele amɛmiishi Nyɔŋmɔ, ni esaaa akɛ wɔŋmɛɔ nifeemɔ ni yɔɔ taŋ nɛɛ gbɛ yɛ asafo lɛ mli.

9. Mɛɛ Ŋmalɛ naa gbɛtsɔɔmɔi Yehowa asafo lɛ kɛhã yɛ niseniianii ni afeɔ gbekɛbii lɛ he kɛjɛ blema? Ni mɛni hewɔ?

 9 Yehowa asafo lɛ kɛ afii abɔ ejɛ Ŋmalɛ lɛ mli etsɔɔ wɔ nibii pii yɛ niseniianii ni afeɔ gbekɛbii lɛ he. Akɛ nɔkwɛmɔnɔ lɛ, Buu-Mɔɔ Awake! srɔtoi etsɔɔ nibii ni mɛi ni be ni amɛji gbekɛbii lɛ akɛ amɛ fee bɔlɛnamɔ nifeemɔi lɛ baanyɛ afee kɛdamɔ dɔlɛ kɛ haomɔ kpele ni amɛtsɔɔ mli lɛ naa, nɔ ni mɛi krokomɛi baanyɛ afee kɛye abua amɛ ni amɛshɛje amɛmii, kɛ nɔ ni fɔlɔi baanyɛ afee kɛbu amɛbii lɛ ahe koni akafee amɛ niseniianii. Agbɛnɛ hu, ajɛ Ŋmalɛ lɛ mli akɛ gbɛtsɔɔmɔi ni mli kã shi faŋŋ ehã asafoŋ onukpai lɛ koni amɛle nɔ ni esa akɛ amɛfee kɛ́ mɔ ko yafee gbekɛ ko niseniianii. Yɛ be kɛ beiaŋ lɛ, Gbɛtsɔɔmɔ Kuu lɛ kwɛɔ gbɛtsɔɔmɔi ni ekɛhã asafoi lɛ yɛ bɔ ni esa akɛ atsu esha nɛɛ, ni ji niseniianii ni afeɔ gbekɛbii lɛ he nii ahã lɛ mli ekoŋŋ. Mɛni hewɔ Yehowa asafo lɛ feɔ nibii nɛɛ fɛɛ? Koni ekaba lɛ akɛ bɔ ni wɔtsuɔ esha nɛɛ he nii wɔhãa lɛ kɛ Kristo lɛ mla lɛ kpãaa gbee.

NƆ NI ASAFOŊ ONUKPAI LƐ FEƆ KƐ́ MƆ KO YAFEE ESHA KO NI YƆƆ HIƐDƆƆ

10-12. (a) Kɛ́ mɔ ko yafee esha ko ni yɔɔ hiɛdɔɔ, ni asafoŋ onukpai lɛ miitsu sane lɛ he nii lɛ, mɛni esa akɛ amɛhã ehi amɛjwɛŋmɔŋ? Ni mɛɛ otii esa akɛ amɛkɛmamɔ amɛhiɛ? (b) Yɛ nɔ ni awie yɛ Yakobo 5:14, 15 lɛ naa lɛ, mɛni asafoŋ onukpai lɛ bɔɔ mɔdɛŋ akɛ amɛbaafee?

10 Kɛ́ mɔ ko yafee esha ko ni yɔɔ hiɛdɔɔ ni asafoŋ onukpai lɛ miitsu sane lɛ he nii lɛ, amɛhãa ehiɔ amɛjwɛŋmɔŋ akɛ, Kristo lɛ mla lɛ biɔ ni amɛjie suɔmɔ kpo amɛtsɔɔ Nyɔŋmɔ webii lɛ, ni yɛ nakai beiaŋ nɔŋŋ lɛ, amɛfee nɔ ni sa ni ja yɛ Nyɔŋmɔ hiɛ. Enɛ hewɔ lɛ, kɛ́ amɛná amɛle akɛ mɔ ko efee esha ko ni yɔɔ hiɛdɔɔ lɛ, nibii pii yɛ ni esa akɛ amɛsusu he. Oti ni he hiaa fe fɛɛ ni ma asafoŋ onukpai lɛ ahiɛ ji, ni amɛbaawo Yehowa hiɛ nyam ni amɛkwɛ ni akagbe egbɛ́i lɛ he guɔ. (3 Mo. 22:31, 32; Mat. 6:9) Oti kroko ni he hiaa ni ma amɛhiɛ ji, ni amɛbaabu amɛnyɛmimɛi Kristofoi lɛ ahe koni nɔ ko akafite wekukpaa kpakpa ni yɔɔ amɛ kɛ Yehowa teŋ lɛ, ni agbɛnɛ hu, amɛye amɛbua mɛi ni esha ni afee lɛ esa amɛhe lɛ.

11 Agbɛnɛ hu, asafoŋ onukpai lɛ kwɛɔ kɛji eshafeelɔ lɛ etsake etsui, ni kɛ́ amɛna akɛ etsake etsui lɛ, amɛbɔɔ mɔdɛŋ akɛ amɛbaaye amɛbua lɛ ni esaa ekɛ Yehowa teŋ. (Kanemɔ Yakobo 5:14, 15.) Kɛ́ Kristofonyo ko ŋmɛɛ ehe ehã akɔnɔ fɔŋ ni eyafee esha ko ni yɔɔ hiɛdɔɔ lɛ, ebɛ hewalɛ yɛ mumɔŋ, ni tsɔɔ akɛ, wekukpaa kpakpa bɛ ekɛ Yehowa teŋ dɔŋŋ. * Asafoŋ onukpai lɛ tamɔ datrɛfoi, ni amɛbaabɔ mɔdɛŋ ni amɛye amɛbua “helatsɛ lɛ,” ni ji mɔ ni efee esha lɛ, koni ená hewalɛ ekoŋŋ. Kɛ́ mɔ lɛ etsake etsui lɛɛlɛŋ lɛ, no lɛ ŋaa ni amɛbaajɛ Ŋmalɛ lɛ mli amɛwo lɛ lɛ baanyɛ aye abua lɛ ni esaa ekɛ Nyɔŋmɔ teŋ.​—Bɔf. 3:19; 2 Kor. 2:5-10.

12 No hewɔ lɛ, eyɛ faŋŋ akɛ, sɔ̃ ni tsii diɛŋtsɛ kã asafoŋ onukpai lɛ anɔ. Mɛi fɛɛ ni yɔɔ asafo lɛ mli lɛ asane kã onukpai lɛ atsui nɔ waa, ejaakɛ Nyɔŋmɔ etuu asafo lɛ ewo amɛdɛŋ. (1 Pet. 5:1-3) Asafoŋ onukpai lɛ miisumɔ ni nyɛmimɛi lɛ fɛɛ anu he akɛ amɛyɛ shweshweeshwe yɛ asafo lɛ mli. Enɛ hewɔ lɛ, kɛ́ amɛná amɛle akɛ mɔ ko efee gbekɛ ko niseniianii loo efee esha kroko ni yɔɔ hiɛdɔɔ lɛ, amɛtsuɔ he nii oya nɔŋŋ. Mɛni amɛtsuɔ yɛ he? Nyɛhãa wɔkɛ sanebimɔi ni yɔɔ  kuku 13,  15, kɛ  17 lɛ shishijee lɛ atsɔɔ mli.

13-14. Kɛ́ amralofoi lɛ wo mlai ni tsɔɔ akɛ kɛ́ mɔ ko nu akɛ afee gbekɛ ko niseniianii lɛ ebabɔ amɛ lɛ, ani asafoŋ onukpai lɛ yeɔ mlai nɛɛ anɔ? Tsɔɔmɔ mli.

 13 Kɛ́ amralofoi lɛ wo mlai ni tsɔɔ akɛ kɛ́ mɔ ko nu akɛ afee gbekɛ ko niseniianii lɛ ebabɔ amɛ lɛ, ani asafoŋ onukpai lɛ yeɔ mlai nɛɛ anɔ? Hɛɛ. Yɛ maji komɛi anɔ lɛ, awo mlai ni tsɔɔ akɛ kɛ́ mɔ ko nu akɛ afee gbekɛ ko niseniianii lɛ eyabɔ amralofoi lɛ, ni asafoŋ onukpai lɛ yeɔ mlai nɛɛ anɔ. (Rom. 13:1) Mlai nɛɛ eteee shi ewooo  Nyɔŋmɔ mla lɛ. (Bɔf. 5:28, 29) No hewɔ lɛ, kɛ́ asafoŋ onukpai lɛ nu akɛ afee gbekɛ ko niseniianii lɛ, esa akɛ amɛhã nitsumɔhe nine lɛ ale amrɔ nɔŋŋ, koni atsɔɔ amɛ bɔ ni amɛbaafee amɛye maŋ lɛ mlai lɛ anɔ.

14 Asafoŋ onukpai lɛ hãa mɔ ni afee lɛ niseniianii lɛ kɛ efɔlɔi, kɛ mɛi krokomɛi ni le sane lɛ leɔ akɛ amɛyɛ hegbɛ akɛ amɛbɔɔ amralofoi lɛ. Shi kɛ́ mɔ ni akɛɛ efee gbekɛ lɛ niseniianii lɛ yɛ asafo lɛ mli ni sane lɛ gbɛ eshwã akutso lɛ mli hu? Ani esa akɛ mɔ ni yabɔ amralofoi lɛ anu he akɛ egbe Nyɔŋmɔ gbɛ́i lɛ he guɔ? Dabi. Mɔ ni fee gbekɛ lɛ niseniianii lɛ moŋ ni egbe Nyɔŋmɔ gbɛ́i lɛ he guɔ.

15-16. (a) Yɛ nɔ ni aŋma yɛ 1 Timoteo 5:19 lɛ naa lɛ, mɛni hewɔ ja asafoŋ onukpai lɛ ená kɛ́ hooo kwraa lɛ odasefoi enyɔ dani abaato saneyeli ajinafoi akuu lɛ? (b) Kɛ́ asafoŋ onukpai lɛ nu akɛ mɔ ko ni yɔɔ asafo lɛ mli lɛ efee gbekɛ ko niseniianii lɛ, mɛni amɛfeɔ?

 15 Mɛni hewɔ ja asafoŋ onukpai lɛ ená kɛ́ hooo kwraa lɛ odasefoi enyɔ dani abaato saneyeli ajinafoi akuu lɛ? Ejaakɛ no ji nɔ ni Biblia lɛ kɛɛ kɛ́ afee lɛ, no tsɔɔ akɛ aye jalɛ sane. Kɛ́ akɛɛ mɔ ko efee esha ko ni yɔɔ hiɛdɔɔ, shi mɔ lɛ ekpɛlɛɛɛ nɔ lɛ, ja aná odasefoi enyɔ ni baama nɔ mi akɛ mɔ lɛ efee esha lɛ lɛɛlɛŋ dani asafoŋ onukpai lɛ baato saneyeli ajinafoi akuu. (5 Mo. 19:15; Mat. 18:16; kanemɔ 1 Timoteo 5:19.) Shi ani enɛ tsɔɔ akɛ kɛ́ akɛɛ mɔ ko efee gbekɛ ko niseniianii lɛ, ja aná odasefoi enyɔ dani abaanyɛ ayabɔ amralofoi lɛ? Dabi. Kɛ́ akɛɛ mɔ ko etɔ̃ maŋ lɛ mla nɔ, ni maŋ lɛ mla biɔ ni abɔ amralofoi lɛ, jeee ja aná odasefoi enyɔ dani asafoŋ onukpai lɛ loo mɛi krokomɛi baayabɔ amralofoi lɛ.

16 Kɛ́ asafoŋ onukpai lɛ nu akɛ mɔ ko ni yɔɔ asafo lɛ mli lɛ efee gbekɛ ko niseniianii, ni maŋ lɛ mla biɔ ni amɛyabɔ amralofoi lɛ, amɛyeɔ mla lɛ nɔ, ni no sɛɛ lɛ, amɛtaoɔ sane lɛ mli. Kɛ́ mɔ lɛ kɛɛ sane lɛ bɛ mli lɛ, asafoŋ onukpai lɛ baatsɛ odasefoi ni amɛbi amɛ. Kɛ́ aná kɛ́ hooo kwraa lɛ, mɛi enyɔ, ni ji mɔ ko ni na nɔ ni tee nɔ lɛ​—gbekɛ lɛ diɛŋtsɛ jio, mɔ kroko jio​—kɛ mɔ kroko hu ni na nɔ ni tee nɔ lɛ loo ni ena ni mɔ lɛ miifee gbekɛ nɛɛ loo gbekɛ kroko niseniianii be ko ni eho lɛ, asafoŋ onukpai lɛ baato saneyeli ajinafoi akuu. * Shi kɛ́ anáaa mɛi enyɔ lɛ, ani no tsɔɔ akɛ sane lɛ bɛ mli? Dabi, jeee doo. Kɛ́ anáaa odasefoi enyɔ po lɛ, ebaanyɛ eba lɛ akɛ mɔ ni akɛɛ efee gbekɛ ko niseniianii lɛ efee esha ko ni yɔɔ hiɛdɔɔ lɛɛlɛŋ, ni eye mɛi awui waa. Asafoŋ onukpai lɛ le enɛ, ni no hewɔ lɛ, amɛbaaya nɔ amɛshɛje mɛi fɛɛ ni ekolɛ esha ni ayafee lɛ eye amɛ awui lɛ amii ni amɛye amɛbua amɛ. Agbɛnɛ hu, amɛbaahã amɛhiɛ ahi amɛhe nɔ waa yɛ mɔ ni akɛɛ efee gbekɛ ko niseniianii lɛ he, koni amɛbu asafo lɛ he ni akaye nyɛmimɛi lɛ awui.​—Bɔf. 20:28.

17-18. Gbalamɔ nitsumɔ ni saneyeli ajinafoi akuu lɛ tsuɔ lɛ mli.

 17 Mɛni ji saneyeli ajinafoi akuu lɛ nitsumɔ? Asafoŋ onukpai ni sɔmɔɔ akɛ saneyeli ajinafoi akuu lɛ anitsumɔ ji, ni amɛkwɛ kɛji mɔ ni akɛɛ efee esha ni yɔɔ hiɛdɔɔ lɛ baanyɛ aya nɔ ahi asafo lɛ mli loo enyɛŋ eya nɔ ehi mli. Jeee amɛ amɛbaatsɔɔ kɛji esa akɛ amralofoi lɛ agbala mɔ ni eyafee gbekɛ lɛ niseniianii lɛ toi yɛ maŋ lɛ mla mli ni eku lɛ hewɔ. Amɛshiɔ no amɛhãa amralofoi lɛ.​—Rom. 13:2-4; Tito 3:1.

18 Asafoŋ onukpai ni sɔmɔɔ akɛ saneyeli ajinafoi akuu lɛ tsuɔ sane lɛ fã ni kɔɔ wekukpaa ni kã mɔ lɛ kɛ Nyɔŋmɔ kɛ enyɛmimɛi Kristofoi lɛ ateŋ lɛ he nii. Amɛdamɔɔ saji ni awie yɛ Biblia lɛ mli lɛ anɔ amɛkwɛɔ kɛji efɔŋfeelɔ lɛ etsake etsui lɛɛlɛŋ aloo etsakeko etsui. Kɛ́ etsakeko etsui lɛ, abaashwie lɛ kɛje asafo lɛ mli, ni abaatswa eshwiemɔ lɛ he adafi atsɔɔ asafo lɛ. (1 Kor. 5:11-13) Shi kɛ́ etsake etsui lɛ, ashwieŋ lɛ; ebaaya nɔ ehi asafo lɛ mli. Kɛ̃lɛ, asafoŋ onukpai lɛ baahã ele akɛ, enáŋ sɔɔmɔ hegbɛ ko kwraa yɛ asafo lɛ mli; kɛ́ ekolɛ ebaaná eko po lɛ, jeee ŋmɛnɛ kɛ wɔ́ sane. Akɛni gbekɛbii ni yɔɔ asafo lɛ mli lɛ asane kã asafoŋ  onukpai lɛ atsui nɔ waa hewɔ lɛ, ekolɛ amɛbaabɔ gbekɛbii fɛɛ ni yɔɔ asafo lɛ mli lɛ afɔlɔi kɔkɔ ni amɛhã amɛhiɛ ahi amɛbii lɛ anɔ waa kɛ́ amɛna akɛ amɛbii lɛ miibɛŋkɛ nakai ashimashi lɛ. Be ni asafoŋ onukpai lɛ tsuɔ saji nɛɛ ahe nii lɛ, esa akɛ amɛkwɛ jogbaŋŋ ni amɛkahã mɛi le gbekɛ lɛ ni afee lɛ niseniianii lɛ.

FƆLƆI, NYƐBUA NYƐBII LƐ AHE

Fɔlɔi komɛi kɛ woji kɛ nibii ni Yehowa asafo lɛ efee lɛ miitsɔɔ amɛbii nɔ ni esa akɛ amɛle yɛ bɔlɛnamɔ he yɛ afii ni amɛye lɛ naa. Enɛ ni amɛfeɔ lɛ baabu amɛbii lɛ ahe koni akɛ amɛ akafee bɔlɛnamɔ nifeemɔi. (Kwɛmɔ kuku 19-22)

19-22. Mɛni fɔlɔi baanyɛ afee kɛbu amɛbii lɛ ahe? (Kwɛmɔ mfoniri ni yɔɔ wolo lɛ hiɛ lɛ.)

19 Fɔlɔi, eji nyɛsɔ̃ akɛ nyɛbu nyɛbii lɛ ahe koni akaye amɛ awui. * Nyɛbii lɛ ji “gboshinii ni jɛ Yehowa ŋɔɔ,” ni eekpa gbɛ akɛ nyɛbaabu gboshinii nɛɛ he jogbaŋŋ. (Lala 127:3) Mɛni nyɛbaanyɛ nyɛfee kɛbu nyɛbii lɛ ahe ni mɔ ko akafee amɛ niseniianii?

20 Klɛŋklɛŋ lɛ, bɔɔ mɔdɛŋ ni ole niseniianii ni afeɔ gbekɛbii lɛ he sane fitsofitso. Esa akɛ ole mɛi ni fɔɔ gbekɛbii niseniianii feemɔ kɛ ŋaa gbɛi ni amɛtsɔɔ nɔ amɛlakaa gbekɛbii lɛ. Kɛ́ oyiŋ etɛ̃ɛɛ bo yɛ mɔ ko he loo ona shihilɛ ko ni kɛ́ obi lɛ yaje mli lɛ ewaaa akɛ abaafee lɛ niseniianii lɛ, kaaku ohiɛ ofɔ̃ nɔ. (Abɛi 22:3; 24:3) Kaahã ohiɛ kpa nɔ akɛ, bei pii lɛ mɛi ni feɔ gbekɛbii niseniianii lɛ ji mɛi ni gbekɛbii lɛ le momo ni amɛheɔ amɛ amɛyeɔ.

21 Nɔ ni ji enyɔ lɛ, okɛ obii lɛ agba sane waa. (5 Mo. 6:6, 7) Nɔ kome ni enɛ baabi ni ofee ji, ni obo saji fɛɛ ni amɛkɛɔ bo lɛ amli toi jogbaŋŋ. (Yak. 1:19) Be fɛɛ be lɛ, hã ehi ojwɛŋmɔ mli akɛ, kɛ́ afee gbekɛbii niseniianii lɛ, bei pii lɛ, amɛsheɔ gbeyei akɛ amɛbaababɔ amaniɛ. Ekolɛ amɛsusuɔ akɛ mɔ ko mɔ ko heŋ amɛ eyeŋ, aloo ekolɛ mɔ ni fee amɛ niseniianii lɛ etswa amɛnaa ma akɛ kɛ́ amɛyabɔ amaniɛ lɛ, ebaafee amɛ nɔ ko. Kɛ́ eefee bo akɛ afee obi lɛ niseniianii lɛ, bi lɛ saji ni sa, ni oto otsui shi obo lɛ toi jogbaŋŋ be ni ewieɔ lɛ. Shi kwɛmɔ bɔ ni obaabi saji lɛ ohã lɛ jogbaŋŋ, koni okafã gbekɛ lɛ tsui.

22 Nɔ ni ji etɛ lɛ, tsɔɔmɔ obii lɛ nii. Kwɛmɔ afii abɔ ni amɛye ni otsɔɔ amɛ nɔ ni esa akɛ amɛle yɛ bɔlɛnamɔ he. Tsɔɔmɔ amɛ nɔ ni amɛwie kɛ nɔ ni amɛfee kɛji mɔ ko ka akɛ ebaamɔmɔ amɛhei ni esaaa akɛ emɔmɔɔ loo ekɛ amɛ baashwɛ shwɛmɔi komɛi. Yehowa asafo lɛ ehã fɔlɔi nibii pii ni amɛbaanyɛ amɛkɛtsɔɔ amɛbii lɛ nii kɛbu amɛhe.​—Kwɛmɔ akrabatsa ni yitso ji, “ Tsɔɔmɔ Bo Diɛŋtsɛ Ohe Kɛ Obii Lɛ Nii.”

23. Te wɔbuɔ bɔlɛnamɔ nifeemɔi ni akɛ gbekɛbii feɔ lɛ wɔhãa tɛŋŋ? Mɛɛ sanebimɔ wɔbaahã hetoo yɛ nikasemɔ ni nyiɛ sɛɛ lɛ mli?

23 Wɔ, ni ji Yehowa Odasefoi lɛ, buɔ bɔlɛnamɔ nifeemɔi ni akɛ gbekɛbii feɔ lɛ akɛ eji esha kpele kɛ yitsoŋwalɛ sane. Akɛni wɔhiɔ shi yɛ Kristo lɛ mla lɛ naa hewɔ lɛ, kɛ́ mɔ ko kɛ gbekɛ ko fee bɔlɛnamɔ nifeemɔ ko lɛ, wɔtsimɔɔɔ nɔ. Moŋ lɛ, wɔhãa ekpaa enɔfɔŋfeemɔ lɛ mli yibii lɛ. Shi mɛni wɔbaanyɛ wɔfee kɛye wɔbua wɔnyɛmimɛi Kristofoi ni afee amɛ niseniianii lɛ? Wɔbaahã sanebimɔ nɛɛ hetoo yɛ nikasemɔ ni nyiɛ sɛɛ lɛ mli.

LALA 103 Nɔkwɛlɔi​—Hii Ni Ji Nikeenii

^ kk. 5 Yɛ nikasemɔ nɛɛ mli lɛ, abaatsɔɔ wɔ nɔ ni wɔbaanyɛ wɔfee kɛbu gbekɛbii ahe kɛje mɛi ni baasumɔ ni amɛkɛ amɛ aná bɔlɛ loo amɛkɛ amɛ afee bɔlɛnamɔ nifeemɔi lɛ ahe. Wɔbaana nɔ ni asafoŋ onukpai lɛ feɔ kɛbuɔ asafo lɛ he, kɛ nɔ ni fɔlɔi baanyɛ afee kɛbu amɛbii ahe.

^ kk. 3 WIEMƆ NI ATSƆƆ MLI: Kɛ́ akɛɛ akɛ gbekɛ ko efee bɔlɛnamɔ nifeemɔ ko lɛ, etsɔɔ akɛ onukpa ko kɛ gbekɛ lɛ ená bɔlɛ, loo elɛmɔ gbekɛ lɛ yoohe, loo ekɛ gbekɛ lɛ nuutso ewo edaaŋ loo edunaa, loo ehã gbekɛ lɛ elɛmɔ lɛ, onukpa lɛ, eyoohe, loo ekɛ enuutso ewo gbekɛ lɛ daaŋ loo edunaa, loo ekɛ eniji ehɔlɔ gbekɛ lɛ he, loo eshwɛ gbekɛ lɛ fufɔi loo edukui ahe, loo ekɛ lɛ efee nifeemɔ kroko ni tamɔ nakai ni yɔɔ nyaŋemɔ kɛgbe ekɔnɔ. Nɔ kome ni ehe miihia ni wɔkadi ji akɛ, mɛi ni kɛ gbekɛbii feɔ bɔlɛnamɔ nifeemɔi lɛ lakaa amɛ ni amɛyeɔ amɛ awui. No hewɔ lɛ, esaaa akɛ ashwaa gbekɛbii lɛ akɛ amɛ amɛfee ni afee amɛ nakai. Eyɛ mli akɛ gbekɛbii ni akɛ amɛ efee bɔlɛnamɔ nifeemɔi lɛ ateŋ mɛi titri ji yei moŋ, shi gbekɛbii hii pii hu yɛ mli. Mɛi ni kɛ gbekɛbii feɔ bɔlɛnamɔ nifeemɔi lɛ ateŋ mɛi pii ji hii, shi yei komɛi hu feɔ nakai.

^ kk. 11 Kɛ́ mɔ ko ni bɛ hewalɛ yɛ mumɔŋ lɛ yafee esha ko ni yɔɔ hiɛdɔɔ lɛ, anyɛŋ adamɔ hewalɛ ni ebɛ yɛ mumɔŋ lɛ nɔ aku hiɛ afɔ̃ nɔ ni eyafee lɛ nɔ. Ebaabu eyiŋkpɛi kɛ enifeemɔi gbohii lɛ ahe akɔntaa, ni Yehowa hu baakojo lɛ.​—Rom. 14:12.

^ kk. 16 Asafoŋ onukpai lɛ bibiŋ mɔ ni akɛɛ efee gbekɛ ko niseniianii lɛ saji yɛ gbekɛ lɛ hiɛ kɔkɔɔkɔ. Gbekɛ lɛ fɔlɔi loo mɔ kroko ni eda ni gbekɛ lɛ nyɛɔ egbaa lɛ eyitsoŋ sane lɛ baanyɛ agba asafoŋ onukpai lɛ nɔ ni gbekɛ lɛ kɛɛ etee nɔ lɛ. Kɛ́ atsu saji ahe nii nɛkɛ lɛ, ayeŋ gbekɛ lɛ awui.

^ kk. 19 Kɛjeee fɔlɔ ji bo, shi mɔ ko bi yɛ oŋɔɔ ni bo okwɛɔ lɛ lɛ, sane nɛɛ kɔɔ bo hu ohe.