Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

 NIKASEMƆ 27

Saamɔ Ohe Bianɛ Oto Yiwaa

Saamɔ Ohe Bianɛ Oto Yiwaa

“Mɛi fɛɛ ni taoɔ akɛ amɛhi shi yɛ Nyɔŋmɔjamɔ naa yɛ Kristo Yesu mli lɛ, abaawa amɛ hu yi.”​—2 TIM. 3:12.

LALA 129 Wɔbaaya Nɔ Wɔfi Shi Shiŋŋ

NƆ NI ABAASUSU HE *

1. Mɛni hewɔ esa akɛ wɔsaa wɔhe wɔto yiwaa?

GBI gbɛkɛ ni enɔ jetsɛremɔ lɛ abaagbe wɔ-Nuŋtsɔ Yesu lɛ, ewie nɔ ko ni hãa wɔnaa akɛ, ele akɛ abaanyɛ mɛi fɛɛ ni batsɔmɔɔ ekaselɔi lɛ. (Yoh. 17:14) Kɛjɛ Yesu beiaŋ aahu kɛbashi ŋmɛnɛ lɛ, mɛi ni jáaa Yehowa lɛ ewa Kristofoi anɔkwafoi ayi. (2 Tim. 3:12) Ni wɔle akɛ, be ni jeŋ fɔŋ nɛɛ naagbee lɛ bɛŋkɛɔ lɛ, abaawa wɔ yi waa fe tsutsu lɛ po.​—Mat. 24:9.

2-3. (a) Kɛ́ wɔhã ŋmiŋmi mɔ wɔ lɛ, mɛni baaba? (b) Mɛni he wɔbaasusu yɛ nikasemɔ nɛɛ mli?

2 Mɛni esa akɛ wɔfee bianɛ kɛsaa wɔhe koni kɛ́ aawa wɔ yi lɛ, wɔnyɛ wɔfi shi? Ani esa akɛ wɔfee nibii srɔtoi kɛ gbɛi srɔtoi ni abaanyɛ atsɔ nɔ awa wɔ yi lɛ ahe mfoniri? Dabi. Kɛ́ wɔfee nakai lɛ, ŋmiŋmi baamɔ wɔ, ni wɔbaahao. Anɔkwa, wɔtsui ni baafã lɛ sɔŋŋ hewɔ lɛ, ekolɛ wɔkɛ yiwaa ekpeŋ po ni wɔbaakpa Yehowa sɔɔmɔ. (Abɛi 12:25; 17:22) ‘Wɔhenyɛlɔ Abonsam’ woɔ wɔhe gbeyei, ejaakɛ ele akɛ kɛ́ wɔtsui fã lɛ, wɔbaakpa Yehowa sɔɔmɔ. (1 Pet. 5:8, 9) No hewɔ lɛ, mɛni wɔbaanyɛ wɔfee bianɛ kɛsaa wɔhe wɔto yiwaa?

3 Yɛ nikasemɔ nɛɛ mli lɛ, wɔbaakwɛ bɔ ni wɔbaafee wɔhã wekukpaa ni yɔɔ wɔ kɛ Yehowa teŋ lɛ mli awa, kɛ nɔ hewɔ ni ehe miihia ni wɔfee nakai bianɛ. Agbɛnɛ hu, wɔbaakwɛ nibii komɛi ni kɛ́ wɔfee lɛ, ebaaye ebua wɔ ni wɔfee ekãa waa. Naagbee kwraa lɛ, wɔbaana bɔ ni esa akɛ wɔfee wɔnii wɔhã kɛ́ mɛi nyɛ wɔ.

BƆ NI OBAAFEE OHÃ WEKUKPAA NI YƆƆ OKƐ YEHOWA TEŊ LƐ MLI AWA

4. Yɛ nɔ ni awie yɛ Hebribii 13:5, 6 lɛ naa lɛ, mɛni esaaa akɛ wɔyiŋ feɔ wɔ kɔshikɔshi yɛ he kɔkɔɔkɔ? Ni mɛni hewɔ?

4 Hemɔ oye kɛ otsui fɛɛ akɛ, Yehowa sumɔɔ bo ni ekwaŋ bo kɔkɔɔkɔ. (Kanemɔ Hebribii 13:5, 6.) Afii pii ni eho nɛ lɛ,  awie yɛ Buu-Mɔɔ lɛ mli akɛ: “Kɛ́ mɔ ko le Nyɔŋmɔ jogbaŋŋ lɛ, ekɛ ehiɛ baafɔ̃ enɔ kwraa kɛ́ ekɛ kai kpe.” Sane nɛɛ yɛ mli nyɔŋma shiishi! Kɛ́ wɔsumɔɔ Yehowa, wɔkɛ wɔhiɛ fɔ̃ɔ enɔ yɛ nɔ fɛɛ nɔ mli, ni wɔheɔ wɔyeɔ kɛ wɔtsui fɛɛ akɛ edɔɔ wɔhe lɛ, no lɛ, kɛ́ aawa wɔ yi lɛ wɔbaafi shi shiŋŋ.​—Mat. 22:36-38; Yak. 5:11.

5. Mɛni kɛ́ ofee lɛ, ebaahã ona akɛ Yehowa sumɔɔ bo?

5 Kanemɔ Biblia lɛ daa, ni be ni ofeɔ nakai lɛ, kwɛmɔ bɔ ni saji ni okaneɔ lɛ baanyɛ aye abua bo ni otsi obɛŋkɛ Yehowa. (Yak. 4:8) Be ni okaneɔ Biblia lɛ, bi ohe akɛ, ‘Te Yehowa sui lɛ ateŋ nɔ ni miina akɛ ejie lɛ kpo yɛ sane nɛɛ ni mikaneɔ lɛ mli? Mɛɛ gbɛ nɔ nibii ni ewie kɛ bɔ ni efee enii ehã lɛ hãa minaa akɛ esumɔɔ wɔ ni wɔsane kã etsui nɔ?’ (2 Mo. 34:6) Mɛi komɛi yɛ ni kɛjɛ amɛgbekɛbiiashi tɔ̃ɔ lɛ, mɔ ko ejeko gbɛ efeko nɔ ko ni baahã amɛna akɛ asumɔɔ amɛ. Enɛ hewɔ lɛ, ewa hã amɛ akɛ amɛbaahe amɛye akɛ Nyɔŋmɔ sumɔɔ amɛ. Kɛ́ nakai eji yɛ ogbɛfaŋ lɛ, mɛni baanyɛ aye abua bo? Gbi fɛɛ gbi lɛ, ŋmalamɔ nibii ni Yehowa efee ehã bo ni hãa onaa akɛ eji mɔbɔnalɔ ni emli hi lɛ oshwie shi. (Lala 78:38, 39; Rom. 8:32) Kɛ́ osusu nibii ni etee nɔ yɛ oshihilɛ mli lɛ ahe, ni ohe be kɛjwɛŋ nibii ni okane yɛ Nyɔŋmɔ Wiemɔ lɛ mli lɛ anɔ lɛ, ekã shi faŋŋ akɛ, obaana nibii pii ni Yehowa efee ehã bo. Enɛ baahã ohiɛ asɔ nibii ni Yehowa feɔ ehãa bo lɛ, ni wekukpaa ni yɔɔ okɛ lɛ teŋ lɛ mli baawa.​—Lala 116:1, 2.

6. Tamɔ bɔ ni awie yɛ Lala 94:17-19 lɛ, kɛ́ ojɛ otsuiŋ osɔle lɛ, mɛɛ gbɛ nɔ obaaná he sɛɛ?

6 Sɔlemɔ daa. Kɛ́ wɔjɛ wɔtsuiŋ wɔsɔle wɔhã Yehowa daa gbi lɛ, wekukpaa ni yɔɔ wɔ kɛ lɛ teŋ lɛ mli baawa tamɔ wekukpaa ni yɔɔ tsɛ ko ni yɔɔ suɔmɔ waa lɛ kɛ ebinuu fioo teŋ lɛ. Kɛ́ tsɛ nɛɛ fua ebinuu lɛ ni amɛho amɛtara shi amɛmiigba sane lɛ, gbekɛ lɛ sheee gbeyei kwraa. Enɛ hewɔ lɛ, enyɛɔ egbaa etsɛ lɛ nibii kpakpai kɛ nibii gbohii fɛɛ ni tee nɔ yɛ eshihilɛ mli nakai gbi lɛ. (Kanemɔ Lala 94:17-19.) Kɛ́ oosɔle lɛ, “fɔsemɔ otsuiŋ tamɔ nu” oshwie Yehowa, o-Tsɛ ni sumɔɔ bo lɛ hiɛ, ni ogba lɛ nibii fɛɛ ni yeɔ otsui ni woɔ ohe gbeyei lɛ. (Yaf. 2:19) Kɛ́ ofee nakai lɛ, ani ole nɔ ni baaba? Obaaná “Nyɔŋmɔ toiŋjɔlɛ ni fe niiashishinumɔi fɛɛ lɛ.” (Fip. 4:6, 7) Ni kɛ́ ofɔɔ sɔlemɔ nɛkɛ lɛ, wekukpaa ni yɔɔ okɛ Yehowa teŋ lɛ mli baawa.​—Rom. 8:38, 39.

Kɛ́ ohe oye akɛ Yehowa kɛ bo yɛ, ni nibii ni ewo shi akɛ Maŋtsɛyeli lɛ baafee lɛ baaba mli lɛ, no baawa bo ni ofee ekãa

Stanley Jones yiŋ efeee lɛ kɔshikɔshi bibioo po yɛ Nyɔŋmɔ Maŋtsɛyeli lɛ he, ni enɛ waje lɛ (Kwɛmɔ kuku 7)

7. Mɛni hewɔ esa akɛ ohe oye akɛ nibii kpakpai fɛɛ ni Nyɔŋmɔ ewo shi akɛ ebaatsɔ e-Maŋtsɛyeli lɛ nɔ efee ehã wɔ lɛ baaba mli?

7 Hemɔ oye kɛ otsui fɛɛ akɛ, nibii kpakpai fɛɛ ni Nyɔŋmɔ ewo shi akɛ ebaatsɔ e-Maŋtsɛyeli lɛ nɔ efee ehã wɔ lɛ baaba mli. (4 Mo. 23:19) Kɛ́ oheee shiwoi nɛɛ oyeee kɛ otsui fɛɛ lɛ, ewaaa akɛ Satan kɛ esamaŋfoi lɛ baawo ohe gbeyei. (Abɛi 24:10; Heb. 2:15) Mɛni obaanyɛ ofee bianɛ koni hemɔkɛyeli ni oyɔɔ akɛ Maŋtsɛyeli lɛ baaye shikpɔŋ lɛ nɔ lɛ mli awa? Too gbɛjianɔ ni opɛi Nyɔŋmɔ shiwoi srɔtoi ni kɔɔ e-Maŋtsɛyeli lɛ he lɛ kɛ nɔ hewɔ ni oheɔ oyeɔ akɛ amɛbaaba mli lɛ mli. Mɛɛ gbɛ nɔ enɛ baaye abua bo? Susumɔ Nyɛminuu Stanley Jones, ni awo lɛ tsuŋ afii kpawo yɛ ehemɔkɛyeli lɛ hewɔ  lɛ he okwɛ. * Mɛni ye ebua lɛ ni enyɛ efi shi? Ewie akɛ: “Akɛni Nyɔŋmɔ Maŋtsɛyeli lɛ he nilee lɛ waje mi, ni miyɛ nɔmimaa hu akɛ ebaaba lɛɛlɛŋ, ni mijeee he ŋwane hewɔ lɛ, amɛnyɛɛɛ amɛhã maŋmɛɛ mihemɔkɛyeli lɛ he.” Kɛ́ hemɔkɛyeli ni oyɔɔ akɛ Nyɔŋmɔ shiwoi lɛ fɛɛ baaba mli lɛ mli wa lɛ, wekukpaa ni yɔɔ okɛ lɛ teŋ lɛ hu mli baawa, ni nɔ ko kwraa bɛ ni baawo ohe gbeyei ni okpa lɛ sɔɔmɔ.​—Abɛi 3:25, 26.

8. Mɛni bɔ ni wɔfeɔ wɔnii wɔhãa yɛ asafoŋ kpeei ahe bianɛ lɛ hãa anaa yɛ wɔhe? Tsɔɔmɔ mli.

8 Kaafolɔ Kristofoi akpeei amli. Wɔkpeei lɛ yeɔ amɛbuaa wɔ ni wekukpaa ni yɔɔ wɔ kɛ Yehowa teŋ lɛ mli waa. Bɔ ni wɔyaa kpeei wɔhãa bianɛ lɛ baanyɛ aye abua wɔ ni wɔna bɔ ni wɔbaafee wɔnii wɔhã wɔsɛɛ ko kɛ́ aawa wɔ yi. (Heb. 10:24, 25) Bo lɛ susumɔ he okwɛ: Kɛ́ amrɔ nɛɛ ni nɔ ko bako lɛ, wɔhãa nibii bibii tsĩɔ wɔnaa ni wɔyaaa asafoŋ kpeei lɛ, belɛ wɔsɛɛ ko kɛ́ eba lɛ akɛ wɔheyeli loo wɔwala po baanyɛ aŋmɛɛ wɔ kɛ́ wɔtee Kristofoi akpeei lɛ, te wɔbaafee tɛŋŋ? Kɛ́ amrɔ nɛɛ ni nɔ ko bako lɛ wɔtswa wɔfai shi waa akɛ wɔfolɔŋ asafoŋ kpeei amli lɛ, no lɛ wɔsɛɛ ko kɛ́ shiteekɛwolɔi bɔ mɔdɛŋ akɛ amɛbaatsĩ wɔnaa ni wɔkakpe lɛ, wɔŋmɛŋ saji ahe kɛsaŋ. Amrɔ nɛɛ ji be ni esa akɛ wɔsumɔ asafoŋ kpeeiyaa waa. Kɛ́ wɔsumɔɔ asafoŋ kpeeiyaa lɛ, no lɛ, kɛ́ ate shi awo wɔ, loo nɔyeli lɛ tsĩ wɔnitsumɔ lɛ naa po lɛ, wɔbaaya nɔ wɔbo Nyɔŋmɔ moŋ toi fe gbɔmɛi.​—Bɔf. 5:29.

Kɛ́ okase ŋmalɛi kɛ Maŋtsɛyeli lalai owo oyitsoŋ bianɛ lɛ, ebaawa bo waa wɔsɛɛ kɛ́ aawa bo yi (Kwɛmɔ kuku 9) *

9. Kɛ́ wɔkpe ŋmalɛi wɔwo wɔyitsoŋ lɛ, mɛɛ gbɛ nɔ no baaye abua wɔ wɔsɛɛ ko kɛ́ aawa wɔ yi?

9 Kpe ŋmalɛi ni osumɔɔ waa lɛ owo oyitsoŋ. (Mat. 13:52) Kɛ́ ohiɛ kpaa nii anɔ mra po lɛ, Yehowa baanyɛ ekɛ emumɔ krɔŋkrɔŋ ni yɔɔ hewalɛ lɛ aye abua bo ni okai ŋmalɛi nɛɛ. (Yoh. 14:26) Naa nɔ ni nyɛmi nuu ko ni awo lɛ tsuŋ ekome too yɛ East Germany lɛ wie. Ewie akɛ: “Kwɛ miishɛɛ ni eji akɛ nakai beiaŋ lɛ mile ŋmalɛi ohai abɔ yɛ miyitsoŋ! Mikɛ shoofeemɔ be nɛɛ tsu nii kɛjwɛŋ Biblia mli saji srɔtoi ahe.” Ŋmalɛi lɛ ye amɛbua wɔnyɛmi lɛ ni wekukpaa ni yɔɔ ekɛ Yehowa teŋ lɛ mli gbɔjɔɔɔ. Ni akɛni wekukpaa kpakpa yɛ ekɛ Yehowa teŋ hewɔ lɛ, enyɛ efi shi kɛyashi naagbee.

(Kwɛmɔ kuku 10) *

10. Mɛni hewɔ esa akɛ wɔkase asafo lɛ lalai wɔwo wɔyitsoŋ?

10 Kasemɔ asafo lɛ lalai lɛ owo oyitsoŋ ni olá kɛjie Yehowa yi. Be ni awo Paulo kɛ Sila tsuŋ yɛ Filipi lɛ, amɛhiɛɛɛ lalawolo, shi amɛnyɛ amɛlá kɛjie Yehowa yi. (Bɔf. 16:25) Be ni amɔmɔ wɔnyɛmimɛi ni yɔɔ maji ni tsutsu ko lɛ amɛyɔɔ Soviet Union lɛ mli lɛ ni akɛ amɛ tee Siberia lɛ, mɛni amɛfee kɛwo amɛhe hewalɛ?  Amɛteŋ mɔ kome ni atsɛɔ lɛ Mariya Fedun lɛ wie akɛ: “Wɔlá lalai fɛɛ ni wɔle, ni ji lalawolo lɛ mli lalai lɛ.” Ewie akɛ lalai nɛɛ wo amɛ hewalɛ ni eye ebua amɛ ni amɛna akɛ Yehowa shiko amɛ kwraa. Kɛ́ olá asafo lɛ lalai ni osumɔɔ waa lɛ, ani ewooo bo hewalɛ? No hewɔ lɛ, kaafite be. Kasemɔ lalai nɛɛ owo oyitsoŋ bianɛ!​—Kwɛmɔ akrabatsa ni yitso ji, “ Hã Mafee Ekãa.”

NIBII NI BAAYE ABUA BO NI OFEE EKÃA WAA

11-12. (a) Yɛ amaniɛ ni abɔ yɛ 1 Samuel 17:37, 45-47 lɛ naa lɛ, mɛni ye ebua David ni efee ekãa? (b) Mɛɛ nɔ ko ni he hiaa waa wɔkaseɔ yɛ David sane lɛ mli?

11 Kɛ́ obɛ ekãa lɛ, onyɛŋ ofi shi kɛ́ ate shi awo bo loo awa bo yi. Kɛ́ oonu he akɛ obɛ ekãa lɛ, mɛni obaanyɛ ofee? Klɛŋklɛŋ lɛ, hã ehi ojwɛŋmɔ mli akɛ, jeee mɔ ko dalɛ, etilɛ, ehewalɛ, loo hesai ni eyɔɔ lɛ ni tsɔɔ kɛji ebaanyɛ efee ekãa aloo enyɛŋ efee ekãa. Susumɔ David kɛ Goliat sane lɛ he okwɛ. Be ni David tee akɛ ekɛ Goliat yaanɔ lɛ, no mli lɛ eji oblanyo fioo, ni edalɛ kɛ etilɛ shɛɛɛ oblaŋ lɛ nɔ lɛ he kwraa. Agbɛnɛ hu, David ehiɛɛɛ tawuu nii kpakpa ko kwraa; ehiɛɛɛ klante po. Shi efee ekãa waa, ni ejo foi etee ekɛ nakai oblaŋ ni ebuuu nɔ ko nɔ ko lɛ yawuu.

12 Mɛni ye ebua David ni enyɛ efee ekãa waa nakai? Ehe eye kɛ etsui fɛɛ akɛ Yehowa kɛ lɛ yɛ. (Kanemɔ 1 Samuel 17:37, 45-47.) David kwɛɛɛ Goliat dalɛ kɛ etilɛ ni ekɛ ehe baato ehe. Moŋ lɛ, ekɛ Goliat to Yehowa he, ni ena akɛ Goliat jeee mɔ ko kwraa yɛ Yehowa hiɛ. Mɛni wɔkaseɔ yɛ sane nɛɛ mli? Kɛ́ wɔhe wɔye kɛ wɔtsui fɛɛ akɛ, Yehowa, Nyɔŋmɔ Ofe lɛ, kɛ wɔ yɛ, ni akɛ, mɛi ni teɔ shi amɛwoɔ wɔ lɛ jeee mɛi komɛi kwraa yɛ ehiɛ lɛ, wɔbaaná ekãa. (2 Kro. 20:15; Lala 16:8) Mɛni ekoŋŋ wɔbaanyɛ wɔfee amrɔ nɛɛ koni kɛ́ yiwaa ba lɛ, wɔná ekãa kɛfi shi?

13. Mɛni baaye abua wɔ ni wɔnyɛ wɔfee ekãa waa? Tsɔɔmɔ mli.

13 Nɔ kome ni wɔbaanyɛ wɔfee amrɔ nɛɛ koni no aye abua wɔ ni wɔfee ekãa ji, ni wɔbaashiɛ Nyɔŋmɔ Maŋtsɛyeli lɛ he sane kpakpa lɛ wɔhã mɛi. Nɔ hewɔ ni wɔkɛɔ nakai ji akɛ, shiɛmɔ nitsumɔ lɛ yeɔ ebuaa wɔ ni wɔkɛ wɔhiɛ afɔ̃ Yehowa nɔ ni wɔkashe gbɔmɔ gbeyei. (Abɛi 29:25) Bɔ ni kɛ́ wɔgbɔle wɔkpɔiaŋ daa lɛ, wɔkpɔiaŋ waa lɛ, nakai nɔŋŋ kɛ́ wɔshiɛ yɛ shĩa fɛɛ shĩa, wɔkɛ wɔhe wo maŋ odaseyeli mli, wɔshiɛ be ni wɔnyiɛɛɛ shiɛmɔ nɔ, ni wɔshiɛ yɛ nitsumɔhei lɛ, wɔbaaná ekãa waa fe tsutsu lɛ po. Kɛ́ wɔshiɛ kɛ ekãa bianɛ lɛ, no lɛ wɔsɛɛ ko kɛ́ atsĩ wɔnitsumɔ lɛ naa lɛ, ewaŋ kɛhãŋ wɔ akɛ wɔbaaya nɔ wɔshiɛ.​—1 Tes. 2:1, 2.

Nancy Yuen tswa efai shi akɛ ekpaŋ sane kpakpa lɛ shiɛmɔ (Kwɛmɔ kuku 14)

14-15. Mɛni wɔkaseɔ yɛ Nyɛmiyoo Nancy Yuen kɛ Nyɛmiyoo Valentina Garnovskaya niiashikpamɔ lɛ mli?

 14 Wɔbaanyɛ wɔkase nii waa yɛ nyɛmimɛi yei anɔkwafoi enyɔ komɛi ni fee ekãa waa lɛ aniiashikpamɔ lɛ mli. Klɛŋklɛŋ mɔ lɛ ji Nancy Yuen. Nyɛmiyoo Yuen kwɔlɛ fɛɛ feɔ mita kome kɛ fã pɛ, shi esheee nɔ ko nɔ ko gbeyei. * Be ni China nɔyeli lɛ fã akɛ akpa Nyɔŋmɔ Maŋtsɛyeli lɛ he sane kpakpa lɛ shiɛmɔ lɛ, Nyɛmiyoo Yuen kpaaa. Enɛ hewɔ lɛ, awo lɛ tsuŋ nɔ ni fe afii 20. Nɔyeli lɛ najiaŋdamɔlɔi ni bibii Nyɛmiyoo Yuen saji lɛ wie yɛ ehe akɛ, “mɔ ko mɔ ko bɛ ni toi wa fe lɛ” yɛ amɛmaŋ lɛ mli!

Valentina Garnovskaya he eye akɛ Yehowa kɛ lɛ yɛ (Kwɛmɔ kuku 15)

15 Mɔ ni ji enyɔ lɛ ji Valentina Garnovskaya. Awo nyɛmi yoo nɛɛ tsuŋ yɛ Russia shii etɛ sɔŋŋ, ni kɛ́ abua be ni eyaye yɛ tsuŋwoohe lɛ nakai shii etɛ lɛ fɛɛ naa lɛ, eehe eshɛ afii 21. * Amralofoi lɛ po wie yɛ ehe akɛ, eji awuiyelɔ ni he yɔɔ oshãra waa. Ni ani ole nɔ hewɔ? Valentina tswa efai shi waa akɛ ekpaŋ shiɛmɔ kɔkɔɔkɔ. Mɛni ye ebua nyɛmimɛi yei enyɔ nɛɛ ni amɛnyɛ amɛfee ekãa waa nakai? No ji, amɛhe amɛye kɛ amɛtsui fɛɛ akɛ, Yehowa kɛ amɛ yɛ.

16. Kɛ́ wɔmiitao wɔná ekãa lɛ, mɛni esa akɛ wɔfee?

16 No hewɔ lɛ, tamɔ bɔ ni wɔna lɛ, kɛ́ wɔmiitao wɔná ekãa lɛ, esaaa akɛ wɔkɛ wɔjwɛŋmɔ maa wɔ diɛŋtsɛ wɔhewalɛ kɛ wɔnyɛmɔi anɔ. Moŋ lɛ, esa akɛ wɔhe wɔye akɛ Yehowa kɛ wɔ yɛ, ni akɛ, lɛ ji mɔ ni wuɔ ehãa wɔ. (5 Mo. 1:29, 30; Zak. 4:6) Kɛ́ wɔhã enɛ hi wɔjwɛŋmɔ mli be fɛɛ be lɛ, wɔbaafee ekãa.

BƆ NI ESA AKƐ WƆFEE WƆNII WƆHÃ KƐ́ MƐI NYƐ WƆ

17-18. Mɛɛ kɔkɔ Yesu bɔ wɔ yɛ Yohane 15:18-21? Ni mɛni hewɔ mɛi baanyɛ wɔ lɛ?

17 Kɛ́ mɛi kɛ amɛwiemɔ kɛ amɛnifeemɔ tsɔɔ akɛ amɛbuɔ wɔ lɛ, wɔnáa miishɛɛ. Shi esaaa akɛ wɔnuɔ he kɔkɔɔkɔ akɛ, kɛ́ mɛi ebuuu wɔ loo amɛwieee wɔhe ekpakpa lɛ, belɛ wɔhe bɛ sɛɛnamɔ. Yesu wie akɛ: “Nyɛyɛ miishɛɛ kɛji gbɔmɛi nyɛ nyɛ, kɛji amɛtse nyɛ kɛje amɛhe, amɛjɛ nyɛ, ni amɛwie nyɛhe akɛ nyɛji mɛi fɔji yɛ gbɔmɔ Bi lɛ hewɔ.” (Luka 6:22) Mɛni Yesu wiemɔi nɛɛ tsɔɔ?

 18 Nɔ ni Yesu wie lɛ etsɔɔɔ akɛ kɛ́ wɔna akɛ mɛi miinyɛ wɔ lɛ, wɔmii baashɛ wɔhe. Moŋ lɛ, eebɔ wɔ kɔkɔ akɛ mɛi baanyɛ wɔ. Shi mɛni hewɔ amɛbaanyɛ wɔ lɛ? Klɛŋklɛŋ lɛ, wɔfataaa je lɛ he, ni wɔhiɔ shi yɛ nibii ni Yesu tsɔɔ lɛ anaa. Agbɛnɛ hu, sane ni eshiɛ lɛ, no nɔŋŋ wɔ hu wɔshiɛɔ. (Kanemɔ Yohane 15:18-21.) Wɔsumɔɔ wɔ-Tsɛ Yehowa ni wɔmiisumɔ ni wɔfee esuɔmɔnaa nii. Kɛ́ mɛi kɛɛ amɛbaanyɛ wɔ yɛ enɛ hewɔ lɛ, amɛsane ni.

19. Mɛni kaselɔi lɛ fee ni tsɔɔ akɛ amɛsheee gbɔmɔ gbeyei? Ni mɛɛ gbɛ nɔ wɔbaanyɛ wɔkase amɛ?

19 Kaahã nɔ ko ni gbɔmɛi adesai baawie loo amɛbaafee lɛ hã efee bo hiɛgbele akɛ Yehowa Odasefonyo ji bo kɔkɔɔkɔ. (Mika 4:5) Susumɔ nɔ ko ni bɔfoi lɛ fee ni baanyɛ aye abua bo ni okashe gbɔmɛi adesai gbeyei lɛ he okwɛ. Enɛ ba yɛ Yesu gbele lɛ sɛɛ etsɛɛɛ be ni amɛyɔɔ Yerusalem lɛ. Bɔfoi lɛ le krɛdɛɛ akɛ, Yudafoi ajamɔŋ hiɛnyiɛlɔi lɛ ahe miitsɛ̃ amɛ waa. (Bɔf. 5:17, 18, 27, 28) Kɛ̃lɛ, amɛtee sɔlemɔ shĩa lɛ daa gbi, ni amɛshiɛ koni mɛi fɛɛ ana akɛ Yesu kaselɔi ji amɛ. (Bɔf. 5:42) Amɛhãaa ŋmiŋmi amɔ amɛ. Kɛ́ wɔ hu wɔhã mɛi ni wɔkɛyaa skul, mɛi ni wɔkɛtsuɔ nii, wɔkutsoŋbii, kɛ mɛi krokomɛi le faŋŋ akɛ Yehowa Odasefoi ji wɔ lɛ, no baaye abua wɔ ni wɔkashe gbɔmɛi adesai gbeyei.​—Bɔf. 4:29; Rom. 1:16.

20. Mɛni hewɔ bɔfoi lɛ ná miishɛɛ yɛ nyɛ ni anyɛɔ amɛ lɛ fɛɛ sɛɛ?

20 Bɔfoi lɛ ná miishɛɛ yɛ nyɛ ni anyɛɔ amɛ lɛ fɛɛ sɛɛ. Mɛni hewɔ? Ejaakɛ amɛle akɛ, Yehowa suɔmɔnaa nii ni amɛtaoɔ amɛfee lɛ hewɔ anyɛɔ amɛ lɛ, ni amɛbu enɛ akɛ eji hegbɛ kpele. (Luka 6:23; Bɔf. 5:41) Bɔfo Petro wie akɛ: “Kɛ́ jalɛ hewɔ nyɛna nɔ po lɛ, nyɛyɛ miishɛɛ.” (1 Pet. 2:19-21; 3:14) Kɛ́ wɔhã ehi wɔjwɛŋmɔŋ akɛ, jalɛ hewɔ anyɛɔ wɔ lɛ, wɔhãŋ ŋmiŋmi amɔ wɔ ni wɔkpa Yehowa sɔɔmɔ yɛ nyɛ ni mɛi nyɛɔ wɔ lɛ hewɔ.

KƐ́ OSAA OHE OTO LƐ, OBAANÁ HE SƐƐ

21-22. (a) Mɛni okpɛ oyiŋ akɛ obaafee kɛsaa ohe oto yiwaa? (b) Mɛni he wɔbaasusu yɛ nikasemɔ ni nyiɛ sɛɛ lɛ mli?

21 Wɔleee be ni abaate shi awo wɔ, awa wɔ yi, loo atsĩ wɔnitsumɔ lɛ naa po. Shi wɔle akɛ, wɔbaanyɛ wɔsaa wɔhe bianɛ wɔto nakai be lɛ kɛji wɔhã wekukpaa ni yɔɔ wɔ kɛ Yehowa teŋ lɛ mli wa, wɔfee nibii ni baahã wɔná ekãa babaoo, ni wɔhãaa mɛi ni nyɛɔ wɔ lɛ ahe ŋmiŋmi amɔ wɔ. Kɛ́ wɔsaa wɔhe wɔto yiwaa bianɛ lɛ, no lɛ wɔsɛɛ ko kɛ́ wɔkɛ yiwaa kpe lɛ, wɔbaafi shi shiŋŋ.

22 Ni kɛ́ nɔyeli lɛ ná etsĩ wɔnitsumɔ lɛ naa hu? Mɛni wɔbaafee? Nikasemɔ ni nyiɛ sɛɛ lɛ baatsɔɔ wɔ nibii komɛi ni baaye abua wɔ ni wɔya nɔ wɔsɔmɔ Yehowa kɛ́ atsĩ wɔnitsumɔ lɛ naa po.

LALA 118 “Hã Wɔ Hemɔkɛyeli Pii”

^ kk. 5 Wɔsumɔɔɔ ni mɛi nyɛɔ wɔ. Shi wɔle akɛ, bɔ fɛɛ bɔ ni fee lɛ, mɛi baanyɛ wɔ ni amɛbaawa wɔ yi. Nikasemɔ nɛɛ baaye abua wɔ ni wɔfee ekãa kɛ́ aawa wɔ yi.

^ kk. 7 Kwɛmɔ December 15, 1965 Blɔfo Buu-Mɔɔ lɛ, bf. 756-767.

^ kk. 14 Kwɛmɔ July 15, 1979 Blɔfo Buu-Mɔɔ lɛ, bf. 4-7, kɛ agbɛnɛ hu, vidio ni ji, Yehowa Baahã Ale Egbɛ́i Lɛ. Eyɛ JW Broadcasting® lɛ nɔ, yɛ fã ni ji NIIASHIKPAMƆI KƐ SAJI NI ABIBII MƐI.

^ kk. 15 Kwɛmɔ April 15, 2009 Buu-Mɔɔ lɛ, bf. 9-10 kk. 10-11; kɛ 2008 Yearbook of Jehovah’s Witnesses, bf. 191-192.

^ kk. 67 MFONIRI LƐ HE SANE: Weku ko miifee weku jamɔ, ni fɔlɔi lɛ kɛ woji ni amɛŋmala ŋmalɛi yɛ nɔ miiye amɛmiibua amɛbii lɛ koni amɛkpe ŋmalɛi lɛ amɛwo amɛyitsoŋ.

^ kk. 70 MFONIRI LƐ HE SANE: Weku ko ta tsɔne mli amɛmiiya asafoŋ kpee, ni yɛ gbɛ lɛ nɔ lɛ amɛmiikase Maŋtsɛyeli lalai.