Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

BUU-MƆƆ NO. 5 2016

 SANEYITSO LƐ MLITSƆƆMƆ | NƐGBƐ OBAANYƐ ONÁ MIISHƐJEMƆ KƐJƐ?

Miishɛjemɔ He Miihia Wɔ Fɛɛ

Miishɛjemɔ He Miihia Wɔ Fɛɛ

Ani okaiɔ be ko ni ogbee shi be ni oji gbekɛ fioo lɛ? Ekolɛ opila onine loo okanto naa kpɔlɔ. Ani okaiɔ bɔ ni omami shɛje omii? Ekolɛ eto fala lɛ nɔ ni ekɛ bandeji fi nɔ. Ekolɛ ofó, shi bɔ ni eshɛje omii, ni efua bo lɛ hã omii shɛ ohe. Yɛ nakai beiaŋ be ni oji gbekɛ lɛ, ewaaa akɛ obaaná mɔ ko ni eshɛje omii.

Shi be ni wɔdaraa lɛ, wɔkɛ shihilɛi ni jaraa kpeɔ. Naagbai lɛ amli woɔ wu, ni ewaa kɛhãa wɔ akɛ wɔbaaná miishɛjemɔ ko. Dɔlɛ sane ji akɛ, anyɛŋ akɛ bandeji kɛ nyɛ ko fuamɔ pɛ atsu onukpai anaagbai ahe nii. Susumɔ nɔkwɛmɔnii fioo komɛi ahe okwɛ.

  • Ani onitsumɔ eŋmɛɛ bo ni ehã ohao dã? Oblanyo ko ni atsɛɔ lɛ Julian lɛ kɛɛ akɛ, be ni ashwie lɛ yɛ nitsumɔ mli lɛ, ehiɛ fee lɛ yaa, ni ehao waa. Ebi ehe akɛ, ‘Te mafee tɛŋŋ makwɛ miweku lɛ? Afii babaoo ni mikɛ gbo deŋme yɛ nitsumɔ nɛɛ mli lɛ fɛɛ sɛɛ lɛ, mɛni hewɔ amɛsusu akɛ mihe ehiaaa amɛ lɛ?’

  • Ekolɛ ogbala ni efite lɛ ehã ohao waa. Yoo ko ni atsɛɔ lɛ Raquel lɛ wie akɛ: “Be ni miwu shi mi trukaa nyɔji 18 ni eho nɛ lɛ, minii fee mɔbɔ waa. Efee tamɔ nɔ ni aja mitsui mli enyɔ. Mi piŋ yɛ gbɔmɔtsoŋ kɛ henumɔŋ fɛɛ. Enɛ hã mihao waa.”

  • Ekolɛ ooye hela ko ni naa wa waa, ni etamɔ nɔ ni enaa baaa shi. Bei komɛi lɛ, ekolɛ obaanu he tamɔ bɔ ni blematsɛ Hiob, ní kɛɛ akɛ: “Jeŋ hilɛ eje mitsine, jeee naanɔ mihiɛ aaakã kɛyashi” nu he lɛ. (Hiob 7:16) Ekolɛ onuɔ he tamɔ nuu ko ni eye afii 80 kɛ sɛɛ, ni atsɛɔ lɛ Luis lɛ nu he lɛ pɛpɛɛpɛ; ewie akɛ, “Bei komɛi lɛ, minuɔ he akɛ miimɛ migbele.”

  • Aloo ekolɛ osuɔlɔ ko gbele hewɔ lɛ, onuɔ he akɛ miishɛjemɔ he miihia bo. Nuu ko ni atsɛɔ lɛ Robert lɛ wie akɛ, “Be ni mibinuu lɛ gbo yɛ kɔɔyɔŋ lɛlɛ oshara ko mli lɛ, shishijee lɛ misusu akɛ ejeee anɔkwale. Kɛkɛ ni minu piŋmɔ ko he, piŋmɔ ni Biblia lɛ kɛto klante kakadaŋŋ ni akɛgbu mɔ ko mli lɛ he lɛ.”Luka 2:35.

Robert, Luis, Raquel, kɛ Julian fɛɛ ná miishɛjemɔ yɛ shihilɛi ni jaraa ni amɛkɛkpe lɛ po amli. Amɛná Mɔ ni fe fɛɛ ni baanyɛ ashɛje amɛmii—ejeee mɔ ko akɛ ja Nyɔŋmɔ Ofe lɛ pɛ. Mɛɛ gbɛ nɔ etsɔɔ eshɛjeɔ wɔmii? Ani ebaanyɛ eshɛje bo hu omii?