Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Mɛɛ Be Naagbee Lɛ Baaba? Nɔ Ni Yesu Wie

Mɛɛ Be Naagbee Lɛ Baaba? Nɔ Ni Yesu Wie

Tamɔ wɔna yɛ sane ni tsɔ hiɛ lɛ mli lɛ, kɛ́ Biblia lɛ miiwie je lɛ naagbee lɛ he lɛ, etsɔɔɔ akɛ abaakpãtã shikpɔŋ lɛ loo adesai ahiɛ kwrakwra. Moŋ lɛ, etsɔɔ akɛ abaakpãtã mɛi fɔji kɛ amɛgbɛjianɔtoi gbohii lɛ fɛɛ hiɛ. Shi ani Biblia lɛ etsɔɔ be ni jeŋ fɔŋ nɛɛ baaba naagbee?

NAA SAJI ENYƆ KOMƐI NI YESU WIE YƐ NAAGBEE LƐ HE:

“No hewɔ lɛ, nyɛyaa nɔ nyɛbua, ejaakɛ nyɛleee gbi lɛ loo ŋmɛlɛtswaa lɛ.”​—MATEO 25:13.

“Nyɛyaa nɔ nyɛkwɛa, nyɛyaa nɔ nyɛshia kpe, ejaakɛ nyɛleee be ni ato lɛ.”​—MARKO 13:33.

Hewɔ lɛ, mɔ ko mɔ ko bɛ shikpɔŋ lɛ nɔ ni le be tuuntu ni je lɛ baaba naagbee. Shi Nyɔŋmɔ ‘eto be,’ ni ji ‘gbi kɛ ŋmɛlɛtswaa’ pɔtɛɛ ko, ni naagbee lɛ baaba. (Mateo 24:36) Ani enɛ tsɔɔ akɛ gbɛ ko kwraa bɛ ni wɔbaanyɛ wɔtsɔ nɔ wɔle akɛ naagbee lɛ ebɛŋkɛ? Dabi kwraa. Yesu tsɔɔ ekaselɔi lɛ nibii komɛi ni kɛ́ amɛna lɛ no baatsɔɔ akɛ naagbee lɛ ebɛŋkɛ.

OKADI LƐ

Nibii nɛɛ baafee “je lɛ naagbee gbii lɛ” he okadi. Yesu wie akɛ: “Jeŋmaŋ baate shi awo jeŋmaŋ, ni maŋtsɛyeli baate shi awo maŋtsɛyeli, ni hɔmɔ kɛ shikpɔŋhosomɔi baaba yɛ heihei.” (Mateo 24:3, 7) Ewie hu akɛ, “tsɛŋemɔ helai ni gbeɔ mɔ baaba.” (Luka 21:11) Ani oona nibii ni Yesu gba akɛ amɛbaaba lɛ?

Ŋmɛnɛ lɛ, tai, hɔmɔ, shikpɔŋhosomɔi, kɛ helai ni eko nyiɛ eko sɛɛ ehã mɛi miina nɔ waa. Akɛ nɔkwɛmɔnɔ lɛ, yɛ afi 2004 mli lɛ, ŋshɔ mli shikpɔŋhosomɔ ko ni ba yɛ Indian Ocean lɛ mli lɛ, yatsɛ tsunami ko kɛba, ni egbe mɛi 225,000 sɔŋŋ. Yɛ nɔ ni fe afi mli lɛ, COVID-19 tsɛŋemɔ hela lɛ gbe aaafee mɛi akpekpei 2.6 sɔŋŋ yɛ jeŋ fɛɛ. Yesu kɛɛ nibii ni tamɔ enɛɛmɛi lɛ baatsɔɔ akɛ je lɛ naagbee lɛ ebɛŋkɛ.

 “NAAGBEE GBII LƐ”

Biblia lɛ tsɛ be ni baatsɔ naagbee lɛ hiɛ lɛ akɛ “naagbee gbii lɛ.” (2 Petro 3:3, 4) Sane ni yɔɔ 2 Timoteo 3:1-5 lɛ tsɔɔ akɛ, mɛi ajeŋba baakpɔtɔ waa yɛ naagbee gbii lɛ amli. (Kwɛmɔ akrabatsa ni yitso ji, “ Be Ni Baatsɔ Je Lɛ Naagbee Lɛ Hiɛ” lɛ.) Ŋmɛnɛ lɛ, ani onaa mɛi ni fóɔ amɛ pɛ amɛnɔ mli, yeɔ amim, hiɛ yɔɔ la, ni ejieee suɔmɔ kpo? Enɛ hu tsɔɔ akɛ, etsɛŋ kwraa, je lɛ naagbee lɛ baaba.

Bei enyiɛ naagbee gbii lɛ baahe? Biblia lɛ tsɔɔ akɛ, ebaahe “be fioo kɛkɛ.” No sɛɛ lɛ, Nyɔŋmɔ baakpãtã “mɛi ni fiteɔ shikpɔŋ lɛ” ahiɛ.​—Kpojiemɔ 11:15-18, shishigbɛ niŋmaa; 12:12.

 ETSƐŊ, SHIKPƆŊ LƐ BAATSƆ PARADEISO!

Nyɔŋmɔ eto gbi kɛ ŋmɛlɛtswaa ni ekɛ jeŋ fɔŋ nɛɛ naagbee lɛ baaba lɛ momo. (Mateo 24:36) Shi, sane kpakpa kroko hu yɛ, ni no ji akɛ, Nyɔŋmɔ sumɔɔɔ “akɛ akpãtã mɔ ko mɔ ko hiɛ.” (2 Petro 3:9) Ehã wɔ hegbɛ ni wɔkase nɔ ni esumɔɔ, ni wɔbo lɛ toi. Mɛni hewɔ? Ejaakɛ eesumɔ ni wɔyi aná wala yɛ je nɛɛ naagbee lɛ mli, ni wɔhi ejeŋ hee lɛ mli; nakai beiaŋ lɛ, shikpɔŋ lɛ baatsɔ paradeiso.

Nyɔŋmɔ eto gbɛjianɔ koni atsɔɔ mɛi ni yɔɔ jeŋ fɛɛ lɛ bɔ ni amɛbaafee amɛhi jeŋ hee lɛ mli, yɛ e-Maŋtsɛyeli lɛ shishi. Yesu kɛɛ abaashiɛ Nyɔŋmɔ Maŋtsɛyeli lɛ he sane kpakpa lɛ “yɛ shikpɔŋ lɛ nɔ fɛɛ.” (Mateo 24:14) Yɛ afi 2019 mli lɛ, Yehowa Odasefoi ni yɔɔ jeŋ fɛɛ lɛ kɛ nɔ ni fe ŋmɛlɛtswai akpekpe toi akpei enyɔ shiɛ, ni amɛtsɔɔ mɛi Biblia mli sane ni hãa anáa hiɛnɔkamɔ lɛ. Yesu kɛɛ abaatsu shiɛmɔ nitsumɔ nɛɛ yɛ shikpɔŋ lɛ nɔ fɛɛ dani naagbee lɛ baaba.

Etsɛŋ kwraa, adesai anɔyeli baaba naagbee. Shi sane kpakpa lɛ ji akɛ, oyi baanyɛ aná wala yɛ je nɛɛ naagbee lɛ mli, ni ohi shikpɔŋ ni etsɔ Paradeiso ni Nyɔŋmɔ ewo he shi lɛ nɔ. Obaana bɔ ni obaafee ohi nakai jeŋ hee lɛ mli lɛ yɛ sane ni nyiɛ sɛɛ lɛ mli.

Yesu gbalɛ ni kɔɔ “naagbee gbii lɛ” ahe lɛ hãa wɔnáa hiɛnɔkamɔ