Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Ná Jwɛŋmɔ Ni Ja Yɛ Tɔmɔi Ahe

Ná Jwɛŋmɔ Ni Ja Yɛ Tɔmɔi Ahe

Nuu ko ni atsɛɔ lɛ Don kɛ eŋa Margaret * mii shɛ amɛhe waa be ni amɛbiyoo lɛ kɛ eweku lɛ basara amɛ lɛ. Be ni amɛbaashi amɛ lɛ, Margaret hoo makroni kɛ tsiis, ni ji niyenii ko ni enabii enyɔ lɛ sumɔɔ waa lɛ. Margaret ji nihoolɔ ko ni he esa waa ni eba pɛnshɛŋ.

Be ni mɔ fɛɛ mɔ ebatara okpɔlɔ lɛ he lɛ, Margaret kɛ niyenii lɛ bama okpɔlɔ lɛ nɔ. Be ni egbele naa lɛ, ena akɛ tsiis lɛ pɛ yɔɔ tsɛnsi lɛ mli. Enaa kpɛ ehe waa. Asomoaŋ lɛ, ehiɛ ekpa nɔ ni ekɛ makroni lɛ baawo mli! *

Wɔ fɛɛ wɔtɔ̃ɔ, ekɔɔɔ he eko afii abɔ ni wɔye loo niiashikpamɔ ni wɔyɔɔ. Ekolɛ wɔbaawie nɔ ko ni wɔsusuuu he, wɔbaafee nɔ ko yɛ be ni esaaa mli, loo wɔhiɛ baakpa nɔ ko nɔ. Mɛni hewɔ wɔtɔ̃ɔ? Kɛ́ wɔtɔ̃ lɛ, mɛni esa akɛ wɔfee? Ani wɔbaanyɛ wɔtsĩ tɔmɔi anaa? Kɛ́ wɔná jwɛŋmɔ ni ja yɛ tɔmɔi ahe lɛ, ebaaye ebua wɔ ni wɔhã sanebimɔi nɛɛ ahetoo.

ANI WƆNAA TƆMƆI TAMƆ BƆ NI NYƆŊMƆ NAA LƐ LƐ?

Kɛ́ wɔfee nɔ ko jogbaŋŋ ni mɛi jie wɔyi lɛ, eŋɔɔ wɔnaa ni wɔnuɔ he akɛ wɔbɔ mɔdɛŋ. No hewɔ lɛ, kɛ́ wɔtɔ̃ ni jeee gbɛ wɔje loo mɛi enaaa po lɛ, ani esaaa akɛ wɔkpɛlɛɔ wɔtɔmɔ lɛ nɔ? Ja wɔbaa wɔhe shi dani wɔbaanyɛ wɔkpɛlɛ wɔtɔmɔ nɔ.

Kɛji wɔnaa wɔhe tsɔ lɛ, no lɛ, kɛ́ wɔtɔ̃ lɛ, ekolɛ wɔbaajie wɔnaa, wɔbaashwa mɛi krokomɛi, loo wɔwieŋ anɔkwale lɛ po. Shi bei pii lɛ, nibii gbohii jɛɔ enɛ mli kɛbaa. Ekolɛ naagba lɛ baahi bɔ ni eyɔɔ lɛ nɔŋŋ, ni abaashwa mɛi krokomɛi yɛ gbɛ ni ejaaa nɔ. Kɛ́ wɔnáaa wɔtɔmɔ lɛ he nyɔmɔwoo amrɔ nɛɛ po lɛ, esa akɛ wɔkai akɛ, wɔsɛɛ lɛ “wɔteŋ mɔ fɛɛ mɔ baabu lɛ diɛŋtsɛ ehe akɔntaa ehã Nyɔŋmɔ.”​—Romabii 14:12.

Esoro bɔ ni Nyɔŋmɔ naa tɔmɔi kwraa. Yɛ Lalai awolo lɛ mli lɛ, awie yɛ Nyɔŋmɔ he akɛ, “mɔbɔnalɔ kɛ durolɔ” ji lɛ; “ehiɛɛɛ béi amli daa, ni ebɛɛɛ mɔ ewooo emli kɛyaaa naanɔ.” Ele akɛ wɔyeee emuu, enuɔ wɔfatɔi lɛ ashishi, ni “ekaiɔ akɛ sũ kɛkɛ ji wɔ.”​—Lala 103:8, 9, 14.

Kɛfata he lɛ, Nyɔŋmɔ tamɔ tsɛ ko ni naa mɔ mɔbɔ, ni eesumɔ ni wɔ, ni ji ebii lɛ, wɔna tɔmɔi tamɔ bɔ ni enaa lɛ lɛ nɔŋŋ. (Lala 130:3) Ejɛ suɔmɔ mli ekɛ ŋaawoi kɛ gbɛtsɔɔmɔi babaoo ehã wɔ yɛ e-Wiemɔ lɛ mli koni wɔnyɛ wɔtsu wɔ diɛŋtsɛ wɔtɔmɔi kɛ mɛi krokomɛi anɔ he nii.

BƆ NI WƆBAAFEE WƆTSU TƆMƆI AHE NII

Bei pii kɛ́ wɔtɔ̃ lɛ, wɔfiteɔ be babaoo kɛshwaa mɛi loo wɔkɛjieɔ wɔnaa yɛ nɔ ni wɔwie loo wɔfee lɛ he, ni enɛ hãa wɔhaoɔ. Nɔ najiaŋ ni wɔbaafee nakai lɛ, kɛ́ wɔwie nɔ ko ni egba mɔ ko naa lɛ, esa akɛ wɔkpa lɛ fai, wɔjaje nibii, ni wɔkahã wɔkɛ lɛ teŋ naanyobɔɔ lɛ fite. Ani ofee nɔ ko ni ehiii, ni no ehã bo loo mɔ kroko he efĩ lɛ loo ekɛ naagba wulu ko eba? Nɔ najiaŋ ni omli baafu ohe loo obaashwa mɛi krokomɛi lɛ, bɔɔ mɔdɛŋ ni ojaje nibii. Kɛ́ oma nɔ mi doo akɛ tɔmɔ lɛ jɛɛɛ bo lɛ, no  lɛ, ebaanyɛ ehã mlifu ahi okɛ mɛi krokomɛi ateŋ be kplaŋŋ, ní ehã naagba lɛ hu mli awo wu. No najiaŋ lɛ, kasemɔ nii kɛjɛ otɔmɔ lɛ mli, jajemɔ nibii, ni ojie yɛ ojwɛŋmɔŋ.

Shi kɛ́ mɔ kroko tɔ̃ hu? Bei pii lɛ, ewaaa kwraa akɛ wɔbaafee nɔ ko ni tsɔɔ akɛ wɔnyaaa he. Shi ehi jogbaŋŋ akɛ wɔkɛ ŋaa ni Yesu Kristo wo lɛ baatsu nii, ewie akɛ: “Nɔ fɛɛ nɔ ni nyɛtaoɔ akɛ mɛi afee ahã nyɛ lɛ, esa akɛ nyɛ hu nyɛfee nakai nɔŋŋ nyɛhã amɛ.” (Mateo 7:12) Kɛ́ otɔ̃ ni ejeee tɔmɔ wulu po lɛ, ŋwanejee ko bɛ he akɛ, obaasumɔ ni mɛi ana mli ahã bo, loo amɛkɛke bo kwraa. No hewɔ lɛ, bo hu bɔɔ mɔdɛŋ ni ona mli ohã mɛi krokomɛi.​—Efesobii 4:32.

SHISHITOO MLAI NI BAAWA WƆ KONI WƆKATƆ̃ PII

Dishinari ko tsɔɔ mli akɛ, “nii ahe ni asusuuu jogbaŋŋ, anɔkwalei fɛɛ ni aleee yɛ sane ko mli, loo sane toi ni abooo jogbaŋŋ” ji nɔ ni hãa atɔ̃ɔ. Anɔkwa, yɛ be kɛ beiaŋ lɛ, wɔteŋ mɔ fɛɛ mɔ feɔ nibii nɛɛ ateŋ ekome loo nɔ. Kɛ̃lɛ, kɛ́ wɔsusu shishitoo mlai komɛi ni yɔɔ Ŋmalɛ lɛ mli lɛ ahe lɛ, wɔtɔ̃ŋ pii.

Shishitoo mlai nɛɛ ateŋ ekome ji Abɛi 18:13. Jɛmɛ kɛɛ: “Mɔ ni nuuu sane dani ehereɔ nɔ lɛ, eji buulufeemɔ kɛ hiɛgbele hã lɛ.” Kɛ́ ohe be fioo kɛbo sane ko mli toi jogbaŋŋ, ni osusu nɔ ni obaafee yɛ he lɛ he lɛ, ehãŋ oye ohe oyai kɛwie nɔ ko loo ofee nɔ ko ní sɛɛ mli lɛ oshwa ohe. Kɛ́ obo sane toi jogbaŋŋ lɛ, ebaawa bo ni osusu nii ahe jogbaŋŋ, kɛkɛ lɛ, otɔ̃ŋ.

Biblia mli shishitoo mla kroko kɛɛ akɛ: “Kɛ́ aaahi lɛ, nyɛgbɛfaŋ lɛ, nyɛfea bɔ fɛɛ bɔ ni nyɛaanyɛ koni toiŋjɔlɛ ahi nyɛ kɛ mɛi fɛɛ ateŋ.” (Romabii 12:18) Bɔɔ mɔdɛŋ ni ohã toiŋjɔlɛ kɛ ekomefeemɔ ahi okɛ mɛi ateŋ. Kɛ́ okɛ mɛi miitsu nii lɛ, susumɔ amɛhe, buu amɛ, jiemɔ amɛyi, ni owo amɛ hewalɛ. Kɛ́ ofee nakai ni mɔ ko wie nɔ ko loo efee nɔ ko ni esusuuu he lɛ, ewaŋ kɛhãŋ bo akɛ okɛbaake lɛ tswaa, ni obaanyɛ otsu naagbai ni yɔɔ hiɛdɔɔ lɛ ahe nii yɛ toiŋjɔlɛ mli.

Kwɛmɔ akɛ obaanyɛ okase nɔ ko kɛjɛ otɔmɔ lɛ mli lo. Nɔ najiaŋ ni obaatao nɔ ko kɛjie onaa yɛ nɔ ni owie loo ofee lɛ he lɛ, naa lɛ akɛ hegbɛ ni oná ni okɛbaakase sui kpakpai. Ani ekolɛ ehe miihia ni oto otsui shi, ojie mlihilɛ kpo, loo oye ohe nɔ fe tsutsu lɛ? Aloo ehe miihia ni ojie mlijɔlɛ, toiŋjɔlɛ, kɛ suɔmɔ hu kpo? (Galatiabii 5:22, 23) Kɛ́ okaseee nɔ ko kwraa po lɛ, obaana nɔ ni esaaa akɛ ofeɔ be kroko. Kpɛlɛmɔ otɔmɔ lɛ nɔ, shi kaahã otɔmɔ lɛ miidɔ bo fe nine. Kɛ́ okɛ nibii komɛi fee ŋmɔlɔ lɛ, ebaahã aŋmɛɛ saji ahe.

KƐ́ WƆNÁ JWƐŊMƆ NI JA LƐ, WƆBAANÁ HE SƐƐ

Kɛ́ wɔná jwɛŋmɔ ni ja yɛ tɔmɔi ahe lɛ, ebaahã wɔtsu amɛhe nii jogbaŋŋ. Ehãŋ wɔmli afu wɔhe loo mɛi krokomɛi. Kɛ́ wɔbɔ mɔdɛŋ akɛ wɔbaakase nii kɛjɛ wɔtɔmɔi amli lɛ, ebaahã wɔhiɛ akã shi, ni mɛi baasumɔ wɔsane waa. Ehãŋ wɔtsui akumɔ kwraa loo wɔbu wɔhe fɔ fe nine. Kɛ́ wɔkpɛlɛ nɔ akɛ mɛi krokomɛi hu miibɔ mɔdɛŋ ni amɛtsu amɛtɔmɔi ahe nii lɛ, ebaahã wɔsumɔ amɛsane waa. Nɔ ni fe fɛɛ lɛ, kɛ́ wɔkase bɔ ni Nyɔŋmɔ sumɔɔ mɛi ní ekɛ amɛtɔmɔi keɔ amɛ tswaa lɛ, wɔbaaná he sɛɛ waa.​—Kolosebii 3:13.

Ani Margaret tɔmɔ ni atsĩ tã kɛtsɔ hiɛ lɛ fite weku lɛ henaabuamɔ lɛ? Dabi kwraa. Mɔ fɛɛ mɔ kɛfee ŋmɔlɔ, titri lɛ Margaret, ni amɛye nii lɛ nakai nɔŋŋ ni makroni lɛ fataaa he! Enabii enyɔ lɛ ahiɛ kpaaa be nɛɛ kɛ nibii ni amɛnii kɛ amɛnaa lɛ fee ni hã amɛná miishɛɛ lɛ nɔ, ni afii komɛi asɛɛ lɛ, amɛ hu amɛgba amɛbii nɔ ni ba lɛ. Eji tɔmɔ kɛkɛ!

^ kk. 2 Atsake mɛi lɛ agbɛ́ii.

^ kk. 3 Makroni kɛ tsiis ji niyenii ko ni akɛ makroni ni ahoo kɛ tsiis flɔ feɔ.