Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

BUU-MƆƆ NO. 3 2016

 SANEYITSO LƐ MLITSƆƆMƆ | KƐ́ OSUƆLƆ KO GBO

Gbohii lɛ Baahi Shi Ekoŋŋ!

Gbohii lɛ Baahi Shi Ekoŋŋ!

Ekolɛ obaakai akɛ, Gail ni atsĩ etã yɛ saji ni tsɔ hiɛ lɛ ateŋ ekome mli lɛ wie akɛ, eleee kɛji ebaanyɛ ekpa ewu Rob gbele lɛ he awerɛho ni eyeɔ lɛ. Kɛ̃lɛ, eyɛ hiɛnɔkamɔ akɛ ebaana lɛ ekoŋŋ yɛ jeŋ hee ni Nyɔŋmɔ ewo shi akɛ ekɛbaaba lɛ mli. Gail wie akɛ: “Ŋmalɛ ko ni misumɔɔ waa ji, Kpojiemɔ 21:3, 4 lɛ.” Jɛmɛ kɛɔ akɛ: “Nyɔŋmɔ diɛŋtsɛ kɛ amɛ baahi shi. Ni ebaatsumɔ amɛhiŋmɛiiaŋ yaafonui fɛɛ, ni gbele bɛ dɔŋŋ, asaŋ awerɛhoyeli ko loo yarawoo ko loo hejaramɔ ko hu bɛ dɔŋŋ. Tsutsu nibii lɛ eho etee.”

Gail kɛfata he akɛ: “Enɛ ji hiɛnɔkamɔ ni miyɔɔ kɛhã wɔsɛɛ. Minuɔ he waa mihãa mɛi ni suɔlɔi egboi shi amɛbɛ hiɛnɔkamɔ ko kwraa akɛ amɛbaana amɛ ekoŋŋ lɛ.” Gail hiɔ shi yɛ ehemɔkɛyeli lɛ naa kɛtsɔ ebe fɛɛ ni ekɛshiɛɔ lɛ nɔ, ni eyeɔ ebuaa ekutsoŋbii lɛ ni amɛle akɛ, Nyɔŋmɔ ewo shi akɛ be baashɛ ni “gbele bɛ dɔŋŋ.”

Hiob ná nɔmimaa kɛ abaatee lɛ shi

Ekolɛ obaakɛɛ akɛ, ‘Enyɛŋ eba lɛ nakai!’ Shi susumɔ nuu ko atsɛɔ lɛ Hiob lɛ nɔkwɛmɔnɔ lɛ he okwɛ. No mli lɛ ehe miiye waa. (Hiob 2:7) Eyɛ mli akɛ Hiob shwe gbele moŋ, shi ená hemɔkɛyeli akɛ Nyɔŋmɔ yɛ hewalɛ ni ekɛbaatee lɛ shi kɛba wala mli ekoŋŋ yɛ shikpɔŋ. Ewie kɛ nɔmimaa akɛ: ‘Miná ní kulɛ oŋɔ mi otée yɛ gbohiiaje. Kulɛ oootsɛ́, ni mahereo nɔ; ni oootao onine naa nitsumɔ lɛ sɛɛ gbɛ.’ (Hiob 14:13, 15) Hiob yɛ nɔmimaa akɛ e-Nyɔŋmɔ lɛ hiɛ baatse lɛ, ni ebaashwe akɛ ekɛ lɛ baaba wala mli ekoŋŋ.

Etsɛŋ, nakai pɛpɛɛpɛ Nyɔŋmɔ baafee—ebaatee Hiob kɛ mɛi babaoo ni anyɛŋ akane lɛ shibe ni shikpɔŋ lɛ etsɔ paradeiso lɛ. (Luka 23:42, 43) Biblia wieɔ yɛ Bɔfoi 24:15 lɛ akɛ, ‘Abaatee mɛi ashi.’ Yesu ma nɔ mi ehã wɔ akɛ, “Enɛ akafee nyɛ naakpɛɛ ejaakɛ ŋmɛlɛtswaa lɛ miiba, be mli ni mɛi fɛɛ ni yɔɔ gbohii akaimɔ bui lɛ amli lɛ baanu egbee ni amɛbaaje kpo.” (Yohane 5:28, 29) Hiob baana be ni shiwoo nɛɛ baaba mli. Ebaaná hegbɛ ‘etsɔ oblanyo ekoŋŋ’ ni eheloo lɛ “aaatsɔ efɔ́ fe gbekɛ nɔ” kɛya naanɔ. (Hiob 33:24, 25) Nakai nɔŋŋ ebaaji yɛ mɛi fɛɛ ni hiɛ sɔɔ gbɛjianɔ ni Nyɔŋmɔ eto akɛ ebaatee mɛi ashi kɛba wala mli yɛ shikpɔŋ lɛ nɔ lɛ agbɛfaŋ.

Kɛ́ osuɔlɔ ko egbo lɛ, ekolɛ saji ni wɔsusu he kɛtsɔ hiɛ lɛ ejieŋ awerɛho ni oyeɔ lɛ kɛjɛŋ jɛmɛ kwraa. Shi kɛ́ ojwɛŋ Nyɔŋmɔ shiwoi ni yɔɔ Biblia lɛ mli lɛ anɔ lɛ, obaaná hiɛnɔkamɔ, ni no baaye abua bo ni okpee naa.1 Tesalonikabii 4:13.

Ani obaasumɔ ni ole nibii babaoo ni kɔɔ bɔ ni ooofee okpee awerɛhoyeli naa? Aloo oyɛ sanebimɔ ko ni kɔɔ sane nɛɛ he, tamɔ “Mɛni hewɔ Nyɔŋmɔ ŋmɛɔ efɔŋfeemɔ kɛ piŋmɔ gbɛ?” Ofainɛ yaa wɔwɛbsaiti lɛ nɔ, yɛ jw.org/gaa koni okwɛ hetoi ni shɛjeɔ mɔ mii ni Biblia lɛ kɛhãa lɛ.

Ekrokromɛi Hu Nɛ

Mɛni Baa yɛ Gbele Sɛɛ?

Biblia lɛ wieɔ mɛi kpaanyɔ komɛi ni gboi ni te shi ekoŋŋ lɛ ahe. Mɛni amɛwie yɛ shihilɛ mli ni gbohii lɛ yɔɔ lɛ he?