Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

 NIKASEMƆ 52

Fɔlɔi​—Nyɛtsɔa Nyɛbii Lɛ Nii Koni Amɛsumɔ Yehowa

Fɔlɔi​—Nyɛtsɔa Nyɛbii Lɛ Nii Koni Amɛsumɔ Yehowa

“Bii lɛ, gboshinii ni jɛ Yehowa ŋɔɔ ni.”​—LALA 127:3.

LALA 134 Bii Ji Nii Ni Jara Wa Ni Jɛ Nyɔŋmɔ Ŋɔɔ

NƆ NI ABAASUSU HE *

1. Mɛni Yehowa ehã fɔlɔi?

YEHOWA to klɛŋklɛŋ gbalashihilɛ lɛ shishi be ni ebɔ Adam kɛ Hawa lɛ, ni bɔ ni ebɔ amɛ ehã lɛ hewɔ lɛ, amɛshwe akɛ amɛfɔ. Enɛ hewɔ lɛ, Biblia lɛ kɛɔ akɛ: “Bii lɛ, gboshinii ni jɛ Yehowa ŋɔɔ ni.” (Lala 127:3) Mɛni wiemɔ nɛɛ tsɔɔ? Ŋɔɔ lɛ akɛ, onaanyo ko ni osumɔɔ esane waa lɛ ehã bo shika pii akɛ okwɛ nɔ ohã lɛ. Te obaanu he ohã tɛŋŋ? Ekã shi faŋŋ akɛ, obaana akɛ ebuɔ bo waa, ni eheɔ bo eyeɔ. Shi ekolɛ obaaye otsui yɛ bɔ ni obaafee okwɛ shika lɛ nɔ jogbaŋŋ koni eko kwraa akalaaje lɛ he. Yɛ gbɛ ni tamɔ nakai nɔŋŋ nɔ lɛ, Yehowa, wɔ-Naanyo ni fe fɛɛ lɛ, ehã fɔlɔi nɔ ko ni amɛkwɛ nɔ, ni nɔ ni ehã amɛ lɛ jara wa kwraa fe shika. Ehã amɛ bii, ni eesumɔ ni amɛkwɛ bii nɛɛ jogbaŋŋ, ni amɛhã amɛná miishɛɛ.

2. Mɛɛ sanebimɔi wɔbaahã hetoo yɛ nikasemɔ nɛɛ mli?

2 Kɛ́ wu kɛ ŋa ko baafɔ loo amɛfɔŋ lɛ, namɛi ayiŋkpɛɛ ni? Ni kɛ́ amɛbaafɔ lɛ, namɔ esa akɛ etsɔɔ be ni amɛfɔ? Mɛni fɔlɔi baanyɛ afee kɛye amɛbua amɛbii lɛ ni amɛná miishɛɛ yɛ shihilɛ mli? Yɛ nikasemɔ nɛɛ mli lɛ, wɔbaakwɛ shishitoo mlai ni yɔɔ Nyɔŋmɔ Wiemɔ lɛ mli ni baanyɛ aye abua Kristofoi ni ebote gbalashihilɛ mli lɛ ni amɛkpɛ yiŋ ni ja yɛ saji nɛɛ ahe.

GBALASHIHILƐ MLI BII LƐ DIƐŊTSƐ BAAKPƐ AMƐYIŊ YƐ HE

3. (a) Kɛ́ wu kɛ ŋa ko baafɔ loo amɛfɔŋ lɛ, namɛi ayiŋkpɛɛ ni? (b) Mɛɛ Biblia mli shishitoo mlai esa akɛ mɛi ni ebote gbalashihilɛ mli lɛ awekumɛi kɛ amɛnanemɛi ahã ehi amɛjwɛŋmɔ mli?

3 Yɛ maji komɛi anɔ lɛ, kɛ́ mɛi bote gbalashihilɛ mli lɛ, akpaa gbɛ akɛ amɛbaabɔi fɔmɔ nɔŋŋ. Ekolɛ, amɛwekumɛi kɛ mɛi krokomɛi po baanyɛ amɛnɔ ni amɛfee nakai. Nyɛmi nuu  ko ni yɔɔ maji ni yɔɔ Asia lɛ eko nɔ, ni atsɛɔ lɛ Jethro lɛ wie akɛ: “Nyɛmimɛi komɛi ni yɔɔ bii lɛ nyɛɔ gbalashihilɛ mli bii ni fɔko lɛ anɔ ni amɛbɔi fɔmɔ.” Nyɛmi nuu kroko ni lɛ hu eyɔɔ Asia maji lɛ eko nɔ, ni atsɛɔ lɛ Jeffrey lɛ wie akɛ: “Mɛi komɛi kɛɔ gbalashihilɛ mli bii ni fɔko lɛ akɛ, kɛ́ amɛfɔɔɔ lɛ, amɛnáŋ mɔ ko akwɛ amɛ yɛ amɛgbɔlɛ beiaŋ.” Shi esaaa akɛ mɔ ko tsɔɔ wu kɛ ŋa ko kɛji amɛfɔ loo amɛkafɔ. Amɛ diɛŋtsɛ amɛbaakpɛ amɛyiŋ yɛ he; amɛsɔ̃ ni. (Gal. 6:5, shn.) Eyɛ mli akɛ nuu lɛ kɛ yoo lɛ wekumɛi kɛ amɛnanemɛi miisumɔ ni amɛná miishɛɛ moŋ, shi esaaa akɛ amɛhiɛ kpaa nɔ akɛ, nuu lɛ kɛ eŋa lɛ diɛŋtsɛ ni baakpɛ amɛyiŋ kɛji amɛbaafɔ loo amɛfɔŋ.​—1 Tes. 4:11.

4-5. Mɛɛ sanebimɔi enyɔ esa akɛ gbalashihilɛ mli bii asusu he? Ni mɛɛ be ji be ni hi fe fɛɛ ni esa akɛ amɛfee nakai? Tsɔɔmɔ mli.

4 Kɛ́ gbalashihilɛ mli bii kpɛ amɛyiŋ akɛ amɛbaafɔ lɛ, ebaahi akɛ amɛbaasusu sanebimɔi enyɔ ni he hiaa ni nyiɛ sɛɛ nɛɛ ahe: Klɛŋklɛŋ lɛ, mɛɛ be amɛbaasumɔ ni amɛfɔ? Nɔ ni ji enyɔ lɛ, bii enyiɛ amɛbaasumɔ ni amɛfɔ? Mɛɛ be ji be ni hi fe fɛɛ ni esa akɛ amɛsusu saji nɛɛ ahe? Ni mɛni hewɔ sanebimɔi enyɔ nɛɛ ahe hiaa waa lɛ?

5 Bei pii lɛ, ehi waa akɛ abaasusu saji nɛɛ ahe dani abote gbalashihilɛ mli. Mɛni hewɔ? Ejaakɛ ehe miihia waa ni gbalashihilɛ mli bii akpã gbee yɛ saji nɛɛ ahe. Agbɛnɛ hu, ehe miihia ni amɛkwɛ kɛji amɛbaanyɛ amɛtsu sɔ̃i ni biiafɔmɔ kɛbaa lɛ ahe nii lo. Mɛi komɛi kpɛɔ amɛyiŋ akɛ, kɛ́ amɛbote gbalashihilɛ mli lɛ, amɛbaamɛ, kɛ́ hooo kwraa lɛ, afi loo afii enyɔ dani amɛfɔ, ejaakɛ amɛle akɛ biiakwɛmɔ heɔ be kɛ hewalɛ waa. Amɛmiisumɔ ni amɛmɛ fioo koni amɛnyɛ amɛkase bɔ ni ahiɔ shi akɛ wu kɛ ŋa, ni suɔmɔ ni yɔɔ amɛteŋ lɛ hu mli awa dani bii lɛ abɔi baa.​—Efe. 5:33.

6. Akɛni wɔyɛ “bei krɛdɛi ni mli shihilɛ wa” amli hewɔ lɛ, mɛni gbalashihilɛ mli bii komɛi ekpɛ amɛyiŋ akɛ amɛbaafee?

6 Kristofoi komɛi hu ekpɛ amɛyiŋ akɛ, amɛbaakase Noa bihii etɛ lɛ kɛ amɛŋamɛi lɛ. Amɛfɔɔɔ be ni amɛbote gbalashihilɛ mli lɛ nɔŋŋ. (1 Mo. 6:18; 9:18, 19; 10:1; 2 Pet. 2:5) Yesu kɛ wɔgbii nɛɛ to “Noa gbii lɛ” ahe, ni ŋwanejee ko bɛ he akɛ, wɔyɛ “bei krɛdɛi ni mli shihilɛ wa” amli. (Mat. 24:37; 2 Tim. 3:1) Enɛ hewɔ lɛ, mɛi komɛi ekpɛ amɛyiŋ akɛ, amɛfɔŋ bianɛ koni amɛnyɛ amɛná be babaoo amɛhã sɔɔmɔ nitsumɔ lɛ.

Kɛ́ gbalashihilɛ mli bii miikwɛ kɛji amɛbaafɔ loo amɛfɔŋ, loo bii abɔ ni amɛbaasumɔ ni amɛfɔ lɛ, nilee yɛ mli akɛ ‘amɛbaabu naa amɛkwɛ’ dã (Kwɛmɔ kuku 7) *

7. Mɛɛ gbɛ nɔ shishitoo mlai ni yɔɔ Luka 14:28, 29 kɛ Abɛi 21:5 lɛ baanyɛ aye abua gbalashihilɛ mli bii?

 7 Kɛ́ gbalashihilɛ mli bii miikwɛ kɛji amɛbaafɔ loo amɛfɔŋ, loo bii abɔ ni amɛbaasumɔ ni amɛfɔ lɛ, nilee yɛ mli akɛ ‘amɛbaabu naa amɛkwɛ’ dã. (Kanemɔ Luka 14:28, 29.) Mɛi ni ekwɛ bii ni amrɔ nɛɛ bii lɛ edara amɛtsɔmɔ onukpai lɛ baakɛɛ bo akɛ, biiakwɛmɔ hãa mɔ fiteɔ shika waa, ni eheɔ be kɛ hewalɛ hu. No hewɔ lɛ, ehe miihia ni gbalashihilɛ mli bii asusu sanebimɔi ni nyiɛ sɛɛ nɛɛ ahe: ‘Mɛɛ nibii ahe baahia wɔweku lɛ, ni ani wɔkpɛlɛɔ nɔ akɛ nomɛi ji nibii ni he baahia wɔ? Ani ehe baahia ni wɔyi enyɔ lɛ fɛɛ wɔtsu nii kɛkwɛ wɔweku lɛ? Kɛ́ ebi ni wɔyi enyɔ lɛ fɛɛ wɔtsu nii lɛ, namɔ baakwɛ gbekɛbii lɛ? Namɔ baaná bɔ ni amɛsusuɔ nii ahe amɛhãa kɛ bɔ ni amɛfeɔ amɛnii amɛhãa lɛ nɔ hewalɛ?’ Kɛ́ gbalashihilɛ mli bii susu sanebimɔi nɛɛ ahe lɛ, no baatsɔɔ akɛ amɛkɛ ŋaa ni awo yɛ Abɛi 21:5 lɛ miitsu nii.​—Kanemɔ.

Wu ni sumɔɔ eŋa lɛ baafee nɔ fɛɛ nɔ ni ebaanyɛ kɛye ebua lɛ (Kwɛmɔ kuku 8)

8. Mɛɛ naagbai esa akɛ gbalashihilɛ mli bii ni ji Kristofoi lɛ akpa gbɛ? Ni mɛni wu ni sumɔɔ eŋa lɛ baafee?

8 Kɛ́ wu kɛ ŋa ko fɔ lɛ, gbekɛ lɛ kwɛmɔ heɔ be kɛ hewalɛ pii, ni esa akɛ fɔlɔi enyɔ lɛ fɛɛ anyɛ aná nakai dekã lɛ amɛhã lɛ. No hewɔ lɛ, kɛ́ amɛfɔ pii kɛtsara nɔ lɛ, ebaawa kɛhã amɛ akɛ amɛbaaná dekã amɛhã gbekɛbii lɛ ateŋ mɔ fɛɛ mɔ. Mɛi komɛi ni fɔ pii nakai lɛ wie akɛ, gbekɛbii lɛ akwɛmɔ bafee jatsu kɛhã amɛ. Kɛ́ gbekɛbii lɛ ayi fa lɛ, ekolɛ be fɛɛ be lɛ, mami lɛ baanu he akɛ etɔ lɛ bliboo. Ekolɛ ebaatɔ lɛ aahu akɛ, enáŋ hewalɛ ni ekɛkase nii be fɛɛ be, efɔ sɔlemɔ, loo etsu shiɛmɔ nitsumɔ lɛ daa. Agbɛnɛ hu, kɛ́ atee Kristofoi akpeei lɛ, ekolɛ ebaawa kɛhã lɛ akɛ ebaabo nibii ni abaawie yɛ jɛmɛ lɛ toi ni ená he sɛɛ. Wu ni sumɔɔ eŋa lɛ baafee nɔ ni ebaanyɛ kɛye ebua lɛ kɛ bii lɛ akwɛmɔ, be ni atee asafoŋ kpeei kɛ yɛ shĩa fɛɛ. Akɛ nɔkwɛmɔnɔ lɛ, ebaaye ebua eŋa lɛ kɛ shĩa nifeemɔ. Agbɛnɛ hu, ebaabɔ mɔdɛŋ ni eye ebua mɛi fɛɛ ni yɔɔ eweku lɛ mli lɛ koni amɛná Weku Jamɔ ni amɛfeɔ daa otsi lɛ he sɛɛ. Ni tsɛmɛi ni ji Kristofoi lɛ kɛ amɛweku lɛ baaya shiɛmɔ daa.

NYƐTSƆA NYƐBII LƐ NII KONI AMƐSUMƆ YEHOWA

9-10. Fɔlɔi, kɛ́ nyɛmiisumɔ ni nyɛnyɛ nyɛkwɛ nyɛbii lɛ jogbaŋŋ lɛ, mɛni esa akɛ nyɛfee?

9 Mɛni ji nibii komɛi ni fɔlɔi baanyɛ afee kɛye amɛbua amɛbii lɛ koni amɛsumɔ Yehowa? Te amɛbaafee tɛŋŋ amɛbu amɛbii lɛ ahe koni nibii gbohii ni yaa nɔ yɛ jeŋ fɔŋ nɛɛ mli lɛ akaye amɛ awui? Nyɛhãa wɔkwɛa nibii komɛi ni amɛbaanyɛ amɛfee.

10 Nyɛsɔlea nyɛbia Yehowa ni eye ebua nyɛ. Ani nyɛkaiɔ nɔkwɛmɔnɔ kpakpa ni Manoa kɛ eŋa fee lɛ? Be ni Manoa ná ele akɛ amɛbaafɔ  Samson lɛ, ekpa Yehowa fai ni etsɔɔ amɛ bɔ ni esa akɛ amɛtsɔse lɛ amɛhã.

11. Tamɔ bɔ ni abɔ he amaniɛ yɛ Kojolɔi 13:8 lɛ, mɛni Manoa fee? Ni mɛɛ gbɛ nɔ fɔlɔi baanyɛ akase lɛ?

11 Nyɛmi nuu ko ni atsɛɔ lɛ Nihad, kɛ eŋa Alma ni amɛ fɛɛ amɛjɛ Bosnia and Herzegovina lɛ kase Manoa. Amɛwie akɛ: “Tamɔ bɔ ni Manoa fee lɛ, wɔkpa Yehowa fai ni eye ebua wɔ ni wɔtsɔmɔ fɔlɔi kpakpai. Ni Yehowa tsɔ Ŋmalɛ lɛ, asafo lɛ woji lɛ, asafoŋ kpeei, kɛ kpeei wuji anɔ ehã wɔsɔlemɔi lɛ hetoo.”​—Kanemɔ Kojolɔi 13:8.

12. Mɛɛ nɔkwɛmɔnɔ kpakpa Yosef kɛ Maria fee amɛhã amɛbii lɛ?

12 Nyɛfea nɔkwɛmɔnɔ kpakpa nyɛhãa nyɛbii lɛ. Ehe miihia ni nyɛtsɔɔ nyɛbii lɛ nɔ ni amɛfee, shi ekã shi faŋŋ akɛ, nibii ni nyɛfeɔ lɛ baaná amɛnɔ hewalɛ kwraa fe nibii ni nyɛkɛɔ amɛ lɛ. Susumɔ Yosef kɛ Maria he okwɛ. Ŋwanejee ko bɛ he akɛ, amɛfee nɔkwɛmɔnɔ kpakpa amɛhã Yesu kɛ amɛbii krokomɛi lɛ. Yosef tsu nii waa koni enyɛ ekwɛ eweku lɛ. Agbɛnɛ hu, ewo amɛ hewalɛ ni amɛnya Yehowa sɔɔmɔ lɛ he. (5 Mo. 4:9, 10) Yosef kɛ eweku lɛ tee Yerusalem “daa afi” ni amɛyaye Hehoo lɛ, eyɛ mli akɛ Mla lɛ biii ni efee nakai. (Luka 2:41, 42) Ekolɛ tsɛmɛi komɛi ni hi shi yɛ ebeiaŋ lɛ baana gbɛfãa nɛɛ akɛ ewa tsɔ, eheɔ be, ni ehãa afiteɔ shika hu. Shi Yosef enaaa lɛ nakai. Ekã shi faŋŋ akɛ, Yosef kɛ Yehowa sɔɔmɔ shwɛɛɛ kwraa, ni ekɛ nakai tsɔse ebii lɛ. Maria hu le Ŋmalɛ lɛ mli waa, ni ŋwanejee ko bɛ he akɛ, etsɔ ewiemɔi kɛ enifeemɔi anɔ etsɔɔ ebii lɛ ni amɛsumɔ Nyɔŋmɔ Wiemɔ lɛ.

13. Mɛɛ gbɛ nɔ fɔlɔi komɛi kase Yosef kɛ Maria?

13 Nihad kɛ Alma, ni wɔtsĩ amɛtã kɛtsɔ hiɛ lɛ, bɔ mɔdɛŋ akɛ amɛbaakase Yosef kɛ Maria. Mɛɛ gbɛ nɔ no ye ebua amɛ ni amɛnyɛ amɛtsɔse amɛbinuu lɛ koni esumɔ Nyɔŋmɔ ni esɔmɔ lɛ? Amɛwie akɛ: “Wɔbɔ mɔdɛŋ akɛ wɔbaahi shi bɔ ni baahã wɔbi lɛ ana akɛ, kɛ́ ehi shi yɛ Yehowa shishitoo mlai lɛ anaa lɛ, ebaaná he sɛɛ waa.” Nihad hu wie akɛ: “Hii shi bɔ ni obaasumɔ ni obi lɛ ahi shi ahã.”

14. Mɛni hewɔ ehe miihia ni fɔlɔi ale mɛi ni amɛbii lɛ kɛbɔɔ?

14 Nyɛyea nyɛbuaa nyɛbii lɛ koni amɛná nanemɛi kpakpai. Esa akɛ fɔlɔi, mami lɛ kɛ papa lɛ fɛɛ, ale mɛi ni amɛbii lɛ kɛbɔɔ kɛ nibii ni amɛfeɔ. Ni tsɔɔ akɛ, esa akɛ amɛle mɛi ni amɛbii lɛ kɛgbaa sane yɛ mobail foŋ, tablɛtii, kɛ amɛhenɔi lɛ hu anɔ. Mɛi nɛɛ baanyɛ aná bɔ ni gbekɛbii lɛ susuɔ nii ahe amɛhãa, kɛ bɔ ni amɛfeɔ amɛnii amɛhãa lɛ nɔ hewalɛ.​—1 Kor. 15:33.

15. Mɛni fɔlɔi baanyɛ akase yɛ Jessie sane lɛ mli?

15 Fɔlɔi komɛi leee kɔmpiutai, tablɛtii, kɛ amɛhenɔi lɛ amli, ni kɛ̃lɛ, amɛbaanyɛ amɛye amɛbua amɛbii lɛ. Yɛ mɛɛ gbɛ nɔ? Nyɛmi nuu ko ni yɔɔ Philippines, ni atsɛɔ lɛ Jessie lɛ wie akɛ: “No mli lɛ, nɔ ko fioo pɛ wɔle yɛ kɔmpiutai, mobail foŋ, kɛ amɛhenɔi lɛ ahe. Kɛ̃lɛ, wɔhã wɔbii lɛ le naagbai ni baanyɛ aba kɛ́ amɛkɛ nibii nɛɛ tsuuu nii jogbaŋŋ.” Jessie ekɛɛɛ akɛ akɛni eleee nibii nɛɛ amli hewɔ lɛ, eŋmɛŋ ebii lɛ gbɛ ni amɛkɛtsu nii. Moŋ lɛ, ewie akɛ: “Miwo mibii lɛ hewalɛ ni amɛkɛ amɛfoŋ kɛ amɛtablɛtii lɛ atsu nii kɛkase wiemɔ hee, amɛkɛsaa amɛhe kɛhã asafoŋ kpeei, ni amɛkɛkane Biblia lɛ daa.” Fɔlɔi, ani nyɛkane ŋaawoi kpakpai ni asafo lɛ kɛhã yɛ tɛs mɛseji kɛ mfonirii ni ashaa awoɔ Intanɛt lɛ nɔ lɛ he ni nyɛkɛ nyɛbii lɛ esusu he? Nyɛbaanyɛ nyɛna nibii nɛɛ ahe saji yɛ jw.org® lɛ nɔ, yɛ fã ni ji, “Oblahii Kɛ Oblayei.” Agbɛnɛ hu, asafo lɛ efee vidioi ni ji, Ani Ofoŋ Kɛ Ehenɔi Lɛ Kudɔɔ Bo, Aloo Bo Okudɔɔ Amɛ?Ohiɛ Akã  Shi Yɛ Fesbuk Kɛ Ehenɔi Lɛ Kɛnitsumɔ Mli. * Vidioi nɛɛ baanyɛ aye abua fɔlɔi ni amɛtsɔɔ amɛbii lɛ bɔ ni amɛbaafee amɛkɛ hiɛshikamɔ atsu nii be ni amɛkɛ amɛfoŋ kɛ amɛtablɛtii lɛ tsuɔ nii lɛ. Fɔlɔi, ani nyɛkɛ nyɛbii lɛ ekwɛ vidioi nɛɛ ni nyɛgba he sane?​—Abɛi 13:20.

16. Mɛni fɔlɔi pii efee? Ni mɛɛ yibii kpakpai ewo?

16 Fɔlɔi pii bɔɔ mɔdɛŋ waa akɛ amɛbaato gbɛjianɔ koni amɛbii lɛ kɛ mɛi ni feɔ nɔkwɛmɔnɔ kpakpa yɛ Nyɔŋmɔ sɔɔmɔ lɛ mli lɛ abɔ. Akɛ nɔkwɛmɔnɔ lɛ, no mli lɛ, nyɛmi nuu ko ni yɔɔ Côte d’Ivoire, ni atsɛɔ lɛ N’Déni lɛ, kɛ eŋa Bomine hãa kpokpaa nɔkwɛlɔ lɛ batoɔ amɛshĩa lɛ. N’Déni wie akɛ: “Enɛ ná wɔbinuu lɛ nɔ hewalɛ kpakpa. Ebɔi gbɛgbamɔ nitsumɔ lɛ, ni amrɔ nɛɛ eesɔmɔ akɛ kpokpaa nɔkwɛlɔi ayelikɛbualɔ.” Ani obaanyɛ oto gbɛjianɔ ko ni tamɔ nakai ohã obii lɛ?

17-18. Mɛɛ be esa akɛ fɔlɔi abɔi amɛbii tsɔsemɔ?

17 Nyɛjea mra nyɛtsɔsea nyɛbii lɛ. Kɛ́ fɔlɔi je mra amɛtsɔse amɛbii lɛ, enɔ bɛ. (Abɛi 22:6) Timoteo sane lɛ hãa wɔnaa nakai. Timoteo mami, Eunike, kɛ enaa, Loise, bɔi lɛ tsɔsemɔ kɛjɛ ‘ebifabiiaŋ’ tɔ̃ɔ. (2 Tim. 1:5; 3:15) Be ni Timoteo da lɛ, ená hegbɛ efata bɔfo Paulo he kɛyashiɛ yɛ maŋsɛɛ.

18 Nyɛmi nuu ko ni lɛ hu eyɔɔ Côte d’Ivoire, ni atsɛɔ lɛ Jean-Claude lɛ, kɛ eŋa Peace nyɛ amɛtsɔse amɛbii ekpaa lɛ fɛɛ ni amɛbatsɔmɔ Yehowa tsuji. Mɛni ye ebua amɛ? Amɛkase Eunike kɛ Loise. Amɛwie akɛ: “Wɔnyɛmɔ Nyɔŋmɔ Wiemɔ lɛ nɔ wɔwo wɔbii lɛ amli, ni wɔje shishi kɛjɛ be ni afɔ amɛ lɛ tɔ̃ɔ.”​—5 Mo. 6:6, 7; shn.

19. Kɛ́ akɛɛ fɔlɔi ‘anyɛmɔ Yehowa Wiemɔ lɛ nɔ amɛwo amɛbii lɛ amli’ lɛ, te etsɔɔ tɛŋŋ?

19 Kɛ́ akɛɛ fɔlɔi ‘anyɛmɔ Yehowa Wiemɔ lɛ nɔ amɛwo amɛbii lɛ amli’ lɛ, te etsɔɔ tɛŋŋ? Nɔ ni etsɔɔ ji akɛ, amɛtsɔɔ amɛbii lɛ Yehowa Wiemɔ lɛ, ni amɛtĩ nibii ni amɛtsɔɔ amɛ lɛ amli shii abɔ koni ebote amɛtsuiŋ tɔ̃ɔ. Enɛ baabi ni fɔlɔi aná dekã amɛhã amɛbii lɛ be fɛɛ be. Bei komɛi lɛ, efeɔ fɔlɔi ahuntoo akɛ amɛbaatĩ nɔ kome too lɛ nɔŋŋ mli shii abɔ amɛtsɔɔ amɛbii lɛ. Shi kɛ́ amɛnu shishi akɛ, ja amɛfee nakai dani amɛbii lɛ baanu Nyɔŋmɔ Wiemɔ lɛ shishi jogbaŋŋ ni amɛkɛtsu nii lɛ, ebaaye ebua amɛ.

Ehe miihia ni fɔlɔi ale amɛbii lɛ ateŋ mɔ fɛɛ mɔ jogbaŋŋ kɛ bɔ ni amɛbaatsɔse lɛ amɛhã (Kwɛmɔ kuku 20) *

20. Mɛɛ gbɛ nɔ Lala 127:4 lɛ kɔɔ bii atsɔsemɔ he?

 20 Nyɛlea nyɛbii lɛ jogbaŋŋ. Lala 127 lɛ, akɛ bii to gãimlibii ahe. (Kanemɔ Lala 127:4.) Ayɛ gãimlibii henɔi srɔtoisrɔtoi; eko fɛɛ eko kɛ edalɛ kɛ nɔ ni akɛfee. Nakai nɔŋŋ esoro gbekɛ fɛɛ gbekɛ. No hewɔ lɛ, ehe miihia ni fɔlɔi ale amɛbii lɛ ateŋ mɔ fɛɛ mɔ jogbaŋŋ kɛ bɔ ni amɛbaatsɔse lɛ amɛhã. Nyɛmi nuu ko ni yɔɔ ŋmɛnɛŋmɛnɛ beiaŋ maŋ ni atsɛɔ lɛ Israel lɛ kɛ eŋa nyɛ amɛtsɔse amɛbii enyɔ lɛ ni amɛbatsɔmɔ Yehowa tsuji. Amɛkɛɛ nɔ ni amɛfee ni ye ebua amɛ ji akɛ, nuu lɛ kɛ gbekɛbii lɛ ateŋ mɔ kome kase nii, ni yoo lɛ hu kɛ mɔ kroko lɛ kase nii. Wekuyitsei baanyɛ akwɛ kɛji ehe miihia ni amɛfee nakai yɛ amɛweku lɛ mli, kɛ agbɛnɛ hu, kɛji ebaahi nakai feemɔ.

YEHOWA BAAYE ABUA NYƐ

21. Mɛɛ gbɛ nɔ Yehowa baaye abua fɔlɔi?

21 Bei komɛi lɛ, fɔlɔi komɛi nuɔ he akɛ, amɛnyɛŋ amɛtsɔse amɛbii lɛ jogbaŋŋ, ejaakɛ naagbai ni amɛkɛkpeɔ lɛ fa tsɔ. Shi bii ji Yehowa dɛŋ nikeenii, ni efee klalo be fɛɛ be akɛ ebaaye ebua fɔlɔi. Kɛ́ amɛsɔle amɛhã lɛ lɛ, ebaabo amɛ toi aahu. Ni ebaahã amɛsɔlemɔi lɛ hetoo kɛtsɔ Biblia lɛ, asafo lɛ woji lɛ, nɔkwɛmɔnɔ kpakpa ni fɔlɔi ni enyɛ etsɔse amɛbii jogbaŋŋ lɛ feɔ lɛ, kɛ ŋaa srɔtoi ni amɛbaawo amɛ lɛ anɔ.

22. Mɛni ji nibii komɛi ni sa kadimɔ waa ni fɔlɔi baanyɛ afee ahã amɛbii?

22 Mɛi komɛi kɛɔ akɛ, bi tsɔsemɔ heɔ afii 20. Shi kɛ́ mɔ ko tsɔ fɔlɔ lɛ, no lɛ, ewala gbii abɔ fɛɛ lɛ, eji fɔlɔ. Nibii kpakpai pii yɛ ni fɔlɔi baanyɛ afee ahã amɛbii. Ekomɛi ni sa kadimɔ waa ji, ni amɛbaasumɔ amɛ, amɛná dekã amɛhã amɛ, ni amɛjɛ Biblia lɛ mli amɛtsɔse amɛ. Eyɛ mli akɛ jeee gbekɛbii fɛɛ mɔɔ tsɔsemɔ mli jogbaŋŋ moŋ, shi mɛi ni sumɔɔ Yehowa lɛ ateŋ mɛi pii abii emɔ tsɔsemɔ ni amɛtsɔse amɛ lɛ mli. Nyɛmi yoo ko ni yɔɔ Asia maji lɛ eko nɔ, ni atsɛɔ lɛ Joanna Mae lɛ wie yɛ efɔlɔi ahe akɛ: “Kɛ́ misusu bɔ ni mifɔlɔi tsɔse mi amɛhã lɛ he lɛ, eŋɔɔ minaa waa akɛ amɛtsɔɔ mi nii jogbaŋŋ koni masumɔ Yehowa. Amɛkɛ mi ba wala mli, ni amɛye amɛbua mi koni mikɛ nakai wala lɛ atsu nii jogbaŋŋ.” (Abɛi 23:24, 25) Nyɛmimɛi akpekpei abɔ hu nuɔ he nakai yɛ amɛfɔlɔi ahe.

LALA 59 Nyɛbaa Wɔjiea Yehowa Yi!

^ kk. 5 Nikasemɔ nɛɛ baahã sanebimɔi ni nyiɛ sɛɛ nɛɛ hetoo: Ani esa akɛ mɛi ni ebote gbalashihilɛ mli lɛ afɔ? Ni kɛ́ amɛbaafɔ lɛ, bii enyiɛ esa akɛ amɛfɔ? Te amɛbaafee tɛŋŋ amɛtsɔse amɛbii lɛ ni amɛsumɔ Yehowa ni amɛsɔmɔ lɛ? Wɔbaana nyɛmimɛi komɛi aniiashikpamɔi, kɛ agbɛnɛ hu, Biblia mli shishitoo mlai ni baanyɛ aye abua mɛi ni ebote gbalashihilɛ mli lɛ ni amɛkpɛ yiŋ ni ja yɛ saji nɛɛ ahe.

^ kk. 15 Kwɛmɔ Questions Young People Ask​—Answers That Work, Kpo 1, yitso 36, kɛ Kpo 2, yitso 11.

^ kk. 60 MFONIRI LƐ HE SANE: Nyɛmi nuu ko kɛ eŋa miisusu jɔɔmɔi kɛ sɔ̃i ni biiafɔmɔ kɛbaa lɛ ahe, koni amɛkwɛ kɛji amɛbaafɔ loo amɛfɔŋ.

^ kk. 64 MFONIRI LƐ HE SANE: Fɔlɔi komɛi kɛ amɛbii miikase nii, shi akɛni esoro afii ni amɛteŋ mɔ fɛɛ mɔ eye kɛ enyɛmɔi hewɔ lɛ, papa lɛ kɛ binuu lɛ miikase nii, ni mami lɛ kɛ biyoo lɛ miikase nii.