Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Etsɛŋ, Nyɔŋmɔ Baafo Nɔnai Fɛɛ Asɛɛ

Etsɛŋ, Nyɔŋmɔ Baafo Nɔnai Fɛɛ Asɛɛ

Be ko lɛ, gbɔmɔ kpakpa ko ni atsɛɔ lɛ Habakuk, ni Nyɔŋmɔ ná ehe miishɛɛ lɛ wie akɛ: “Ao, Yehowa, mɛɛ beyinɔ nɔŋŋ mabolɔ kɛhã yelikɛbuamɔ kɛyashi, ni oboŋ mi toi? Mɛɛ beyinɔ nɔŋŋ mabi ni ojie mi kɛje yiwalɛ mli kɛyashi, ni otsuŋ he nii?” (Habakuk 1:2, 3) Ani Habakuk faikpamɔ nɛɛ tsɔɔ akɛ ebɛ hemɔkɛyeli? Dabi kwraa! Nyɔŋmɔ hã ele akɛ, eto be ko ni ekɛbaafo nɔnaa sɛɛ.​—Habakuk 2:2, 3.

Kɛji bo loo mɔ ko ni osumɔɔ esane miina nɔ lɛ, ewaaa akɛ obaanu he akɛ Nyɔŋmɔ sɛɛ miigbala shi, ni akɛ, kulɛ esa akɛ benɛ nɛɛ efee he nɔ ko momo. Kɛ̃lɛ, Biblia lɛ kɛɔ wɔ akɛ: “Jeee akɛ Yehowa sɛɛ miigbala shi yɛ eshiwoo lɛ he, tamɔ bɔ ni mɛi komɛi buɔ nɔ ko akɛ esɛɛ egbala shi lɛ, shi moŋ etsui shi etoɔ ehãa nyɛ, ejaakɛ esumɔɔɔ akɛ akpãtã mɔ ko mɔ ko hiɛ, shi moŋ eesumɔ ni mɛi fɛɛ atsake amɛtsui.”​—2 Petro 3:9.

MƐƐ BE NYƆŊMƆ BAAFO NƆNAA SƐƐ?

Etsɛŋ kwraa! Yesu tsɔɔ akɛ, yinɔ pɔtɛɛ ko baana nibii komɛi ni tsɔɔ akɛ, eshwɛ fioo ni ‘jeŋ’ ko baaba naagbee. (Mateo 24:3-42) Yesu gbalɛ lɛ miiba mli yɛ wɔgbii nɛɛ amli, ni no tsɔɔ akɛ, etsɛŋ kwraa Nyɔŋmɔ kɛ ehe baawo adesai asaji amli. *

Shi mɛɛ gbɛ nɔ Nyɔŋmɔ baatsɔ efo nɔnai fɛɛ asɛɛ? Be ni Yesu yɔɔ shikpɔŋ lɛ nɔ lɛ, ehã ana hewalɛ ni Nyɔŋmɔ yɔɔ ni ekɛbaafo nɔnai asɛɛ lɛ. Naa enɛ he nɔkwɛmɔnii komɛi.

Adebɔɔ Naa Oshãrai: Be ko be ni Yesu kɛ ekaselɔi lɛ kɛ lɛlɛ miifo Galilea Ŋshɔ lɛ, kɔɔyɔɔ wulu ko ni naa wa bɔi tswaa, ni shwɛ fioo ni amɛlɛlɛ lɛ ashiu. Shi Yesu hã ana akɛ, lɛ kɛ e-Tsɛ fɛɛ baanyɛ asa adebɔɔ naa oshãrai anaa. (Kolosebii 1:15, 16) Yesu kɛɛ kɛkɛ akɛ: “Bu onaa! Feemɔ diŋŋ!” Ni mɛni ba? “Kɔɔyɔɔ lɛ kpa tswaa, ni jɛmɛ jɔ diŋŋ.”​—Marko 4:35-39.

Hela: Ale Yesu waa akɛ mɔ ni nyɛɔ etsaa shwilafoi kɛ obubuafoi, kɛ agbɛnɛ hu, mɛi ni miiye gbiligbili kɛ kpiti, loo mɛi ni yɔɔ gbɔmɔtsoŋ gbɔjɔmɔi srɔtoi fɛɛ. “Etsa mɛi ni naa nɔ lɛ fɛɛ.”​Mateo 4:23, 24; 8:16; 11:2-5.

Hɔmɔ: Yesu kɛ hewalɛ ni e-Tsɛ kɛhã lɛ lɛ tsu nii, ni ehã niyenii fioo fee babaoo. Biblia lɛ tsɔɔ akɛ, elɛ mɛi akpei abɔ shii enyɔ sɔŋŋ be ni etsuɔ esɔɔmɔ nitsumɔ lɛ.​—Mateo 14:14-21; 15:32-38.

Gbele: Biblia lɛ tsɔɔ akɛ, Yesu tee mɛi etɛ shi, ni gbohiiashitei nɛɛ hãa wɔnaa faŋŋ akɛ, Yehowa yɛ gbele nɔ hewalɛ. No mli lɛ, mɛi nɛɛ ateŋ mɔ kome egbo gbii ejwɛ.​—Marko 5:35-42; Luka 7:11-16; Yohane 11:3-44.

^ kk. 5 Kɛ́ ootao ole naagbee gbii lɛ he saji babaoo lɛ, kwɛmɔ wolo ni ji, Mɛni Wɔbaanyɛ Wɔkase Kɛjɛ Biblia Lɛ Mli? ni Yehowa Odasefoi fee lɛ yitso 9 lɛ, ni obaanyɛ odaunloodi eko yɛ www.jw.org/gaa ni owooo he nyɔmɔ.