Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Halamɔ wiemɔ Ga

 NIKASEMƆ 24

Fãamɔ Susumɔi Fɛɛ Ni Teɔ Shi Ewoɔ Nyɔŋmɔ Nilee Lɛ Oshwie!

Fãamɔ Susumɔi Fɛɛ Ni Teɔ Shi Ewoɔ Nyɔŋmɔ Nilee Lɛ Oshwie!

“Wɔmiifãmɔ susumɔi kɛ nɔ fɛɛ nɔ ni kwɔ ni teɔ shi ewoɔ Nyɔŋmɔ nilee lɛ wɔmiishwie.”​—2 KOR. 10:5.

LALA 124 Ye Anɔkwa Daa!

NƆ NI ABAASUSU HE *

1. Mɛɛ kɔkɔ Paulo bɔ Kristofoi komɛi ni afɔ amɛ mu lɛ?

BƆFO Paulo bɔ blema Kristofoi lɛ kɔkɔ akɛ: “Nyɛkahãa je nɛɛ shɔ̃a nyɛ dɔŋŋ.” (Rom. 12:2) Mɛni hewɔ ebɔ hii kɛ yei anɔkwafoi nɛɛ ni ejɔɔ amɛhe nɔ amɛhã Nyɔŋmɔ ni akɛ mumɔ krɔŋkrɔŋ efɔ amɛ mu lɛ kɔkɔ ni yɔɔ hiɛdɔɔ nɛɛ?​—Rom. 1:7.

2-3. Mɛɛ nibii Satan kɛtsuɔ nii koni etsi wɔ kɛje Yehowa he? Te wɔbaafee tɛŋŋ wɔfãmɔ susumɔi gbohii ni ‘shishifãi emɔmɔ shi waa’ yɛ wɔjwɛŋmɔ mli lɛ wɔshwie?

2 Etamɔ nɔ ni Kristofoi nɛɛ ekomɛi hã susumɔi gbohii ni ehe shi waa yɛ Satan je lɛ mli lɛ ná amɛnɔ hewalɛ, ni no hewɔ Paulo kɛ hiɛdɔɔ bɔ amɛ kɔkɔ lɛ. (Efe. 4:17-19) Nɔ ni nina amɛ lɛ baanyɛ anina wɔteŋ mɔ fɛɛ mɔ. Satan, je nɛɛ nyɔŋmɔ lɛ, etswa efai shi akɛ ebaatsi wɔ kɛje Yehowa he, ni etsɔɔ gbɛi srɔtoi anɔ koni efee nakai. Akɛ nɔkwɛmɔnɔ lɛ, kɛ́ ena akɛ wɔmiisumɔ ni wɔtsɔmɔ mɛi wuji loo wɔhã ana wɔ lɛ, ebaanyɛ etsɔ no nɔ enine ashɛ wɔnɔ. Agbɛnɛ hu, ebaanyɛ etsɔ nibii komɛi ni atsɔɔ wɔ yɛ shĩa yɛ wɔgbekɛbiiashi, nibii komɛi ni wɔkase yɛ wɔkutsoŋbii adɛŋ, loo nibii komɛi ni wɔkase yɛ skul lɛ anɔ efite wɔjwɛŋmɔ.

3 Ani wɔbaanyɛ wɔfãmɔ nibii nɛɛ “ni amɛshishifãi emɔmɔ shi waa” yɛ wɔjwɛŋmɔ mli lɛ wɔshwie? (2 Kor. 10:4) Hɛɛ, Yehowa yelikɛbuamɔ naa lɛ, wɔbaanyɛ! Paulo wie akɛ: “Wɔmiifãmɔ susumɔi  kɛ nɔ fɛɛ nɔ ni kwɔ ni teɔ shi ewoɔ Nyɔŋmɔ nilee lɛ wɔmiishwie, ni wɔmiiŋɔ jwɛŋmɔ fɛɛ jwɛŋmɔ nom koni wɔhã ebo Kristo lɛ toi.” (2 Kor. 10:5) Bɔ ni tsofai baanyɛ afã helai kɛ amɛshishi kɛje wɔgbɔmɔtso lɛ mli lɛ, nakai nɔŋŋ Nyɔŋmɔ Wiemɔ lɛ baanyɛ aye abua wɔ ni wɔfamɔ susumɔi fɔji ni Satan je lɛ edu ewo wɔyitsoŋ lɛ wɔshwie, ni wɔtsake wɔjeŋba.

‘TSAKEMƆ OJWƐŊMƆ’

4. Be ni akɛ wɔteŋ mɛi pii bɔi Biblia lɛ kasemɔ lɛ, mɛni ehe bahia ni wɔfee?

4 Ekã shi faŋŋ akɛ, be ni akɛ bo bɔi Biblia lɛ kasemɔ ni okpɛ oyiŋ akɛ obaasɔmɔ Yehowa lɛ, ehe bahia ni ofee tsakemɔi komɛi yɛ oshihilɛ mli. Yɛ wɔteŋ mɛi pii agbɛfaŋ lɛ, enɛ bi ni wɔkpa nibii gbohii komɛi feemɔ. (1 Kor. 6:9-11) Eŋɔɔ wɔnaa waa akɛ Yehowa ye ebua wɔ ni wɔkpa nakai nibii gbohii lɛ feemɔ!

5. Mɛɛ gbɛtsɔɔmɔi enyɔ akɛhã yɛ Romabii 12:2 lɛ?

5 Shi ani no tsɔɔ akɛ wɔgbe naa? Dabi. Eyɛ mli akɛ wɔkpa eshai ni yɔɔ hiɛdɔɔ ni wɔfeɔ be ni abaptisiko wɔ lɛ feemɔ moŋ, shi ehe miihia ni wɔkwɛ jogbaŋŋ ni wɔtsi wɔhe kɛje nɔ fɛɛ nɔ ni baanyɛ ahã wɔku wɔsɛɛ kɛya wɔblema lɛ he. Mɛɛ gbɛ nɔ wɔbaatsɔ wɔfee nakai? Sane ko ni Paulo wie lɛ hãa sanebimɔ nɛɛ hetoo. Ewie akɛ: “Nyɛkahãa je nɛɛ shɔ̃a nyɛ dɔŋŋ, shi moŋ, nyɛtsakea nyɛhe kɛtsɔ nyɛjwɛŋmɔ ni nyɛbaaya nɔ nyɛtsake lɛ nɔ.” (Rom. 12:2) Ani okadi gbɛtsɔɔmɔi enyɔ ni Paulo kɛhã yɛ ŋmalɛ nɛɛ mli lɛ? Klɛŋklɛŋ lɛ, ekɛɛ ‘wɔkahã je nɛɛ shɔ̃ wɔ’ loo ená wɔnɔ hewalɛ dɔŋŋ. Nɔ ni ji enyɔ lɛ, ekɛɛ ‘wɔtsake wɔhe’ kɛtsɔ wɔjwɛŋmɔ ni wɔbaaya nɔ wɔtsake lɛ nɔ.

6. Mɛni wɔkaseɔ yɛ nɔ ni Yesu wie yɛ Mateo 12:43-45 lɛ mli?

6 Be ni Paulo kɛɛ wɔtsake wɔhe lɛ, no mli lɛ, jeee bɔ ni mɛi naa wɔ yɛ kponɔgbɛ lɛ pɛ kɛkɛ he ewieɔ lɛ. Moŋ lɛ, eetsɔɔ akɛ wɔtsake mɛi ni wɔji diɛŋtsɛ yɛ wɔmligbɛ tɔ̃ɔ. (Kwɛmɔ akrabatsa ni yitso ji, “ Ani Otsake Yɛ Mligbɛ Aloo Yɛ Kponɔgbɛ Pɛ Kɛkɛ?”) Enɛ biɔ ni wɔtsake wɔjwɛŋmɔ, ni ji wɔsubaŋ, bɔ ni wɔnuɔ he wɔhãa  yɛ nibii ahe, kɛ nibii ni wɔshweɔ. No hewɔ lɛ, esa akɛ wɔteŋ mɔ fɛɛ mɔ abi ehe akɛ, ‘Ani tsakemɔi ni mifeɔ koni matsɔ tamɔ Kristo lɛ esa nibii ni mishweɔ kɛ bɔ ni misusuɔ nii ahe mihãa lɛ he, aloo bɔ ni mɛi naa mi amɛhãa yɛ kponɔgbɛ lɛ pɛ kɛkɛ ni etsake?’ Sanebimɔ nɛɛ hetoo lɛ he miihia waa. Yɛ Mateo 12:43-45 lɛ, Yesu tsɔɔ wɔ nɔ ni esa akɛ wɔfee koni tsakemɔi ni wɔfeɔ lɛ akafee kponɔgbɛ nɔ pɛ kɛkɛ. (Kanemɔ.) Wɔbaanyɛ wɔkase nɔ ko ni he hiaa waa yɛ nɔ ni ewie lɛ mli, no ji: Kɛ́ wɔjie susumɔi gbohii kɛje wɔjwɛŋmɔ mli lɛ, esa akɛ wɔkɛ susumɔi ni sa Nyɔŋmɔ hiɛ aye najiaŋ.

HÃ OJWƐŊMƆ ‘ATSƆ EHEE BE FƐƐ BE’

7. Te wɔbaafee tɛŋŋ wɔtsake mɛi ni wɔji yɛ wɔmligbɛ tɔ̃ɔ lɛ?

7 Ani wɔbaanyɛ wɔtsake mɛi ni wɔji yɛ wɔmligbɛ tɔ̃ɔ lɛ lɛɛlɛŋ? Hɛɛ. Nyɔŋmɔ Wiemɔ lɛ kɛɔ akɛ: “Nyɛyaa nɔ nyɛtsakea nyɛjwɛŋmɔ koni etsɔ ehee be fɛɛ be, koni nyɛwo subaŋ hee ni abɔ yɛ Nyɔŋmɔ suɔmɔ naa yɛ anɔkwa jalɛ kɛ anɔkwayeli krɔŋŋ mli lɛ.” (Efe. 4:23, 24) Shi enɛ feemɔ kãaa shi akɔɔɔ, ejaakɛ ebiɔ babaoo fe ni wɔbaawu wɔshi akɔnɔi fɔji ni wɔkpa nibii gbohii feemɔ kɛkɛ. Esa akɛ ‘wɔtsake wɔjwɛŋmɔ,’ ni ji nibii ni wɔshweɔ, nibii ni baa wɔtsine, kɛ nɔ ni tsirɛɔ wɔ ni wɔfeɔ nibii ni wɔfeɔ lɛ. Enɛ biɔ hiɛmiamɔ waa, ni ejeee nɔ ko ni baa gbi kome jenamɔ.

8-9. Mɛɛ gbɛ nɔ nyɛmi nuu ko niiashikpamɔ hãa wɔnaa akɛ, ehe miihia ni wɔtsake mɛi ni wɔji diɛŋtsɛ yɛ wɔmligbɛ tɔ̃ɔ lɛ?

8 Naa niiashikpamɔ ko ni baaye abua wɔ ni wɔnu sane nɛɛ shishi jogbaŋŋ. Ekɔɔ nyɛmi nuu ko ni be ko ni eho lɛ etsui shaa lɛ lɛ he. Be ni akɛ lɛ kase Biblia lɛ, ekpa dãatɔɔ kɛ nɔmɔ, ni no sɛɛ lɛ, abaptisi lɛ. Enɛ bafee odaseyeli kpele yɛ he ni eyɔɔ lɛ. Shi ebaptisimɔ lɛ sɛɛ etsɛɛɛ lɛ, ekɛ kaa ko ni ekpaaa gbɛ kwraa kpe. Gbɛkɛ ko lɛ, dãatɔlɔ ko ba eshĩa lɛ ebatsɔ̃ enaa. Shishijee lɛ, wɔnyɛmi nuu lɛ ye ehe nɔ ni efooo edaaŋ. Shi loloolo lɛ, dãatɔlɔ lɛ eyaaa. Ehiɛ feemɔ aahu ni eyawie eshi Yehowa. Agbɛnɛ lɛ, wɔnyɛmi nuu lɛ nyɛɛɛ ehe nɔ eye dɔŋŋ. Eje kpo ni eyatsoo lɛ jogbaŋŋ. Mɛni hewɔ wɔnyɛmi lɛ eyanyɛɛɛ ehe nɔ eye dɔŋŋ lɛ? Eyɛ mli akɛ Biblia lɛ ni ekase lɛ hewɔ lɛ, kɛ́ emli fu po lɛ, eyeɔ ehe nɔ ni ekɛ mɛi enɔɔɔ moŋ, shi etsakeko mɔ ni eji diɛŋtsɛ yɛ emligbɛ tɔ̃ɔ. Aloo kɛ́ wɔɔwie lɛ, etsakeko ejwɛŋmɔ loo bɔ ni esusuɔ nii ahe ehãa lɛ.

9 Shi wɔnyɛmi lɛ kɛ eshigbeemɔhe efeee ewɔɔhe. (Abɛi 24:16) Asafoŋ onukpai lɛ ye amɛbua lɛ, ni fiofio lɛ, enyɛ etsake. Sɛɛ mli lɛ, ebatsɔ asafoŋ onukpa. Kɛkɛ ni gbɛkɛ ko lɛ, ekɛ kaa ni ekɛkpe afii komɛi ni eho lɛ eko pɛpɛɛpɛ kpe yɛ Maŋtsɛyeli Asa lɛ hiɛ tuuntu. Ena ni dãatɔlɔ ko miitao eyi asafoŋ onukpa ko. Mɛni efee? Ekɛ dãatɔlɔ lɛ wie kɛ naajɔlɛ kɛ bulɛ, ni ejɔɔ etsui he. Kɛkɛ ni eye ebua lɛ ni eyashɛ shĩa. Mɛni hewɔ wɔnyɛmi lɛ eyiii dãatɔlɔ lɛ tamɔ efee be ko ni eho lɛ? Efeee nakai, ejaakɛ etsake ejwɛŋmɔ. Etsake mɔ ni eji yɛ mligbɛ tɔ̃ɔ lɛ, ni ebatsɔ mɔ ko ni he jɔ, ni baa ehe shi. Enɛ kɛ yijiemɔ bahã Yehowa!

10. Ani eyɛ mlɛo akɛ wɔbaatsake mɛi ni wɔji yɛ wɔmligbɛ tɔ̃ɔ? Tsɔɔmɔ mli.

10 Tamɔ bɔ ni wɔwie kɛtsɔ hiɛ lɛ, tsakemɔi nɛɛ biɔ hiɛmiamɔ waa, ni amɛbaaa gbi kome jenamɔ. Ekolɛ tsakemɔi nɛɛ afeemɔ baahe wɔ afii abɔ, ni ebaabi ni ‘wɔbɔ mɔdɛŋ fɛɛ ni wɔbaanyɛ.’ (2 Pet. 1:5) Anɔkwa, kɛ́ wɔkɛ hiɛdɔɔ efeee nɔ fɛɛ nɔ ni wɔbaanyɛ koni wɔtsake mɛi ni wɔji yɛ wɔmligbɛ lɛ, wɔnyɛŋ wɔtsake kɔkɔɔkɔ, ekɔɔɔ he eko afii abɔ ni wɔkɛhi asafo lɛ mli. Mɛni ji nibii komɛi ni he hiaa ni baaye abua wɔ ni wɔnyɛ wɔtsake? Nyɛhãa wɔkwɛa.

 NIBII NI BAAYE ABUA WƆ NI WƆTSAKE

11. Mɛɛ gbɛ nɔ sɔlemɔ baaye abua wɔ ni wɔtsake wɔjwɛŋmɔ?

11 Nɔ klɛŋklɛŋ ni ehe miihia ni wɔfee ji, ni wɔsɔle. Tamɔ bɔ ni mɔ ni ŋma Lala 51 lɛ fee lɛ, esa akɛ wɔ hu wɔsɔle wɔkɛɛ Yehowa akɛ: “Ao Nyɔŋmɔ, bɔɔ tsui ni he tse yɛ mimli ohã mi, ni okɛ mumɔ hee, mumɔ ni fĩɔ shi, awo mimli.” (Lala 51:10) Esa akɛ wɔkpɛlɛ nɔ akɛ, ehe miihia ni wɔtsake wɔjwɛŋmɔ, ni wɔkpa Yehowa fai ni eye ebua wɔ ni wɔfee nakai. Ani Yehowa baaye abua wɔ? Hɛɛ. Mɛni hewɔ wɔkɛɔ nakai? Nɔ ni ewo shi akɛ ebaafee ehã Israelbii ni tsui wa ni hi shi yɛ Ezekiel beiaŋ lɛ hewɔ wɔkɛɔ nakai. Ewo shi akɛ: “Mahã amɛ tsui ni efee ekome, ni mikɛ mumɔ hee baawo amɛmli; . . . ni mahã amɛ tsui ni he jɔ, [loo “heloo tsui,” ni ji, tsui ni kɛ Nyɔŋmɔ gbɛtsɔɔmɔ tsuɔ nii].” (Eze. 11:19; shn.) Yehowa ná he miishɛɛ akɛ ebaaye ebua Israelbii lɛ ni amɛtsake, ni nakai nɔŋŋ eyɔɔ he miishɛɛ akɛ ebaaye ebua wɔ.

12-13. (a) Yɛ nɔ ni aŋma yɛ Lala 119:59 lɛ naa lɛ, mɛni nɔ esa akɛ wɔjwɛŋ? (b) Mɛɛ saji esa akɛ wɔteŋ mɔ fɛɛ mɔ abi ehe?

12 Nɔ ji enyɔ ni ehe miihia ni wɔfee ji, ni wɔjwɛŋ nii anɔ. Esa akɛ wɔkane Nyɔŋmɔ Wiemɔ lɛ daa gbi, ni be ni wɔfeɔ nakai lɛ, esa akɛ wɔhe be kɛjwɛŋ nɔ ni wɔkane lɛ nɔ loo wɔsusu he kɛya shɔŋŋ. Enɛ baaye abua wɔ ni wɔna tsakemɔi ni esa akɛ wɔfee yɛ bɔ ni wɔsusuɔ nii ahe wɔhãa kɛ bɔ ni wɔnuɔ he wɔhãa yɛ nibii ahe lɛ mli. (Kanemɔ Lala 119:59; Heb. 4:12; Yak. 1:25) Ekolɛ je lɛ ená wɔsusumɔi yɛ saji komɛi ahe kɛ nibii komɛi ni wɔfeɔ lɛ anɔ hewalɛ, ni esa akɛ wɔnyɛ wɔyɔse enɛ. Esa akɛ wɔnyɛ wɔyɔse wɔgbɔjɔmɔi lɛ, ni wɔmia wɔhiɛ wɔtsu amɛhe nii.

13 Akɛ nɔkwɛmɔnɔ lɛ, bi ohe akɛ: ‘Ani miyeɔ mɛi ahe awuŋa fioo yɛ mitsui mli?’ (1 Pet. 2:1) ‘Ani he ni atsɔse mi yɛ, skul abɔ ni mitee, loo shika abɔ ni miyɔɔ lɛ hewɔ lɛ, minuɔ he fioo yɛ mitsui mli akɛ minɔ kwɔ fe mɛi krokomɛi?’ (Abɛi 16:5) ‘Ani mibuɔ mɛi ni bɛ nibii ni miyɔɔ lɛ eko loo esoro amɛhewolonɔ su lɛ akɛ amɛjeee mɛi komɛi?’ (Yak. 2:2-4) ‘Ani nibii ni yɔɔ Satan je lɛ mli lɛ baa mitsine?’ (1 Yoh. 2:15-17) ‘Ani misumɔɔ lalai, gemisii, woji, sinii, loo TV nɔ nifeemɔi ni jeŋba sha kɛ awuiyeli eyi mli obɔ lɛ kwɛmɔ?’ (Lala 97:10; 101:3; Amos 5:15) Sanebimɔi nɛɛ ahetoo baanyɛ aye abua wɔ ni wɔna wɔgbɔjɔmɔi ni wɔtsu amɛhe nii. Kɛ́ wɔmia wɔhiɛ wɔfãmɔ nibii nɛɛ ni ekolɛ “amɛshishifãi emɔmɔ shi waa” yɛ wɔtsui mli lɛ wɔshwie lɛ, wɔbaahã wɔ-Tsɛ ni yɔɔ ŋwɛi lɛ tsui anyɔ emli.​—Lala 19:14.

14. Mɛni hewɔ ehe miihia waa ni wɔkɛ nanemɛi kpakpai abɔ?

14 Nɔ ni ji etɛ lɛ, ehe miihia ni wɔkɛ nanemɛi kpakpai abɔ. Wɔsumɔɔ jio, wɔsumɔɔɔ jio, mɛi ni wɔkɛbɔɔ lɛ náa wɔnɔ hewalɛ waa. (Abɛi 13:20) Ekolɛ mɛi ni wɔkɛtsuɔ nii loo mɛi ni wɔkɛyaa skul lɛ jeee mɛi ni baaye abua wɔ ni wɔkwɛ nii tamɔ bɔ ni Nyɔŋmɔ kwɛɔ nii ehãa lɛ. Shi kɛ́ wɔtee asafoŋ kpeei lɛ, wɔbaanyɛ wɔná nanemɛi kpakpai babaoo. Kɛ́ wɔtee asafoŋ kpeei lɛ, abaakanya wɔ loo abaawo wɔ hewalɛ, ni “wɔjie suɔmɔ kpo ni wɔtsu nitsumɔi kpakpai.”​—Heb. 10:24, 25, shn.

DAAMƆ SHI SHIŊŊ “YƐ HEMƆKƐYELI LƐ MLI”

15-16. Mɛni Satan feɔ koni ekɛfite wɔjwɛŋmɔ?

15 Hã ehi ojwɛŋmɔ mli akɛ, Satan etswa efai shi akɛ ebaafite ojwɛŋmɔ. Eebɔ mɔdɛŋ ni ekɛ susumɔi kɛ tsɔɔmɔi gbohii srɔtoi afite nibii kpakpai ni okase kɛjɛ Nyɔŋmɔ Wiemɔ lɛ mli lɛ.

16 Satan miitao ni wɔyiŋ afee wɔ kɔshikɔshi yɛ nibii ni wɔkase yɛ Nyɔŋmɔ Wiemɔ lɛ mli lɛ ahe. Kɛ́ obaakai lɛ, nakai nɔŋŋ efee enine shɛ Hawa nɔ yɛ Eden abɔɔ lɛ mli. Ebi lɛ akɛ: “Ani eji anɔkwale akɛ Nyɔŋmɔ kɛɛ . . . ?” (1 Mo. 3:1) Bei pii lɛ, wɔnuɔ ni mɛi ni yɔɔ Satan je lɛ mli lɛ miibi saji tamɔ: ‘Ani eji anɔkwale akɛ  Nyɔŋmɔ sumɔɔɔ ni hii kɛ hii loo yei kɛ yei boteɔ gbalashihilɛ mli? Ani oheɔ oyeɔ lɛɛlɛŋ akɛ Nyɔŋmɔ sumɔɔɔ ni oyeɔ Blonya kɛ ofɔmɔ gbi? Ani oheɔ oyeɔ lɛɛlɛŋ akɛ Nyɔŋmɔ sumɔɔɔ ni oheɔ lá? Nyɔŋmɔ yɛ suɔmɔ. No hewɔ lɛ, ani oheɔ oyeɔ akɛ ebaakɛɛ nyɛ akɛ nyɛkɛ nyɛwekumɛi kɛ nyɛnanemɛi ni ashwie amɛ lɛ akabɔ?’

17. Kɛ́ mɔ ko bi wɔ saji ni baanyɛ ahã wɔyiŋ afee wɔ kɔshikɔshi lɛ, mɛni esa akɛ wɔfee? Ni tamɔ bɔ ni wɔnaa yɛ Kolosebii 2:6, 7 lɛ, kɛ́ wɔfee nakai lɛ, mɛni baanyɛ ajɛ mli kɛba?

17 Esa akɛ wɔná nɔmimaa yɛ nibii ni wɔheɔ wɔyeɔ lɛ ahe. Kɛ́ wɔtaooo nibii ni wɔnuuu shishi jogbaŋŋ lɛ amli koni wɔnu shishi jogbaŋŋ lɛ, wɔyiŋ baanyɛ afee wɔ kɔshikɔshi yɛ nibii ni wɔkase lɛ ahe. Kɛkɛ lɛ, fiofio lɛ, wɔjwɛŋmɔ baabɔi tsakemɔ ni wɔhemɔkɛyeli lɛ mli baagbɔjɔ. No hewɔ lɛ, mɛni esa akɛ wɔfee koni ekaba lɛ nakai? Nyɔŋmɔ Wiemɔ lɛ kɛɔ wɔ akɛ, esa akɛ wɔtsake wɔjwɛŋmɔ koni wɔnyɛ wɔka wɔkwɛ ni wɔyɔse “nɔ ni ji Nyɔŋmɔ suɔmɔnaa nii kpakpa ni enáa he miishɛɛ ni hi kɛwula shi lɛ.” (Rom. 12:2) Kɛ́ wɔkase nii daa lɛ, wɔbaana faŋŋ akɛ, nibii ni atsɔɔ wɔ kɛjɛ Biblia lɛ mli lɛ ji anɔkwale. Enɛ baahã wɔná nɔmimaa akɛ, Yehowa mlai kɛ eshishitoo mlai lɛ ja. Wɔbaadamɔ shi shiŋŋ yɛ hemɔkɛyeli lɛ mli, tamɔ tso ni shishifã emɔ shi jogbaŋŋ.​—Kanemɔ Kolosebii 2:6, 7.

18. Mɛni kɛ́ wɔfee lɛ, susumɔi fɔji ni ehe shi yɛ Satan je lɛ mli lɛ náŋ wɔnɔ hewalɛ?

18 Kɛ́ obaadamɔ shi shiŋŋ yɛ hemɔkɛyeli lɛ mli jio, ofeŋ nakai jio, fɛɛ damɔ bo diɛŋtsɛ onɔ. No hewɔ lɛ, yaa nɔ otsake ojwɛŋmɔ koni etsɔ ehee be fɛɛ be. Sɔlemɔ daa, ni okpa Yehowa fai ni ekɛ mumɔ krɔŋkrɔŋ lɛ aye abua bo. Jwɛŋmɔ nibii anɔ jogbaŋŋ; be fɛɛ be lɛ, kwɛmɔ akɛ nibii ni osusuɔ he kɛ yiŋtoo hewɔ ni ofeɔ nibii ni ofeɔ lɛ sa Nyɔŋmɔ hiɛ lo. Okɛ nanemɛi kpakpai, ni ji mɛi ni baaye abua bo ni otsake ojwɛŋmɔ koni osusumɔi kɛ Nyɔŋmɔ nɔ lɛ akpã gbee lɛ, abɔ. Kɛ́ ofee nibii nɛɛ, susumɔi fɔji ni ehe shi yɛ Satan je lɛ mli lɛ náŋ onɔ hewalɛ, ni obaafãmɔ “susumɔi kɛ nɔ fɛɛ nɔ ni kwɔ ni teɔ shi ewoɔ Nyɔŋmɔ nilee lɛ” oshwie.​—2 Kor. 10:5.

LALA 50 Mihenɔjɔɔmɔ Lɛ He Sɔlemɔ

^ par. 5 He ni afɔ wɔ yɛ, bɔ ni atsɔse wɔ ahã, kɛ skul abɔ ni wɔtee lɛ náa wɔjwɛŋmɔ nɔ hewalɛ. Ekolɛ wɔyɔse akɛ sui gbohii komɛi eka wɔhe. Nikasemɔ nɛɛ baatsɔɔ wɔ bɔ ni wɔbaafee wɔye sui gbohii nɛɛ anɔ.