Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Te Obaafee Tɛŋŋ Oná Shihilɛ Ni Hi Fe Enɛ Lɛ?

Te Obaafee Tɛŋŋ Oná Shihilɛ Ni Hi Fe Enɛ Lɛ?

JEEE nɛkɛ Nyɔŋmɔ to akɛ adesai ashihilɛ afee. Kulɛ esa akɛ shikpɔŋ lɛ nɔ ayi kɛ adesai ni sumɔɔ ni wɔ-Bɔlɔ lɛ aye amɛnɔ, ni amɛhãa etsɔɔ amɛ gbɛ, ni amɛkaseɔ esuɔmɔ kɛ esui krokomɛi ni nɔ bɛ lɛ. Kulɛ Nyɔŋmɔ miitao ni amɛná miishɛɛ be ni amɛfeɔ ekome kɛkwɛɔ amɛbii, kɛkaseɔ nibii hei, kɛkwɛɔ hu koni shikpɔŋ muu lɛ fɛɛ atsɔ paradeiso lɛ.

NYƆŊMƆ EWO SHI AKƐ EBAAHÃ SHIKPƆŊ LƐ NƆ SHIHILƐ AFEE TAMƆ BƆ NI ETO LƐ

  • “Ebaafo tai asɛɛ yɛ shikpɔŋ lɛ nɔ fɛɛ.”​Lala 46:9.

  • “Be ni ato lɛ shɛ . . . koni afite mɛi ni fiteɔ shikpɔŋ lɛ.”​Kpojiemɔ 11:18.

  • “Mɛi ni yɔɔ mli lɛ ateŋ mɔ ko ekɛŋ akɛ: ‘Mibɛ hewalɛ.’”​Yesaia 33:24.

  • “Mɛi ni mihala lɛ baaye amɛninenaa nitsumɔ lɛ mli nii jogbaŋŋ.”​Yesaia 65:22.

Mɛɛ gbɛ nɔ gbalɛi nɛɛ baaba mli? Nyɔŋmɔ ewó e-Bi Yesu Maŋtsɛ yɛ nɔyeli ko ni eye emuu nɔ koni ejɛ ŋwɛi eye shikpɔŋ lɛ nɔ. Biblia lɛ tsɛɔ nɔyeli nɛɛ akɛ Nyɔŋmɔ Maŋtsɛyeli. (Daniel 2:44) Biblia lɛ wieɔ Yesu he akɛ: ‘Nyɔŋmɔ kɛ maŋtsɛ sɛi lɛ baahã lɛ ni ebaaye Maŋtsɛ.’​—Luka 1:32, 33.

Be ni Yesu yɔɔ shikpɔŋ lɛ nɔ lɛ, etsu hewalɛ nitsumɔi pii koni ana akɛ, kɛ́ etsɔ Nɔyelɔ lɛ, ebaahã adesai ashihilɛ ahi fe bɔ ni eji bianɛ lɛ.

YESU HÃ ANA NIBII KPAKPAI NI EBAAFEE EHÃ ADESAI NI BOƆ NYƆŊMƆ TOI LƐ

  • Etsa helai srɔtoi fɛɛ, koni ana akɛ ebaajie adesai agbɔmɔtsoŋ gbɔjɔmɔi kɛya.​Mateo 9:35.

  • Ehã ŋshɔ ŋmɛ dɛmm, ni ekɛtsɔɔ akɛ ebaabu mɛi ahe kɛje adebɔɔ mli nibii ni baanyɛ akpãtã nibii ahiɛ lɛ ahe.​Marko 4:36-39.

  • Elɛ mɛi akpei abɔ, koni ana akɛ ebaahã adesai amɛhiamɔ nii.​Marko 6:41-44.

  • Ehã nu tsɔ wain yɛ yookpeemɔ ko shishi, ni ekɛtsɔɔ akɛ ebaahã wɔná miishɛɛ.​Yohane 2:7-11.

Te obaafee tɛŋŋ onine ashɛ wala ni Nyɔŋmɔ taoɔ ni mɛi ni sumɔɔ lɛ lɛ aná lɛ nɔ? “Gbɛ” ko yɛ ni esa akɛ oyi nɔ. Biblia lɛ kɛɛ eji gbɛ “ni kɛ mɔ yaa wala mli, ni mɛi fioo ji mɛi ni naa no.”​—Mateo 7:14.

BƆ NI OBAAFEE ONA WALA GBƐ LƐ

Mɛni ji wala gbɛ lɛ? Nyɔŋmɔ kɛɛ: “Mi Yehowa, miji o-Nyɔŋmɔ lɛ, mɔ ni tsɔɔ bo nii koni oná he sɛɛ lɛ, mɔ ni tsɔɔ bo gbɛ yɛ gbɛ ni esa akɛ onyiɛ nɔ lɛ nɔ lɛ.” (Yesaia 48:17) Gbɛ nɛɛ nɔ nyiɛmɔ ji shihilɛ gbɛ ni hi fe fɛɛ.

Yesu wie akɛ: “Miji gbɛ lɛ kɛ anɔkwale lɛ kɛ wala lɛ.” (Yohane 14:6) Kɛ́ wɔhe anɔkwalei ni Yesu tsɔɔ lɛ wɔye, ni wɔba wɔjeŋ tamɔ lɛ lɛ, wekukpaa kpakpa baahi wɔ kɛ Nyɔŋmɔ teŋ, ni nibii baahi ahã wɔ.

 Te obaafee tɛŋŋ ona wala gbɛ lɛ? Jamɔi pii yɛ, shi Yesu bɔ kɔkɔ akɛ: “Jeee mɔ fɛɛ mɔ ni kɛɔ mi akɛ, ‘Nuŋtsɔ, Nuŋtsɔ’ lɛ, baabote ŋwɛi Maŋtsɛyeli lɛ mli, shi moŋ, mɔ ni feɔ mi-Tsɛ ni yɔɔ ŋwɛi lɛ suɔmɔnaa nii lɛ pɛ.” (Mateo 7:21) Ewie hu akɛ: “Amɛyibii lɛ nyɛkɛbaayoo amɛ.” (Mateo 7:16) Biblia lɛ baanyɛ eye ebua bo ni ona jamɔi lɛ ateŋ nɔ ni ji anɔkwa jamɔ lɛ.​—Yohane 17:17.

Te obaafee tɛŋŋ onyiɛ wala gbɛ lɛ nɔ? Ebaabi ni ole mɔ ni hãa wɔ wala lɛ: Namɔ ni? Te atsɛɔ lɛ tɛŋŋ? Mɛɛ mɔ nɛkɛ eji? Mɛni efeɔ ehãa wɔ? Mɛni ekpaa gbɛ yɛ wɔdɛŋ? *

Nyɔŋmɔ taooo akɛ adesai atsu nii, amɛye nii, amɛshwɛ, ni amɛto weku kɛkɛ. Wɔbaanyɛ wɔle wɔ-Bɔlɔ lɛ, ni wɔtsɔmɔ enanemɛi. Wɔbaanyɛ wɔfee esuɔmɔnaa nii kɛtsɔɔ akɛ wɔsumɔɔ lɛ. Yesu wie akɛ: “Enɛ ji naanɔ wala lɛ, akɛ amɛbaale bo, anɔkwa Nyɔŋmɔ kome lɛ.”​—Yohane 17:3.

NYƆŊMƆ TSƆƆ BIBLIA LƐ NƆ ETSƆƆ BO NII “KONI ONÁ HE SƐƐ.”​—YESAIA 48:17

BƆ NI WƆBAAFEE WƆYI WALA GBƐ LƐ NƆ

Kɛ́ wɔná wɔle nɔ ni anɔkwa Nyɔŋmɔ kome lɛ kpaa gbɛ yɛ wɔdɛŋ lɛ, ekolɛ no baabi ni wɔfee tsakemɔi komɛi. Ekolɛ wɔnáŋ nakai feemɔ mlɛo. Shi anɔkwa, kɛ́ wɔyi wala gbɛ nɛɛ nɔ nɔŋŋ lɛ, nibii baahi ahã wɔ. Yehowa Odasefoi baasumɔ ni amɛkɛ bo akase Biblia lɛ yɛ be kɛ he ni baahi ahã bo ni aheee bo nɔ ko, koni oná hetoi ohã sanebimɔi ni kɔɔ Nyɔŋmɔ he lɛ. Obaanyɛ oya wɔwɛbsaiti ni ji, www.jw.org lɛ nɔ ni obi ni akɛ bo abakase nii.