Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Halamɔ wiemɔ Ga

Jeŋ Shihilɛ Akaje Otsine

Jeŋ Shihilɛ Akaje Otsine

Faizal ŋa gbo, ni afi sɛɛ nɔŋŋ lɛ, ehe bahia ni afee etsui opireshɛŋ. Ewie akɛ: “Be ni mikane Hiob wolo lɛ, minu he akɛ Yehowa hã aŋma yɛ yiŋtoo ko hewɔ. Kɛ́ wɔkane mɔ ko ni nu he tamɔ bɔ ni wɔnuɔ he lɛ he sane yɛ Biblia lɛ mli lɛ, eshɛjeɔ wɔmii.” Ekɛfata he akɛ: “Esaaa akɛ wɔhãa jeŋ shihilɛ jeɔ wɔtsine.”

Tarsha mami gbo be ni edako. Ekɛɛ akɛ: “Eyɛ mli akɛ wɔyɛ naagbai babaoo moŋ, shi kɛ́ wɔle wɔ-Bɔlɔ lɛ, wɔtsui baanyɔ wɔmli, wɔbaaná hiɛnɔkamɔ, ni wɔbaaná miishɛɛ hu. Yehowa baanyɛ akwɛ wɔ ni eye ebua wɔ yɛ naagbai ni wɔkɛkpeɔ daa gbi lɛ amli aahu.”

SAJI ni tsɔ hiɛ lɛ ehã wɔna shihilɛi komɛi ni mli wawai ni baanyɛ ahã jeŋ shihilɛ aje wɔtsine. Be ni okɛ shihilɛi ni tamɔ nakai kpeɔ lɛ, ekolɛ obaabi ohe kɛji hiɛnɔkamɔ ko yɛ, loo mɔ ko jwɛŋɔ ohe po. Kaashe gbeyei, Nyɔŋmɔ jwɛŋɔ ohe. Ojara wa hã lɛ.

Mɔ ni ŋma Lala 86 lɛ kɛ ehiɛ fɔ̃ Nyɔŋmɔ nɔ, ni no hã ewie akɛ: “Miboɔ mitsɛɔ bo yɛ mihaomɔ gbi lɛ nɔ, ejaakɛ obaahere mi nɔ.” (Lala 86:7) Shi ekolɛ obaabi ohe akɛ, ‘Te Nyɔŋmɔ baafee tɛŋŋ ehere mi nɔ “yɛ mihaomɔ gbi lɛ nɔ” lɛ?’

Eyɛ mli akɛ ekolɛ Nyɔŋmɔ tsuŋ onaagbai lɛ ahe nii amrɔ nɔŋŋ moŋ, shi e-Wiemɔ lɛ, ni ji Biblia lɛ, kɛɛ ebaanyɛ ehã bo toiŋjɔlɛ ni okɛdamɔ naa. Ewie akɛ: ‘Nyɛkayea nyɛtsui yɛ nɔ ko nɔ ko he, shi moŋ yɛ nɔ fɛɛ nɔ mli lɛ, nyɛtsɔa sɔlemɔ, kɛ fai ni akɛ hiɛdɔɔ kpaa, kɛ shidaa nɔ nyɛhãa Nyɔŋmɔ alea nyɛnibimɔi lɛ; ni Nyɔŋmɔ toiŋjɔlɛ ni fe niiashishinumɔi fɛɛ lɛ baabu nyɛtsuii kɛ nyɛsusumɔi ahe.’ (Filipibii 4:6, 7, shishigbɛ niŋmaa) Ofainɛ, kwɛmɔ bɔ ni ŋmalɛi ni nyiɛ sɛɛ nɛɛ hãa wɔnaa akɛ, wɔsane kã Nyɔŋmɔ tsui nɔ lɛɛlɛŋ.

Nyɔŋmɔ Jwɛŋɔ Ohe

“Nyɔŋmɔ ekuuu ehiɛ efɔ̃ɔɔ [afilimata kome] folo po nɔ. . . . Nyɛjara wa fe afilimatai babaoo.”​Luka 12:6, 7, shishigbɛ niŋmaa.

SUSUMƆ HE OKWƐ: Ekolɛ mɛi pii enaaa loofɔji bibii tamɔ afilimatai akɛ amɛhe yɛ sɛɛnamɔ, shi Nyɔŋmɔ jwɛŋɔ amɛhe. Nyɔŋmɔ naa amɛteŋ eko fɛɛ eko; amɛ fɛɛ amɛjara wa hã lɛ. Shi adesai ajara wa hã Nyɔŋmɔ kwraa fe afilimatai. Adesai anɔ kwɔ fe nibii fɛɛ ni Nyɔŋmɔ ebɔ yɛ shikpɔŋ lɛ nɔ lɛ. Abɔ amɛ ‘tamɔ bɔ ni Nyɔŋmɔ yɔɔ’ lɛ, ni amɛnyɛɔ amɛkaseɔ esui ni nɔ bɛ lɛ, ni amɛjieɔ amɛ kpo.​—1 Mose 1:26, 27.

“Ao Yehowa, otao mimli, ni ole mi. . . . Onaa misusumɔi . . . Pɛimɔ mimli, ni ole susumɔi ni gbaa minaa lɛ fɛɛ.”​Lala 139:1, 2, 23.

SUSUMƆ HE OKWƐ: Nyɔŋmɔ le bo jogbaŋŋ. Ele nɔ fɛɛ nɔ ni gbaa onaa. Eyɛ mli akɛ ekolɛ mɛi nuŋ naagbai ni okɛkpeɔ lɛ ashishi moŋ, shi Nyɔŋmɔ jwɛŋɔ ohe, ni eesumɔ ni eye ebua bo. Enɛ hewɔ lɛ, kaahã jeŋ shihilɛ je otsine.

 Ogbeko Ojeŋ Naa

“Ao Yehowa, bo misɔlemɔ lɛ toi; hã bo ni miboɔ kɛhã yelikɛbuamɔ lɛ ashɛ oŋɔɔ. . . . Ba otoi shi ohã mi; kɛ́ mibo mitsɛ bo lɛ, heremɔ mi nɔ oya. . . . Ebaabo mɛi ni bɛ mɔ ko lɛ asɔlemɔ toi.”​Lala 102:1, 2, 17.

SUSUMƆ HE OKWƐ: Etamɔ nɔ ni kɛjɛ be ni adesai bɔi piŋmɔ nɛɛ, Yehowa eŋmala amɛyaafonui lɛ fɛɛ ahe saji eshwie shi. (Lala 56:8) Bo hu onɔ fata he. Nyɔŋmɔ le shihilɛi ni mli wawai ni okɛkpeɔ kɛ yaafo ni ofóɔ lɛ fɛɛ, ejaakɛ ojara wa hã lɛ.

“Kaaye otsui, ejaakɛ miji o-Nyɔŋmɔ lɛ, mawaje bo, anɔkwa, maye mabua bo . . . mi, Yehowa, o-Nyɔŋmɔ lɛ . . . mi mɔ ni kɛɔ bo akɛ, ‘Kaashe gbeyei. Maye mabua bo’ lɛ.”​Yesaia 41:10, 13.

SUSUMƆ HE OKWƐ: Nyɔŋmɔ efee klalo akɛ ebaaye ebua bo. Kɛ́ ogbee shi lɛ, ebaawó onɔ.

Wɔsɛɛ Lɛ Nibii Baahi

“Nyɔŋmɔ sumɔɔ je lɛ aahu akɛ ekɛ e-Bi koome lɛ hã, koni mɔ fɛɛ mɔ ni heɔ enɔ eyeɔ lɛ hiɛ akakpãtã shi moŋ ená naanɔ wala.”​Yohane 3:16.

SUSUMƆ HE OKWƐ: Nyɔŋmɔ sumɔɔ bo aahu akɛ, ejɛ esuɔmɔ mli ekɛ e-Bi Yesu hã akɛ afɔle yɛ ohewɔ. Afɔle nɛɛ egbele gbɛ kɛhã bo koni onyɛ ohi shi kɛ miishɛɛ kɛya naanɔ. *

Ekolɛ ohao ni oonu he akɛ jeŋ shihilɛ eje otsine, shi bo lɛ kasemɔ Nyɔŋmɔ Wiemɔ lɛ jogbaŋŋ koni hiɛnɔkamɔ ni oyɔɔ yɛ nɔ ni Nyɔŋmɔ ewie lɛ mli lɛ mli awa kpɛŋŋ. Kɛ́ ofee nakai lɛ, omii baashɛ ohe, ni obaaná nɔmimaa akɛ wɔsɛɛ lɛ, nibii baahi.

^ kk. 19 Kɛ́ ootao ole bɔ ni obaafee oná Yesu kpɔmɔ afɔle lɛ he sɛɛ lɛ he saji babaoo lɛ, kwɛmɔ vidio ni ji, Nyɛkaia Yesu Gbele Lɛ ni yɔɔ www.jw.org lɛ nɔ lɛ. Yaa WOJI KƐ NIBII > VIDIOI > WƆSAFOŊ KPEEI KƐ WƆSHIƐMƆ NITSUMƆ LƐ.