ANI nɔ ko egba onaa waa aahu akɛ, oná kulɛ ogbo? Kɛ́ nakai lɛ, ekolɛ onuɔ bɔ ni Adriana nu he ehã lɛ shishi. Eye etsui fe nine, emiishɛɛ kɛ ehiɛnɔkamɔ fɛɛ tã. Datrɛfoi kɛɛ Adriana ená hela ko ni hãaa mɔ aná miishɛɛ be fɛɛ be.

Susumɔ nuu ko ni jɛ Japan ni atsɛɔ lɛ Kaoru, ni kwɛ efɔlɔi ni bɛ hewalɛ, ni amɛgbɔlɔ hu lɛ he okwɛ. Ewie akɛ: “Nakai beiaŋ lɛ, minitsumɔ lɛ miigbala mimli waa. Eshɛ be ko ni minyɛɛɛ nii maye, ni kɛ́ miyakã shi hu lɛ, miwɔɔɔ jogbaŋŋ. Minu he akɛ kɛ́ migbo lɛ, fɛɛ sɛɛ baafo.”

Nigerianyo ko ni atsɛɔ lɛ Ojebode lɛ hu kɛɛ akɛ: “Bei pii lɛ, mimiishɛɛ tãa aahu akɛ mifóɔ, no hewɔ lɛ, mitao gbɛ nɔ ni matsɔ ni mafo miwala sɛɛ.” Miishɛɛ sane ji akɛ, Ojebode, Kaoru, kɛ Adriana fɛɛ egbeee amɛhe. Shi daa afi lɛ, mɛi akpei ohai abɔ gbeɔ amɛhe.

Hii ji mɛi titri ni gbeɔ amɛhe, efeɔ amɛteŋ mɛi pii hiɛgbele akɛ amɛbaabi ni aye abua amɛ. Yesu wie akɛ, mɛi ni bɛ hewalɛ lɛ, datrɛfonyo he hiaa amɛ. (Luka 5:31) No hewɔ lɛ, kɛ́ ohaoɔ aahu akɛ, onuɔ he akɛ ogbe ohe lɛ, ofainɛ kaahã efee bo hiɛgbele akɛ obaabi ni aye abua bo. Mɛi ni ehao lɛ ateŋ mɛi pii ena akɛ, datrɛfonyo ni amɛbaayana lɛ baanyɛ awa amɛ ni amɛkpee naagba lɛ naa. Ojebode, Kaoru, kɛ Adriana fɛɛ yana datrɛfonyo, ni no ehã amɛnyɛ amɛmiikpee amɛnaagbai lɛ anaa.

Ekolɛ datrɛfoi lɛ baahã mɔ lɛ tsofã, loo amɛbaabi lɛ saji kɛkɛ lɛ amɛwo lɛ ŋaa, loo amɛbaafee enyɔ lɛ fɛɛ. Mɛi ni ehao lɛ sumɔɔ hu ni amɛwekumɛi kɛ amɛnanemɛi anu amɛ shishi, amɛná tsui amɛhã amɛ, ni amɛjie suɔmɔ kpo amɛtsɔɔ amɛ. Yehowa Nyɔŋmɔ ji naanyo ni fe fɛɛ ni wɔbaanyɛ wɔná. Etsɔɔ e-Wiemɔ lɛ, ni ji Biblia lɛ, nɔ eyeɔ ebuaa wɔ waa.

Bei pii lɛ, ebiɔ ni datrɛfonyo aye abua mɔ ko ni ehao lɛ be kplaŋŋ, ni agbɛnɛ hu, mɔ lɛ afee tsakemɔi komɛi yɛ eshihilɛ mli. Shi kɛ́ ohaoɔ yɛ be kɛ beiaŋ lɛ, obaanyɛ oná hiɛnɔkamɔ tamɔ Ojebode ná lɛ. Ekɛɛ akɛ: “Miikpa be ni Yesaia 33:24 lɛ baaba mli lɛ gbɛ. Jɛmɛ tsɔɔ akɛ, be ko baashɛ ni mɛi ni yɔɔ shikpɔŋ lɛ nɔ lɛ ateŋ mɔ ko ekɛŋ akɛ, ‘Mibɛ hewalɛ.’” Hã Nyɔŋmɔ shiwoo ni kɔɔ “shikpɔŋ hee” ni mɔ ko ‘piŋ’ dɔŋŋ yɛ nɔ lɛ ashɛje omii, tamɔ eshɛje Ojebode mii lɛ. (Kpojiemɔ 21:1, 4) Shiwoo nɛɛ tsɔɔ akɛ, mɔ ko piŋ yɛ jwɛŋmɔŋ kɛ henumɔŋ dɔŋŋ. Opiŋmɔi lɛ fɛɛ asɛɛ baafo kɛbaaya naanɔ. ‘Okaiŋ opiŋmɔi lɛ dɔŋŋ, ni amɛbaŋ otsui mli hu dɔŋŋ.’​—Yesaia 65:17.