Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Halamɔ wiemɔ Ga

Tetragrammaton lɛ, ni damɔ shi kɛhã Yehowa, ni ji Nyɔŋmɔ gbɛ́i krɔŋkrɔŋ lɛ ni akɛ Hebri niŋmaa okadii eŋma, ni akaneɔ kɛjɛɔ ninejurɔ kɛyaa abɛkugbɛ

Hebri Niŋmaa Okadii Lɛ Ateŋ Bibioo Fe Fɛɛ Lɛ Hã Aná Nɔmimaa Kpele Ko

Hebri Niŋmaa Okadii Lɛ Ateŋ Bibioo Fe Fɛɛ Lɛ Hã Aná Nɔmimaa Kpele Ko

Ani wɔbaanyɛ wɔná nɔmimaa akɛ Nyɔŋmɔ shiwoi lɛ fɛɛ baaba mli? Yesu ná hekɛnɔfɔɔ akɛ fɛɛ baaba mli, ni nibii ni etsɔɔ lɛ hã etoibolɔi lɛ hu ná hemɔkɛyeli. Bo lɛ susumɔ nɔkwɛmɔnɔ ko ni efee yɛ Gɔŋ Nɔ Shiɛmɔ lɛ mli, taakɛ aŋma yɛ Mateo 5:18 lɛ he okwɛ; ewie akɛ: “Lɛɛlɛŋ, miikɛɛ nyɛ akɛ, kɛ́ ŋwɛi kɛ shikpɔŋ ho tee po lɛ, Mla lɛ mli niŋmaa okadii lɛ ateŋ bibioo fe fɛɛ loo emli niŋmaa okadi ko he kuli kome hoŋ eyaŋ, kɛyashi nibii fɛɛ aaaba mli.”

Niŋmaa okadi ni edaaa fe fɛɛ yɛ Hebri niŋmaa okadii lɛ ateŋ ji י (yod), ni eji Tetragrammaton lɛ, ni damɔ shi kɛhã Yehowa, Nyɔŋmɔ gbɛ́i krɔŋkrɔŋ lɛ klɛŋklɛŋ niŋmaa okadi. * Woloŋmalɔi kɛ Farisifoi lɛ bu wiemɔ kulibii kɛ niŋmaa okadii kɛ agbɛnɛ ‘niŋmaa okadi ko he kulibii’ ni yɔɔ Nyɔŋmɔ Mla lɛ mli lɛ ateŋ eko fɛɛ eko akɛ nɔ ko ni he hiaa waa.

No mli lɛ Yesu miikɛɛ akɛ, ŋwɛi kɛ shikpɔŋ hoŋ eyaŋ, ja Mla lɛ mli oti bibioo fe fɛɛ lɛ eba mli dã. Kɛ̃lɛ, Ŋmalɛi lɛ hãa wɔnaa faŋŋ akɛ, ŋwɛi kɛ shikpɔŋ lɛ baahi shi kɛya naanɔ. (Lala 78:69) No hewɔ lɛ, nɔ ni Yesu wie lɛ tsɔɔ akɛ, Mla lɛ mli oti bibioo fe fɛɛ lɛ po baaba mli.

Ani Yehowa Nyɔŋmɔ buɔ Mla lɛ mli otii bibii lɛ akɛ amɛhe hiaa? Hɛɛ. Susumɔ enɛ he okwɛ: Akɛɛ blema Israelbii lɛ akɛ amɛkajwara Hehoo toobi lɛ wui lɛ eko. (2 Mose 12:46) Ekolɛ enɛ ji oti bibioo ko. Ani amɛnu nɔ hewɔ ni esaaa akɛ amɛjwaraa wui lɛ eko kwraa lɛ shishi? Ekolɛ amɛnuuu shishi. Shi Yehowa Nyɔŋmɔ le akɛ, nɛkɛ oti nɛɛ ji gbalɛ ni tsɔɔ akɛ akuŋ Mesia lɛ wu ko be ni agbeɔ lɛ yɛ piŋmɔ tso lɛ nɔ lɛ.​—Lala 34:21; Yohane 19:31-33, 36.

Belɛ, mɛni wɔbaanyɛ wɔkase kɛjɛ nɔ ni Yesu wie lɛ mli? No ji akɛ, wɔ hu wɔbaanyɛ wɔná nɔmimaa diɛŋtsɛ akɛ Yehowa Nyɔŋmɔ shiwoi lɛ fɛɛ baaba mli, ni emli bibioo fe fɛɛ lɛ hu po fata he. Mɛɛ nɔmimaa kpele po Hebri niŋmaa okadii lɛ ateŋ bibioo fe fɛɛ lɛ hãa wɔnáa nɛkɛ!

^ kk. 3 Hela niŋmaa okadii lɛ ateŋ bibioo fe fɛɛ ji iota, ni etamɔ Hebri niŋmaa okadi ni ji י (yod) lɛ nɔŋŋ. Akɛni aŋma Mose Mla lɛ yɛ Hebri mli, ni akɛtsu nii aahu kɛyashi Yesu ba hewɔ lɛ, eeenyɛ efee akɛ no mli lɛ Yesu miiwie Hebri niŋmaa okadi lɛ he.