Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Halamɔ wiemɔ Ga

Obaanyɛ Ohi Shi Kɛya Naanɔ Yɛ Shikpɔŋ Lɛ Nɔ

Obaanyɛ Ohi Shi Kɛya Naanɔ Yɛ Shikpɔŋ Lɛ Nɔ

HIƐNƆKAMƆ NƐƐ NƆ BƐ KWRAA! Wɔ-Bɔlɔ lɛ ewo shi akɛ ebaahã wɔná naanɔ wala yɛ biɛ, yɛ shikpɔŋ lɛ nɔ. Shi ewa kɛhã mɛi pii akɛ amɛbaahe enɛ amɛye. Amɛkɛɔ akɛ, ‘Mɔ fɛɛ mɔ baagbo kɛ̃. Nakai ato akɛ eba lɛ.’ Mɛi komɛi hu nuɔ he akɛ, abaanyɛ ahi shi kɛya naanɔ, shi jeee yɛ shikpɔŋ lɛ nɔ. Amɛkɛɛ ja ogbo ni otee ŋwɛi dani obaanyɛ ohi shi kɛya naanɔ. Te bo hu osusuɔ tɛŋŋ?

Dani obaawie nɔ ko lɛ, susumɔ sanebimɔi etɛ ni nyiɛ sɛɛ nɛɛ ahetoi ni Biblia lɛ kɛhã lɛ ahe okwɛ: Mɛɛ gbɛ nɔ bɔ ni abɔ gbɔmɔ ahã lɛ hãa wɔnaa afii abɔ ni kulɛ esa akɛ ehi shi? Mɛni hewɔ Nyɔŋmɔ bɔ shikpɔŋ lɛ kɛ gbɔmɛi? Te fee tɛŋŋ adesai bɔi gboimɔ?

ESORO BƆ NI ABƆ GBƆMƆ AHÃ

Esoro gbɔmɔ kwraa yɛ nibii ni wala yɔɔ amɛmli ni Nyɔŋmɔ ebɔ yɛ shikpɔŋ lɛ nɔ lɛ fɛɛ ahe. Mɛni hewɔ wɔkɛɔ nakai? Biblia lɛ tsɔɔ akɛ, adesai pɛ Nyɔŋmɔ bɔ amɛ ‘tamɔ bɔ ni eyɔɔ lɛ, tamɔ ehenɔ.’ (1 Mose 1:26, 27) Mɛni enɛ tsɔɔ? Etsɔɔ akɛ, Nyɔŋmɔ bɔ adesai bɔ ni amɛbaanyɛ amɛjie esui lɛ akpo. Sui nɛɛ ekomɛi ji suɔmɔ kɛ jalɛsaneyeli.

Agbɛnɛ hu, abɔ gbɔmɔ bɔ ni ebaanyɛ ejwɛŋ ni esusu nii ahe, enyɛ ekpa ekpakpa kɛ efɔŋ mli, ní etao Nyɔŋmɔ sɛɛ gbɛ hu. Enɛ hãa wɔnyɛɔ wɔnaa bɔ ni jeŋ muu lɛ, kɛ adebɔɔ nibii ni yɔɔ mli lɛ yɔɔ fɛo hã, ni wɔnyaa nibii ni atɛŋ, lalai, kɛ lalawiemɔi hu ahe. Nɔ ni fe fɛɛ lɛ, adesai pɛ abɔ amɛ bɔ ni amɛbaanyɛ amɛjá Bɔlɔ lɛ. Sui nɛɛ hãa anaa srɔto agbo ni kã adesai kɛ bɔɔ nii fɛɛ ni hiɛ kamɔ ni yɔɔ shikpɔŋ lɛ nɔ lɛ ateŋ.

Yɛ sui ni nɔ bɛ ni Nyɔŋmɔ kɛhã wɔ lɛ sɛɛ lɛ, ehã wɔ nyɛmɔ hu ni wɔbaanyɛ wɔkɛjie amɛ kpo jogbaŋŋ fe bɔ ni wɔfeɔ amrɔ nɛɛ, ni wɔbaanyɛ wɔfee nakai kɛya naanɔ po. No hewɔ lɛ, bo lɛ susumɔ he okwɛ: Eji Nyɔŋmɔ bɔ wɔ ni wɔhi shi afii fioo ko pɛ kulɛ, ani ebaabɔ wɔ nakai? Anɔkwa sane lɛ ji akɛ, Nyɔŋmɔ miisumɔ ni wɔkɛ miishɛɛ ahi shi yɛ biɛ, yɛ shikpɔŋ lɛ nɔ kɛya naanɔ, ni no hewɔ ehã wɔ sui kpakpai kɛ nyɛmɔi nɛɛ.

NƆ HEWƆ NI NYƆŊMƆ BƆ SHIKPƆŊ LƐ KƐ GBƆMƐI

Shi mɛi komɛi kɛɛ Nyɔŋmɔ ebɔɔɔ gbɔmɔ ni ehi shikpɔŋ lɛ nɔ kɛya naanɔ. Amɛkɛɛ abɔ shikpɔŋ lɛ koni gbɔmɛi ahi nɔ fioo ní akɛkwɛ amɛteŋ mɛi ni  esa akɛ amɛya ŋwɛi ni amɛkɛ Nyɔŋmɔ ayahi shi kɛya naanɔ. Shi kɛ́ nakai sane lɛ ji lɛ, belɛ Nyɔŋmɔ ji mɔ ehã nɔfɔŋfeemɔ kɛ awuiyeli eyi shikpɔŋ lɛ nɔ obɔ lɛ. Shi ani nakai eji? Dabi, jeee nakai kwraa Nyɔŋmɔ yɔɔ. Biblia lɛ wie yɛ ehe akɛ: “Eyeɔ jalɛ sane yɛ egbɛi fɛɛ mli. Nyɔŋmɔ anɔkwafo ji lɛ, ni efeee nɔ ko ni ejaaa; jalɔ ji lɛ, eja.”​—5 Mose 32:4.

Biblia lɛ hãa wɔleɔ nɔ hewɔ ni Nyɔŋmɔ bɔ shikpɔŋ lɛ, ekɛɔ akɛ: “Ŋwɛi lɛ, Yehowa nɔ ni, shi ekɛ shikpɔŋ lɛ ehã gbɔmɛi abii.” (Lala 115:16) Nyɔŋmɔ bɔ shikpɔŋ lɛ fɛfɛo koni adesai ahi nɔ daa, ni ekɛ nɔ fɛɛ nɔ ni baahã wɔtsui anyɔ wɔmli, ni wɔhi shi kɛya naanɔ lɛ wo nɔ.​—1 Mose 2:8, 9.

“Ŋwɛi lɛ, Yehowa nɔ ni, shi ekɛ shikpɔŋ lɛ ehã gbɔmɛi abii.”​—Lala 115:16

Agbɛnɛ hu, Biblia lɛ hãa wɔleɔ nɔ hewɔ ni Nyɔŋmɔ bɔ adesai. Ekɛɛ Adam kɛ Hawa akɛ, ‘amɛfɔ ni amɛyi shikpɔŋ lɛ nɔ obɔ ni amɛkwɛ nɔ, ni amɛye bɔɔ nii fɛɛ ni tsiɔ amɛhe yɛ shikpɔŋ lɛ nɔ lɛ anɔ.’ (1 Mose 1:28) Eji hegbɛ kpele ni amɛná akɛ amɛbaakura Paradeiso lɛ, ní amɛhã ekpele shikpɔŋ lɛ nɔ fɛɛ! No hewɔ lɛ, kulɛ amɛ kɛ bii ni amɛbaafɔ lɛ baahi shi kɛya naanɔ yɛ shikpɔŋ lɛ nɔ, jeee ŋwɛi.

MƐNI HEWƆ WƆGBOIƆ?

Mɛni hewɔ wɔgboiɔ mɔ? Biblia lɛ tsɔɔ akɛ, ŋwɛibɔfo ko ka akɛ ebaafite gbɛjianɔ ni Nyɔŋmɔ to yɛ Eden lɛ. Sɛɛ mli lɛ, abale ŋwɛibɔfo nɛɛ akɛ Satan Abonsam. Mɛni efee?

Satan laka wɔklɛŋklɛŋ fɔlɔi lɛ, ni ji Adam kɛ Hawa, koni amɛbafata ehe kɛtse Nyɔŋmɔ hiɛ atua. Satan kɛɛ amɛ akɛ, Nyɔŋmɔ kɛ nɔ ko kpakpa miitee amɛ, no ji, ni amɛ diɛŋtsɛ amɛbaatsɔɔ nɔ ni ji ekpakpa kɛ nɔ ni ji efɔŋ. Amɛyafi Satan sɛɛ, ni amɛte shi amɛwo Nyɔŋmɔ. Mɛni jɛ mli kɛba? Sɛɛ mli lɛ, amɛgboi tamɔ bɔ ni Nyɔŋmɔ kɛɛ lɛ pɛpɛɛpɛ. Amɛnyɛɛɛ amɛhi Paradeiso lɛ mli yɛ shikpɔŋ lɛ nɔ kɛya naanɔ.​—1 Mose 2:17; 3:1-6; 5:5.

Adam kɛ Hawa toigbele lɛ esa adesai fɛɛ ahe kɛbashi ŋmɛnɛ. Nyɔŋmɔ Wiemɔ lɛ kɛɔ akɛ: “Gbɔmɔ kome [Adam] nɔ esha tsɔ kɛba je lɛ mli, ni gbele tsɔ esha nɔ kɛba, ni no hã gbele tsɛŋe gbɔmɛi fɛɛ.” (Romabii 5:12) Esha kɛ gbele ni wɔná kɛjɛ wɔklɛŋklɛŋ fɔlɔi lɛ adɛŋ lɛ hewɔ wɔgboiɔ, shi jeee yiŋ ko ni Nyɔŋmɔ ekpɛ momo ni wɔnyɛŋ shishi wɔnu lɛ hewɔ.

OBAANYƐ OHI SHI KƐYA NAANƆ YƐ SHIKPƆŊ LƐ NƆ

Atua ni atse yɛ Eden lɛ fiteee yiŋtoo hewɔ ni Nyɔŋmɔ bɔ shikpɔŋ lɛ kɛ adesai lɛ. Suɔmɔ ni nɔ bɛ ni Nyɔŋmɔ yɔɔ, kɛ jalɛ sane ni eyeɔ lɛ hã eto gbɛjianɔ koni wɔye wɔhe kɛje esha kɛ gbele ni wɔná kɛjɛ Adam ŋɔɔ lɛ dɛŋ. Bɔfo Paulo tsɔɔ mli akɛ: “Esha dɛŋ nyɔmɔwoo ji gbele, shi nikeenii ni Nyɔŋmɔ kɛhãa ji naanɔ wala kɛtsɔ Kristo Yesu, wɔ-Nuŋtsɔ lɛ nɔ.” (Romabii 6:23) Nyɔŋmɔ jɛ suɔmɔ mli “ekɛ e-Bi koome lɛ hã, koni mɔ fɛɛ mɔ ni heɔ enɔ eyeɔ lɛ hiɛ akakpãtã shi moŋ ená naanɔ wala.” (Yohane 3:16) Yesu jɛ esuɔmɔ mli ekɛ ehe hã akɛ kpɔmɔ afɔle, ni ekɛkpɔ̃ nibii fɛɛ ni Adam hã eŋmɛɛ wɔ lɛ. *

Etsɛŋ, shi ni Nyɔŋmɔ ewo akɛ shikpɔŋ lɛ baatsɔ paradeiso lɛ baaba mli. Kɛ́ obo Yesu ŋaawoo ni nyiɛ sɛɛ nɛɛ toi lɛ, bo hu obaanyɛ ohi jɛmɛ. Ewie akɛ: “Nyɛtsɔa agbó bibioo lɛ mli, ejaakɛ agbó ni da kɛ gbɛ ni lɛɛ lɛ ji nɔ ni kɛ mɔ yaa hiɛkpatamɔ mli, ni mɛi babaoo ji mɛi ni tsɔɔ agbó nɛɛ mli; shi agbó bibioo lɛ kɛ gbɛ ni elɛɛɛ lɛ ji nɔ ni kɛ mɔ yaa wala mli, ni mɛi fioo ji mɛi ni naa no.” (Mateo 7:13, 14) No hewɔ lɛ, kɛ́ obaahi jɛmɛ wɔsɛɛ lɛ, edamɔ onɔ. Mɛni obaafee?

^ kk. 17 Kɛ́ ootao ole bɔ ni obaanyɛ oná kpɔmɔnɔ lɛ he sɛɛ lɛ he saji babaoo lɛ, kwɛmɔ wolo ni ji, Mɛni Wɔbaanyɛ Wɔkase Kɛjɛ Biblia Lɛ Mli? ni Yehowa Odasefoi fee lɛ yitso 5 lɛ. Eko yɛ www.jw.org/gaa.