Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Gbalɛi Ni Eba Mli

Gbalɛi Ni Eba Mli

Wɔna yɛ Croesus sane ni wɔwie he kɛtsɔ hiɛ lɛ mli akɛ, Delphi wɔŋtsɛ lɛ laka lɛ, ni no hã Persia maŋtsɛ lɛ ye enɔ kunim. Shi Biblia lɛ gba gbalɛ ko ni sa kadimɔ waa yɛ Persia maŋtsɛ lɛ he, ni gbalɛ nɛɛ ba mli fitsofitso.

Hebri gbalɔ Yesaia tsɛ Koresh kɛ egbɛ́i, ni etsɔɔ bɔ ni Koresh baaye Babilon maŋ kpeteŋkpele lɛ nɔ kunim ehã. Ewie enɛ aaafee afii 200 sɔŋŋ dani afɔ Koresh.

Yesaia 44:24, 27, 28: “Nɔ ni Yehowa . . . kɛɛ nɛ: . . . ‘Mɔ ni kɛɔ nui ni mli kwɔlɔ lɛ akɛ, “Miimɔ, ni mahã ofai lɛ fɛɛ hu agbi” lɛ; Mɔ ni kɛɔ yɛ Koresh he akɛ, “Lɛ ji tookwɛlɔ ni mihala, ni ebaafee misuɔmɔnaa nii fɛɛ” lɛ; Mɔ ni kɛɔ yɛ Yerusalem he akɛ, “Abaatswa lɛ ekoŋŋ,” ni ekɛɔ yɛ sɔlemɔ shĩa lɛ hu he akɛ, “Abaatswa ofaneshi” lɛ.’”

Greek yinɔsaneŋmalɔ Herodotus wie akɛ, Koresh asraafoi lɛ gbá nujɔɔ amɛhã Yufrate Faa ni tsɔɔ Babilon maŋ lɛ mli lɛ. Enɛ hã Koresh asraafoi lɛ nyɛ amɛnyiɛ kɛtsɔ faa lɛ mli kɛbote maŋ lɛ mli. Be ni Koresh ŋɔ maŋ lɛ, eŋmɛɛ Yudafoi ni aŋɔ amɛ nom kɛtee Babilon lɛ ahe, ni amɛku amɛsɛɛ amɛyatswa Yerusalem ekoŋŋ. Nakai beiaŋ lɛ, akpãtã Yerusalem hiɛ ni ekã shi amaŋfɔ afii 70.

Yesaia 45:1: “Nɔ ni Yehowa kɛɔ Koresh, ni ji mɔ ni efɔ lɛ mu, mɔ ni mimɔ eninejurɔ mli koni maba jeŋmaji ashi yɛ ehiɛ, koni majie tawuu nii yɛ maŋtsɛmɛi ahe, koni magbele shinai ntai yɛ ehiɛ, bɔ ni afee ni akaŋamɔ agbói lɛ nɛ.”

Persiabii lɛ tsɔ agbó kɛ enaa shinaa nta wulu lɛ mli kɛbote maŋ lɛ mli. No mli lɛ, ashi shinaa lɛ afɔ̃ shi kɛkɛ. Eji Babilonbii lɛ le ŋaa ni Koresh toɔ yɛ amɛhe kulɛ, amɛbaaŋamɔ agbói fɛɛ ni hiɛ tsɔɔ faa lɛ. Shi akɛni amɛŋamɔɔɔ agbói lɛ hewɔ lɛ, maŋ lɛ yaje oshãra mli.

Gbalɛ ni sa kadimɔ nɛɛ ji Biblia mli gbalɛi babaoo ni eba mli lɛ ateŋ ekome kɛkɛ. * Bei pii kɛ́ gbɔmɛi gba akɛ nɔ ko baaba lɛ, amɛkɛɔ akɛ ejɛ amɛmale nyɔŋmɔi lɛ aŋɔɔ. Shi Biblia mli gbalɛi lɛ jɛ Nyɔŋmɔ ŋɔɔ. Lɛ ewie akɛ: “Mi mijɛɔ shishijee migbaa nibii ni baaba yɛ naagbee, ni mijɛɔ blema mijajeɔ nibii ni anako afee lɛ.”​—Yesaia 46:10.

Anɔkwa Nyɔŋmɔ lɛ, mɔ ni atsɛɔ lɛ Yehowa lɛ, pɛ baanyɛ awie nakai. Egbɛ́i lɛ shishi ji, “Ehãa Etsɔɔ.” No hãa wɔnaa akɛ, ebaanyɛ ele wɔsɛɛ saji, ni ebaanyɛ ekudɔ nibii ni baaba wɔsɛɛ bɔ ni afee ni eyiŋtoo  aba mli. Enɛ hãa wɔnáa nɔmimaa akɛ, bɔ fɛɛ bɔ ni fee lɛ, ebaahã eshiwoi fɛɛ aba mli.

GBALƐI NI MIIBA MLI ŊMƐNƐ

Ani obaasumɔ ni ole nibii komɛi ni Biblia lɛ egba yɛ wɔgbii nɛɛ ahe? Aaafee afii 2,000 ni eho nɛ lɛ, Biblia lɛ gba akɛ, “naagbee gbii lɛ amli lɛ, bei krɛdɛi ni mli shihilɛ wa baaba.” Mɛni naagbee gbii ahe ewieɔ lɛ? Jeee shikpɔŋ lɛ loo adesai anaagbee gbii, shi moŋ béi kɛ nɔnai kɛ naagbai ni adesai kɛkpe afii akpei abɔ lɛ anaagbee gbii. Hã wɔsusu “naagbee gbii lɛ” ahe gbalɛi lɛ fioo komɛi ahe wɔkwɛ.

2 Timoteo 3:1-5: “Naagbee gbii lɛ amli lɛ, . . . gbɔmɛi baatsɔmɔ hesuɔlɔi, shikasuɔlɔi, shwãlɔi, henɔwolɔi, mɛi ni wieɔ wiemɔi fɔji, fɔlɔi anɔ toigbolɔi, mɛi ni hiɛ esɔɔɔ nii, mɛi ni yeee anɔkwa, mɛi ni bɛ suɔmɔ kɛhã amɛweku mli bii, mɛi ni anyɛɛɛ akɛ amɛ afee kpaŋmɔ, mɛi ni wieɔ mɛi krokomɛi ahe efɔŋ, mɛi ni nyɛɛɛ amɛhe nɔ amɛye, mɛi ni hiɛ yɔɔ la, mɛi ni sumɔɔɔ ekpakpa, mɛi ni jieɔ mɛi amɛhãa, kuɛŋtilɔi, mɛi ni naa amɛhe tsɔ, mɛi ni sumɔɔ shwɛmɔ-kɛ-ŋɔɔmɔ moŋ fe Nyɔŋmɔ, mɛi ni anaa amɛ akɛ amɛsumɔɔ Nyɔŋmɔjamɔ shi amɛhãaa ená amɛnɔ hewalɛ lɛ.”

Ani oona akɛ mɛi ni jieɔ sui nɛɛ akpo lɛ ayi miifa be fɛɛ be? Ani oyɔse akɛ mɛi ni yɔɔ je lɛ mli lɛ ateŋ mɛi pii sumɔɔ amɛ diɛŋtsɛ amɛhe, amɛsumɔɔ shika, ni amɛwóɔ amɛhe nɔ? Ani oona akɛ ŋmɛnɛ lɛ, mɛi ahiɛ esɔɔɔ nii, ni anyɛɛɛ akɛ amɛ afee kpaŋmɔ? Ekã shi faŋŋ akɛ, ona hu akɛ, gbekɛbii pii ebuuu amɛfɔlɔi, ni mɛi pii hu sumɔɔ shwɛmɔ-kɛ-ŋɔɔmɔ moŋ fe Nyɔŋmɔ. Ni be ni je naa ni je tsɛreɔ lɛ, nibii amli miiwo wu.

Mateo 24:6, 7: “Nyɛbaanu tai kɛ tai amaniɛbɔi ahe. . . . Jeŋmaŋ baate shi awo jeŋmaŋ, ni maŋtsɛyeli baate shi awo maŋtsɛyeli.”

Akɔntaabui komɛi tsɔɔ akɛ, mɛi ni agbe yɛ tai amli kɛjɛ afi 1914 kɛbaa nɛɛ ayi fa kwraa fe akpekpei 100, ni maji pii amli bii ayifalɛ shɛɛɛ yibɔ nɛɛ. Bo lɛ, susumɔ mɛi abɔ ni fó, ni amɛye awerɛho, ni amɛna nɔ yɛ amɛsuɔlɔi ni gboi lɛ ahewɔ lɛ ahe okwɛ. Shi ani jeŋmaji lɛ ekase nɔ ko yɛ mli, ni amɛkpa ta wu?

Mateo 24:7: “Hɔmɔ . . . baaba.”

Gbɛjianɔtoo ni ji, World Food Programme lɛ wie akɛ: “Niyenii ni anáa yɛ je lɛŋ ŋmɛnɛ lɛ baanyɛ alɛ mɔ fɛɛ mɔ, shi loloolo lɛ, mɛi akpekpei 815, ni ji mɔ kome yɛ mɛi nɛɛhu mli lɛ, yawɔɔ kɛ hɔmɔ daa gbi. Kɛfata he lɛ, kɛ́ ahala mɛi etɛ lɛ, amɛteŋ mɔ kome bɛ hewalɛ yɛ niyenii kpakpa ni enáaa eye lɛ hewɔ.” Akɔntaabuu tsɔɔ akɛ, daa afi lɛ, gbekɛbii aaafee akpekpei etɛ gboiɔ yɛ hɔmɔ hewɔ.

Luka 21:11: “Shikpɔŋhosomɔi wuji baaba.”

Daa afi lɛ, shikpɔŋhosomɔi aaafee 50,000 ni naa wala bɔ ni adesai baanyɛ anu he lɛ baa. Emli aaafee 100 fiteɔ tsũi, ni kɛ́ hooo lɛ daa afi lɛ, ekome ni naa wa waa baa. Akɔntaa ko ni abu lɛ tsɔɔ akɛ, kɛjɛ afi 1975 kɛbashi afi 2000 lɛ, shikpɔŋhosomɔi gbe mɛi 471,000.

Mateo 24:14: “Abaashiɛ Maŋtsɛyeli lɛ he sane kpakpa nɛɛ yɛ shikpɔŋ lɛ nɔ fɛɛ koni akɛye jeŋmaji lɛ fɛɛ odase, ni no sɛɛ lɛ naagbee lɛ baaba.”

Yehowa Odasefoi ni fa fe akpekpei kpaanyɔ miishiɛ, ni amɛmiiye Nyɔŋmɔ Maŋtsɛyeli lɛ he sane kpakpa lɛ he odase yɛ maji aaafee 240 anɔ yɛ shikpɔŋ lɛ nɔ fɛɛ. Amɛmiishiɛ sane kpakpa lɛ yɛ maji wuji kɛ akrowai ni etse amɛhe banee amli, yɛ koi amli kɛ gɔji anɔ. Gbalɛ lɛ kɛɛ kɛ́ atsu nitsumɔ lɛ kɛshɛ he ni Nyɔŋmɔ taoɔ ni atsu kɛshɛ lɛ, “naagbee lɛ baaba.” Mɛni enɛ tsɔɔ? Etsɔɔ akɛ adesai anɔyeli baaba naagbee, ni Nyɔŋmɔ Maŋtsɛyeli lɛ baabɔi shikpɔŋ lɛ nɔ yeli. Kɛ́ Nyɔŋmɔ Maŋtsɛyeli lɛ ba lɛ, mɛɛ shiwoi baaba mli? Tsa nikanemɔ lɛ nɔ, ni obaana.

^ kk. 8 Kwɛmɔ sane ni yitso ji, “Nɔ Ko Ni Yeɔ Gbalɛ Ko Ni Ba Mli He Odase.”