Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

 SAJI NI MƐI NI KANEƆ LƐ BIƆ . . .

Ani Esa Akɛ Kristofoi Aye Blonya?

Ani Esa Akɛ Kristofoi Aye Blonya?

Mɛi akpekpei abɔ ni yɔɔ jeŋ fɛɛ lɛ heɔ amɛyeɔ akɛ, Blonyayeli ji Yesu Kristo fɔmɔ gbi jurɔ. Shi, ani obi ohe kɛji Kristofoi ni hi shi yɛ Yesu beiaŋ, titri lɛ mɛi ni bɛŋkɛ lɛ kpaakpa lɛ, ye Blonya? Ani ole nɔ ni Biblia lɛ wieɔ yɛ fɔmɔ gbii ahe? Kɛ́ wɔná sanebimɔi nɛɛ ahetoo lɛ, ebaahã wɔna kɛji esa akɛ Kristofoi aye Blonya loo esaaa akɛ amɛyeɔ.

Klɛŋklɛŋ lɛ, Biblia lɛ ewieee yɛ he ko he ko akɛ Yesu loo Nyɔŋmɔ tsuji anɔkwafoi lɛ ateŋ mɔ ko ye efɔmɔ gbi. Mɛi enyɔ pɛ Ŋmalɛ lɛ tsĩ amɛtã akɛ amɛye amɛfɔmɔ gbi. Amɛteŋ mɔ ko mɔ ko jáaa Yehowa, Nyɔŋmɔ ni Biblia lɛ wieɔ ehe lɛ, ni nibii gbohii tee nɔ yɛ amɛfɔmɔ gbijurɔyelii lɛ ashishi. (1 Mose 40:20; Marko 6:21) Encyclopædia Britannica lɛ wie akɛ, mra beiaŋ Kristofoi lɛ “na fɔmɔ gbijurɔyeli akɛ wɔŋjamɔ nifeemɔ,” ni amɛkɛ amɛhe wooo mli.

Mɛɛ be afɔ Yesu?

Biblia lɛ etsɔɔɔ gbi tuuntu nɔ ni afɔ Yesu. Cyclopedia ni McClintock kɛ Strong ŋma lɛ wie akɛ: “Anyɛŋ ana gbi ni afɔ Kristo yɛ K[paŋmɔ] H[ee] lɛ mli, ni anyɛŋ ana yɛ he ko he ko hu.” Ekã shi faŋŋ akɛ, eji Yesu miisumɔ ni esɛɛnyiɛlɔi lɛ aye efɔmɔ gbi kulɛ, ebaahã amɛle gbi ni afɔ lɛ.

Nɔ ni ji enyɔ lɛ, Biblia lɛ ewieee akɛ Yesu loo ekaselɔi lɛ ateŋ mɔ ko ye Blonya. New Catholic Encyclopedia lɛ wie akɛ, he klɛŋklɛŋ ni atsĩ Blonya gbijurɔyeli tã yɛ ji, Roma wolo ko ni atsɛɔ lɛ Chronograph, ni Philocalus ŋma lɛ mli, ni “sane ko ni aŋma yɛ afi 336 [Ŋ.B.] lɛ nɔ edamɔ eŋma wolo nɛɛ.” Eyɛ faŋŋ akɛ, be ni Yesu eba shikpɔŋ lɛ nɔ etee, ní aŋma Biblia lɛ hu agbe naa lɛ sɛɛ afii ohai abɔ dani aŋma wolo nɛɛ. No hewɔ lɛ, McClintock kɛ Strong wie akɛ, “jeee Nyɔŋmɔ to Blonyayeli shishi, ni ebɛ K[paŋmɔ] H[ee] lɛ hu mli.” *

Mɛɛ nifeemɔ Yesu fã ekaselɔi lɛ akɛ amɛkai?

Yesu, ni ji Tsɔɔlɔ Kpele lɛ, tsɔɔ ekaselɔi lɛ nɔ ni eesumɔ ni amɛfee, ni enɛ mli kã shi faŋŋ yɛ Biblia lɛ mli. Shi Blonyayeli fataaa he. Tamɔ bɔ ni skul tsɔɔlɔ ko sumɔŋ ni eskulbii lɛ afee nɔ ko ni ekɛko amɛ akɛ amɛfee lɛ, Yesu hu sumɔŋ ni esɛɛnyiɛlɔi lɛ ‘ateke nibii ni aŋmala’ yɛ Ŋmalɛ Krɔŋkrɔŋ lɛ mli lɛ.​—1 Korintobii 4:6.

Shi nifeemɔ ko ni he hiaa waa yɛ ni mra beiaŋ Kristofoi lɛ le waa, no ji Yesu gbele lɛ Kaimɔ lɛ. Yesu diɛŋtsɛ tsɔɔ ekaselɔi lɛ be ni esa akɛ amɛye Kaimɔ lɛ, kɛ bɔ ni amɛye lɛ amɛhã. Gbɛtsɔɔmɔi ni mli kã shi faŋŋ nɛɛ, kɛ gbi ni Yesu gbo lɛ yɛ Biblia lɛ mli.​—Luka 22:19; 1 Korintobii 11:25.

Wɔna faŋŋ akɛ, Blonya ji fɔmɔ gbijurɔyeli, ni mra beiaŋ Kristofoi lɛ kɛ amɛhe wooo wɔŋjalɔi anifeemɔ nɛɛ mli. Agbɛnɛ hu, Biblia lɛ ewieee akɛ Yesu loo mɔ kroko ye Blonya. Yiŋtoi nɛɛ ahewɔ lɛ, Kristofoi akpekpei abɔ ni yɔɔ jeŋ fɛɛ lɛ ekpɛ mli akɛ, amɛyeŋ Blonya.

^ kk. 6 Kɛ́ ootao ole he ni Blonyayeli kusumii pii jɛ lɛ, kwɛmɔ sane ni je kpo yɛ December 1, 2014, Buu-Mɔɔ lɛ mli ni yitso ji, “Saji Ni Mɛi Ni Kaneɔ Lɛ Biɔ . . . Mɛni Ji Anɔkwa Saji ni Kɔɔ Blonya He?” lɛ; eko yɛ Intanɛt lɛ nɔ yɛ www.jw.org/gaa.