Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

BUU-MƆƆ NO. 5 2016

 SANEYITSO LƐ MLITSƆƆMƆ | NƐGBƐ OBAANYƐ ONÁ MIISHƐJEMƆ KƐJƐ?

Gbɛi Anɔ ni Nyɔŋmɔ Tsɔɔ Eshɛjeɔ Wɔmii

Gbɛi Anɔ ni Nyɔŋmɔ Tsɔɔ Eshɛjeɔ Wɔmii

Bɔfo Paulo wie Yehowa * he akɛ, eji ‘miishɛjemɔ fɛɛ Nyɔŋmɔ, ni shɛjeɔ wɔmii yɛ wɔjaramɔ shihilɛi fɛɛ mli.’ (2 Korintobii 1:3, 4) No hewɔ lɛ, Biblia maa nɔ mi kɛhãa wɔ akɛ, mɔ ko mɔ ko bɛ ni nyɛŋ ená yelikɛbuamɔ ni Nyɔŋmɔ kɛhãa lɛ he sɛɛ, ni akɛ, oshara ko kwraa bɛ ni wɔkɛbaakpe ni wɔŋwɛi Tsɛ lɛ nyɛŋ ashɛje wɔmii yɛ he.

Shi nɔ ko yɛ ni esa akɛ wɔfee kɛ́ wɔmiisumɔ ni Nyɔŋmɔ ashɛje wɔmii. Te aaafee tɛŋŋ ni datrɛfonyo ko baaye abua wɔ kɛ́ wɔkɛ lɛ bɛ gbɛjianɔtoo ko? Gbalɔ Amos bi akɛ: “Ani mɛi enyɔ feɔ ekome kɛnyiɛɔ, kɛ́ amɛkpaŋko he?” (Amos 3:3) No hewɔ lɛ, Biblia lɛ woɔ wɔ hewalɛ akɛ: “Nyɛtsia nyɛbɛŋkɛa Nyɔŋmɔ, ni ebaatsi ebɛŋkɛ nyɛ.”Yakobo 4:8.

Te wɔɔfee tɛŋŋ wɔná nɔmimaa akɛ Nyɔŋmɔ baatsi ebɛŋkɛ wɔ lɛ? Klɛŋklɛŋ kwraa lɛ, akɛni ekɛɔ wɔ shii abɔ akɛ eesumɔ ni eye ebua wɔ lɛ hewɔ. ( Kwɛmɔ akrabatsa ni fata sane nɛɛ he lɛ.) Nɔ ni ji enyɔ lɛ, mɛi komɛi ni hi shi yɛ blema kɛ wɔ bei nɛɛ amli fɛɛ lɛ eye he odase akɛ, Nyɔŋmɔ shɛje amɛmii.

Maŋtsɛ David kɛ jaramɔ shihilɛi babaoo kpe, ni ebi yelikɛbuamɔ kɛjɛ Nyɔŋmɔ ŋɔɔ, taakɛ mɛi babaoo feɔ ŋmɛnɛ lɛ. Be ko lɛ ekpa Yehowa fai akɛ: “Kɛ mibolɔ mitsɛo . . . lɛ, bo mifaikpamɔ gbee lɛ toi!” Ani Nyɔŋmɔ hã lɛ hetoo? Hɛɛ. David kɛfata he akɛ: “Eye ebua mi; no hewɔ lɛ miná tsuijurɔ.”Lala 28:2, 7.

GBƐFAŊNƆ NI YESU TSUƆ HE NII KƐSHƐJEƆ MƐI FƐƐ NI YEƆ ŊKƆMƆ LƐ AMII

Nyɔŋmɔ to ni Yesu atsu gbɛfaŋnɔ krɛdɛɛ ko he nii kɛshɛje mɛi amii. Nitsumɔi ni Nyɔŋmɔ kɛhã Yesu lɛ eko ji, ni ‘etsá mɛi ni tsuii ekumɔ lɛ, ni eshɛje ŋkɔmɔyelɔi fɛɛ amii.’ (Yesaia 61:1, 2) Taakɛ agba afɔ̃ shi lɛ, Yesu jie mlihilɛ krɛdɛɛ kpo etsɔɔ mɛi ni ‘eetɔ amɛ, ní amɛtere jatsui ni tsiitsii’ lɛ.Mateo 11:28-30.

Yesu shɛje mɛi amii, kɛtsɔ ŋaa kpakpa ni ewo amɛ, mlihilɛ kpo ni ejie etsɔɔ amɛ, kɛ amɛhelai ni etsa bei komɛi po lɛ nɔ. Be ko lɛ, kpitiyelɔ ko kpa Yesu fai akɛ: “Kɛ́ oosumɔ lɛ, obaanyɛ ohã mihe atse.” Yesu musuŋ tsɔ lɛ, ni ehã lɛ hetoo akɛ: “Miisumɔ! Ohe atse.” (Marko 1:40, 41) Kɛkɛ ni kpitiyelɔ lɛ he tse.

 Ŋmɛnɛ lɛ, Nyɔŋmɔ Bi lɛ bɛ shikpɔŋ lɛ nɔ ni ebaashɛje wɔmii hiɛ kɛ hiɛ. Shi e-Tsɛ, Yehowa, ni ji “Miishɛjemɔ fɛɛ Nyɔŋmɔ lɛ,” miiya nɔ eeye eebua mɛi ni miishɛjemɔ he miihia amɛ lɛ. (2 Korintobii 1:3) Naa gbɛi titrii ejwɛ ni Nyɔŋmɔ tsɔɔ nɔ eshɛjeɔ mɛi amii.

  • Biblia Lɛ. “Nibii fɛɛ ni aŋma ato momo lɛ, aŋma koni etsɔɔ wɔ nii, koni kɛtsɔ wɔshifimɔ kɛ agbɛnɛ hu kɛtsɔ Ŋmalɛi lɛ amli miishɛjemɔ lɛ nɔ lɛ, wɔná hiɛnɔkamɔ.”Romabii 15:4.

  • Nyɔŋmɔ Mumɔ Krɔŋkrɔŋ Lɛ. Yɛ Yesu gbele lɛ sɛɛ be fioo lɛ, Kristofoi asafo muu lɛ fɛɛ ná toiŋjɔlɛ. Mɛni hewɔ? Ejaakɛ ‘enyiɛ yɛ Yehowa gbeyeishemɔ kɛ mumɔ krɔŋkrɔŋ lɛ miishɛjemɔ mli.’ (Bɔfoi 9:31) Mumɔ krɔŋkrɔŋ lɛ, ni ji Nyɔŋmɔ hewalɛ ni miitsu nii lɛ, yɛ hewalɛ waa. Nyɔŋmɔ baanyɛ ekɛtsu nii kɛshɛje mɔ fɛɛ mɔ mii yɛ shihilɛ fɛɛ shihilɛ mli.

  • Sɔlemɔ. Biblia lɛ woɔ wɔ ŋaa akɛ, “Nyɛkafea yeyeeye yɛ nɔ ko nɔ ko he.” Ni ekɛ fata he akɛ, ‘nyɛhãa Nyɔŋmɔ alea nyɛnibimɔi lɛ; ni Nyɔŋmɔ toiŋjɔlɛ ni fe niiashishinumɔi fɛɛ lɛ baabu nyɛtsuii kɛ nyɛjwɛŋmɔi ahe.’Filipibii 4:6, 7.

  • Wɔnyɛmimɛi Kristofoi Lɛ baanyɛ afee nanemɛi kpakpai ni wɔbaanyɛ wɔkɛ wɔhe afɔ̃ amɛnɔ kɛhã miishɛjemɔ yɛ haomɔ beiaŋ. Bɔfo Paulo wie yɛ enanemɛi lɛ ahe akɛ, amɛji ‘mɛi ni shɛjeɔ emii babaoo’ yɛ ‘hejaramɔ kɛ amanehulu’ beiaŋ.Kolosebii 4:11; 1 Tesalonikabii 3:7.

Shi ekolɛ lɛ obaabi akɛ, te aaafee tɛŋŋ ni Nyɔŋmɔ baatsɔ gbɛi nɛɛ anɔ eshɛje omii lɛ? Hã wɔsusu mɛi komɛi ni kɛ naagbai ni atsĩ tã yɛ sane ni tsɔ hiɛ lɛ mli lɛ kpe lɛ aniiashikpamɔi ahe wɔkwɛ. Amɛniiashikpamɔi lɛ baahã ona akɛ, Nyɔŋmɔ yeɔ eshiwoo ni yɔɔ miishɛɛ ni nyiɛ sɛɛ nɛɛ nɔ lolo. Ekɛɛ akɛ: “Taakɛ bɔ ni mɔ nyɛ shɛjeɔ emii lɛ, nakai nɔŋŋ mi hu mashɛje nyɛmii.”Yesaia 66:13.

^ kk. 3 Yehowa ji Nyɔŋmɔ gbɛ́i, taakɛ ejeɔ kpo yɛ Biblia lɛ mli lɛ.