Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Te Yesu Gbɔmɔtso Tamɔ Tɛŋŋ?

Te Yesu Gbɔmɔtso Tamɔ Tɛŋŋ?

Ŋmɛnɛ lɛ, mɔ ko mɔ ko leee bɔ ni Yesu gbɔmɔtso ji diɛŋtsɛ, ejaakɛ be ni eba shikpɔŋ lɛ nɔ lɛ, edamɔɔɔ shi akɛ mɔ ko atɛŋ lɛ loo egbɔ lɛ. Fɛɛ sɛɛ lɛ, yɛ afii ohai abɔ ni eho lɛ amli fɛɛ lɛ, mɛi pii etɛŋ lɛ ni amɛgbɔ lɛ.

Anɔkwa, mɛi nɛɛ leee bɔ ni Yesu gbɔmɔtso ji diɛŋtsɛ. Bei pii lɛ, bɔ ni amɛtɛŋɔ loo amɛgbɔɔ Yesu amɛhãa lɛ damɔ shihilɛ ni bɔle amɛ, nibii ni amɛheɔ amɛyeɔ, kɛ nibii ni mɛi ni kɛ nitsumɔ lɛ hãa amɛ lɛ sumɔɔ lɛ anɔ. Kɛ̃lɛ nibii ni amɛtɛŋɔ loo amɛgbɔɔ lɛ baanyɛ aná mɛi anɔ hewalɛ, ni ebaanyɛ ehã amɛná jwɛŋmɔ ni ejaaa yɛ Yesu kɛ etsɔɔmɔi lɛ ahe po.

Mɛi komɛi tɛŋɔ loo amɛgbɔɔ Yesu akɛ nuu wudɔwudɔ ko kɛ eyitsɔi kakadaŋŋ ni eje tsɛŋ fioo, loo mɔ ko ni nii yɔɔ mɔbɔ. Mɛi krokomɛi hu tɛŋɔ loo amɛgbɔɔ lɛ akɛ mumɔŋ bɔɔ nɔ ko ni la kokloo ko bɔle eyitso he, loo akɛ mɔ ko ni tseee ehiɛ ehãaa mɛi. Shi ani nakai Yesu ji lɛɛlɛŋ? Te wɔbaafee tɛŋŋ wɔle? Nɔ kome ni baaye abua wɔ ji, ni wɔbaapɛi nibii ni Biblia lɛ ewie ni hãa wɔnaa bɔ ni ekolɛ egbɔmɔtso ji lɛ mli. Nibii nɛɛ baanyɛ aye abua wɔ ni wɔná jwɛŋmɔ ni ja hu yɛ ehe.

“GBƆMƆTSO OSAA OHÃ MI”

Eeenyɛ efee akɛ, Yesu wie wiemɔi nɛɛ yɛ sɔlemɔ mli be ni abaptisi lɛ lɛ. (Hebribii 10:5; Mateo 3:13-17) Te nakai gbɔmɔtso lɛ tamɔ tɛŋŋ? Aaafee afii 30 ni tsɔ nakai be lɛ hiɛ lɛ, bɔfo Gabriel kɛɛ Maria akɛ: “Obaaná musu ni obaafɔ binuu, . . . Nyɔŋmɔ Bi.” (Luka 1:31, 35) No hewɔ lɛ, Yesu eye emuu, tamɔ bɔ ni Adam ji be ni abɔ lɛ lɛ nɔŋŋ. (Luka 3:38; 1 Korintobii 15:45) Eeenyɛ efee akɛ, Yesu yɛ gbɔmɔtsoŋ hewalɛ waa, ni ekolɛ eje emami, ni ji Yudayoo Maria lɛ.

Romabii ni hi shi yɛ Yesu beiaŋ lɛ etooo amɛtsɛŋ. Shi Yesu to etsɛŋ, ejaakɛ Yudafoi lɛ toɔ amɛtsɛŋ. Nakai beiaŋ lɛ, kɛ́ mɔ ko to etsɛŋ ni esaa he, ni ehãaa ekɛ kakadaŋŋ lɛ, abuɔ lɛ, ni akɛ woo hãa lɛ. No hewɔ lɛ, ŋwanejee ko bɛ he akɛ, Yesu kuɔ eyitsɔi ni esaa etsɛŋ he hu. Mɛi pɛ ni ekuuu amɛyitsɔi ji Nazirmɛi, tamɔ Samson.​—4 Mose 6:5; Kojolɔi 13:5.

Nitsumɔ titri ni Yesu tsu dani eye afii 30 ji kapinta. Nakai beiaŋ lɛ, dɛŋdadei ni kapintafoi kɛtsuɔ nii ŋmɛnɛ lɛ eko bɛ. (Marko 6:3) No hewɔ lɛ, eeenyɛ efee akɛ Yesu mli ti ni eyɛ hewalɛ waa. Esɔɔmɔ nitsumɔ lɛ shishijee mli lɛ, ekome too eshwie mɛi fɛɛ ni hɔ̃ɔ tsinai kɛ gwantɛŋi lɛ kɛ “amɛgwantɛŋi kɛ amɛtsinai lɛ kɛje sɔlemɔwe lɛ, ni etsɔ shika tsakelɔi lɛ ashika lɛ eshwie shi ni etsirɛ amɛkpɔlɔi lɛ etswiatswiaa shi.” (Yohane 2:14-17) Ja mɔ ko yɛ hewalɛ waa dani ebaanyɛ efee enɛ. Yesu kɛ gbɔmɔtso ni Nyɔŋmɔ saa ehã lɛ lɛ tsu nitsumɔ ni ekɛwo edɛŋ lɛ, ekɛɛ: “Esa akɛ miyajajeɔ Nyɔŋmɔ maŋtsɛyeli lɛ he sanekpakpa lɛ mitsɔɔ maji krokomɛi hu, ejaakɛ no hewɔ atsu mi.” (Luka 4:43) Kɛ́ mɔ ko baanyɛ akpa Palestina fɛɛ yɛ enane nɔ ni eshiɛ sane nɛɛ, ja eyɛ gbɔmɔtsoŋ hewalɛ waa.

“NYƐBAA MIŊƆƆ, . . . NI MAHÃ NYƐHE AJƆ NYƐ”

Eeenyɛ efee akɛ, bɔ ni Yesu tseɔ ehiɛ ehãa mɛi lɛ hã ‘mɛi ni eetɔ amɛ ni amɛtere jatsui ni tsiitsii’ lɛ nyɛ amɛba eŋɔɔ. (Mateo 11:28-30) Bɔ ni edɔɔ mɔ he ni emli hi lɛ hã ana akɛ, ebaanyɛ ehã mɛi ni miisumɔ  ni etsɔɔ amɛ nii lɛ ahe ajɔ amɛ lɛɛlɛŋ. Biblia lɛ kɛɔ akɛ: “Eloo gbekɛbii lɛ atuu.” Enɛ hãa wɔnaa akɛ, gbekɛbii po sumɔɔ ni amɛbɛŋkɛ Yesu.​—Marko 10:13-16.

Eyɛ mli akɛ Yesu piŋ dani egbo moŋ, shi ejeee mɔ ko ni feɔ enii mɔbɔmɔbɔ. Akɛ nɔkwɛmɔnɔ lɛ, be ni etee yookpeemɔ he okpɔlɔŋmɛɛ ko shishi yɛ Kana lɛ, ehã nu tsɔ wain kpakpa koni mɛi ni eba lɛ amii ashɛ amɛhe. (Yohane 2:1-11) Agbɛnɛ hu, etsɔɔ nibii ni mɛi hiɛ kpaŋ nɔ kɔkɔɔkɔ yɛ henaabuamɔi krokomɛi ashishi.​—Mateo 9:9-13; Yohane 12:1-8.

Nɔ ni fe fɛɛ lɛ, Yesu shiɛmɔ nitsumɔ lɛ hã mɛi ni bo lɛ toi lɛ ná hiɛnɔkamɔ ni nɔ bɛ akɛ, amɛbaahi shi kɛya naanɔ. (Yohane 11:25, 26; 17:3) Be ni ekaselɔi lɛ ateŋ mɛi 70 bagba lɛ bɔ ni amɛshiɛmɔ nitsumɔ lɛ tee lɛ ehã lɛ, “emli fili lɛ” ni ekɛɛ: “Nyɛnyaa akɛni aŋmala nyɛgbɛ́ii yɛ ŋwɛi lɛ hewɔ.”​—Luka 10:20, 21.

“NYƐ LƐ, ESAAA AKƐ NYƐFEƆ NYƐNII YƐ NAKAI GBƐ NƆ”

Jamɔŋ hiɛnyiɛlɔi ni hi shi yɛ Yesu beiaŋ lɛ tao gbɛi anɔ ni amɛaatsɔ amɛgbala mɛi ajwɛŋmɔ kɛba amɛnɔ koni ana akɛ amɛyɛ mɛi anɔ hewalɛ. (4 Mose 15:38-40; Mateo 23:5-7) Nɔ ni tamɔɔɔ nakai lɛ, Yesu kɛɛ ebɔfoi lɛ akɛ, ‘amɛkaye mɛi anɔ nuŋtsɔmɛi asane.’ (Luka 22:25, 26) Anɔkwa, Yesu bɔ kɔkɔ akɛ: “Nyɛkwɛa jogbaŋŋ yɛ woloŋmalɔi lɛ ahe, mɛi ni sumɔɔ akɛ amɛwo atadei yuuyui kɛnyiɛ ni amɛsumɔɔ jaji anɔ ŋamɔi” lɛ.​—Marko 12:38.

Shi Yesu tseee ehe kɛjeee maŋbii lɛ ahe, ni bei komɛi po lɛ, kɛ́ eyɛ mɛi ateŋ lɛ, ayooo lɛ. (Yohane 7:10, 11) Kɛ́ eyɛ ebɔfoi anɔkwafoi 11 lɛ po ateŋ lɛ, anaaa srɔto ko. No hewɔ ni Yuda, mɔ ni jie Yesu ehã lɛ, to mɛi ni baamɔ Yesu lɛ “okadi ko,” ni ji naashɔmɔ lɛ.​—Marko 14:44, 45.

Eyɛ mli akɛ wɔleee Yesu he saji pii moŋ, shi wɔmiina faŋŋ akɛ, bɔ ni mɛi tɛŋɔ loo amɛgbɔɔ lɛ lɛ, jeee nakai eji diɛŋtsɛ. Shi nɔ ko yɛ ni he hiaa kwraa fe bɔ ni egbɔmɔtso ji diɛŋtsɛ, no ji bɔ ni wɔnaa lɛ wɔhãa amrɔ nɛɛ.

“ESHWƐ FIOO NI JE LƐ ENAŊ MI DƆŊŊ”

Gbi ni Yesu wie wiemɔi nɛɛ, nakai gbi lɛ nɔ nɔŋŋ egbo ni afũ lɛ. (Yohane 14:19) Ekɛ ewala hã akɛ “kpɔmɔnɔ kɛkpɔ̃ mɛi babaoo.” (Mateo 20:28) Gbi ni ji etɛ lɛ nɔ lɛ, Nyɔŋmɔ tee lɛ shi “yɛ mumɔ mli,” ni “eŋmɛ lɛ gbɛ ní ejie ehe kpo etsɔɔ” ekaselɔi lɛ ateŋ mɛi komɛi faŋŋ. (1 Petro 3:18; Bɔfoi 10:40) Be ni Yesu jie ehe kpo etsɔɔ ekaselɔi lɛ, no mli lɛ, te egbɔmɔtso tamɔ tɛŋŋ? Eeenyɛ efee akɛ, esoro no yɛ bɔ ni eji dani egbo lɛ he, ejaakɛ enanemɛi ni bɛŋkɛ lɛ kpaakpa lɛ po yooo lɛ amrɔ nɔŋŋ. Maria Magdalena susu akɛ abɔɔ nɔkwɛlɔ ji lɛ; ni kaselɔi enyɔ ni nyiɛ gbɛ kɛmiiya Emao lɛ hu susu akɛ gbɔ ji lɛ.​—Luka 24:13-18; Yohane 20:1, 14, 15.

Ŋmɛnɛ lɛ, te esa akɛ wɔna Yesu wɔhã tɛŋŋ? Yesu gbele sɛɛ nɔ ni fe afii 60 lɛ, bɔfo Yohane na Yesu he ninai. Yohane enaaa Yesu akɛ mɔ ko ni miigbo yɛ krɔs nɔ. Moŋ lɛ, ena lɛ akɛ “maŋtsɛmɛi a-Maŋtsɛ kɛ nuŋtsɔmɛi a-Nuŋtsɔ,” Nyɔŋmɔ Maŋtsɛyeli lɛ nɔ Maŋtsɛ, mɔ ni etsɛŋ ebaakpãtã daimonioi kɛ adesai ni ji Nyɔŋmɔ henyɛlɔi lɛ ahiɛ, ní ekɛ naanɔ jɔɔmɔi abahã adesai lɛ.​—Kpojiemɔ 19:16; 21:3, 4.