Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Obaanyɛ Oná Miishɛɛ Bianɛ Po

Obaanyɛ Oná Miishɛɛ Bianɛ Po

ETSƐŊ, hela mɔŋ mɔ ko mɔ ko, mɔ ko egbɔŋ, ni mɔ ko gboŋ hu, ni bo hu obaanyɛ oná shihilɛ ni tamɔ nakai! Shi ŋmɛnɛ lɛ, mɔ fɛɛ mɔ kɛ shihilɛi ni mli wawai kɛ naagbai kpeɔ. Ani nɔ ko yɛ ni baanyɛ aye abua bo? Biblia lɛ baanyɛ aye abua bo ni omii ashɛ ohe, ni otsui anyɔ omli bianɛ po. Naa shihilɛ mli naagbai komɛi kɛ ŋaa ni Biblia lɛ woɔ yɛ he.

MƆ TSUI NI BAANYƆ EMLI

Ŋaa ni Biblia lɛ woɔ: “Shikasuɔmɔ akaba nyɛshihilɛ mli, ni nyɛmii ashɛa nibii ni nyɛyɔɔ amrɔ nɛɛ ahe.”​Hebribii 13:5.

Ŋmɛnɛ lɛ, nibii ni mɛi susuɔ akɛ esa akɛ wɔná eko lɛ efa waa. Kɛ̃lɛ, Biblia lɛ kɛɔ akɛ, wɔmii baanyɛ ‘ashɛ nibii ni wɔyɔɔ amrɔ nɛɛ ahe.’ Yɛ mɛɛ gbɛ nɔ?

Kaasumɔ shika. Mɛi kɛ amɛgbɔmɔtsoŋ hewalɛnamɔ, amɛweku, amɛnanemɛi, amɛjeŋba kpakpa, kɛ amɛhiɛnyam po shãa afɔle yɛ shika hewɔ. (1 Timoteo 6:10) Sɛɛnamɔ ko bɛ he! Ejaakɛ, mɔ ni sumɔɔ ni ená nii lɛ, ninámɔ ‘shɛŋ enaa.’​—Jajelɔ 5:10.

Suɔmɔ gbɔmɛi fe nibii. Anɔkwa, heloonaa nibii ahe yɛ sɛɛnamɔ. Shi amɛnyɛŋ amɛsumɔ wɔ loo amɛhiɛ asɔ wɔ; gbɔmɛi pɛ baanyɛ afee nakai. Kɛ́ wɔyɛ “naanyo kpakpa” lɛ, ebaanyɛ ehã wɔtsui anyɔ wɔmli.​—Abɛi 17:17.

KƐ́ WƆHÃ BIBLIA LƐ TSƆƆ WƆGBƐ LƐ, WƆBAANYƐ WƆNÁ MIISHƐƐ BIANƐ PO

HELA NAA NI ABAAKPEE

Ŋaa ni Biblia lɛ woɔ: “Tsui ni yɔɔ miishɛɛ lɛ, eji tsofa kpakpa.”​Abɛi 17:22.

Miishɛɛ tamɔ “tsofa kpakpa,” ni ebaanyɛ ewa bo ni okpee hela naa. Shi te obaafee tɛŋŋ oná miishɛɛ kɛ́ obɛ hewalɛ?

Le shidaa. Kɛ́ wɔye wɔtsui yɛ wɔnaagbai ahe lɛ, “gbii fɛɛ” baafee tamɔ gbii fɔji. (Abɛi 15:15) Yɛ no najiaŋ lɛ, Biblia lɛ kɛɔ akɛ: “Nyɛfea nyɛhe mɛi ni le shidaa.” (Kolosebii 3:15) Hã ohiɛ asɔ nibii bibiibibii po ni onine shɛɔ nɔ lɛ. Nibii tamɔ hulushinyɔɔ ko ni yɔɔ fɛo, kɔɔyɔɔ ŋmaii ko, loo mɔ ko ni osumɔɔ esane lɛ ŋmɔlɔ baanyɛ ahã shihilɛ aŋɔɔ.

Feemɔ nibii ohã mɛi. Kɛ́ wɔbɛ hewalɛ po ni wɔhãa mɔ nɔ lɛ, wɔbaaná miishɛɛ. (Bɔfoi 20:35) Kɛ́ mɛi ahiɛ sɔ nibii ni wɔfeɔ wɔhãa amɛ lɛ, wɔtsui nyɔɔ wɔmli, ni no hãa wɔjieɔ wɔjwɛŋmɔ yɛ wɔnaagbai lɛ anɔ. Kɛ́ wɔfee nibii ni baahã mɛi atsui anyɔ amɛmli lɛ, wɔ hu wɔtsui baanyɔ wɔmli.

 GBÃLA NI ABAAHÃ ESƆ

Ŋaa ni Biblia lɛ woɔ: “Nyɛkaa nyɛkwɛa ni nyɛna nibii ni he hiaa waa lɛ.”​Filipibii 1:10.

Wu kɛ ŋa ni náaa deka amɛhãaa amɛhe lɛ agbãla lɛ baanyɛ afite. Enɛ hewɔ lɛ, esa akɛ wumɛi kɛ ŋamɛi ahã amɛgbãla lɛ akã amɛtsui nɔ, ejaakɛ eji nibii ni he hiaa waa lɛ ateŋ ekome.

Nyɛfea ekome kɛfea nibii. Nɔ najiaŋ ni mɔ kome baafee nɔ ko ni lɛ pɛ enyaa he lɛ, nyɛtoa gbɛjianɔ ni nyɛfea ekome kɛfea nibii. Biblia lɛ kɛɔ akɛ: “Mɛi enyɔ hi fe mɔ kome.” (Jajelɔ 4:9) Nyɛbaanyɛ nyɛfee ekome kɛhoo nii, kɛgbɔle nyɛkpɔiaŋ, kɛnu nɔ ko, loo kɛjie nyɛhiɛtserɛ.

Hã ena akɛ osumɔɔ lɛ. Biblia lɛ woɔ wumɛi kɛ ŋamɛi hewalɛ ni amɛsumɔ amɛhe, ni amɛbu amɛhe hu. (Efesobii 5:28, 33) Kɛ́ ofeɔ ohiɛ ŋmɔlɔŋmɔlɔ otsɔɔ ohefatalɔ, ofuaa lɛ kɛ suɔmɔ, loo okeɔ lɛ nii lɛ, no baanyɛ ahã nyɛgbãla lɛ asɔ. Anɔkwa, esa akɛ nifeemɔi ni kɔɔ bɔlɛnamɔ he lɛ aya nɔ yɛ wu kɛ ŋa pɛ teŋ.​—Hebribii 13:4.