Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Be Ni Mɔ Ko Ni Osumɔɔ Esane Waa Egbo

Be Ni Mɔ Ko Ni Osumɔɔ Esane Waa Egbo

“Be ni minyɛmi nuu nukpa lɛ gbo trukaa lɛ, mifee basaa. Nyɔji komɛi asɛɛ lɛ, kɛ́ mita shi nɔŋŋ kɛkɛ lɛ mikai lɛ, enɛ hãa mipiŋɔ waa; minuɔ he tamɔ nɔ ni akɛ kakla miigbulɔ mi yɛ mimligbɛ tɔ̃ɔ. Bei komɛi lɛ, mimli fuɔ waa. Mɛni hewɔ kwraa minyɛmi nuu lɛ gbo? Mishwaa mihe akɛ mináaa bei babaoo mihãaa lɛ.”—Vanessa, eyɛ Australia.

KƐ́ OMƆ KO egbo pɛŋ lɛ, ekolɛ bo hu oye awerɛho, onu shoofeemɔ he, ni ofee basaa. Ekolɛ omli fu, oshwa ohe, ni gbeyei hu mɔ bo. Ekolɛ jeŋ shihilɛ je otsine po.

Ejeee tɔmɔ akɛ obaaye awerɛho, kɛ́ etee nɔ be kplaŋŋ po. No moŋ tsɔɔ akɛ, osumɔɔ mɔ ni egbo lɛ sane waa. Shi ani nɔ ko yɛ ni baanyɛ aye abua bo?

NƆ NI EYE EBUA MƐI KOMƐI

Ekolɛ obaanu he tamɔ nɔ ni dɔlɛ lɛ sɛɛ efooo, shi ŋaawoi ni nyiɛ sɛɛ nɛɛ baanyɛ aye abua bo:

TƆMƆ BƐ HE AKƐ OBAAYE AWERƐHO BE KPLAŊŊ

Esoro bɔ ni mɔ fɛɛ mɔ yeɔ awerɛho ehãa, kɛ be sɛɛkɛlɛ ni ekɛfeɔ nakai. Shi kɛ́ ofó lɛ, ebaanyɛ ehã ohe ajɔ bo. Vanessa ni awie ehe kɛtsɔ hiɛ lɛ wie akɛ: “Mifóɔ; ehãa mijieɔ dɔlɛ lɛ kpo.” Yoo ko ni atsɛɔ lɛ Sofía, ni nyɛmi yoo gbo trukaa lɛ kɛɛ akɛ: “Kɛ́ mijwɛŋ nɔ ni ba lɛ he lɛ, edɔɔ mi waa, etamɔ nɔ ni akpɔ fala ko nɔ ni aato nɔ. Eshãa mɔ waa diɛŋtsɛ, shi ebaahã fala lɛ agbo.”

HÃ ALE OSUSUMƆI KƐ BƆ NI ONUƆ HE OHÃA

Eji anɔkwale akɛ, bei komɛi lɛ, obaasumɔ ni otse ohe yɛ mɛi ahe. Shi awerɛhoyeli ji jatsu ko ni tsii,  okome onyɛŋ otere. Jared ni eye afii 17, ni papa gbo lɛ wie akɛ: “Mihã mɛi le bɔ ni minuɔ he mihãa. Efeee mi akɛ amɛnu mi shishi, shi eŋɔɔ minaa akɛ mihã amɛle bɔ ni minuɔ he mihãa.” Janice ni atsĩ etã yɛ klɛŋklɛŋ sane lɛ mli lɛ hu kɛfata he akɛ: “Mikɛ mɛi gba sane, ni ehã mitsui nyɔ mimli waa. Minu he akɛ amɛnu bɔ ni minuɔ he mihãa lɛ shishi, ni minuuu shoofeemɔ he.”

HÃ AYE ABUA BO

Datrɛfonyo ko kɛɛ akɛ: “Kɛ́ agbo yɛ mɔ ko nɔ ni ehã enanemɛi kɛ ewekumɛi ye amɛbua lɛ yɛ gbele lɛ sɛɛ nɔŋŋ, be ni dɔlɛ ni enuɔ he lɛ naa wa waa lɛ, enyɛɔ ekpeɔ awerɛhoyeli lɛ naa yɛ gbɛ ni waaa nɔ.” Hã onanemɛi lɛ ale nɔ ni amɛbaanyɛ amɛfee kɛwa bo; ekolɛ amɛmiisumɔ ni amɛwa bo, shi amɛleee nɔ ni amɛbaafee kɛwa bo.​—Abɛi 17:17.

TSI OBƐŊKƐ NYƆŊMƆ

Yoo ko ni atsɛɔ lɛ Tina lɛ kɛɛ akɛ: “Be ni kansa gbe miwu trukaa lɛ, minyɛɛɛ makɛɛ lɛ minaagbai lɛ dɔŋŋ, no hewɔ lɛ, mikɛɔ Nyɔŋmɔ nɔ fɛɛ nɔ! Daa leebi lɛ, mibiɔ lɛ ni ewa mi kɛtsu nibii ahe nii yɛ gbi lɛ mli. Nyɔŋmɔ ye ebua mi yɛ gbɛi babaoo anɔ.” Yoo ko hu ni atsɛɔ lɛ Tarsha, ni mami gbo be ni eye afii 22 lɛ wie akɛ: “Biblia lɛ kanemɔ ji nɔ ni shɛje mimii gbi fɛɛ gbi. Ehãa mináa nɔ ko kpakpa mijwɛŋɔ nɔ.”

FEEMƆ GBOHIIASHITEE LƐ HE MFONIRI

Tina kɛfata he akɛ: “Shishijee lɛ, gbohiiashitee he hiɛnɔkamɔ lɛ eshɛjeee mimii, ejaakɛ miitao mana miwu lɛ​—ni mibihii lɛ hu miitao amɛna amɛpapa​—amrɔ nɔŋŋ. Shi bianɛ lɛ, afii ejwɛ eho, ni mishwɛɛɛ hiɛnɔkamɔ nɛɛ he kwraa. Ewajeɔ mi waa. Mifeɔ he mfoniri ni miina lɛ ekoŋŋ, ni enɛ hãa mitsui nyɔɔ mimli waa!”

Ekolɛ awerɛho ni oyeɔ lɛ sɛɛ efoŋ amrɔ nɔŋŋ. Shi Vanessa niiashikpamɔ lɛ baanyɛ awo bo hewalɛ. Ewie akɛ, “Obaanu he akɛ onyɛŋ okpee shihilɛ lɛ naa, shi fiofio lɛ, nibii baahi.”

Kaimɔ akɛ, eyɛ mli akɛ ohiɛ baatse mɔ lɛ yɛ be kɛ beiaŋ moŋ, shi esaaa akɛ ohãa jeŋ shihilɛ jeɔ otsine. Nyɔŋmɔ sumɔɔ bo, no hewɔ lɛ, ebaawa bo ni oná nanemɛi kpakpai, ni otsui hu anyɔ omli. Ni etsɛŋ, Nyɔŋmɔ baatee gbohii lɛ ashi. Eesumɔ ni ofua mɛi ni osumɔɔ amɛsane waa lɛ ekoŋŋ. Kɛkɛ lɛ, awerɛho ni oyeɔ lɛ sɛɛ baafo kɛya naanɔ!