Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

BUU-MƆƆ NO. 5 2016

Ela Jɔɔ

David kɛ Goliat Sane Lɛ—Ani Eba mli Lɛɛlɛŋ?

David kɛ Goliat Sane Lɛ—Ani Eba mli Lɛɛlɛŋ?

Mɛi komɛi biɔ amɛhe akɛ, ‘Ani David kɛ Goliat sane lɛ ba mli lɛɛlɛŋ aloo eji adesã ko kɛkɛ?’ Ani sanebimɔ nɛɛ ba ojwɛŋmɔ mli be ni okaneɔ sane ni tsɔ hiɛ lɛ? Kɛ́ nakai ni lɛ, susumɔ sanebimɔi etɛ ni nyiɛ sɛɛ nɛɛ ahe okwɛ.

1 | Ani gbɔmɔ ko kwɔlɛ baanyɛ ashɛ mitai 2.9 lɛɛlɛŋ?

Biblia lɛ kɛɔ akɛ, Goliat ‘kɛlɛ ji ninetalɔi ekpaa kɛ klakate kome.’ (1 Samuel 17:4) Ninetalɔi ni ŋmalɛ nɛɛ wie he lɛ kome kɛlɛ ji sɛntimitai 44.5; ni klakate lɛ kɛlɛ ji sɛntimitai 22.2. Fɛɛ feɔ aaafee mitai 2.9. Mɛi komɛi kɛɔ akɛ Goliat kwɔlɛ nyɛŋ ashɛ nakai, shi susumɔ enɛ he okwɛ: Yɛ wɔbei nɛɛ amli lɛ, nuu ni kwɔ fe hii fɛɛ yɛ je lɛ mli lɛ kwɔ fe mitai 2.7. Belɛ, ani Goliat nyɛŋ akwɔ fe nuu nɛɛ sɛntimitai 15 loo nɔ? Goliat jɛ Refaim weku lɛ mli, ni ale hii ni jɛ nakai weku lɛ mli lɛ akɛ amɛje oblaŋ. Afi 1,200 D.Ŋ.B. afii lɛ amli niŋmaa ko ni ana yɛ Ejipt lɛ tsɔɔ akɛ, tawulɔi kakalɔi komɛi ni hi Kanaan lɛ kwɔlɔ fe mitai 2.4. No hewɔ lɛ, eyɛ mli akɛ anako mɔ ko ni kwɔlɛ shɛɔ Goliat kwɔlɛ lɛ moŋ, shi no etsɔɔɔ akɛ enyɛŋ eba lɛ nakai.

2 | Ani David ji mɔ ko ni hi shi lɛɛlɛŋ?

Be ko lɛ, woloŋlelɔi komɛi ka akɛ amɛbaahã ana Maŋtsɛ David akɛ eji adesã mli gbɔmɔ ko kɛkɛ, shi amɛyeee omanye. Shitsalɔi ena blema sane ko ni aŋma ni tsĩ “David shĩa lɛ” tã. Kɛfata he lɛ, Yesu Kristo wie David he akɛ, eji mɔ ko ni hi shi lɛɛlɛŋ. (Mateo 12:3; 22:43-45) Wekutɔkpaa he saji ni yɔɔ fitsofitso srɔtoi enyɔ hãa anaa faŋŋ akɛ, Yesu ji Mesia lɛ, ni akɛ ejɛ Maŋtsɛ David wekutɔkpaa lɛ mli. (Mateo 1:6-16; Luka 3:23-31) Eyɛ faŋŋ akɛ, David ji mɔ ko ni hi shi lɛɛlɛŋ.

3 | Ani nibii ni awie he yɛ nakai sane lɛ mli lɛ tee nɔ yɛ he ko diɛŋtsɛ?

Biblia lɛ kɛɔ akɛ, awu ta lɛ yɛ Ela Jɔɔ lɛ mli. Ni etsɔɔ mli fitsofitso kɛfata he akɛ, Filistibii lɛ bɔ nsara yɛ gɔŋ ko he yɛ maji enyɔ komɛi, ni ji Soko kɛ Azeka teŋ. Israelbii lɛ hu bɔ nsara yɛ gɔŋ kroko he, ni jɔɔ kã amɛ kɛ Filistibii lɛ ateŋ. Ani hei nɛɛ ji hei ni yɔɔ diɛŋtsɛ?

Kadimɔ nɔ ni mɔ ko ni yashara shi yɛ hei nɛɛ nyɛsɛɛ nɛɛ lɛ wie: “Nuu ni kɛ wɔ yashara shi lɛ—ejeee Nyɔŋmɔjalɔ—ekɛ wɔ tee Ela Jɔɔ lɛ mli. Wɔtsɔ gbɛ ko nɔ kɛkwɔ kɛtee gɔŋ lɛ ŋwɛigbɛ fioo. Be ni wɔma wɔyi shi kɛkwɛɔ jɔɔ lɛ mli lɛ, ehã wɔkane 1 Samuel 17:1-3 lɛ. Kɛkɛ ni ekɛ enine tsɔɔ jɔɔ lɛ mli, ni ekɛɛ: ‘Soko maŋ lɛ tsukoi lɛ yɔɔ nyɛbɛku gbɛ lɛ.’ Etsɔ ehe ni ekɛɛ akɛ, ‘Azeka maŋ lɛ tsukoi lɛ yɔɔ nyɛninejurɔ gbɛ lɛ. Filistibii lɛ bɔ nsara lɛ yɛ maji enyɔ nɛɛ ateŋ, yɛ gɔŋ lɛ shishi yɛ nyɛhiɛ gbɛ. No hewɔ lɛ, ekolɛ he tuuntu ni Israelbii lɛ bɔ nsara lɛ yɛ lɛ wɔdamɔ nɛɛ.’ Mifee Saul kɛ David he mfoniri akɛ amɛdamɔ he tuuntu ni midamɔ lɛ. Kɛkɛ ni wɔkpeleke shi kɛtee jɔɔ lɛ mli, ni wɔfo nujɔɔ ko ni mli egbi, ní tɛi sɔŋŋ eyi mli. Mifee David he mfoniri ni ema eyi shi yɛ biɛ eehala tɛi enumɔ ni yɔɔ trotro ní ekome gbe Goliat lɛ.” Shisharalɔ nɛɛ naa kpɛ ehe yɛ bɔ ni sane ni yɔɔ Biblia lɛ mli lɛ ja kɛmɔ shi lɛ he, ni nakai nɔŋŋ eji yɛ mɛi pii agbɛfaŋ.

Nɔ ko bɛ ni wɔbaanyɛ wɔdamɔ nɔ wɔkɛɛ akɛ Biblia mli sane nɛɛ jeee anɔkwale. Mɛi ni ewie amɛhe lɛ ji mɛi ni hi shi diɛŋtsɛ, ni hei ni etsĩ tã lɛ ji hei ni yɔɔ diɛŋtsɛ. Nɔ ni fe fɛɛ lɛ, eji sane ni yɔɔ Nyɔŋmɔ Wiemɔ ni ajɛ mumɔŋ aŋma lɛ mli, no hewɔ lɛ ejɛ Nyɔŋmɔ anɔkwafo, mɔ ni “nyɛŋ emale lɛ” ŋɔɔ.Tito 1:2; 2 Timoteo 3:16.