Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Halamɔ wiemɔ Ga

 SANEYITSO LƐ MLITSƆƆMƆ | ŊWƐIBƆFOI​—ANI AMƐYƐ LƐƐLƐŊ? NƆ HEWƆ NI ESA AKƐ OLE

Gbɛi Anɔ Ni Ŋwɛibɔfoi Baanyɛ Awa Bo

Gbɛi Anɔ Ni Ŋwɛibɔfoi Baanyɛ Awa Bo

Adesai ashihilɛ mli saji kã ŋwɛibɔfoi anɔkwafoi lɛ atsui nɔ waa, ni amɛyeɔ amɛbua adesai koni amɛfee Yehowa suɔmɔnaa nii. Be ni Nyɔŋmɔ bɔ shikpɔŋ lɛ, ŋwɛibɔfoi lɛ ‘fɛɛ lá nyamɔ lala shi koome ni Nyɔŋmɔ bii lɛ fɛɛ kwa bɔ oshe.’ (Hiob 38:4, 7) Kɛjɛ jeŋbɔɔ mli tɔ̃ɔ lɛ, ŋwɛibɔfoi eshwe waa akɛ “amɛna” gbalɛi ni kɔɔ nibii ni baaya nɔ yɛ shikpɔŋ nɔ lɛ amli.​—1 Petro 1:11, 12.

Biblia lɛ tsɔɔ akɛ, ŋwɛibɔfoi bu Nyɔŋmɔ anɔkwa tsuji ahe yɛ bei komɛi amli, koni amɛfee Nyɔŋmɔ suɔmɔnaa nii. (Lala 34:8) Akɛ nɔkwɛmɔnɔ lɛ:

  • Be ni Yehowa baakpãtã Sodom kɛ Gomora maji lɛ ahiɛ yɛ amɛnifɔji lɛ ahewɔ lɛ, ŋwɛibɔfoi ye amɛbua anɔkwafo Lot kɛ eweku lɛ ni amɛje mli shweshweeshwe.​—1 Mose 19:1, 15-26.

  • Be ni ashɛrɛ Nyɔŋmɔ tsuji oblahii etɛ komɛi awo flɔnɔɔ kɛ emli la lɛ mli yɛ blema Babilon lɛ, Nyɔŋmɔ ‘tsu ebɔfo, ni ebahere’ amɛ.​—Daniel 3:19-28.

  • Be ni anɔkwafo Daniel eye jenamɔ muu fɛɛ yɛ jatai ni hɔmɔ miiye amɛ waa lɛ abu mli lɛ, ewie akɛ jatai lɛ yeko lɛ awui ko, ejaakɛ ‘Nyɔŋmɔ tsu ebɔfo, ni ebaŋamɔ jatai lɛ anaabui.’​—Daniel 6:16, 22.

Ŋwɛibɔfoi eye ebua mɛi ni yeɔ Nyɔŋmɔ anɔkwa lɛ kɛjɛ blema

ŊWƐIBƆFOI YE AMƐBUA MRA BEIAŊ KRISTOFOI ASAFO LƐ

Nyɔŋmɔ bɔfoi lɛ ye amɛbua mra beiaŋ Kristofoi asafo lɛ bei komɛi, ni Kristofoi lɛ nyɛ amɛtsu Yehowa yiŋtoi ahe nii. Akɛ nɔkwɛmɔ nɔ lɛ:

  • Be ni awo Yesu kaselɔi lɛ ekomɛi tsuŋ lɛ, ŋwɛibɔfo ko bagbele tsuŋwoohe lɛ shinai lɛ ehã amɛ, ni efã amɛ koni amɛya nɔ amɛshiɛ yɛ sɔlemɔwe lɛ.​—Bɔfoi 5:17-21.

  • Ŋwɛibɔfo ko fã sane kpakpa shiɛlɔ Filipo koni eya gbɛ ni kã shia ŋa ni jɛɔ Yerusalem kɛyaa Gaza lɛ nɔ, koni eyashiɛ ehã Etiopianyo ko ní eyajá Nyɔŋmɔ yɛ Yerusalem eeya shĩa lɛ.​—Bɔfoi 8:26-33.

  • Be ni be shɛ, ni Nyɔŋmɔ miitao ehã mɛi ni jeee Yudafoi lɛ abatsɔmɔ Kristofoi lɛ, ehã ŋwɛibɔfo ko jie ehe kpo yɛ ninaa mli etsɔɔ Kornelio, ní eji Roma asraafoiatsɛ lɛ, ni efã lɛ koni ehã ayatsɛ bɔfo Petro kɛba eshĩa lɛ.​—Bɔfoi 10:3-5.

  • Be ni awo bɔfo Petro tsuŋ lɛ, ŋwɛibɔfo ko bajie ehe kpo etsɔɔ lɛ, ni ejie lɛ kɛje tsuŋwoohe lɛ.​—Bɔfoi 12:1-11.

 GBƐI ANƆ NI ŊWƐIBƆFOI BAANYƐ AYE ABUA BO

Odaseyeli ko bɛ ni tsɔɔ akɛ yɛ wɔbei nɛɛ amli lɛ, Nyɔŋmɔ tsɔɔ ŋwɛibɔfoi anɔ eyeɔ ebuaa mɛi yɛ naakpɛɛ gbɛi anɔ tamɔ eba lɛ yɛ Biblia lɛ mli lɛ. Kɛ̃lɛ, Yesu wie yɛ wɔbei nɛɛ he akɛ: “Abaashiɛ Maŋtsɛyeli lɛ he sane kpakpa nɛɛ yɛ shikpɔŋ lɛ nɔ fɛɛ koni akɛye jeŋmaji lɛ fɛɛ odase, ni no sɛɛ lɛ naagbee lɛ baaba.” (Mateo 24:14) Ani ole akɛ ŋwɛibɔfoi miikudɔ Kristo sɛɛnyiɛlɔi ni yɔɔ bianɛ lɛ ni amɛmiitsu nakai nitsumɔ lɛ?

Ŋwɛibɔfoi yeɔ amɛbuaa kɛshiɛɔ sane kpakpa lɛ yɛ je lɛŋ fɛɛ

Biblia mli wolo ni ji Kpojiemɔ lɛ tsɔɔ akɛ, yɛ bei nɛɛ amli lɛ, ŋwɛibɔfoi baaye abua mɛi yɛ shikpɔŋ lɛ nɔ he fɛɛ he koni amɛle Yehowa Nyɔŋmɔ, kɛ eyiŋtoo kɛhã adesai lɛ he nii. Bɔfo Yohane ŋma akɛ: “Mina ŋwɛibɔfo kroko miifiliki yɛ ŋwɛi teŋ, ni ehiɛ naanɔ sane kpakpa ní eyaajaje etsɔɔ mɛi ni yɔɔ shikpɔŋ lɛ nɔ lɛ, kɛ jeŋmaŋ fɛɛ jeŋmaŋ kɛ weku fɛɛ weku, kɛ wiemɔ fɛɛ wiemɔ, kɛ gbɔmɛi srɔtoi fɛɛ. Ekɛ gbee ni wa miiwie akɛ: ‘Nyɛshea Nyɔŋmɔ gbeyei ní nyɛkɛ anunyam ahãa lɛ, ejaakɛ ŋmɛlɛtswaa ní ekɛbaakojo lɛ eshɛ, no hewɔ lɛ, nyɛjáa mɔ ni fee ŋwɛi kɛ shikpɔŋ lɛ kɛ ŋshɔ lɛ kɛ nuhiŋmɛii lɛ.’” (Kpojiemɔ 14:6, 7) Nibii pii miiya nɔ yɛ wɔbei nɛɛ amli ni maa nɔ mi akɛ, ŋwɛibɔfoi lɛ miifĩ jeŋ muu fɛɛ Maŋtsɛyeli shiɛmɔ nitsumɔ lɛ sɛɛ. Anɔkwa, kɛ́ efɔŋfeelɔ kome po tsake ni ebaabɔi Yehowa jamɔ lɛ, “miishɛɛ baa yɛ Nyɔŋmɔ bɔfoi lɛ ateŋ.”​—Luka 15:10.

Shi kɛ́ agbe shiɛmɔ nitsumɔ lɛ fɛɛ naa lɛ, mɛni baaba? Ŋwɛibɔfoi lɛ baafata Yesu Kristo, ni ji maŋtsɛmɛi a-Maŋtsɛ lɛ he akɛ “ŋwɛi tai” kɛwu “Nyɔŋmɔ Ofe lɛ gbi wulu lɛ nɔ ta lɛ” yɛ Harmagedon. (Kpojiemɔ 16:14-16; 19:14-16) Nyɔŋmɔ baahã ŋwɛibɔfoi lɛ akpãtã mɛi fɔji lɛ ahiɛ, be ni Nuŋtsɔ Yesu ‘tɔɔ mɛi ni booo wɔ-Nuŋtsɔ Yesu he sane kpakpa lɛ toi lɛ ahe owele lɛ.’​—2 Tesalonikabii 1:7, 8.

No hewɔ lɛ, ná nɔmimaa akɛ ŋwɛibɔfoi lɛ susuɔ ohe. Mɛi ni miisumɔ ni amɛsɔmɔ Nyɔŋmɔ lɛ asane kã ŋwɛibɔfoi lɛ atsui nɔ waa; ni Yehowa kɛ ŋwɛibɔfoi lɛ etsu nii shii abɔ kɛwo enɔkwa tsuji ni yɔɔ shikpɔŋ lɛ nɔ lɛ hewalɛ, ni ekɛbu amɛhe hu.​—Hebribii 1:14.

Belɛ, ehe miihia ni wɔteŋ mɔ fɛɛ mɔ akpɛ eyiŋ yɛ sane ko ni he hiaa waa he. No ji, ‘Ani wɔbaabo sane kpakpa ni ashiɛɔ yɛ jeŋ fɛɛ lɛ toi ni wɔkɛtsu nii?’ Yehowa Odasefoi ni yɔɔ okutso lɛ mli lɛ yɛ he miishɛɛ akɛ amɛbaaye amɛbua bo koni oná yelikɛbuamɔ ni suɔmɔ yɔɔ mli ni Nyɔŋmɔ bɔfoi ni yɔɔ hewalɛ lɛ kɛhãa lɛ he sɛɛ.