Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Halamɔ wiemɔ Ga

 NIKASEMƆ 26

Ye Obua Mɛi Ni Ehao Lɛ

Ye Obua Mɛi Ni Ehao Lɛ

“Nyɛ fɛɛ nyɛnáa jwɛŋmɔ kome, nyɛnua he nyɛhãa nyɛhe, nyɛjiea nyɛmimɛi ateŋ suɔmɔ, kɛ musuŋtsɔlɛ, kɛ heshibaa kpo.”​—1 PET. 3:8.

LALA 107 Nyɔŋmɔ Tsɔɔ Wɔ Akɛ Wɔsumɔ Mɛi

NƆ NI ABAASUSU HE *

1. Mɛni kɛ́ wɔfee lɛ, no tsɔɔ akɛ wɔmiikase Yehowa, wɔ-Tsɛ ni sumɔɔ wɔ lɛ?

YEHOWA, wɔ-Tsɛ lɛ, sumɔɔ wɔ waa, ni wɔmiisumɔ ni wɔkase lɛ. (Yoh. 3:16) Enɛ hewɔ lɛ, wɔbɔɔ mɔdɛŋ akɛ ‘wɔbaanu he wɔhã mɛi, wɔjie nyɛmimɛi asuɔmɔ kpo, ni wɔmusuŋ atsɔ wɔ’ yɛ mɛi fɛɛ ahe, shi titri lɛ, yɛ “mɛi ni etsɔmɔ wɔwekumɛi yɛ hemɔkɛyeli lɛ mli lɛ” ahe. (1 Pet. 3:8; Gal. 6:10) Kɛ́ wɔnyɛmimɛi Kristofoi lɛ ateŋ mɔ ko kɛ naagbai ni naa wala kpe lɛ, wɔyeɔ wɔbuaa lɛ.

2. Mɛni he wɔbaasusu yɛ nikasemɔ nɛɛ mli?

2 Mɛi fɛɛ ni miisumɔ ni amɛhi Yehowa weku lɛ mli lɛ kɛ naagbai baakpe. (Mar. 10:29, 30) Be ni jeŋ fɔŋ nɛɛ naagbee lɛ bɛŋkɛɔ lɛ, ekolɛ wɔkɛ naagbai pii baakpe fe bɔ ni wɔkɛkpeɔ bianɛ lɛ po. Mɛni wɔteŋ mɔ fɛɛ mɔ baanyɛ afee kɛye ebua enyɛmi? Yɛ nikasemɔ nɛɛ mli lɛ, wɔbaasusu nɔ ni Biblia lɛ gbaa wɔ yɛ Lot, Hiob, kɛ Naomi he lɛ he, ni wɔkwɛ nɔ ni wɔbaanyɛ wɔkase yɛ mli. Agbɛnɛ hu, wɔbaakwɛ naagbai komɛi ni wɔnyɛmimɛi Kristofoi lɛ kɛkpeɔ ŋmɛnɛ, kɛ nɔ ni wɔbaanyɛ wɔfee kɛye wɔbua amɛ ni amɛnyɛ amɛdamɔ naa.

TOO OTSUI SHI

3. Mɛɛ yiŋ gbonyo 2 Petro 2:7, 8 lɛ hãa wɔnaa akɛ Lot kpɛ? Ni mɛni jɛ mli kɛba?

3 Yiŋ ni Lot kpɛ akɛ ebaayahi Sodom lɛ jeee yiŋkpɛɛ kpakpa kwraa, ejaakɛ Sodombii lɛ ajeŋba ekpɔtɔ. (Kanemɔ 2 Petro 2:7, 8.) Eyɛ mli akɛ jɛmɛ shikpɔŋ lɛ yɛ frɔ̃frɔ̃ moŋ, shi naagbai ni Lot kɛkpe yɛ jɛmɛ lɛ, jeee shwɛmɔ kwraa. (1 Mo. 13:8-13; 14:12) Be ni Yehowa hã la kɛ sɔlfa nɛ kɛjɛ ŋwɛi ni ekɛkpãtã Sodom kɛ maji krokomɛi ni yɔɔ nakai kpokpaa lɛ nɔ lɛ ahiɛ lɛ, Lot shĩa lɛ kɛ heloonaa nibii ni eyɔɔ lɛ fɛɛ hiɛ kpãtã. Agbɛnɛ hu, hii ni ewo shi akɛ amɛkɛ ebiyei lɛ baahi shi lɛ hu ahiɛ kpãtã.  Ni eŋa lɛ hu? Etamɔ nɔ ni yoo nɛɛ yanya maŋ lɛ mli hilɛ loo mɛi ni yɔɔ jɛmɛ lɛ ateŋ mɛi komɛi ahe aahu akɛ, egbo Yehowa nɔ toi ni lɛ hu ehiɛ kpãtã. Kwɛ bɔ ni enɛ baadɔ Lot waa ehã! (1 Mo. 19:12-14, 17, 26) Ani Lot sane je Yehowa tsine yɛ yiŋ gbonyo ni ekpɛ lɛ kɛ naagbai ni jɛ mli kɛba lɛ ahewɔ? Dabi.

Yehowa musuŋ tsɔ lɛ yɛ Lot kɛ eweku lɛ he, ni no hewɔ lɛ, etsu ŋwɛibɔfoi ni amɛyakpɔ̃ amɛ (Kwɛmɔ kuku 4)

4. Mɛni hãa wɔnaa akɛ Yehowa to etsui shi waa diɛŋtsɛ ehã Lot? (Kwɛmɔ mfoniri ni yɔɔ wolo lɛ hiɛ lɛ.)

4 Eyɛ mli akɛ Lot ni kpɛ eyiŋ akɛ ebaayahi Sodom moŋ, shi Yehowa musuŋ tsɔ lɛ yɛ ehe ni etsu ŋwɛibɔfoi ni amɛyahere lɛ kɛ eweku lɛ yiwala. Be ni ŋwɛibɔfoi lɛ fã Lot kɛ eweku lɛ akɛ amɛshi Sodom lɛ, Lot booo toi ni ebaashi oya nɔŋŋ; ‘eshashao shi.’ No hewɔ lɛ, ŋwɛibɔfoi lɛ mɔ enineshi ni amɛye amɛbua lɛ kɛ eweku lɛ ni amɛjo foi kɛje maŋ lɛ mli. (1 Mo. 19:15, 16) Kɛkɛ ni amɛkɛɛ lɛ akɛ ejo foi kɛya gɔji lɛ anɔ. Shi yɛ nɔ najiaŋ ni Lot baabo toi lɛ, ekɛɛ Yehowa akɛ ehã eya maŋ ko ni bɛŋkɛ jɛmɛ lɛ moŋ nɔ. (1 Mo. 19:17-20) Yehowa to etsui shi ebo Lot toi, ni eŋmɛ lɛ gbɛ ni eya nakai maŋ lɛ nɔ. Sɛɛ mli lɛ, Lot she nakai maŋ lɛ nɔ hilɛ gbeyei, ni efã eyahi gɔji lɛ anɔ, he tuuntu ni Yehowa kɛɛ lɛ mra mli akɛ eya lɛ. (1 Mo. 19:30) Yehowa to etsui shi waa diɛŋtsɛ ehã Lot! Mɛɛ gbɛ nɔ wɔbaanyɛ wɔkase Yehowa?

5-6. Mɛni kɛ́ wɔfee lɛ, no baatsɔɔ akɛ wɔmiikase Nyɔŋmɔ ni wɔkɛ nɔ ni awie yɛ 1 Tesalonikabii 5:14 lɛ miitsu nii?

5 Tamɔ bɔ ni eba lɛ yɛ Lot gbɛfaŋ lɛ, ŋɔɔ lɛ akɛ, onyɛmi Kristofonyo ko ekpɛ yiŋ gbonyo ko, ni no hewɔ lɛ, ekɛ naagbai ni naa wala miikpe. Te obaafee onii ohã tɛŋŋ? Ekolɛ obaakɛɛ lɛ akɛ nɔ ni edu lɛ mli yibii ekpaa lɛ, ni kɛ́ okɛɛ lɛ nakai lɛ otɔ̃ko. (Gal. 6:7) Shi ani no baaye abua lɛ? Ani ebaatsɔɔ akɛ ookase Yehowa? Hã wɔkwɛ nɔ ni Yehowa fee kɛye ebua Lot lɛ shi kome ekoŋŋ.

6 Yehowa tsu ŋwɛibɔfoi lɛ ni amɛyabɔ Lot kɔkɔ, ni agbɛnɛ hu, amɛye amɛbua lɛ ni eje hiɛkpatamɔ ni ekɛbaa Sodom nɔ lɛ mli. Nakai nɔŋŋ kɛ́ wɔ hu wɔna ni wɔnyɛmi Kristofonyo ko miikɔ gbɛ ko ni baanyɛ ayatsɛ naagbai ahã lɛ lɛ, esa akɛ wɔbɔ lɛ kɔkɔ. Kɛ́ efee tamɔ nɔ ni wɔnyɛmi lɛ miishashao shi akɛ ekɛ ŋaa ni wɔjɛ Biblia lɛ mli wɔwo lɛ lɛ baatsu nii po lɛ, esa akɛ wɔto wɔtsui shi wɔhã lɛ, ni esaaa akɛ wɔhãa esane jeɔ wɔtsine ni wɔkpoɔ ejeŋ wɔhãa lɛ. Bɔ ni bɔfoi enyɔ lɛ mɔ Lot nineshi ni amɛkɛ lɛ shi maŋ lɛ mli lɛ, nakai nɔŋŋ esa akɛ wɔ hu wɔkwɛ nɔ ni wɔbaanyɛ wɔfee kɛye wɔbua wɔnyɛmi lɛ, ni wɔwa lɛ ni ekɛ ŋaa ni awo lɛ lɛ atsu nii.​—Kanemɔ 1 Tesalonikabii 5:14; 1 Yoh. 3:18.

7. Yɛ tɔmɔi ni Lot tɔ̃ lɛ fɛɛ sɛɛ lɛ, te atsɛ lɛ tɛŋŋ yɛ Biblia lɛ mli, ni mɛni enɛ tsɔɔ wɔ yɛ Yehowa he? Te wɔbaafee tɛŋŋ wɔkase Yehowa?

7 Yɛ tɔmɔi ni Lot tɔ̃ lɛ fɛɛ sɛɛ lɛ, Yehowa kɛ mumɔ krɔŋkrɔŋ lɛ tsirɛ bɔfo Petro ni etsɛ Lot jalɔ. Mɛni hewɔ? Ejaakɛ Yehowa kɛ Lot tɔmɔi lɛ ke lɛ, ni ekɛ ejwɛŋmɔ emaaa nɔ. Ani ejeee miishɛɛ sane akɛ Yehowa kɛ ejwɛŋmɔ emaaa wɔtɔmɔi anɔ? (Lala 130:3) Te wɔbaafee tɛŋŋ wɔkase Yehowa lɛ? Esa akɛ wɔ hu wɔkɛ wɔjwɛŋmɔ ama wɔnyɛmimɛi lɛ asui kpakpai lɛ anɔ. Kɛ́ wɔfee nakai lɛ, ewaŋ tsɔ kɛhãŋ wɔ akɛ wɔbaato wɔtsui shi wɔhã amɛ. Ni ewaŋ kɛhãŋ amɛ hu akɛ amɛbaakpɛlɛ yelikɛbuamɔ ni wɔkɛhãa amɛ lɛ nɔ.

OMUSUŊ ATSƆ BO

8. Kɛ́ wɔmusuŋ tsɔ wɔ yɛ wɔnyɛmimɛi lɛ ahe lɛ, mɛni wɔbaafee?

8 Hiob ekpɛɛɛ yiŋ gbohii tamɔ Lot fee lɛ. Kɛ̃lɛ, lɛ hu ekɛ naagbai ni naa wala waa kpe. Enibii fɛɛ hiɛ kpãtã, ebulɛ fɛɛ tã, ni hela ko ni naa wa waa mɔ lɛ. Nɔ ni yɔɔ dɔlɛ fe fɛɛ lɛ, bii ni ekɛ eŋa lɛ fɔ lɛ fɛɛ gboi. Kɛkɛ ni mɛi etɛ komɛi ni kɛɛ amɛnaanyo ji lɛ lɛ hu folɔ enaa. Mɛni hewɔ Hiob nanemɛi etɛ nɛɛ ni kɛɛ amɛba ni amɛbashɛje emii lɛ amusuŋ etsɔɔɔ amɛ  kwraa yɛ ehe lɛ? Amɛkɛ amɛhe wooo eshihilɛ lɛ mli, ni no hewɔ lɛ, amɛyanuuu nɔ ni enina lɛ lɛ shishi jogbaŋŋ. Ni akɛni amɛnuuu shishi hewɔ lɛ, amɛmu sane naa yɛ gbɛ ni ejaaa nɔ, ni amɛwie Hiob hiɛ nyanyaanya. Mɛni baaye abua wɔ ni wɔkafee wɔnii tamɔ amɛ? Klɛŋklɛŋ lɛ, esa akɛ wɔhã ehi wɔjwɛŋmɔ mli akɛ, wɔleee shihilɛ mli ni wɔnyɛmi lɛ yɔɔ lɛ he nɔ fɛɛ nɔ. Yehowa pɛ ni le. No hewɔ lɛ, kɛ́ wɔnyɛmi lɛ miiwie lɛ, esa akɛ wɔbo lɛ toi jogbaŋŋ. Shi jeee no pɛ. Esa akɛ wɔbɔ mɔdɛŋ wɔkɛ wɔhe awo eshihilɛ lɛ mli. Anɔkwa, ja wɔfee nakai dani wɔbaanu he wɔhã lɛ.

9. Kɛ́ wɔmusuŋ tsɔɔ wɔ yɛ wɔnyɛmimɛi lɛ ahe lɛ, mɛni wɔfeŋ? Ni mɛni hewɔ?

9 Kɛ́ wɔmusuŋ tsɔ wɔ yɛ wɔnyɛmimɛi lɛ ahe lɛ, wɔyeŋ amɛnaagbai lɛ ahe osheku wɔtsɔŋ mɛi krokomɛi. Oshekuyelɔi jwaa asafo, ejaakɛ amɛkɛ mligbalamɔi baa. (Abɛi 20:19; Rom. 14:19) Mɔ ko ni yeɔ osheku lɛ bɛ mlihilɛ, esusuuu mɛi krokomɛi ahe, ni ewiemɔi baanyɛ ahã mɔ ko ni ehao lɛ ahao waa fe tsutsu lɛ po. (Abɛi 12:18; Efe. 4:31, 32) No hewɔ lɛ, yɛ nɔ najiaŋ ni wɔbaaye wɔnyɛmi ko ni kɛ naagbai miikpe lɛ he osheku lɛ, ehi moŋ akɛ wɔkɛ wɔjwɛŋmɔ baaya esui kpakpai lɛ anɔ ni wɔkwɛ nɔ ni wɔbaanyɛ wɔfee kɛye wɔbua lɛ.

Kɛ́ onyɛmi Kristofonyo ko ehao ni ‘eewie kɛkɛ’ lɛ, too otsui shi obo lɛ toi, koni sɛɛ mli lɛ, oshɛje emii (Kwɛmɔ kuku 10-11) *

10. Mɛni Hiob 6:2, 3 lɛ hãa wɔnaa?

10 Kanemɔ Hiob 6:2, 3. Be ni Hiob naa nɔ lɛ, bei komɛi lɛ, ‘ewieɔ kɛkɛ.’ Nibii ni ewie lɛ ekomɛi yɛ ni sɛɛ mli lɛ, egbala sɛɛ. (Hiob 42:6) Ŋmɛnɛ lɛ, wɔnyɛmi ko ni ehao waa lɛ hu baanyɛ awie nibii komɛi, ni sɛɛ mli lɛ ebaashwa ehe. Kɛ́ ebɔi nibii nakai wiemɔ lɛ, mɛni esa akɛ wɔfee? Yɛ nɔ najiaŋ ni wɔbaawie ehiɛ lɛ, esa akɛ wɔmusuŋ atsɔ wɔ yɛ ehe. Kaimɔ akɛ, Yehowa ebɔɔɔ wɔ ni wɔkɛ naagbai kɛ haomɔi babaoo ni wɔkɛkpeɔ ŋmɛnɛ lɛ akpe. No  hewɔ lɛ, kɛ́ wɔnyɛmi ko kɛ naagbai ni naa wala miikpe ni ewie nibii komɛi ni esaaa akɛ ewieɔ po lɛ, esaaa akɛ wɔhiɛ feɔ wɔ yaa. Kɛ́ ewie nibii komɛi ni ejaaa yɛ Yehowa loo wɔhe po lɛ, esaaa akɛ wɔmli fuɔ lɛ oya nɔŋŋ ni wɔwieɔ ehiɛ nyanyaanya.​—Abɛi 19:11.

11. Mɛɛ gbɛ nɔ asafoŋ onukpai lɛ baanyɛ akase Elihu be ni amɛwoɔ mɔ ko ŋaa lɛ?

11 Bei komɛi lɛ, ehe baahia ni awo nyɛmi ko ni naagba ko miisu etsui waa lɛ ŋaa loo ajaje ejwɛŋmɔ. (Gal. 6:1) Te asafoŋ onukpai lɛ baafee tɛŋŋ amɛtsu enɛ he nii? Esa akɛ amɛkase Elihu. Elihu bo Hiob toi jogbaŋŋ, ni enu he ehã lɛ waa. (Hiob 33:6, 7) Enɛ hewɔ lɛ, enyɛ ena susumɔ ni Hiob hiɛ kɛ nɔ hewɔ ni ená nakai susumɔ lɛ, ni no sɛɛ dani ewo lɛ ŋaa. Kɛ́ asafoŋ onukpai lɛ hu bo mɔ ni ehao lɛ toi jogbaŋŋ koni amɛnu eshihilɛ lɛ shishi dani amɛwo lɛ ŋaa lɛ, ewaaa akɛ ŋaa ni amɛbaawo lɛ lɛ baashɛ etsui he.

WIEMƆ MIISHƐJEMƆ WIEMƆI

12. Be ni Naomi wu kɛ ebihii enyɔ lɛ gboi lɛ, te enu he ehã tɛŋŋ?

12 Naomi sumɔ Yehowa, ni eye lɛ anɔkwa. Shi be ni ewu kɛ ebihii enyɔ lɛ gboi lɛ, sane lɛ gba enaa aahu akɛ, ekɛɛ akatsɛ lɛ Naomi dɔŋŋ, shi moŋ atsɛ lɛ “Mara,” ni shishi ji, “Joomɔ.” (Rut 1:3, 5, 20, shn., 21) Yɛ nɛkɛ be ni wa nɛɛ mli lɛ, Naomi shaayoo Rut shiii lɛ. Rut ye ebua Naomi kɛ shĩakwɛmɔ, ni ekɛ ewiemɔi shɛje Naomi mii hu. Wiemɔi ni shishinumɔ waaa ni Rut jɛ etsuiŋ ewie kɛshɛje Naomi mii lɛ hãa wɔnaa akɛ, esumɔɔ lɛ ni eesumɔ ni eye ebua lɛ.​—Rut 1:16, 17.

13. Kɛ́ wɔnyɛmi Kristofonyo ko wu loo eŋa gbo lɛ, mɛni hewɔ ehe miihia waa ni wɔshɛje emii?

13 Kɛ́ wɔnyɛmi Kristofonyo ko wu loo eŋa gbo lɛ, ehe miihia waa ni wɔshɛje emii ni wɔye wɔbua lɛ. Gbalashihilɛ mli hefatalɔi tamɔ tsei enyɔ ni bɛŋkɛ waa. Be ni tsei nɛɛ daraa lɛ, amɛshishifãi lɛ lalaa amɛhe. Enɛ hewɔ lɛ, kɛ́ afã ekome loo egbo lɛ, ebaanyɛ eye ekome lɛ ni eshwɛ lɛ awui waa. Nakai nɔŋŋ ebaa lɛ kɛji mɔ ko gbalashihilɛ mli hefatalɔ gbo. Mɔ ni agbo ashi lɛ lɛ baanyɛ anu dɔlɛ he yɛ etsuiŋ tɔ̃ɔ be kplaŋŋ. Nyɛmi yoo ko ni atsɛɔ lɛ Paula * lɛ wu gbo trukaa. Ewie akɛ: “Mishihilɛ tsake kwraa, ni mifee shwɛm. No mli lɛ, miwu lɛ ji minaanyo ni bɛŋkɛ mi kpaakpa. Nɔ ko bɛ ni migbaaa lɛ. Kɛ́ miná miishɛɛ lɛ, lɛ hu enáa miishɛɛ, ni eye ebua mi yɛ minaagbai amli. Be fɛɛ be kɛ́ nɔ ko miiye mitsui ni mitee eŋɔɔ lɛ, eboɔ mi toi. Minu he tamɔ nɔ ni migbɔmɔtso lɛ fã egbo.”

Mɛni wɔbaanyɛ wɔfee kɛye wɔbua mɔ ko ni ehefatalɔ egbo eshi lɛ lɛ? (Kwɛmɔ kuku 14-15) *

14-15. Mɛni wɔbaanyɛ wɔfee kɛshɛje mɔ ko ni hefatalɔ egbo lɛ mii?

14 Te wɔbaafee tɛŋŋ wɔshɛje mɔ ko ni ewu loo eŋa egbo lɛ mii? Klɛŋklɛŋ lɛ, ehe miihia waa ni wɔkɛ mɔ lɛ agba sane, kɛ́ nakai feemɔ wa hã wɔ loo wɔleee nɔ ni wɔbaawie po. Paula, ni wɔtsĩ etã kɛtsɔ hiɛ lɛ wie akɛ: “Mile akɛ kɛ́ agbo yɛ mɔ ko nɔ lɛ, ewaa hãa mɛi pii akɛ amɛbaawie kɛ́ amɛyɛ mɔ lɛ masɛi. Amɛnuɔ he akɛ, kɛ́ amɛtee wiemɔ lɛ, ekolɛ amɛbaawie nɔ ko ni baagba mɔ lɛ naa. Shi kɛ́ eyaba lɛ nakai po lɛ, ehi fe ni amɛwieee nɔ ko kwraa.” Etamɔ nɔ ni mɔ ni agbo yɛ enɔ lɛ kpaŋ gbɛ po akɛ obaawie nɔ ko srɔto ko. Paula wie akɛ: “Mɛi komɛi kɛɛ mi kɛkɛ akɛ, ‘Edɔ wɔ waa akɛ nɔ ko tamɔ nɛkɛ eba onɔ,’ ni mihiɛ sɔ enɛ waa.”

15 Nyɛmi nuu ko ni atsɛɔ William, ni ŋa gbo afii komɛi ni eho nɛ lɛ wie akɛ: “Kɛ́ mɛi gba mi nibii kpakpai ni amɛkaiɔ yɛ miŋa he lɛ, ehãa mináa miishɛɛ waa, ejaakɛ ehãa minaa akɛ be ni eyɔɔ wala mli lɛ, mɛi sumɔɔ esane ni amɛbuɔ lɛ. Anɔkwa, kɛ́ amɛfee nakai lɛ, eyeɔ ebuaa mi waa diɛŋtsɛ. Eshɛjeɔ mimii waa, ejaakɛ no mli lɛ, miŋa sane kã mitsui nɔ diɛŋtsɛ, ni mishwɛɛɛ ehe kwraa.” Nyɛmi yoo  okulafo ko ni atsɛɔ lɛ Bianca lɛ wie akɛ: “Kɛ́ mɛi kɛ mi fee ekome kɛsɔle ni amɛkɛ mi kane ŋmalɛi enyɔoo ko lɛ, eshɛjeɔ mimii waa. Kɛ́ amɛgba mi miwu lɛ he sane ni amɛbo mi toi be ni mi hu migbaa amɛ ehe sane lɛ, ewaa mi waa.”

16. (a) Kɛ́ mɔ ko hefatalɔ loo mɔ ko ni esumɔɔ waa lɛ gbo lɛ, mɛni esa akɛ wɔfee? (b) Yɛ nɔ ni awie yɛ Yakobo 1:27 lɛ naa lɛ, mɛɛ sɔ̃ kã wɔnɔ?

16 Bɔ ni Rut tee nɔ eye ebua yoo okulafo Naomi lɛ, nakai nɔŋŋ esa akɛ wɔya nɔ wɔye wɔbua mɛi ni amɛhefatalɔi loo mɔ ko ni amɛsumɔɔ waa lɛ egbo lɛ. Paula, mɔ ni wɔtsĩ etã kɛtsɔ hiɛ lɛ, wie akɛ: “Miwu lɛ gbele lɛ sɛɛ nɔŋŋ lɛ, mɛi pii baye amɛbua mi ni amɛshɛje mimii. Shi sɛɛ mli lɛ, amɛku amɛsɛɛ amɛtee amɛnitsumɔi srɔtoi anɔ. Kɛ̃lɛ, nakai beiaŋ fɛɛ lɛ, minaaa nibii anaa. Kɛ́ mɛi hã ehi amɛjwɛŋmɔŋ akɛ, ehe baahia ni amɛya nɔ amɛye amɛbua mɔ ni agbo yɛ enɔ lɛ ni amɛshɛje emii nyɔji abɔ loo afii abɔ po lɛ, eyeɔ ebuaa waa.” Fɛɛ sɛɛ lɛ, esoro mɔ fɛɛ mɔ. Mɛi komɛi yɛ ni etsɛɛɛ nɔŋŋ amɛnyɛɔ amɛkpeɔ shihilɛ lɛ naa. Shi mɛi komɛi hu yɛ ni be fɛɛ be ni amɛbaafee nɔ ko ni kulɛ amɛkɛ amɛhefatalɔ lɛ feɔ ekome kɛfeɔ lɛ, ekaiɔ amɛ gbele lɛ. Agbɛnɛ hu, esoro mɔ fɛɛ mɔ kɛ nɔ ni efeɔ kɛ́ eeye awerɛho. Fɛɛ mli lɛ, esaaa akɛ wɔhiɛ kpaa nɔ kɔkɔɔkɔ akɛ, eji sɔ̃ ni Yehowa kɛfɔ̃ wɔnɔ kɛ hegbɛ kpele ni ehã wɔ akɛ wɔshɛje mɛi ni hefatalɔi egboi lɛ amii.​—Kanemɔ Yakobo 1:27.

17. Mɛni hewɔ esa akɛ wɔye wɔbua mɛi ni hefatalɔi eshi amɛ lɛ ni wɔshɛje amɛmii?

17 Kɛ́ mɔ ko hefatalɔ je gbɛ eshi lɛ lɛ, mɔ lɛ  haoɔ waa ni etsui kumɔɔ. Nyɛmi yoo ko ni atsɛɔ lɛ Joyce lɛ wu shi lɛ ni eyawó yoo kroko. Joyce wie akɛ: “Tsemɔ ni etse mi gbãla lɛ dɔ mi waa diɛŋtsɛ. Eji gbo egbo po kulɛ, edɔŋ mi nakai. Ejaakɛ eji oshãra ko loo hela ko ni ŋɔ lɛ kɛtee kulɛ, mana akɛ jeee lɛ eje gbɛ akɛ eeshi mi. Shi enɛ lɛ, miwu lɛ diɛŋtsɛ kɛɛ etaooo mi dɔŋŋ. Minu he tamɔ nɔ ni mitsɔ tako shwɛ.”

18. Mɛni wɔbaanyɛ wɔfee kɛye wɔbua mɛi ni amɛgbalashihilɛ mli hefatalɔi bɛ amɛmasɛi dɔŋŋ lɛ?

18 Kɛ́ wɔjɛ mlihilɛ mli wɔfee nibii bibii wɔhã mɛi ni amɛgbalashihilɛ mli hefatalɔi bɛ amɛmasɛi dɔŋŋ lɛ, no hãa amɛnaa akɛ wɔsumɔɔ amɛ. Yɛ be ni tamɔ nɛkɛ mli lɛ, ehe miihia waa ni amɛná nanemɛi kpakpai. (Abɛi 17:17) No hewɔ lɛ, mɛni obaanyɛ ofee kɛtsɔɔ akɛ naanyo kpakpa ji bo? Obaanyɛ ohoo nɔ ko fioo ni ofɔ̃ amɛ nine kɛhã niyeli. Obaanyɛ okɛ amɛ ato gbɛjianɔ ni nyɛyajie nyɛhiɛtserɛ fioo loo nyɛya shiɛmɔ. Aloo, yɛ be kɛ beiaŋ lɛ, obaanyɛ ofɔ̃ amɛ nine ni amɛbafata nyɛhe kɛhã weku jamɔ. Kɛ́ oye obua amɛ lɛ, Yehowa baaná miishɛɛ, ejaakɛ “mɛi ni tsui ekumɔ lɛ” asane kã etsui nɔ, ni eji “yei okulafoi ahebulɔ.”​—Lala 34:18; 68:5.

19. Yɛ nɔ ni aŋma yɛ 1 Petro 3:8 lɛ hewɔ lɛ, mɛni otswa ofai shi akɛ obaafee?

19 Etsɛŋ, Nyɔŋmɔ Maŋtsɛyeli lɛ baaye shikpɔŋ lɛ nɔ, ni ‘wɔhiɛ baakpa wɔhaomɔi’ fɛɛ nɔ. Wɔmiikpa be nɛɛ gbɛ waa. Nakai beiaŋ lɛ, “akaiŋ tsutsu nii lɛ dɔŋŋ, ni amɛbaŋ tsui mli hu dɔŋŋ.” (Yes. 65:16, 17) Shi kɛyashi nakai be lɛ baashɛ lɛ, nyɛhãa wɔteŋ mɔ fɛɛ mɔ ayea abuaa enyɛmi ni eshɛje emii, ni wɔtsɔ wɔwiemɔ kɛ wɔnifeemɔ nɔ wɔhã wɔnyɛmimɛi Kristofoi lɛ fɛɛ ana akɛ, wɔsumɔɔ amɛ.​—Kanemɔ 1 Petro 3:8.

LALA 111 Nibii Ni Hãa Wɔnáa Miishɛɛ

^ par. 5 Lot, Hiob, kɛ Naomi fɛɛ sɔmɔ Yehowa ni amɛye lɛ anɔkwa. Fɛɛ sɛɛ lɛ, amɛkɛ naagbai ni mli wala kpe. Yɛ nikasemɔ nɛɛ mli lɛ, wɔbaakwɛ nɔ ni wɔbaanyɛ wɔkase yɛ nibii komɛi ni tee nɔ yɛ amɛshihilɛ mli lɛ amli. Agbɛnɛ hu, wɔbaana nɔ hewɔ ni ehe miihia ni wɔto wɔtsui shi wɔhã wɔnyɛmimɛi ni kɛ naagbai miikpe lɛ, ni wɔmusuŋ atsɔ wɔ yɛ amɛhe ni wɔshɛje amɛmii.

^ par. 13 Atsake gbɛ́i lɛ ekomɛi yɛ nikasemɔ nɛɛ mli.

^ par. 57 MFONIRI LƐ HE SANE: Nyɛmi nuu ko ehao waa ni ‘eewie kɛkɛ,’ shi asafoŋ onukpa ko eto etsui shi eebo lɛ toi. Sɛɛ mli be ni nyɛmi nuu lɛ tsui eba shi lɛ, asafoŋ onukpa lɛ miiwo lɛ ŋaa.

^ par. 59 MFONIRI LƐ HE SANE: Nyɛmi nuu ko kɛ eŋa eyasara nyɛmi nuu ko ni ŋa gbo etsɛko lɛ. Amɛmiigba nibii ni yɔɔ miishɛɛ ni amɛkaiɔ yɛ eŋa lɛ he lɛ.