Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Nyɔŋmɔ Baanyɛ Akwɛ Bo Jogbaŋŋ

Nyɔŋmɔ Baanyɛ Akwɛ Bo Jogbaŋŋ

Nyɔŋmɔ bɔ wɔgbɔmɔtsei lɛ bɔ ni kɛ́ nɔ ko fee wɔ lɛ, lɛ diɛŋtsɛ enyɛ etsa ehe. Kɛ́ wɔyɛ gbɔmɔtsoŋ hewalɛ ni nɔ ko fo wɔ, nɔ ko ŋmala wɔhe, loo nɔ ko gbu wɔ lɛ, wɔgbɔmɔtso lɛ “feɔ nibii babaoo ni baahã fala lɛ agbo​—eda jio, edaaa jio.” (Johns Hopkins Medicine) Kɛ́ nɔ ko ni tamɔ nakai ba lɛ, oya nɔŋŋ kɛkɛ lɛ gbɔmɔtso lɛ ebɔi nibii komɛi feemɔ koni lá ni hoɔ lɛ sɛɛ afo, lá fãji lɛ amli agbele, fala lɛ agbo, ni gbɔmɔtso lɛ mli fãji lɛ aná hewalɛ.

SUSUMƆ ENƐ HE OKWƐ: Kɛji Bɔlɔ lɛ fee wɔgbɔmɔtso lɛ bɔ ni kɛ́ wɔpila lɛ, lɛ diɛŋtsɛ enyɛ etsa ehe lɛ, ani wɔnyɛŋ wɔhe shi ni ewo akɛ, kɛ́ nɔ ko hã wɔhao lɛ, ebaaye ebua wɔ lɛ wɔye? Lalatsɛ lɛ ŋma akɛ: “Etsaa mɛi ni tsuii ekumɔ lɛ; ni efimɔɔ amɛfaji lɛ anɔ.” (Lala 147:3) Shi kɛ́ shihilɛ ko ni otsɔ mli be ko ni eho, loo shihilɛ ko ni okɛkpeɔ amrɔ nɛɛ hãa ohaoɔ lɛ, te ooofee tɛŋŋ oná nɔmimaa akɛ, Yehowa baafimɔ ofaji lɛ anɔ bianɛ kɛ wɔsɛɛ lɛ?

NƆ NI BIBLIA LƐ TSƆƆ WƆ YƐ NYƆŊMƆ SUƆMƆ LƐ HE

Nyɔŋmɔ ekɛɛ akɛ: “Kaashe gbeyei, ejaakɛ mikɛ bo yɛ. Kaaye otsui, ejaakɛ miji o-Nyɔŋmɔ lɛ, mawaje bo, anɔkwa, maye mabua bo.” (Yesaia 41:10) Kɛ́ mɔ ko le akɛ Yehowa susuɔ ehe lɛ, etoiŋ jɔɔ lɛ, ni enyɛɔ edamɔɔ jaramɔ shihilɛi srɔtoi anaa. Bɔfo Paulo tsɛ toiŋjɔlɛ nɛɛ akɛ, “Nyɔŋmɔ toiŋjɔlɛ ni fe niiashishinumɔi fɛɛ lɛ.” Ekɛfata he akɛ: “Yɛ nɔ fɛɛ nɔ mli lɛ, mitsɔɔ mɔ ni wajeɔ mi lɛ nɔ mináa hewalɛ.”​—Filipibii 4:4-7, 9, 13.

Ŋmalɛ lɛ waa wɔ ní wɔná hemɔkɛyeli yɛ nibii ni Yehowa ewo shi akɛ ebaafee ehã adesai wɔsɛɛ lɛ amli. Akɛ nɔkwɛmɔnɔ lɛ, Kpojiemɔ 21:4, 5 lɛ (eyɛ baafa 15) tsɔɔ wɔ ni ebaafee, kɛ nɔ hewɔ ni wɔbaanyɛ wɔhe wɔye akɛ ebaafee lɛ:

  • Yehowa ‘baatsumɔ mɛi ahiŋmɛiiaŋ yaafonui fɛɛ.’ Ebaahã nibii ni hãa wɔnaa nɔ kɛ nibii ni hãa wɔyeɔ wɔtsui lɛ fɛɛ sɛɛ afo, kɛji mɛi komɛi enaaa amɛ nɔ ko po.

  • Maŋtsɛ Ofe ni bɔ nibii fɛɛ lɛ “ta maŋtsɛ sɛi lɛ nɔ” yɛ ŋwɛi anunyam mli, ni ekɛ hewalɛ kɛ hegbɛ ni eyɔɔ lɛ baatsu nii kɛfo nɔnaa sɛɛ, ni ekɛ yelikɛbuamɔ ni he hiaa wɔ lɛ baahã wɔ.

  • Yehowa kɛɛ eshiwoi lɛ, “anɔkwa wiemɔi ni, ni amɛyɛ mli.” Enɛ tsɔɔ akɛ, ekɛ gbɛ́i ni efee ehã ehe akɛ anɔkwa Nyɔŋmɔ lɛ ekã kitã akɛ, eshiwoi lɛ baaba mli kɛ̃.

“‘Ebaatsumɔ amɛhiŋmɛiiaŋ yaafonui fɛɛ, ni gbele bɛ dɔŋŋ, ni mɔ ko yeŋ awerɛho dɔŋŋ, ni mɔ ko woŋ yara ko hu dɔŋŋ, ni mɔ ko hu piŋŋ dɔŋŋ. Tsutsu nibii lɛ eho etee.’ Ni mɔ ni ta maŋtsɛ sɛi lɛ nɔ lɛ kɛɛ: ‘Naa! Miifee nibii fɛɛ ehee.’ Esaa ekɛɛ: ‘Ŋmaa, ejaakɛ wiemɔi nɛɛ, anɔkwa wiemɔi ni, ni amɛyɛ mli.’”​—Kpojiemɔ 21:4, 5.

Jeŋ muu lɛ kɛ Biblia lɛ fɛɛ hãa wɔnaa bɔ ni wɔŋwɛi Tsɛ lɛ ji. Adebɔɔ kɛɔ wɔ yɛ gbɛ nigii nɔ akɛ, wɔhã Nyɔŋmɔ atsɔ wɔ-Naanyo kpaakpa, ni Biblia lɛ hu kɛɔ wɔ tɛ̃ɛ akɛ: “Nyɛtsia nyɛbɛŋkɛa Nyɔŋmɔ, ni ebaatsi ebɛŋkɛ nyɛ.” (Yakobo 4:8) Bɔfoi 17:27 lɛ kɛɔ akɛ: “Ekɛ wɔteŋ mɔ fɛɛ mɔ teŋ jekɛɛɛ.”

Be ni oyaa nɔ okaseɔ Nyɔŋmɔ he nii lɛ, oyiŋ baatsɔ kwraa akɛ ‘ejwɛŋɔ ohe.’ (1 Petro 5:7) Kɛ́ oná hemɔkɛyeli ni tamɔ nɛkɛ yɛ Yehowa mli lɛ, mɛɛ sɛɛ obaaná?

Susumɔ nuu ko ni atsɛɔ lɛ Toru ni jɛ Japan lɛ niiashikpamɔ lɛ he okwɛ. Emami ni tsɔse lɛ lɛ, Kristofonyo ni, shi ekɛ ehe yabɔ Mafia ni yɔɔ Japan lɛ, ni ji kuu ko ni feɔ basabasa ni atsɛɔ amɛ yakuza lɛ he. Ewie akɛ: “No mli lɛ, minuɔ he akɛ Nyɔŋmɔ nyɛɔ mi, ni akɛ, ehãa mɛi ni mile, titri lɛ, mɛi ni misumɔɔ amɛsane waa lɛ gboiɔ koni ekɛgbala mitoi.” Toru tsɔɔ mli akɛ, mɛi fɔji ni ekɛbɔ lɛ, kɛ bɔ ni enuɔ he ehãa lɛ hã ebatsɔ “mɔ ko ni yitsoŋ wa ní enaaa mɔ mɔbɔ.” Ewie akɛ: “No mli lɛ, oti ni ma mihiɛ ji, ni magbe mɔ ko ni ehe gbɛ́i fe mi ni mikɛhe gbɛ́i, kɛkɛ lɛ, migbo akɛ oblanyo.”

Shi be ni Toru kɛ eŋa Hannah fɛɛ kase Biblia lɛ, Toru fee tsakemɔi wuji yɛ eshihilɛ mli. Hannah wie akɛ: “Mi diɛŋtsɛ mina akɛ miwu lɛ miitsake.”  Amrɔ nɛɛ, Toru wieɔ kɛ nɔmimaa akɛ: “Nyɔŋmɔ ko yɛ ni susuɔ wɔteŋ mɔ fɛɛ mɔ he lɛɛlɛŋ. Esumɔɔɔ ni mɔ ko agbo, ni eyɛ he miishɛɛ akɛ ekɛ mɛi ni tsakeɔ amɛtsui lɛɛlɛŋ lɛ atɔmɔi baake amɛ. Eboɔ saji ni wɔnyɛŋ wɔkɛɛ mɔ ko mɔ ko akɛ ja lɛ pɛ, kɛ saji ni mɔ ko mɔ ko nuŋ shishi lɛ po toi. Etsɛŋ kwraa, Yehowa baafo naagbai, kɛ nɔnai, kɛ piŋmɔi fɛɛ asɛɛ. Bianɛ po lɛ, eyeɔ ebuaa wɔ yɛ gbɛi babaoo ni wɔkpaaa gbɛ po anɔ. Esusuɔ wɔhe, ni kɛ́ wɔkɛ shihilɛi ni mli wala kpe lɛ, eyeɔ ebuaa wɔ.”​—Lala 136:23.

Toru niiashikpamɔ lɛ hãa wɔnaa akɛ, kɛ́ wɔná wɔle akɛ Nyɔŋmɔ baanyɛ afo amanehului asɛɛ, ní etsumɔ wɔhiŋmɛiiaŋ yaafonui fɛɛ, ni akɛ, etsɛŋ kwraa ebaafee nakai lɛ, ehãa wɔnáa hiɛnɔkamɔ kɛhã wɔsɛɛ, ni wɔnáa shihilɛ kpakpa hu bianɛ. Hɛɛ, yɛ jeŋ ni nɔnaa eyi mli obɔ nɛɛ mli po lɛ, Nyɔŋmɔ ni yɔɔ suɔmɔ lɛ baanyɛ akwɛ bo jogbaŋŋ.