Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Halamɔ wiemɔ Ga

 SANEYITSO LƐ MLITSƆƆMƆ | MƐNI JI NIKEENII NI FE FƐƐ?

Mɛi Miitao Nikeenii Ni Fe Fɛɛ Lɛ

Mɛi Miitao Nikeenii Ni Fe Fɛɛ Lɛ

Ebɛ mlɛo akɛ mɔ ko baana nɔ ni kɛ́ ekɛke mɔ ko lɛ, mɔ lɛ baanya he waa. Nɔ hewɔ lɛ ji akɛ, mɔ ni akeɔ lɛ nii lɛ ji mɔ ni baatsɔɔ kɛji nikeenii lɛ he yɛ sɛɛnamɔ loo ehe bɛ sɛɛnamɔ kɛhã lɛ. Kɛfata he lɛ, bɔ ni mɔ ko baana nikeenii ko akɛ eji nɔ ni hi fe fɛɛ lɛ, jeee nakai mɔ kroko hu baana lɛ.

Akɛ nɔkwɛmɔnɔ lɛ, kɛ́ ake oblanyo ko ilɛtrɔnik nibii ni eba lɛ eko lɛ, ebaanu he akɛ eji nikeenii ni fe fɛɛ. Shi mɔ ni hiɛ efã baabu nɔ ko ni etsɛ yɛ amɛweku lɛ mli lɛ akɛ eji nikeenii ko ni nɔ bɛ kwraa. Yɛ hei komɛi hu lɛ, shika ji nɔ ni kɛ́ ake mɔ ko​—onukpa jio, gbekɛ jio lɛ​—ebaabu lɛ akɛ eji nikeenii ni fe fɛɛ, ejaakɛ ebaanyɛ ekɛhé nɔ fɛɛ nɔ ni esumɔɔ.

Eyɛ mli akɛ ewa akɛ abaaná nɔ ko ni kɛ́ akɛke mɔ ko ni asumɔɔ esane waa lɛ, ebaabu lɛ akɛ nikeenii ni fe fɛɛ moŋ, kɛ̃lɛ, mɛi komɛi bɔɔ mɔdɛŋ koni amɛfee nakai. Eji anɔkwale akɛ, jeee be fɛɛ be abaanyɛ aná nikeenii ni tamɔ nakai, shi nibii komɛi yɛ ni kɛ́ wɔhã ehi wɔjwɛŋmɔ mli lɛ, wɔbaanyɛ wɔye omanye. Hã wɔsusu nibii nɛɛ ateŋ ejwɛ ní baahã mɔ ni akeɔ lɛ nii lɛ anya nikeenii lɛ he lɛ ahe.

Nɔ ni kã mɔ lɛ tsui nɔ. Nuu ko ni yɔɔ maŋ ni ji Belfast, yɛ Northern Ireland lɛ wie akɛ, baisiko ni ake lɛ be ni eye afii 10 loo afii 11 lɛ ji nikeenii ni fe fɛɛ ni ená. Mɛni hewɔ enu he nakai? Ewie akɛ: “No mli lɛ miitao baisiko waa.” Nɔ ni ewie nɛɛ tsɔɔ akɛ, nɔ ni kã mɔ ko tsui nɔ lɛ ni tsɔɔ kɛji ehiɛ baasɔ nikeenii ko loo ehiɛ esɔŋ. No hewɔ lɛ, susumɔ mɔ ni oto akɛ obaake lɛ nii lɛ he. Bɔɔ mɔdɛŋ ni ole nɔ ni he hiaa lɛ waa, ejaakɛ bei pii lɛ no náa nibii ni kã etsui nɔ lɛ nɔ hewalɛ. Akɛ nɔkwɛmɔnɔ lɛ, bei pii lɛ, nɔ ni niimɛi kɛ naamɛi sumɔɔ waa ji, ni amɛwekumɛi ahi amɛmasɛi. Nɔ ni kã amɛtsui nɔ ji, ni amɛfɔ amɛbii kɛ amɛnabii namɔ. No hewɔ lɛ, kɛ́ bii lɛ kɛ́ nabii lɛ miito gbɛjianɔ kɛhã henaabuamɔ loo shisharamɔ ko ni amɛhã amɛfata amɛhe lɛ, amɛhiɛ baasɔ no fe nɔ fɛɛ nɔ.

Nɔ kome ni baahã onyɛ ona nɔ ni kã mɔ ko tsui nɔ ji, ni obaafee mɔ ni boɔ sane toi jogbaŋŋ. Biblia lɛ woɔ wɔ hewalɛ ni ‘wɔhe afee oya kɛ sane toiboo, wɔkaye wɔhe oyai kɛwie.’ (Yakobo 1:19) Be fɛɛ be kɛ́ okɛ onanemɛi loo oweku lɛ mli bii miigba sane lɛ,  bo amɛ toi jogbaŋŋ ni okwɛ akɛ obaana nibii ni amɛsumɔɔ kɛ nibii ni amɛsumɔɔɔ lo. Kɛkɛ lɛ, no baahã ona nɔ tuuntu ni kɛ́ okɛke amɛ lɛ, amɛbaanya he waa.

Mɔ lɛ hiamɔ nii. Kɛ́ nikeenii ko nyɛ etsu mɔ ko hiamɔ nii pɔtɛɛ ko he nii lɛ, ebaanya he waa, kɛ́ eji nɔ ko bibioo loo ejara waaa po. Shi, te obaafee tɛŋŋ ole mɔ kroko hiamɔ nii lɛ?

Ekolɛ obaasusu akɛ gbɛ ni yɔɔ mlɛo fe fɛɛ ni obaanyɛ otsɔ nɔ ole mɔ ko hiamɔ nii, loo nɔ ni etaoɔ ji, ni obaabi mɔ lɛ. Shi mɛi babaoo sumɔɔɔ ni kɛ́ amɛbaake mɔ ko nɔ ko lɛ, mɔ lɛ leɔ kɛtsɔɔ hiɛ, ejaakɛ no hãaa amɛmiishɛɛ lɛ aye emuu. Kɛfata he lɛ, mɛi komɛi yɛ ni egbaaa amɛnaa akɛ amɛaahã mɛi ale nibii ni amɛsumɔɔ kɛ nibii ni amɛsumɔɔɔ, kɛ̃lɛ amɛsumɔɔɔ ni mɛi leɔ amɛhiamɔ nii.

No hewɔ lɛ, okɛ ohiɛ afɔ̃ shi, ni oyɔse mɔ lɛ shihilɛ. Ani eji gbekɛ loo onukpa, oshija loo mɔ ni ebote gbalashihilɛ mli, mɔ ni atse lɛ gbãla loo ehefatalɔ egbo eshi lɛ, mɔ ni miitsu nii loo mɔ ni eba pɛnshɛŋ? Susumɔ nikeenii ni baanyɛ atsu mɔ lɛ hiamɔ nii ko he nii lɛ he.

Kɛ́ ootao ole nɔ diɛŋtsɛ ni he hiaa mɔ ni obaake lɛ nii lɛ, okɛ mɛi ni eyaje nakai shihilɛ lɛ eko mli pɛŋ lɛ agba sane. Ekolɛ, amɛbaatsɔɔ bo hiamɔ nii pɔtɛi komɛi ni mɛi babaoo leee. Kɛ́ ofee nakai lɛ, obaanyɛ oke mɔ ko nɔ ko ni baatsu ehiamɔ nii pɔtɛɛ ko ni ekolɛ mɛi krokomɛi leee lɛ he nii.

Be ni sa. Biblia lɛ kɛɔ akɛ: “Wiemɔ ni awie yɛ be ni sa mli lɛ ehĩ pam!” (Abɛi 15:23) Ŋmalɛ nɛɛ maa nɔ mi akɛ, kɛ́ wɔwie yɛ be ni sa mli lɛ, ehe baa sɛɛnamɔ waa. Nakai nɔŋŋ eji yɛ wɔnifeemɔi hu ahe. Bɔ ni kɛ́ awie yɛ be ni sa mli lɛ, eyeɔ ebuaa mɔ ni akɛwieɔ lɛ, nakai nɔŋŋ kɛ́ ake mɔ ko nii yɛ be ni sa mli lɛ, ebaahã mɔ lɛ aná miishɛɛ kpele diɛŋtsɛ.

Ani onaanyo ko yaabote gbalashihilɛ mli? Ani oblanyo ko ni ole lɛ yaagbe skul naa? Ani wu kɛ ŋa ko miikpa bi gbɛ? Bei amli ni mɛi sumɔɔ ni amɛke nii lɛ ateŋ fioo komɛi nɛ. Mɛi komɛi ena akɛ ehi jogbaŋŋ akɛ amɛbaaŋmala bei krɛdɛi ni yɔɔ afi ni baaba lɛ mli lɛ amɛshwie shi. Enɛ hãa amɛnyɛɔ amɛtoɔ gbɛjianɔ kɛtsɔɔ hiɛ koni amɛna nikeenii ni fe fɛɛ ni amɛkɛbaake mɛi yɛ bei krɛdɛi nɛɛ amli. *

Shi yɛ anɔkwale mli lɛ, jeee bei krɛdɛi pɛ amli esa akɛ oke nii. Ekɔɔɔ he eko be ni okɛbaake mɔ ko nɔ ko lɛ, obaanyɛ oná miishɛɛ ni jɛɔ nɔhãmɔ mli kɛbaa lɛ. Shi fɛɛ sɛɛ lɛ, nɔ ko yɛ ni esa akɛ okwɛ jogbaŋŋ yɛ he. Akɛ nɔkwɛmɔnɔ lɛ, kɛ́ nuu ko ke yoo ko nɔ ko ni jeee yɛ yiŋtoo pɔtɛɛ ko hewɔ lɛ, no baanyɛ ahã yoo lɛ amu sane naa akɛ nuu lɛ sumɔɔ lɛ. Ni kɛjeee suɔmɔ ni esumɔɔ yoo lɛ hewɔ ekeɔ lɛ nii lɛ, ebaanyɛ ekɛ naagbai aba. Enɛ hãa wɔnaa nɔ kroko hu ni he hiaa waa ni esa akɛ wɔsusu he yɛ nikee he, no ji yiŋtoo hewɔ ni akeɔ nii lɛ.

Yiŋtoo hewɔ ni akeɔ nii lɛ. Taakɛ wɔna yɛ nɔkwɛmɔnɔ ni tsɔ hiɛ lɛ mli lɛ, dani mɔ ko baake mɔ ko nɔ ko lɛ, esa jogbaŋŋ akɛ ebaasusu he ekwɛ kɛji no baahã mɔ lɛ aná susumɔ kroko yɛ enikeenii lɛ he. Kɛfata he lɛ, esa akɛ mɔ ni keɔ nii lɛ hu apɛi yiŋtoo hewɔ ni ekeɔ nii lɛ mli. Mɛi babaoo susuɔ akɛ amɛkeɔ nii yɛ yiŋtoi kpakpai ahewɔ, shi amɛteŋ mɛi pii keɔ nii yɛ bei pɔtɛi komɛi amli akɛni amɛsusuɔ akɛ nakai akpaa gbɛ akɛ amɛfee lɛ hewɔ. Ni mɛi krokomɛi hu keɔ nii kɛ susumɔ lɛ akɛ, no baahã akɛ amɛ aye yɛ gbɛ krɛdɛɛ ko nɔ, loo ake amɛ hu nii.

Mɛni baaye abua bo ni oke nii yɛ yiŋtoo kpakpa hewɔ? Biblia lɛ kɛɔ akɛ: “Nyɛfea nyɛnii fɛɛ yɛ suɔmɔ mli.” (1 Korintobii 16:14) Kɛ́ okeɔ mɛi nii yɛ amɛsane ni osumɔɔ kɛ amɛhe ni osusuɔ lɛ hewɔ lɛ, ebaahã amɛná onikeenii lɛ he miishɛɛ, ni bo hu obaaná miishɛɛ ni nɔhãmɔ hãa anáa lɛ eko. Kɛ́ ojɛ otsuiŋ oke nii lɛ, ehãa wɔŋwɛi Tsɛ lɛ hu náa miishɛɛ. Bɔfo Paulo jie Kristofoi ni hi shi yɛ blema Korinto lɛ ayi yɛ bɔ ni amɛkɛ miishɛɛ fee amɛnyɛmimɛi Kristofoi ni yɔɔ  Yudea lɛ ejurɔ be ni efĩ amɛ lɛ hewɔ. Ekɛɛ amɛ akɛ: “Mɔ ni hãa nɔ kɛ miishɛɛ lɛ, lɛ Nyɔŋmɔ sumɔɔ.”​—2 Korintobii 9:7.

Kɛ́ ojwɛŋ nibii ni wɔsusu he kɛtsɔ hiɛ lɛ anɔ jogbaŋŋ lɛ, ebaaye ebua bo ni ona nikeenii ni sa ni obaanyɛ okɛke mɔ ko, ní baahã mɔ lɛ aná miishɛɛ. Nibii ni wɔsusu he nɛɛ, kɛ ekrokomɛi yɛ gbɛjianɔ ni Nyɔŋmɔ to koni adesai aná nikeenii ni fe fɛɛ lɛ mli. Ofainɛ, kanemɔ sane ni nyiɛ sɛɛ lɛ, koni ona nɔ ni nikeenii ni fe fɛɛ nɛɛ ji.

^ kk. 13 Mɛi babaoo keɔ nii yɛ fɔmɔ gbijurɔyelii kɛ gbii juji komɛi hu anɔ. Shi bei pii lɛ, nibii ni afeɔ yɛ gbijurɔyelii nɛɛ ashishi lɛ ji nibii ni teɔ shi woɔ Biblia lɛ. Kwɛmɔ sane ni yitso ji, “Saji Ni Mɛi Ni Kaneɔ Lɛ Biɔ​—Ani Esa Akɛ Kristofoi Aye Blonya?” ni yɔɔ magazin nɛɛ mli lɛ.