Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

 WALA SHIHILƐ HE SANE

Yehowa Ejɔɔ Mi Fe Bɔ Ni Mikpa Gbɛ Kwraa

Yehowa Ejɔɔ Mi Fe Bɔ Ni Mikpa Gbɛ Kwraa

MINYA nitsumɔ ni mitsu yɛ Germany yɛ miblahiiaŋ lɛ he waa. No mli lɛ, wɔkɛ nibii yaa Dar es Salaam, Elisabethville yɛ Congo, Asmara (ni yɔɔ Eritrea lɛ), kɛ hei krokomɛi yɛ Afrika. Shi minu he hu akɛ, esa akɛ matsɔ daa gbɛgbalɔ. Naagba lɛ kɛkɛ ji akɛ, efee mi akɛ gbɛgbamɔ nitsumɔ lɛ ebafeŋ miishɛɛ tamɔ nitsumɔ ni mitsuɔ lɛ. Nakai beiaŋ lɛ, mileee kwraa akɛ be fɛɛ sɔɔmɔ nitsumɔ lɛ kɛ mi baaya hei ni mitsĩ tã nɛɛ kɛ hei krokomɛi yɛ Afrika!

Naagbee mli aahu lɛ, mibɔi gbɛgbamɔ nitsumɔ lɛ. Nitsumɔ nɛɛ hã miná hegbɛi pii kɛsɔmɔ Yehowa, ni ehã miná miishɛɛ waa yɛ shihilɛ mli fe bɔ ni mikpa gbɛ po. (Efe. 3:20) Shi ekolɛ, oobi ohe akɛ, mɛni ba ni agbɛnɛ lɛ mibɔi gbɛgbamɔ nitsumɔ lɛ? Hã magba bo.

Be ni abɔi Jeŋ Ta II lɛ wuu yɛ afi 1939 lɛ sɛɛ nyɔji fioo komɛi ni afɔ mi yɛ Berlin, yɛ Germany. Yɛ afi 1945, be ni eshwɛ fioo ni ta lɛ baaba naagbee lɛ, aŋmɛɛŋmɛɛ okplɛmii pii ahe ashwie Berlin nɔ. Be ko be ni aŋmɛɛ eko he nakai lɛ, mi, mipapa, mimami, kɛ minyɛmi yoo fioo lɛ jo foi kɛtee he ko ni mɛi yateɔ yɛ kɛ́ aatswia okplɛmii lɛ. Sɛɛ mli lɛ, wɔjo foi kɛtee Erfurt, ni ji mimami maŋ lɛ mli, ejaakɛ jɛmɛ yɛ shweshweeshwe fe he ni wɔyɔɔ lɛ.

Aaafee afi 1950, mi kɛ mifɔlɔi kɛ minyɛmi yoo lɛ yɛ Germany

Mimami kɛ hiɛdɔɔ bɔi anɔkwale lɛ taomɔ. Ekane woji ni jeŋ nilelɔi eŋmala, ni epɛi jamɔi srɔtoi amli, shi fɛɛ sɛɛ lɛ, enyɛɛɛ ena anɔkwa jamɔ lɛ. Shi yɛ aaafee afi 1948 mli lɛ, Yehowa Odasefoi enyɔ komɛi ba wɔshĩa lɛ. Mimami hã amɛ sɛi ni ebibii amɛ saji babaoo. Eyeee ŋmɛlɛtswaa kome ni ekɛɛ mi kɛ minyɛmi yoo fioo lɛ akɛ, “Mina anɔkwale lɛ!” No sɛɛ etsɛɛɛ lɛ, mi, kɛ mimami, kɛ minyɛmi yoo lɛ fɛɛ bɔi asafoŋ kpeei yaa yɛ Erfurt.

Yɛ afi 1950 mli lɛ, wɔku wɔsɛɛ kɛtee Berlin, ni wɔkɛ Berlin-Kreuzberg Asafo lɛ bɔi bɔɔ. Sɛɛ mli lɛ, wɔfã kɛtee he kroko yɛ Berlin nɔŋŋ, ni wɔkɛ Berlin-Tempelhof Asafo lɛ bɔi bɔɔ. Jɛmɛ abaptisi mimami yɛ. Shi mi lɛ, minuuu he akɛ mishɛ mɔ ni abaptisiɔ. Ani ole nɔ hewɔ?

BƆ NI FEE NI MIYE MIHIƐ NI GBOƆ LƐ NƆ

Mihiɛ gboɔ waa, ni enɛ hewɔ lɛ, minyɛɛɛ maya mihiɛ oyayaayai. Eyɛ mli akɛ no mli lɛ miyaa shiɛmɔ moŋ, shi afii enyɔ sɔŋŋ ho ni kɛ́ mitee shiɛmɔ lɛ miwieee. Shi be ni mikɛ nyɛmimɛi pii ni kɛ ekãa kɛ anɔkwayeli edamɔ  kai srɔtoi anaa lɛ bɔi bɔɔ lɛ, nibii tsake. Nyɛmimɛi nɛɛ ekomɛi yɛ ni akɛ amɛ tee Nazi yiwalɛ nsarai amli loo awo amɛ tsuŋ yɛ East Germany. Amɛteŋ mɛi komɛi hu ju shi amɛkɛ woji tee East Germany, eyɛ mli akɛ kɛ́ amɔ amɛ lɛ, abaawo amɛ tsuŋ moŋ. Amɛnɔkwɛmɔnɔ kpakpa lɛ ta mitsuiŋ waa. Mikɛɛ mihe akɛ, ‘Kɛ́ nyɛmimɛi nɛɛ kɛ amɛheyeli kɛ amɛwala wo oshãra mli yɛ Yehowa kɛ amɛnyɛmimɛi lɛ ahewɔ lɛ, belɛ, kɛ́ hooo kwraa lɛ, esa akɛ mi hu manyɛ mamia mihiɛ maye mihiɛ ni gboɔ lɛ nɔ.’

Yɛ afi 1955 lɛ, ato shiɛmɔ tafãa krɛdɛɛ ko he gbɛjianɔ, ni mikɛ mihe wo mli. Enɛ ye ebua mi ni mihiɛ ni gboɔ lɛ ba shi fioo. Be ni Nyɛminuu Nathan Knorr tswaa tafãa nɛɛ he adafi yɛ wolo ko ni eŋma ni je kpo yɛ Informant * lɛ mli lɛ, ewie akɛ no ji tafãa ni fe fɛɛ ni asafo lɛ eto he gbɛjianɔ. Ekɛfata he akɛ, kɛ́ shiɛlɔi fɛɛ kɛ amɛhe wo mli lɛ, nakai “nyɔɔŋ lɛ baafee nyɔɔŋ ni aye mɛi odase fe fɛɛ yɛ shikpɔŋ nɛɛ nɔ.” Ni nakai pɛpɛɛpɛ eba lɛ! Tafãa lɛ sɛɛ etsɛɛɛ lɛ, mijɔɔ mihe nɔ mihã Yehowa, ni yɛ afi 1956 lɛ, abaptisi mi, kɛ mipapa, kɛ minyɛmi yoo lɛ fɛɛ gbi kome. Shi eyeee be ko ni ehe bahia ni makpɛ miyiŋ yɛ sane kroko ni he hiaa waa lɛ he.

Nakai beiaŋ fɛɛ lɛ, mile akɛ gbɛgbamɔ nitsumɔ lɛ ji nitsumɔ ni esa akɛ matsu, shi mitee nɔ mitsi mito. Klɛŋklɛŋ lɛ, mikpɛ miyiŋ akɛ esa akɛ makase nitsumɔ ko dã, ni nitsumɔ ni mikase ji, bɔ ni ashɛɔ nibii kɛ bɔ ni akɛ nibii majeɔ kɛyaa maŋsɛɛ. Be ni mikase migbe naa lɛ, minu he akɛ mitsu fioo koni male nitsumɔ lɛ mli jogbaŋŋ ni mihe asa yɛ mli. No hewɔ lɛ, yɛ afi 1961 lɛ, miyatsu nii yɛ Hamburg, he ni Germany lɛjiadaamɔhe ni da fe fɛɛ lɛ yɔɔ lɛ. Minya minitsumɔ lɛ he aahu akɛ, mitsi gbɛgbamɔ nitsumɔ lɛ mito kwraa dã. Ani ole nɔ ni ba ni agbɛnɛ lɛ mibɔi gbɛgbamɔ nitsumɔ lɛ?

Yehowa tsɔ nyɛmimɛi komɛi anɔ eye ebua mi ni mina akɛ, esa akɛ mahã esɔɔmɔ lɛ he ahia mi fe nibii krokomɛi fɛɛ, ni midaa lɛ shi waa yɛ enɛ hewɔ. Minanemɛi pii kɛ amɛhe wo gbɛgbamɔ nitsumɔ lɛ mli, ni enɛ bafee nɔkwɛmɔnɔ kpakpa kɛhã mi. Agbɛnɛ hu, nyɛmimɛi ni akɛ amɛ tee yiwalɛ nsarai lɛ amli lɛ ateŋ mɔ kome ni atsɛɔ lɛ Erich Mundt lɛ wo mi hewalɛ ni mikɛ mihiɛ afɔ̃ Yehowa nɔ. Ekɛɛ mi akɛ, be ni amɛyɔɔ yiwalɛ nsarai lɛ amli lɛ, nyɛmimɛi ni kɛ amɛhe fɔ̃ amɛhe nɔ lɛ ahemɔkɛyeli lɛ mli gbɔjɔ. Shi mɛi ni kɛ amɛhiɛ fɔ̃ Yehowa nɔ kɛ amɛtsui muu fɛɛ lɛ ye lɛ anɔkwa, ni amɛbatsɔmɔ akulashiŋi yɛ asafo lɛ mli.

Afi 1963, be ni mibɔi gbɛgbamɔ nitsumɔ lɛ

Kɛfata he lɛ, nɔ ko ni Nyɛminuu Martin Poetzinger, mɔ ni sɛɛ mli lɛ esɔmɔ akɛ Gbɛtsɔɔmɔ Kuu lɛ mli nyo lɛ fɔɔ wiemɔ lɛ hu wa mi. No mli lɛ, efɔɔ kɛɛmɔ akɛ, “Nɔ ko bɛ ni hi fe ni obaafee ekãa!” Mijwɛŋ wiemɔ nɛɛ nɔ, ni no kanya mi ni yɛ June 1963 lɛ, mikpa minitsumɔ lɛ ni mibɔi gbɛgbamɔ nitsumɔ lɛ. Mishwako mihe kwraa akɛ mikpɛ yiŋ nakai! Be ni mibɔi gbɛgbamɔ lɛ sɛɛ nyɔji enyɔ pɛ ni afɔ̃ mi nine akɛ mibɔi sɔɔmɔ akɛ gbɛgbalɔ krɛdɛɛ. No hewɔ lɛ, mibɔiko nitsumɔ kroko taomɔ po ni ninefɔɔ lɛ ba. Afii fioo komɛi asɛɛ lɛ, Yehowa fee nɔ ko ni mikpaaa gbɛ kwraa. Afɔ̃ mi nine akɛ miba Gilead Skul lɛ klas ni ji 44 nɔ lɛ.

NƆ KO NI HE HIAA WAA NI MIKASE YƐ GILEAD

Nɔ kome ni wɔkase yɛ Gilead ni ná minɔ hewalɛ waa ji akɛ, kɛ́ mikɛ naagbai kpe yɛ misɔɔmɔ lɛ mli po lɛ, esaaa akɛ minijiaŋ jeɔ wui mra. Bɔ ni Nyɛminuu Nathan Knorr kɛ Nyɛminuu Lyman Swingle wie enɛ he amɛhã lɛ bote mitsuiŋ tɔ̃ɔ. Nyɛminuu Knorr wie akɛ: “Mɛni nɔ okɛ ojwɛŋmɔ baama? Muji lɛ, kɛ kooloi bibii lɛ, kɛ ohia lɛ? Aloo tsei lɛ, fɔfɔi lɛ, kɛ miishɛɛ ni mɛi lɛ náa kɛ́ amɛna bo lɛ? Hã mɛi lɛ asane akã otsui nɔ!” Gbi ko be ni Nyɛminuu Swingle tsɔɔ nɔ hewɔ ni kɛ́ nyɛmimɛi komɛi kɛ naagbai kpe lɛ amɛnijiaŋ jeɔ wui mra lɛ, ehiŋmɛiiaŋ tɛo nu, ni wɔnu yɛ egbee mli akɛ nii lɛ egba enaa waa. Emɛ fioo dani enyɛ eye ehe nɔ ni etsa ewiemɔ lɛ nɔ. Ená minɔ hewalɛ waa, ni mitswa mifai shi akɛ, mifeŋ nɔ ko ni baahã Kristo loo enyɛmimɛi anɔkwafoi lɛ anine anyɛ shi.​—Mat. 25:40.

Afi 1967, mi, Claude, kɛ Heinrich be ni wɔsɔmɔɔ akɛ maŋsɛɛ sɔɔlɔi yɛ Lubumbashi, yɛ Congo lɛ

Be ni atsɔɔ wɔ hei ni wɔbaaya lɛ, Betelbii komɛi bi mi kɛ miklasbii lɛ ekomɛi hei ni akɛ wɔ yaa. Wɔbɔi tsɔɔmɔ, ni amɛwie nibii kpakpai yɛ maji ni minanemɛi klasbii lɛ yaasɔmɔ yɛ lɛ ahe. Shi be ni miwie akɛ akɛɛ miya Congo (Kinshasa) lɛ, jɛmɛ fɛɛ jɔ, kɛkɛ ni amɛkɛɛ akɛ: “Ei, Congo? Yehowa afata ohe!” Nakai beiaŋ lɛ, be fɛɛ be ni obaanu ni aawie Congo (Kinshasa) he yɛ TV loo redio nɔ lɛ, aanɔ  ni aagbegbee mɛi. Shi mihãaa mihiɛ akpa nibii ni mikase yɛ Gilead lɛ anɔ. Wɔgbe skul lɛ naa September 1967, ni no sɛɛ etsɛɛɛ lɛ, mi, Heinrich Dehnbostel, kɛ Claude Lindsay fã gbɛ kɛtee Congo maŋtiase Kinshasa.

MIKASE NIBII PII YƐ CONGO

Be ni wɔyashɛ Kinshasa lɛ, wɔkɛ nyɔji etɛ kase French. Kɛkɛ ni wɔkɛ kɔɔyɔŋ lɛlɛ fã gbɛ kɛtee Lubumbashi, ni be ko ni eho lɛ atsɛɔ lɛ Elisabethville lɛ. Maŋ nɛɛ yɛ Congo wuoyigbɛ tɔ̃ɔ, ni ekɛ Zambia husu lɛ jekɛɛɛ. Be ni wɔtee jɛmɛ lɛ, wɔyato maŋsɛɛ sɔɔlɔi ashĩa ko mli yɛ maŋ lɛ teŋ tuuntu.

Nakai beiaŋ lɛ, hei pii yɛ Lubumbashi ni ashiɛko yɛ. No hewɔ lɛ, yɛ hei pii lɛ, wɔji klɛŋklɛŋ mɛi ni shiɛ wɔhã maŋbii lɛ, ni enɛ hã wɔná miishɛɛ waa. Eyeee be ko ni wɔná Biblia mli nikaselɔi pii, ni wɔnyɛɛɛ wɔkɛ amɛ fɛɛ po akase nii. Agbɛnɛ hu, wɔná hegbɛ wɔye onukpai ni kɛ amralofoi lɛ loo polisifoi lɛ tsuɔ nii lɛ odase. Amɛteŋ mɛi pii nya Nyɔŋmɔ Wiemɔ lɛ kɛ wɔshiɛmɔ nitsumɔ lɛ he waa. Swahili ji wiemɔ titri ni awieɔ yɛ jɛmɛ, no hewɔ lɛ, mi kɛ Claude Lindsay kase no wɔfata French lɛ he. No sɛɛ etsɛɛɛ lɛ, ahã wɔyasɔmɔ yɛ asafo ko ni wieɔ Swahili lɛ mli.

Eyɛ mli akɛ wɔnya sɔɔmɔ ni wɔsɔmɔ yɛ jɛmɛ lɛ he waa moŋ, shi wɔkɛ naagbai hu kpe. Asraafoi ni etɔrɔ dãa ni hiɛ tui loo polisifoi ni hiɛ yɔɔ laŋlaŋ folɔ wɔnaa shii abɔ. Be ko lɛ, polisifoi pii ni hiɛ tui bote maŋsɛɛ sɔɔlɔi ashĩa lɛ mli trukaa be ni wɔmiifee asafoŋ kpee, ni amɛmɔmɔ hii lɛ kɛtee polisteshɛŋ. Be ni amɛkɛ wɔ shɛ jɛmɛ lɛ, amɛhã wɔtara shikpɔŋ lɛ aahu kɛyashi gbɛkɛ ŋmɛji nyɔŋma loo nɔ dani amɛŋmɛɛ wɔhe.

 Yɛ afi 1969 lɛ, ahã mibɔi sɔɔmɔ akɛ kpokpaa nɔkwɛlɔ. Bei komɛi lɛ, enɛ bi ni manyiɛ gbɛ kakadaŋŋ kɛtsɔ jwɛi amli yɛ gbɛjegbɛi ni nɔ ewo ŋmɔtɔ anɔ. Enɛ jeee nɔ ko srɔto ko yɛ Afrika. Yɛ akrowa ko ni mitee lɛ mli lɛ, wuɔ ko kɛ ebii bawɔɔ misaatso lɛ shishi. Wuɔ nɛɛ hewɔ lɛ, mihiɛ tsiɛɔ mra waa, ejaakɛ ekɛ ebii lɛ hãaa mawɔ. Bei komɛi lɛ, mikɛ nyɛmimɛi lɛ taa la he yɛ agbo lɛ naa gbɛkɛ ni wɔgbaa Biblia lɛ mli sane. Kɛ́ mikai enɛ lɛ, mináa miishɛɛ waa.

Nakai beiaŋ lɛ, kuu ko ni atsɛɔ lɛ Kitawala lɛ mli bii komɛi ju shi kɛbote asafo lɛ mli, ni enɛ bafee naagba wulu diɛŋtsɛ. * Amale nyɛmimɛi nɛɛ ni he yɔɔ oshãra tamɔ “tɛsai ni etee yɛ nu shishi” lɛ ateŋ mɛi komɛi po batsɔmɔ asafoŋ onukpai. Shi nyɛmimɛi lɛ yoo amɛteŋ mɛi pii ni amɛkpa amɛhe mama. (Yuda 12) Fiofio lɛ, Yehowa jie awuiyelɔi nɛɛ fɛɛ kɛje asafo lɛ mli, ni asafo lɛ tee nɔ eshwere waa.

Yɛ afi 1971 mli lɛ, ahã mibɔi sɔɔmɔ yɛ nitsumɔhe nine lɛ yɛ Kinshasa, ni mitsu nibii srɔtoi yɛ jɛmɛ. Akɛ nɔkwɛmɔnɔ lɛ, mito woji ni aŋmalaa kɛjɛɔ nitsumɔhe nine lɛ kɛ nɔ ni aŋmalaa kɛbaa jɛmɛ lɛ ahe gbɛjianɔ, mikwɛ woji ashɛɛ nɔ, ni mitsu nibii krokomɛi ni kɔɔ shiɛmɔ nitsumɔ lɛ he lɛ ahe nii. Congo da waa, shi nakai beiaŋ lɛ, amɛbɛ nibii pii. Kɛ̃lɛ, ehe bahia ni wɔto nibii ahe gbɛjianɔ koni sɔɔmɔ nitsumɔ lɛ aya nɔ pɛpɛɛpɛ. Akɛ nɔkwɛmɔnɔ lɛ, bei komɛi lɛ, eheɔ nyɔji abɔ dani asafoi lɛ anine shɛɔ woji ni aŋmala amɛ kɛjɛ nitsumɔhe nine lɛ anɔ. Eyɛ mli akɛ akɛ woji nɛɛ majeɔ kɛtsɔɔ kɔɔyɔŋ lɛlɛ nɔ moŋ, shi kɛ́ kɔɔyɔŋ lɛlɛ lɛ yajie woji lɛ, esa akɛ akɛ lɛji ahole kɛyahã asafoi lɛ. Bei komɛi lɛ, lɛji lɛ yakaa jwɛi ko ni tsaa yɛ nu hiɛ lɛ mli otsii abɔ. Yɛ naagbai nɛɛ kɛ ekrokomɛi ni wɔkɛkpe lɛ fɛɛ asɛɛ lɛ, nitsumɔ lɛ tee nɔ pɛpɛɛpɛ.

Nyɛmimɛi lɛ nyɛ amɛkɛ shika fioo pɛ to kpeei wuji ahe gbɛjianɔ, ni enɛ fee mi naakpɛɛ waa. Amɛkɛ gbɔtsuii fee wiemɔ kpokui, amɛkɛ jwɛi kakadaji folɔ shitaramɔhei lɛ ahe, ni amɛkɛ eko hu shwie sɛii lɛ anɔ koni sɛii lɛ anɔ tamɔ aŋɔɔ. Amɛkɛ pamplo fee tsũi, ni amɛkɛ sai wo yiteŋ, ni amɛlo sai lɛ eko nɔŋŋ kɛha okpɔlɔi lɛ anɔ. Akɛni amɛbɛ plɛkoi hewɔ lɛ, amɛkɛ tsei ahe totoi fee kpãi ni amɛkɛfimɔ nibii lɛ amli. Bɔ ni nyɛmimɛi lɛ nyɛ amɛkɛ nibii ni amɛyɔɔ lɛ tsu naagbai fɛɛ ni amɛkɛkpe lɛ ahe nii lɛ hã minaa kpɛ mihe diɛŋtsɛ, ni ehã mibasumɔ amɛsane waa. Be ni akɛ mi tee Kenya lɛ, mihiɛ tse amɛ waa!

MISƆMƆ YƐ KENYA

Yɛ afi 1974 lɛ, ajie mi kɛtee nitsumɔhe nine ni yɔɔ Nairobi, yɛ Kenya lɛ. No beiaŋ lɛ, nitsumɔ yɛ Kenya waa, ejaakɛ jɛmɛ ajɛɔ akwɛɔ sɔɔmɔ nitsumɔ lɛ nɔ yɛ maji nyɔŋma ni bɛŋkɛ jɛmɛ lɛ anɔ. Maji nɛɛ ekomɛi yɛ ni no mli lɛ atsĩ nitsumɔ lɛ naa yɛ jɛmɛ. Ahã miyasara nyɛmimɛi ni yɔɔ maji nɛɛ anɔ lɛ shii abɔ, titri lɛ, mɛi ni yɔɔ Ethiopia lɛ. Ate shi awo nyɛmimɛi ni yɔɔ Ethiopia lɛ waa, ni awa amɛ yi. Afee amɛteŋ mɛi pii niseniianii loo awo amɛ tsuŋ, ni agbe amɛteŋ mɛi komɛi po. Shi amɛnyɛ amɛfi shi ni amɛye anɔkwa, ejaakɛ wekukpaa ni yɔɔ amɛ kɛ Yehowa kɛ amɛnyɛmimɛi lɛ ateŋ lɛ mli wa.

Yɛ afi 1980 lɛ, nɔ ko ni yɔɔ miishɛɛ waa tee nɔ yɛ mishihilɛ mli; mi kɛ Gail Matheson bote gbalashihilɛ mli. Gail jɛ Canada, ni mi kɛ lɛ fɛɛ ta klas kome yɛ Gilead. Be ni wɔgbe skul lɛ naa lɛ, akɛ Gail tee Bolivia, shi wɔŋmala wɔhe woji. Afii 12 sɛɛ lɛ, wɔkpe ekoŋŋ yɛ New York. No sɛɛ etsɛɛɛ lɛ, wɔbote gbalashihilɛ mli yɛ Kenya. Eŋɔɔ minaa waa akɛ mikɛ Gail hi shi, ejaakɛ be fɛɛ be lɛ, ebɔɔ mɔdɛŋ akɛ ebaahã esusumɔ kɛ Yehowa nɔ lɛ akpã gbee, ni emii shɛɔ nii ni eyɔɔ lɛ he. Eye ebua mi waa kɛbashi ŋmɛnɛ, ni misumɔɔ lɛ ni mishwɛɛɛ ehe kwraa.

Yɛ afi 1986 lɛ, ahã mi kɛ Gail bɔi sɔɔmɔ akɛ nɔkwɛlɔ gbɛfalɔ kɛ eŋa, ni yɛ nakai beiaŋ nɔŋŋ lɛ, misɔmɔ akɛ Nitsumɔhe Nine Ajinafoi Akuu lɛ mli nyo. Be ni misɔmɔɔ akɛ nɔkwɛlɔ gbɛfalɔ lɛ, ahã miyasara maji pii ni yɔɔ Kenya nitsumɔhe nine lɛ shishi lɛ.

Afi 1992, miihã wiemɔ yɛ kpee ko shishi yɛ Asmara

Mikaiɔ be ni wɔtoɔ gbɛjianɔ kɛhã kpee ko ni afee yɛ Asmara yɛ afi 1992 lɛ. No mli lɛ, atsĩko wɔnitsumɔ lɛ naa yɛ nakai kpokpaa lɛ nɔ. Wɔtao he ko ni wɔbaanyɛ wɔfee kpee lɛ yɛ, shi mɔbɔ sane ji akɛ, he pɛ ni wɔyaná ji nitoohe taŋtaŋ ko ni mli  ewo muji kpɔtɔɔ. Shi nyɛmimɛi pii kɛ mamai fɛfɛji ba ni akɛha nibii fɛɛ ni bɛ hiŋmɛi nɔ lɛ anɔ. No hewɔ lɛ, be ni shɛɔ kpee be lɛ, jɛmɛ efee fɛo bɔ ni sa he ko ni ajáa Yehowa yɛ. Mɛi 1,279 sɔŋŋ ba kpee lɛ, ni efee miishɛɛ waa.

Be ni wɔyɔɔ Betel lɛ, he kome wɔwɔɔ daa otsi; shi be ni wɔbɔi sɔɔmɔ akɛ nɔkwɛlɔ gbɛfalɔ kɛ eŋa lɛ, otsi fɛɛ otsi lɛ, esoro he ni wɔwɔɔ. Be ko lɛ, wɔyato shĩa agbo ko ni nɔ fɛɛ nɔ yɔɔ mli ni bɛŋkɛ ŋshɔ lɛ naa; shi be ko hu lɛ, he ni wɔyato ji ziŋele tsũ bibioo ko, ni he ni niiasɛɛyaahe lɛ yɔɔ lɛ kɛ tsũ lɛ teŋ jekɛmɔ fe mitai 100 (nanetalɔi 300). Shi yɛ he fɛɛ he ni wɔsɔmɔ yɛ lɛ, nɔ ni wɔná he miishɛɛ waa ji bɔ ni wɔnyɛ wɔkɛ gbɛgbalɔi lɛ kɛ shiɛlɔi lɛ fee ekome kɛshiɛ kɛ ekãa lɛ. Wɔbaná nanemɛi kpakpai pii, no hewɔ lɛ, be ni atsake wɔnitsumɔ lɛ, wɔhiɛ tse amɛ waa.

YEHOWA JƆƆ NITSUMƆ LƐ NƆ YƐ ETHIOPIA

Yɛ afi 1987 kɛmiimɔ afi 1992 lɛ, akɛ wɔnitsumɔ lɛ wo mla shishi yɛ maji pii ni yɔɔ Kenya nitsumɔhe nine lɛ shishi lɛ anɔ. Enɛ hewɔ lɛ, ato nitsumɔhe niji kɛ ɔfisii kɛhã Maŋ Ajinafoi Akui yɛ maji nɛɛ anɔ. Maji nɛɛ ekome ji Ethiopia. Nɔyeli lɛ tsĩ wɔnitsumɔ lɛ naa yɛ jɛmɛ afii pii, shi sɛɛ mli lɛ, anyɛ akɛwo mla shishi, ni ato ɔfisi yɛ Addis Ababa. No sɛɛ etsɛɛɛ yɛ afi 1993 lɛ, ajie wɔ kɛtee koni wɔyasɔmɔ yɛ nakai ɔfisi lɛ.

Afi 1996, mi kɛ Gail yɛ Ethiopia akrowai lɛ eko mli be ni wɔsɔmɔɔ akɛ nɔkwɛlɔ gbɛfalɔ kɛ eŋa lɛ

Yehowa ehã nitsumɔ lɛ eshwere waa yɛ Ethiopia. Nyɛmimɛi pii kɛ amɛhe ewo gbɛgbamɔ nitsumɔ lɛ mli. Kɛjɛ afi 2012 kɛbaa nɛɛ lɛ, afi fɛɛ afi lɛ, kɛ́ ohala nyɛmimɛi enumɔ lɛ, obaaná kɛ́ hooo kwraa lɛ, daa gbɛgbalɔ kome yɛ mli. Agbɛnɛ hu, asafo lɛ eto skul srɔtoi ahe gbɛjianɔ, ni amamɔ Maŋtsɛyeli Asai 120 kɛ sɛɛ. Yɛ afi 2004 lɛ, wɔná nitsumɔhe nine hee. Ama Kpee Asa hu yɛ nakai shikpɔŋ lɛ nɔŋŋ nɔ, ni nyɛmimɛi lɛ ená enɛ he sɛɛ waa.

Mi kɛ Gail fɛɛ baná nanemɛi kpakpai pii yɛ Ethiopia. Nyɛmimɛi ni yɔɔ jɛmɛ lɛ amli hi waa ni amɛdɔɔ mɔ he, ni enɛ hã wɔbasumɔ amɛsane waa. Sɛɛkpee nɛɛ, helai miigba wɔnaa waa, ni enɛ hewɔ lɛ, ajie wɔ kɛtee Central Europe nitsumɔhe nine lɛ. Nyɛmimɛi ni yɔɔ jɛmɛ lɛ miikwɛ wɔ jogbaŋŋ, shi wɔhiɛ tseɔ wɔnanemɛi ni yɔɔ Ethiopia lɛ waa diɛŋtsɛ.

YEHOWA EHÃ NITSUMƆ LƐ ESHWERE

Bɔ ni nitsumɔ lɛ etee lɛ yɛ hei ni wɔyasɔmɔ yɛ lɛ hãa wɔnaa akɛ, Yehowa ehã enitsumɔ lɛ eshwere. (1 Kor. 3:6, 9) Akɛ nɔkwɛmɔnɔ lɛ, be ni mikɛ Rwandabii ni eba Congo koni amɛbatsa akɔɔble lɛ bɔi Nyɔŋmɔ Maŋtsɛyeli lɛ he sane gbaa lɛ, abɛ shiɛlɔi yɛ Rwanda. Shi ŋmɛnɛ lɛ, ayɛ shiɛlɔi fe 30,000 yɛ jɛmɛ. Yɛ afi 1967 lɛ, shiɛlɔi aaafee 6,000 ni yɔɔ Congo (Kinshasa). Shi amrɔ nɛɛ, ayɛ shiɛlɔi aaafee 230,000 yɛ jɛmɛ, ni mɛi 1,000,000 kɛ sɛɛ ba afi 2018 Kaimɔ lɛ shishi. Shiɛlɔi ni yɔɔ maji ni no mli lɛ Kenya nitsumɔhe nine lɛ kwɛɔ amɛnɔ lɛ anɔ lɛ hu ayifalɛ etee hiɛ. Ŋmɛnɛ lɛ, kɛ́ obua shiɛlɔi ni yɔɔ maji nɛɛ anɔ lɛ anaa lɛ, amɛyi fe 100,000.

Nɔ ni fe afii 50 ni eho nɛ lɛ, Yehowa tsɔ nyɛmimɛi srɔtoi anɔ eye ebua mi ni mikɛ mihe wo be fɛɛ sɔɔmɔ nitsumɔ lɛ mli. Eyɛ mli akɛ mihiɛ gboɔ lolo moŋ, shi mikɛ mihiɛ fɔ̃ɔ Yehowa nɔ kɛ mitsui fɛɛ. Niiashikpamɔi ni miná yɛ Afrika lɛ ehã mifee mɔ ko ni toɔ etsui shi ni mii shɛɔ nii ni eyɔɔ lɛ he. Mi kɛ Gail fɛɛ sumɔɔ nyɛmimɛi ni yɔɔ Afrika lɛ asane waa, ejaakɛ amɛfeɔ gbɔ waa, amɛhãaa naagbai wuji po aje amɛnijiaŋ wui, ni amɛkɛ amɛhiɛ fɔ̃ɔ Yehowa nɔ. Yehowa ejie mlihilɛ kpele kpo etsɔɔ mi, ni mihiɛ sɔɔ enɛ waa. Anɔkwa, ejɔɔ mi waa fe bɔ ni mikpa gbɛ kwraa.​—Lala 37:4.

^ kk. 11 Sɛɛ mli lɛ, abale Informant lɛ akɛ Wɔ Maŋtsɛyeli Sɔɔmɔ lɛ, ni amrɔ nɛɛ, akɛ Wɔshiɛmɔ Kɛ Wɔshihilɛ Akɛ Kristofoi​—Kpee Nifeemɔ Wolo lɛ ebaye najiaŋ.

^ kk. 23 Gbɛ́i “Kitawala” lɛ jɛ Swahili wiemɔ ko ni shishi ji, “ni abaaye mɔ ko nɔ, loo akudɔ lɛ” lɛ mli. Oti ni ma kuu nɛɛ hiɛ ji, ni ehã Congobii lɛ aye amɛhe kɛje Belgium nɔyeli lɛ shishi. Kitawalabii lɛ hé asafo lɛ woji lɛ, amɛkase, ni amɛjara amɛhã mɛi. Agbɛnɛ hu, amɛtsake nibii ni awie yɛ Biblia lɛ mli lɛ ahiɛ koni efi susumɔi ni amɛhiɛ yɛ maŋkwramɔŋ saji, kusumii komɛi ni amɛfeɔ, kɛ jeŋba sha he lɛ sɛɛ.