Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Nɔ Ni Baaye Abua Bo Ni Ole Ekpakpafeemɔ

Nɔ Ni Baaye Abua Bo Ni Ole Ekpakpafeemɔ

WƆ FƐƐ wɔmiisumɔ ni ana wɔ akɛ gbɔmɛi kpakpai. Shi enɛ feemɔ wa. Mɛni hewɔ? Nɔ kome ji akɛ, ŋmɛnɛ lɛ “mɛi ni sumɔɔɔ ekpakpa” efa waa yɛ je lɛŋ. (2 Tim. 3:3) Mɛi nɛɛ ehiii shi yɛ Yehowa mlai kɛ eshishitoo mlai lɛ anaa. ‘Amɛtsɛɔ ekpakpa akɛ efɔŋ, kɛ efɔŋ akɛ ekpakpa.’ (Yes. 5:20) Agbɛnɛ hu, he ni wɔjɛ, bɔ ni atsɔse wɔ ahã, kɛ emuu ni wɔyeee lɛ hãa ekpakpafeemɔ waa kɛhãa wɔ. Nyɛmi yoo ko ni kɛ afii pii esɔmɔ Yehowa lɛ wie akɛ: “Ewa hã mi waa akɛ mahe maye akɛ manyɛ mafee gbɔmɔ kpakpa.” Ani bo hu onuɔ he nakai?

Miishɛɛ sane ji akɛ, wɔ fɛɛ wɔbaanyɛ wɔtsɔmɔ gbɔmɛi kpakpai! Ekpakpafeemɔ fata yibii ni Nyɔŋmɔ mumɔ krɔŋkrɔŋ lɛ woɔ lɛ he, ni nakai mumɔ lɛ he wa kwraa fe nɔ fɛɛ nɔ ni baanyɛ ahã ewa kɛhã wɔ akɛ wɔbaafee ekpakpa, kɛ́ ejɛ wɔ diɛŋtsɛ jio, mɛi krokomɛi jio. Amrɔ nɛɛ, wɔbaahã sanebimɔi enyɔ komɛi ahetoo. Nomɛi ji: Mɛni ji ekpakpafeemɔ? Ni mɛni baaye abua wɔ ni wɔjie su nɛɛ kpo jogbaŋŋ fe bɔ ni wɔfeɔ bianɛ lɛ po?

MƐNI JI EKPAKPAFEEMƆ?

Kɛ́ wɔbaafo lɛ kuku lɛ, no ji su ni gbɔmɛi kpakpai jieɔ lɛ kpo. Ni kɛ́ akɛɛ mɔ ko ji gbɔmɔ kpakpa lɛ, etsɔɔ akɛ mɔ lɛ baa ejeŋ jogbaŋŋ, efeee nɔ fɔŋ, ni ‘shi’ ko kwraa bɛ ejeŋba he. Kɛ́ mɔ ko fee nɔ ko ni mɛi krokomɛi ná he sɛɛ lɛ, efee ekpakpa. Be fɛɛ be lɛ, gbɔmɔ kpakpa kwɛɔ nɔ ni ebaanyɛ efee kɛye ebua mɛi krokomɛi.

Ekolɛ oyɔse akɛ mɛi komɛi feɔ amɛwekumɛi kɛ amɛnanemɛi ekpakpa waa. Shi ani no pɛ kɛkɛ tsɔɔ akɛ amɛji gbɔmɛi kpakpai? Dabi, jeee doo. Ekpakpafeemɔ kɔɔ wɔjeŋba hu he. Anɔkwa, mɔ ko mɔ ko nyɛŋ eshi etsitsi akɛ eji mɔ kpakpa kɛmɔ shi. Biblia lɛ kɛɔ akɛ: “Mɔ ko mɔ ko bɛ shikpɔŋ lɛ nɔ ni ji jalɔ ni feɔ ekpakpa be fɛɛ be ni efeee esha.” (Jaj. 7:20) Bɔfo Paulo gba mli kpoo ewie akɛ: “Mile akɛ yɛ mimli, ni ji, yɛ miheloo lɛ mli lɛ, nɔ kpakpa ko bɛ jɛmɛ.” (Rom. 7:18) Yehowa ji nibii kpakpai fɛɛ ajɛɛhe. No hewɔ lɛ, kɛ́ wɔmiitao wɔtsɔmɔ gbɔmɛi kpakpai lɛ, ja eye ebua wɔ.

YEHOWA JI MƆ KPAKPA

Yehowa Nyɔŋmɔ pɛ baanyɛ atsɔɔ wɔ nɔ ni esa akɛ wɔfee koni wɔtsɔmɔ gbɔmɛi kpakpai. Biblia lɛ wie yɛ ehe akɛ: “Ohi [loo “Oji mɔ kpakpa”] ni onitsumɔi lɛ hu hi. Tsɔɔmɔ mi otaomɔ nii lɛ.” (Lala 119:68, shn.) Nyɛhãa wɔsusua nibii enyɔ ni awie yɛ Yehowa he yɛ ŋmalɛ nɛɛ mli lɛ ahe ekomekome.

Yehowa hi, loo eji mɔ kpakpa. Yehowa lɛ, nɔ fɔŋ ko kwraa bɛ lɛ. Sui ni ejieɔ lɛ kpo lɛ fɛɛ lɛ, mɔ kpakpa ni eji lɛ hewɔ ejieɔ amɛ kpo. Be ko lɛ, Yehowa kɛɛ Mose akɛ: “Mahã ekpakpa ni mifeɔ lɛ fɛɛ abaho yɛ ohiɛ.” Kɛkɛ ni Yehowa hã mɔ kpakpa ni eji lɛ kɛ nibii krokomɛi fɛɛ ni hãa anaa enunyam lɛ baho yɛ Mose hiɛ. Be ni Nyɔŋmɔ anunyam lɛ hoɔ lɛ, Mose nu wiemɔi nɛɛ: “Yehowa, Yehowa, Nyɔŋmɔ mɔbɔnalɔ kɛ musuŋtsɔlɔ, ní mli fuuu mra ni esuɔmɔ ni tsakeee kɛ enɔkwale fa babaoo, ejieɔ suɔmɔ ni tsakeee kpo etsɔɔ mɛi akpei abɔ, ekɛ tɔmɔ kɛ toigbele kɛ esha keɔ, shi egbalaa mɛi ni yeɔ fɔ lɛ atoi.” (2 Mo. 33:19; 34:6, 7) Nɔ ni Yehowa kɛɛ Mose lɛ hãa wɔnaa faŋŋ akɛ, Yehowa lɛ, mɔ kpakpa ji lɛ yɛ nibii fɛɛ amli. Yesu, ni ji adesa koome pɛ ni nyɛ etsɔɔ akɛ eji mɔ kpakpa kɛwula shi lɛ po wie akɛ:  “Mɔ ko mɔ ko bɛ ni ji mɔ kpakpa, akɛ ja mɔ kome pɛ, Nyɔŋmɔ.”​—Luka 18:19.

Nibii ni Yehowa ebɔ lɛ hãa wɔnaa akɛ eji mɔ kpakpa

Yehowa nitsumɔi lɛ hi. Nibii kpakpai sɔŋŋ Nyɔŋmɔ feɔ. “Yehowa hi hã mɛi fɛɛ, ni anaa emɔbɔnalɛ lɛ yɛ enitsumɔi lɛ fɛɛ amli.” (Lala 145:9) Ehãa adesai fɛɛ wala kɛ nibii fɛɛ ni he baahia amɛ koni amɛya nɔ amɛhi wala mli; ekwɛɛɛ hiɛiaŋ. (Bɔf. 14:17) Nɔ kroko ni hãa wɔnaa akɛ efeɔ ekpakpa ji akɛ, ekɛ wɔhe eshai keɔ wɔ. Biblia lɛ kɛɔ akɛ: “Bo Yehowa, ohi ni osumɔɔ waa akɛ okɛ esha ake.” (Lala 86:5) Eyɛ faŋŋ akɛ, “Yehowa hãaa nɔ kpakpa ko nɔ kpakpa ko ahia mɛi ni nyiɛɔ yɛ anɔkwayeli mli lɛ.”​—Lala 84:11.

‘KASEMƆ EKPAKPAFEEMƆ’

Nyɔŋmɔ bɔ wɔ tamɔ bɔ ni eyɔɔ lɛ, no hewɔ lɛ wɔbaanyɛ wɔkase lɛ ni wɔtsɔmɔ mɛi kpakpai, ni agbɛnɛ hu wɔfee ekpakpa. (1 Mo. 1:27) Nyɔŋmɔ Wiemɔ lɛ woɔ etsuji fɛɛ hewalɛ ni ‘amɛkase ekpakpafeemɔ.’ (Yes. 1:17) Shi te wɔbaafee tɛŋŋ wɔkase su kpakpa nɛɛ? Naa nibii etɛ ni baaye abua wɔ.

Klɛŋklɛŋ lɛ, wɔbaanyɛ wɔsɔle wɔbi mumɔ krɔŋkrɔŋ lɛ. Mumɔ krɔŋkrɔŋ lɛ baaye abua wɔ ni wɔtsɔmɔ gbɔmɛi kpakpai yɛ Nyɔŋmɔ hiɛ. (Gal. 5:22) Ebaanyɛ eye ebua wɔ ni wɔsumɔ ekpakpa, ni wɔhi efɔŋ. (Rom. 12:9) Biblia lɛ kɛɔ akɛ Yehowa baanyɛ aye abua wɔ ni ‘wɔhe awa yɛ nitsumɔ kpakpa kɛ wiemɔ kpakpa fɛɛ mli.’​—2 Tes. 2:16, 17.

Nɔ ni ji enyɔ lɛ, esa akɛ wɔkane Nyɔŋmɔ Wiemɔ lɛ ni ajɛ mumɔŋ aŋma lɛ. Kɛ́ wɔfee nakai lɛ, Yehowa baaye abua wɔ ni ‘wɔnu nɔ ni ekpakpafeemɔ tsɔɔ diɛŋtsɛ lɛ shishi,’ ni ebaasaa wɔ “kɛhã nitsumɔ kpakpa fɛɛ nitsumɔ kpakpa.” (Abɛi 2:9; 2 Tim. 3:17) Kɛ́ wɔkane Nyɔŋmɔ Wiemɔ lɛ ni wɔjwɛŋ nɔ lɛ, Nyɔŋmɔ he nilee baayi wɔtsui mli obɔ, ni wɔbaale esuɔmɔnaa nii, ni enɛɛmɛi ji nibii kpakpai. Nibii kpakpai nɛɛ baaye abua wɔ wɔsɛɛ ko.​—Luka 6:45; Efe. 5:9.

Nɔ ni ji etɛ lɛ, esa akɛ wɔbɔ mɔdɛŋ ‘wɔkase nɔ kpakpa.’ (3 Yoh. 11) Mɛi kpakpai pii yɛ Biblia lɛ mli ni wɔbaanyɛ wɔkase amɛ. Ŋwanejee ko bɛ he akɛ, Yehowa kɛ Yesu ji mɛi kpakpai ni fe fɛɛ. Shi mɛi krokomɛi hu yɛ ni awie amɛhe yɛ Biblia lɛ mli akɛ amɛji mɛi kpakpai. Amɛteŋ mɛi enyɔ ji, Tabita kɛ Barnaba. (Bɔf. 9:36; 11:22-24) Hemɔ be kɛkase amɛhe nii, ni okwɛ nibii komɛi ni amɛfee kɛye amɛbua mɛi krokomɛi. No sɛɛ lɛ, kwɛmɔ nɔ ni bo hu obaanyɛ ofee kɛye obua mɛi yɛ oweku lɛ loo osafo lɛ mli. Be ni okaseɔ amɛhe nii lɛ, obaana akɛ akɛni ale amɛ akɛ amɛji gbɔmɛi kpakpai hewɔ lɛ, amɛná jɔɔmɔi babaoo. Kɛ́ okase amɛ lɛ, bo hu obaaná jɔɔmɔi babaoo.

Agbɛnɛ hu, wɔbaanyɛ wɔkase mɛi komɛi ni yɔɔ ŋmɛnɛ ni amɛ hu amɛfeɔ ekpakpa lɛ. Mɛi nɛɛ ateŋ mɛi komɛi ji asafoŋ onukpai lɛ. Asafoŋ onukpai lɛ tsuɔ nii waa, ni ‘amɛsumɔɔ ekpakpa.’ Wɔbaanyɛ  wɔkase nyɛmimɛi yei anɔkwafoi ni kɛ amɛwiemɔ kɛ amɛnifeemɔ “tsɔɔ nii kpakpai” lɛ hu. (Tito 1:8; 2:3) Nyɛmi yoo ko ni atsɛɔ lɛ Roslyn lɛ wie akɛ: “Minaanyo lɛ yeɔ ebuaa mɛi yɛ asafo lɛ mli ni ewoɔ amɛ hewalɛ, kɛ́ no baabi ni ekɛ nɔ ko ashã afɔle po. Esusuɔ shihilɛ mli ni amɛyɔɔ lɛ he, ni ekeɔ amɛ nibii bibii loo eyeɔ ebuaa amɛ yɛ gbɛi krokomɛi anɔ. Manyɛ makɛɛ akɛ eji gbɔmɔ kpakpa.”

Yehowa woɔ ewebii lɛ hewalɛ ni ‘amɛtao nɔ kpakpa.’ (Amos 5:14) Kɛ́ wɔtao nɔ kpakpa lɛ, wɔbaasumɔ Yehowa mlai kɛ eshishitoo mlai lɛ waa, ni agbɛnɛ hu, shwelɛ ni wɔyɔɔ akɛ wɔfee nɔ kpakpa lɛ mli baawa waa.

Wɔbɔɔ mɔdɛŋ koni wɔtsɔmɔ mɛi kpakpai ni wɔfee nibii kpakpai hu

Jeee nibii wuji ni wɔbaafee wɔhã mɛi loo nɔ ko wulu ni wɔkɛbaashã afɔle wɔhã amɛ shi kome loo shii enyɔ ko pɛ lɛ ni baatsɔɔ akɛ wɔmiifee ekpakpa. Akɛ nɔkwɛmɔnɔ lɛ, kɛ́ mɔ ko du nii lɛ, ani eyaa faaŋ gagba obɔ ni ebatsɔɔ fɛɛ eshwieɔ nɔ shi kome, kɛkɛ lɛ egbe naa? Dabi. Moŋ lɛ, eshwieɔ nɔ nu fiofio. Nakai nɔŋŋ eji yɛ ekpakpafeemɔ gbɛfaŋ. Kɛ́ wɔfee nibii bibii pii kɛye wɔbua mɛi lɛ, no baatsɔɔ akɛ wɔmiifee ekpakpa.

Biblia lɛ woɔ wɔ hewalɛ ni wɔsaa wɔhe kɛhã nitsumɔi kpakpai. (2 Tim. 2:21; Tito 3:1) Agbɛnɛ hu, ekɛɔ wɔ akɛ, ‘wɔteŋ mɔ fɛɛ mɔ asa enyɛmi gbɔmɔ hiɛ koni ehi ehã enyɛmi lɛ, ni etswa lɛ ema shi.’ (Rom. 15:2) Ja wɔkɛ wɔhiɛ efɔ̃ shi dani wɔbaanyɛ wɔkɛ Biblia mli ŋaawoo nɛɛ atsu nii. Ekolɛ enɛ baabi ni wɔ kɛ mɛi aja nibii ni wɔyɔɔ. (Abɛi 3:27) Wɔbaanyɛ wɔfɔ̃ mɔ ko nine kɛhã niyeli loo kɛhã sanegbaa ni tswaa mɔ emaa shi. Kɛ́ wɔná wɔle akɛ mɔ ko bɛ hewalɛ lɛ, wɔbaanyɛ wɔŋma lɛ wolo, wɔyasara lɛ, loo wɔtswa lɛ wɔbi eshi. Kɛ́ wɔkɛ wɔhiɛ fɔ̃ shi lɛ, wɔbaaná hegbɛi pii kɛwie wiemɔi “ni hi ni tswaa mɔ emaa shi, yɛ hiamɔ ni yɔɔ lɛ naa, koni mɛi ni nuɔ lɛ aná nɔ ko ni sɛɛnamɔ yɔɔ he.”​—Efe. 4:29.

Wɔbɔɔ mɔdɛŋ akɛ wɔbaafee mɛi fɛɛ ekpakpa, tamɔ bɔ ni Yehowa feɔ lɛ. No hewɔ lɛ, wɔkwɛɛɛ hiɛiaŋ. Gbɛ kome ni sa kadimɔ ni wɔbaanyɛ wɔtsɔ nɔ wɔfee nakai ji, ni wɔbaashiɛ Maŋtsɛyeli sane kpakpa lɛ wɔhã mɛi fɛɛ. Wɔbɔɔ mɔdɛŋ ni wɔfee mɛi ni nyɛɔ wɔ lɛ po ekpakpa, tamɔ bɔ ni Yesu fã wɔ akɛ wɔfee lɛ. (Luka 6:27) Tɔmɔ ko kwraa bɛ he akɛ wɔbaajie mlihilɛ kpo ni wɔfee mɛi ekpakpa, ejaakɛ “mla ko bɛ ni teɔ shi woɔ nɛkɛ nibii nɛɛ.” (Gal. 5:22, 23) Kɛ́ aawa wɔ yi loo wɔkɛ naagbai miikpe ni kɛ̃lɛ wɔtee nɔ wɔba wɔjeŋ jogbaŋŋ lɛ, ewoɔ Nyɔŋmɔ hiɛ nyam, ni ebaanyɛ egbala mɛi kɛba anɔkwale lɛ he.​—1 Pet. 3:16, 17.

KƐ́ WƆFEE EKPAKPA LƐ, WƆNÁA HE SƐƐ

Biblia lɛ kɛɔ akɛ: “Gbɔmɔ kpakpa kpaa enifeemɔi lɛ amli yibii.” (Abɛi 14:14) Mɛni ji yibii nɛɛ ekomɛi? Kɛ́ wɔfee mɛi ekpakpa lɛ, bei pii lɛ, amɛ hu amɛkɛ wɔ yeɔ jogbaŋŋ. (Abɛi 14:22) Shi kɛ́ amɛfeee nakai po shi wɔtee nɔ wɔfee amɛ ekpakpa lɛ, ebaanyɛ ‘ahã amɛhe ajɔ ni esere amɛtsuiŋwalɛ lɛ.’​—Rom. 12:20, shn.

Mɛi pii ekpa shi amɛna akɛ, kɛ́ amɛfee ekpakpa ni amɛtsi amɛhe kɛje efɔŋ he lɛ, amɛnáa he sɛɛ. Susumɔ nɔ ni nyɛmi yoo ko ni atsɛɔ lɛ Nancy lɛ wie lɛ he okwɛ. Ewie akɛ: “Be ni midaa lɛ, mihiɛ yɛ laŋlaŋ, mibɛ jeŋba, ni mibuuu sã. Shi be ni mikase nɔ ni hãa mɔ ko feɔ gbɔmɔ kpakpa yɛ Nyɔŋmɔ hiɛ ni mihi shi yɛ naa lɛ, miná miishɛɛ waa. Amrɔ nɛɛ, mina akɛ mihe yɛ sɛɛnamɔ ni bulɛ eba mihe.”

Yiŋtoo titri hewɔ ni wɔbɔɔ mɔdɛŋ akɛ wɔbaafee mɛi ekpakpa ji akɛ, kɛ́ wɔfee nakai lɛ, Yehowa náa miishɛɛ. Kɛ́ mɛi enaaa ekpakpa ni wɔfeɔ lɛ po lɛ, Yehowa naa. Enaa nibii kpakpai fɛɛ ni wɔfeɔ kɛ susumɔi kpakpai fɛɛ ni wɔyɔɔ. (Efe. 6:7, 8) Ni kɛ́ ena lɛ, mɛni efeɔ? Biblia lɛ kɛɔ akɛ: “Gbɔmɔ kpakpa hiɛ baa nyam yɛ Yehowa hiɛ.” (Abɛi 12:2) No hewɔ lɛ, nyɛhãa wɔyaa nɔ wɔkasea ekpakpafeemɔ. Yehowa ewo shi akɛ, “anunyam kɛ woo kɛ toiŋjɔlɛ baaba mɔ fɛɛ mɔ ni tsuɔ nitsumɔi kpakpai lɛ nɔ.”​—Rom. 2:10.