Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

BUU-MƆƆ NO. 3 2016

 SANEYITSO LƐ MLITSƆƆMƆ | KƐ́ OSUƆLƆ KO GBO

Bɔ ni Ooofee Okpee Awerɛhoyeli Naa

Bɔ ni Ooofee Okpee Awerɛhoyeli Naa

Mɛi babaoo kɛ ŋaawoo hãa yɛ sane nɛɛ he. Shi jeee fɛɛ yeɔ ebuaa. Akɛ nɔkwɛmɔnɔ lɛ, mɛi komɛi baawo bo ŋaa ni okafó loo okahã mɛi na akɛ ooye awerɛho. Mɛi krokomɛi hu baakɛɛ bo ni ofó waa koni ana bɔ ni eshãa bo ehãa. Shi Biblia lɛ hãa wɔnáa jwɛŋmɔ ni ja yɛ sane nɛɛ he, ni niiamlitaomɔ ni afee nyɛsɛɛ nɛɛ lɛ hu fiɔ ŋaawoo ni Biblia lɛ kɛhãa lɛ sɛɛ.

Yɛ maji komɛi anɔ lɛ, asusuɔ akɛ kɛ́ nuu fó lɛ, belɛ ehiɛ waaa. Shi ani esa akɛ mɔ ko hiɛ agbo akɛ ebaafó, titri lɛ yɛ mɛi ateŋ? Mɛi ni kaseɔ adesa jwɛŋmɔ lɛ he nii lɛ etsɔɔ akɛ, yaafó fata awerɛhoyeli he. Ni be ni be shwieɔ mli lɛ, ekolɛ awerɛhoyeli lɛ baaye abua bo ni okpee shihilɛ lɛ naa, ekɔɔɔ he eko bɔ ni emli wa hã. Shi kɛ́ otsĩ awerɛhoyeli lɛ naa lɛ, ebaanyɛ eye bo awui. Nɔ ko bɛ Biblia lɛ mli ni tsɔɔ akɛ kɛ́ mɔ ko fó be ni eeye awerɛho lɛ, eji tɔmɔ aloo ehiɛ waaa. Akɛ nɔkwɛmɔnɔ lɛ, susumɔ Yesu he okwɛ. Eyɛ mli akɛ Yesu yɛ hewalɛ ni ekɛbaatee gbohii ashi moŋ, shi be ni enaanyo Lazaro gbo lɛ, efó!Yohane 11:33-35.

Bei pii lɛ, kɛ́ mɔ ko miiye esuɔlɔ ko gbele he awerɛho lɛ, emli fuɔ, titri lɛ kɛ́ gbele lɛ ba lɛ kpatu. Nibii pii baanyɛ ahã mɔ ko ni agbo yɛ enɔ lɛ mli afu, tamɔ kɛ́ mɔ ko ni ebuɔ lɛ waa lɛ wie nɔ ko ni esaaa. Nuu ko ni atsɛɔ lɛ Mike ni jɛ South Africa lɛ wie akɛ, “Be ni mipapa gbo lɛ, no mli lɛ miye afii 14 pɛ. Be ni afeɔ yara lɛ, Anglican osɔfo ni kwɛ yara lɛ nɔ lɛ wie akɛ, Nyɔŋmɔ miitao gbɔmɛi kpakpai yɛ ŋwɛi, ni eŋɔɔ amɛ mra. * Enɛ hã mimli wo la ejaakɛ no mli lɛ, wɔpapa he miihia wɔ waa. Amrɔ nɛɛ afii 63 eho, shi minuɔ dɔlɛ he lolo.”

Ni fɔyeli henumɔ ni anáa lɛ hu? Kɛ́ gbele lɛ ba lɛ kpatu lɛ, mɔ ni agbo yɛ enɔ lɛ baasusu akɛ, ‘Eji mifee nɛkɛ kɛ nɛkɛ kulɛ, enɛ fɛɛ baaa.’ Aloo ekolɛ naagbee kwraa ni okɛ mɔ ni egbo lɛ shara lɛ, okɛ lɛ be. Enɛ baahã onu he waa akɛ oyeɔ fɔ.

Kɛ́ oonu fɔyeli kɛ dɔlɛ he lɛ, kaatsimɔ nɔ. Moŋ lɛ, okɛ onaanyo ko ni baabo bo toi, ni baahã ona akɛ ejeee tɔmɔ akɛ mɔ ko ni agbo yɛ enɔ lɛ baanu he nakai lɛ agba he sane. Biblia lɛ kaiɔ wɔ akɛ: “Naanyo sumɔɔ mɔ bei fɛɛ mli, ni afɔ lɛ akɛ nyɛmi hã haomɔ be.”Abɛi 17:17.

Yehowa Nyɔŋmɔ, ni ji wɔ-Bɔlɔ lɛ, ji Naanyo ni fe fɛɛ ni mɔ ko ni agbo yɛ enɔ lɛ baanyɛ ena. Fɔsemɔ otsuiŋ oshwie ehiɛ yɛ sɔlemɔ mli, ejaakɛ ‘esusuɔ ohe.’ (1 Petro 5:7) Agbɛnɛ hu lɛ, ewo shi akɛ ekɛ “Nyɔŋmɔ toiŋjɔlɛ ni fe niiashishinumɔi fɛɛ lɛ” baashɛje mɛi fɛɛ ni feɔ nakai lɛ amii. (Filipibii 4:6, 7) Kɛfata he lɛ, hã Nyɔŋmɔ atsɔ miishɛjemɔ wiemɔi ni yɔɔ e-Wiemɔ, ni ji Biblia lɛ mli lɛ nɔ eye ebua bo. Ŋmalamɔ ŋmalɛi komɛi ni shɛjeɔ mɔ mii lɛ oshwie shi. (Kwɛmɔ  akrabatsa ni fata he lɛ.) Obaanyɛ okase ekomɛi owo oyitsoŋ po. Enɛɛmɛi anɔ ni ooojwɛŋ lɛ baanyɛ aye abua bo, titri lɛ gbɛkɛ be ni eshwɛ okome ní onyɛɛɛ owɔ.Yesaia 57:15.

 Nyɛsɛɛ nɛɛ, kansa gbe nuu ko ni wɔbaatsɛ lɛ Jack, ni eye afii 40 lɛ ŋa. Jack kɛɛ bei komɛi lɛ enuɔ shoofeemɔ he waa. Shi sɔlemɔ eye ebua lɛ. Ewie akɛ: “Kɛ́ misɔle mihã Yehowa lɛ, minuɔ he akɛ jeee mikome miyɔɔ. Bei pii lɛ, mihiɛ tsɛ̃ɔ maŋkɛ ní minyɛɛɛ mawɔ dɔŋŋ. Kɛ́ mikane miishɛjemɔ wiemɔi kɛjɛ Ŋmalɛi lɛ amli ni mijwɛŋ nɔ, ni mifɔse mitsuiŋ susumɔi lɛ mishwie Nyɔŋmɔ hiɛ yɛ sɔlemɔ mli lɛ, mihe jɔɔ mi waa, ni mitsui ŋmɛɔ dɛmm, ni minyɛɔ miwɔɔ.”

Hela bamɔ oblayoo ko ni atsɛɔ lɛ Vanessa lɛ mami, ni egbo. Vanessa hu ena hewalɛ ni sɔlemɔ yɔɔ. Ekɛɛ akɛ: “Kɛ́ miwerɛ ho mihe fe nine lɛ, misɔleɔ mitsɛɔ Nyɔŋmɔ, kɛkɛ lɛ mijwa yaafo. Yehowa boɔ misɔlemɔi lɛ atoi, ni ehãa mi hewalɛ ni mikɛkpee shihilɛ lɛ naa be fɛɛ be.”

Mɛi ni woɔ mɛi ni agbo yɛ amɛnɔ lɛ ŋaa lɛ ateŋ mɛi komɛi woɔ mɛi ni ewa kɛhã amɛ akɛ amɛaakpee awerɛhoyeli naa lɛ ŋaa ni amɛfee nibii kɛye amɛbua mɛi krokomɛi loo ni amɛkɛ amɛbe aye abua kɛtsu maŋ nitsumɔ ko. Enɛ baanyɛ ahã mɔ lɛ aná miishɛɛ, ni ebaaba ewerɛhoyeli lɛ shi. (Bɔfoi 20:35) Kristofoi babaoo ni agbo yɛ amɛnɔ lɛ ena akɛ, mɛi krokomɛi ní amɛyeɔ amɛbuaa lɛ shɛjeɔ amɛmii.2 Korintobii 1:3, 4.

^ kk. 5 Tsɔɔmɔ nɛɛ ejɛɛɛ Biblia lɛ mli. Biblia lɛ tsɔɔ nibii etɛ ni kɛ gbele baa.Jajelɔ 9:11, 12; Yohane 8:44; Romabii 5:12.