Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

BUU-MƆƆ NO. 3 2016

 SANEYITSO LƐ MLITSƆƆMƆ | KƐ́ OSUƆLƆ KO GBO

Shɛjemɔ Mɛi ni Yeɔ Awerɛho lɛ Amii

Shɛjemɔ Mɛi ni Yeɔ Awerɛho lɛ Amii

Ani onaanyo ko suɔlɔ egbo ni onaaa bɔ ni obaafee oshɛje emii pɛŋ? Bei komɛi lɛ wɔleee nɔ ni wɔbaakɛɛ loo nɔ ni wɔbaafee—no hewɔ lɛ wɔfeee nɔ ko nɔ ko. Shi nibii komɛi yɛ ni wɔbaanyɛ wɔfee kɛye wɔbua.

Bei pii lɛ, nɔ ni nɔŋŋ ni he hiaa ji ní obaahi emasɛi, ni okɛɛ lɛ nɔ ko tamɔ, “Edɔ mi waa, kpoo onu.” Yɛ maji pii anɔ lɛ, fuamɔ ni obaafua mɔ lɛ loo enine mli ni obaamɔ kɛkɛ po hãa enuɔ he akɛ osusuɔ ehe. Kɛ́ mɔ ni agbo yɛ enɔ lɛ miitao ni ewie lɛ, bo lɛ toi jogbaŋŋ. Nɔ ni fe fɛɛ lɛ, obaanyɛ ofee nibii komɛi ni weku ni agbo yɛ amɛnɔ lɛ nyɛko afee lɛ ohã amɛ, tamɔ nihoomɔ, gbekɛbii lɛ akwɛmɔ, loo obaanyɛ oye obua kɛto yara lɛ he gbɛjianɔ kɛ́ amɛmiisumɔ. Nibii ni tamɔ enɛɛmɛi lɛ baaye abua mɛi ni agbo yɛ amɛnɔ lɛ kwraa fe wiemɔi ni ŋɔɔ ni obaawie.

Sɛɛ mli lɛ, obaanyɛ owie mɔ ni egbo lɛ he saji komɛi, tamɔ ekolɛ esui kpakpai komɛi loo nibii komɛi ni efee ni yɔɔ miishɛɛ lɛ ahe. Ekolɛ saji ni tamɔ nɛkɛ lɛ baahã mɔ ni agbo yɛ enɔ lɛ aŋmɔ po. Akɛ nɔkwɛmɔnɔ lɛ, yoo ko ni atsɛɔ lɛ Pam, ni ewu ni atsɛɔ lɛ Ian lɛ gbo afii ekpaa nɛ lɛ kɛɛ akɛ: “Bei komɛi lɛ mɛi kɛɔ mi nibii kpakpai ni Ian  fee ehã amɛ ni milé po, ni enɛ hãa mináa miishɛɛ.”

Akpa shi ana akɛ, kɛ́ agbo yɛ mɔ ko nɔ lɛ, amrɔ nɔŋŋ lɛ enanemɛi yeɔ amɛbua lɛ, shi be ni be shwieɔ mli lɛ, hiɛ kpaa enɔ. No hewɔ lɛ, kɛfee oti ni ma ohiɛ akɛ, kɛ́ agbo yɛ onaanyo ko nɔ lɛ, obaafɔ eshi bimɔ. * Mɛi ni agbo yɛ amɛnɔ lɛ ateŋ mɛi pii ahiɛ sɔɔ enɛ waa, ejaakɛ eyeɔ ebuaa amɛ ni amɛkpeɔ amɛwerɛhoyeli lɛ naa.

Susumɔ yoo ko ni jɛ Japan ni atsɛɔ lɛ Kaori, ni hao waa be ni enyɛmi yoo nukpa gbo nyɔji 15 enumɔ yɛ emami gbele sɛɛ lɛ niiashikpamɔ lɛ he okwɛ. Miishɛɛ sane ji akɛ, enanemɛi lɛ tee nɔ amɛye amɛbua lɛ. Kaori naanyo ko ni atsɛɔ lɛ Ritsuko lɛ ye lɛ onukpa kwraa, shi yoo nɛɛ ŋɔ lɛ efee enaanyo. Kaori kɛɛ akɛ: “Yɛ anɔkwale mli lɛ, kulɛ minyaaa he. Ejaakɛ misumɔɔɔ ni mikɛ mɔ ko yeɔ mimami najiaŋ, ni misusuuu akɛ mɔ ko baanyɛ efee nibii ni mimami feɔ ehãa mi lɛ ehã mi. Shi bɔ ni Mama Ritsuko kɛ mi ye ehã lɛ hã naanyobɔɔ ni yɔɔ gbagbalii bakã mi kɛ lɛ teŋ. Daa otsi lɛ, mi kɛ lɛ feɔ ekome kɛyaa shiɛmɔ kɛ Kristofoi akpeei. Efɔ̃ɔ mi nine ni mi kɛ lɛ yanuɔ tii, ebahãa mi niyenii, ni eŋmalaa mi woji, ni ekɛ kaadi majeɔ mi. Nibii kpakpai ni Mama Ritsuko fee lɛ ná minɔ hewalɛ waa.”

Ní Kaori mami gbo nɛɛ, afii 12 eho, ni amrɔ nɛɛ, lɛ kɛ ewu fɛɛ kɛ amɛbe fɛɛ miishiɛ. Kaori kɛɛ akɛ: “Mama Ritsuko miiya nɔ eefee nibii kɛmiitsɔɔ akɛ esusuɔ mihe lolo. Be fɛɛ be ni maku misɛɛ maya shĩa lɛ, miyasaraa lɛ, ni ewoɔ mi hewalɛ waa, ni enɛ hãa mináa miishɛɛ.”

Mɔ kroko hu ni mɛi tee nɔ amɛye amɛbua lɛ be ni agbo yɛ enɔ lɛ ji Yehowa Odasefonyo ko ni yɔɔ Cyprus ni atsɛɔ lɛ Poli lɛ. Ewu ni atsɛɔ lɛ Sozos lɛ ji asafoŋ onukpa ko ni mli hi waa. Bei pii lɛ efɔ̃ɔ awusãi kɛ okulafoi nine kɛbaa amɛshĩa lɛ ni amɛkɛ amɛ gbaa sane ni amɛkɛ amɛyeɔ nii, ni enɛ ji nɔkwɛmɔnɔ ni sa waa. (Yakobo 1:27) Dɔlɛ sane ji akɛ, be ni Sozos ná afii 53 lɛ, ená aŋsɔ hela ko, ni egbo. Poli wie akɛ, “Miwu ni mikɛ lɛ ehi shi afii 33 lɛ gbo eshi mi.”

Taomɔ gbɛi ni obaanyɛ otsɔ nɔ oye obua mɛi ni agbo yɛ amɛnɔ lɛ

Be ni afu Sozos sɛɛ lɛ, Poli kɛ enakutsoŋbi ni eye afii 15 ni atsɛɔ lɛ Daniel lɛ fã kɛyahi Canada. Be ni amɛyɔɔ jɛmɛ lɛ, amɛkɛ Yehowa Odasefoi asafo ko bɔi bɔɔ. Poli wie akɛ, “Mɛi ni yɔɔ wɔsafo hee lɛ mli lɛ lé nɔ ni eba wɔnɔ kɛ naagbai ni wɔkɛkpeɔ. Shi no etsiii amɛnaa akɛ amɛbaabɛŋkɛ wɔ ni amɛwie nibii ni baashɛje wɔmii ni amɛye amɛbua wɔ. Yelikɛbuamɔ nɛɛ sa waa, titri lɛ yɛ nakai beiaŋ, ejaakɛ no mli lɛ mibinuu lɛ tsɛ he miihia lɛ waa! Asafoŋ onukpai lɛ fee nibii ni tsɔɔ akɛ amɛsusuɔ Daniel he waa diɛŋtsɛ. Amɛteŋ mɔ kome po bɔɔ mɔdɛŋ akɛ be fɛɛ be ni ekɛ enanemɛi baayajie amɛhiɛtserɛ loo amɛbaayatswa bɔɔl lɛ, ebaahã Daniel afata amɛhe.” Poli kɛ ebinuu Daniel fɛɛ miiya nɔ jogbaŋŋ ŋmɛnɛ.

Gbɛi srɔtoi pii yɛ ni wɔbaanyɛ wɔtsɔ nɔ wɔshɛje mɛi ni yeɔ awerɛho lɛ amii. Biblia lɛ hu shɛjeɔ wɔmii kɛtsɔ hiɛnɔkamɔ ni yɔɔ miishɛɛ ni ehãa wɔnáa kɛhã wɔsɛɛ lɛ nɔ.

^ kk. 6 Mɛi komɛi po kadiɔ gbi ni mɔ lɛ gbo lɛ yɛ amɛkalanda nɔ koni no akai amɛ ni amɛshɛje mɛi ni agbo yɛ amɛ nɔ lɛ amii—yɛ gbi ni mɔ lɛ gbo lɛ nɔ loo yɛ nakai beiaŋ.