Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yesu yasara Petro shaayoo, ni etsa lɛ.—Mateo 8:14, 15; Marko 1:29-31

Ani Oshijayeli Ji Taomɔnii Kɛhã Kristofoi?

Ani Oshijayeli Ji Taomɔnii Kɛhã Kristofoi?

JAMƆI ni yɔɔ je lɛŋ fɛɛ, tamɔ Roma Katolik Sɔlemɔi lɛ, Ortodɔks sɔlemɔi srɔtoi lɛ, Buddha jamɔ lɛ, kɛ jamɔi krokomɛi lɛ, biɔ ni amɛjamɔŋ hiɛnyiɛlɔi kɛ osɔfoi lɛ ahi shi akɛ oshijafoi. Shi mɛi babaoo nuɔ he akɛ, taomɔnii nɛɛ ji nɔ ni ehã bɔlɛnamɔ he amaniɛbɔi ni kɔɔ osɔfoi ni yɔɔ jamɔi srɔtoi lɛ amli lɛ ahe lɛ efa waa sɛɛkpee nɛɛ.

Belɛ, nilee yɛ mli akɛ wɔɔbi akɛ, ‘Ani eji Ŋmalɛ naa taomɔ nii akɛ Kristofoi ahi shi akɛ oshijafoi?’ Kɛhã nakai sanebimɔ lɛ hetoo lɛ, nyɛhãa wɔkwɛa he ni taomɔnii nɛɛ je shishi kɛjɛ, bɔ ni fee ni ebahe shi, kɛ Nyɔŋmɔ susumɔ yɛ he.

OSHIJAYELI YƐ JAMƆ HE YINƆSANE MLI

Encyclopædia Britannica lɛ tsɔɔ oshijayeli shishi akɛ, “shi ni ahiɔ ní aboteee gbalashihilɛ mli, ni no hewɔ lɛ, atsiɔ he kɛjɛɔ bɔlɛnamɔ he; bei pii lɛ jamɔŋ hiɛnyiɛlɔi loo mɛi ni etuu amɛhe amɛhã yɛ jamɔ hewɔ lɛ ni hiɔ shi nakai.” Yɛ afi 2006 kpee ko ni Roman Curia (Katolik jamɔ lɛ gbɛtsɔɔmɔ kuu) lɛ fee lɛ shishi lɛ, Pope Benedict XVI ni yeɔ nɔ yɛ nakai beiaŋ lɛ wie akɛ, famɔ akɛ jamɔŋ hiɛnyiɛlɔi ahi shi akɛ oshijafoi lɛ ‘je shishi kɛjɛ bei fioo ni tsɔ Yesu Bɔfoi lɛ agbele sɛɛ tɔ̃ɔ.’

Shi ejeee klɛŋklɛŋ afii 100 lɛ mli Kristofoi lɛ ajamɔ lɛ mli kusum akɛ mɔ ko ahi shi akɛ oshija. Anɔkwa, bɔfo Paulo, ni hi shi yɛ klɛŋklɛŋ afii 100 lɛ mli lɛ bɔ enyɛmimɛi Kristofoi lɛ kɔkɔ yɛ hii ni wieɔ “lakamɔ wiemɔi ni jɛ mumɔŋ” ni “amɛguɔ gbalashihilɛ” lɛ ahe.1 Timoteo 4:1-3.

Kɛjɛ afi 100 afii lɛ amli tɔ̃ɔ ni “Kristofoi” ni sɛɛ mli lɛ amɛbatsɔmɔ Roma Katolik Sɔlemɔ lɛ mli bii lɛ bɔi oshijayeli. Wolo ko (Celibacy and Religious Traditions) tsɔɔ mli akɛ, enɛ hewɔ ni ‘mɛi babaoo ni yɔɔ Roma Nɔyeli lɛ shishi lɛ kpɛ mli akɛ amɛboteŋ gbalashihilɛ lɛ.’

 Afii ohai komɛi asɛɛ lɛ, sɔlemɔ lɛ mli hiɛnyiɛlɔi kɛ mɛi ni tsɔɔ jamɔ he saji yɛ sɔlemɔ lɛ mli lɛ wo osɔfoi lɛ hewalɛ ni amɛhi shi akɛ oshijafoi. Amɛsusu akɛ bɔlɛnamɔ buleɔ mɔ, ni ekɛ osɔfoi anitsumɔ lɛ kpãaa gbee. Kɛ̃lɛ, Encyclopædia Britannica lɛ tsɔɔ mli akɛ, “yɛ afi 900 afii lɛ naagbee gbɛ lɛ, osɔfoi babaoo kɛ osɔfonukpai komɛi po yɛ ŋamɛi.”

Yɛ kpee ko ni Katolik Sɔlemɔ lɛ mli Gbɛtsɔɔmɔ Kuu lɛ fee yɛ afi 1123 kɛ afi 1139 yɛ Rome lɛ shishi lɛ, amɛbi ni amɛsɔfoi lɛ ahi shi akɛ oshijafoi. Roma Katolik Sɔlemɔ lɛ ehiɛ susumɔ nɛɛ mli kɛbashi ŋmɛnɛ. Susumɔ nɛɛ hã sɔlemɔ lɛ nyɛ esa hewalɛ kɛ shika ni osɔfoi ni ebote gbalashihilɛ mli lɛ shiɔ amɛhãa amɛbii akɛ gboshinii lɛ anaa.

NYƆŊMƆ SUSUMƆ YƐ OSHIJAYELI HE

Biblia lɛ, ni ji Nyɔŋmɔ Wiemɔ lɛ, hãa wɔleɔ Nyɔŋmɔ susumɔ yɛ oshijayeli he. Ehãa wɔleɔ nɔ ni Yesu wie yɛ mɛi ni hiɔ shi akɛ oshijafoi “yɛ ŋwɛi Maŋtsɛyeli lɛ hewɔ,” tamɔ efee lɛ, ahe sane. (Mateo 19:12) Bɔfo Paulo hu wie mɛi komɛi ni hala akɛ amɛbaahi shi akɛ oshijafoi “yɛ sane kpakpa lɛ hewɔ,” tamɔ bɔ ni lɛ hu ehi shi lɛ he.1 Korintobii 7:37, 38; 9:23.

Shi Yesu kɛ Paulo fɛɛ enyɛɛɛ Kristofoi anɔ ni amɛhi shi akɛ oshijafoi. Yesu wie akɛ, oshijayeli ji “nɔkeenɔ,” ni akɛ, jeee esɛɛnyiɛlɔi lɛ fɛɛ yɔɔ eko. Be ni Paulo ŋma “mɛi ni boteko gbalashihilɛ mli dã” lɛ ahe sane lɛ, ewie faŋŋ akɛ: “Mibɛ kitã ko kɛjɛ Nuŋtsɔ lɛ ŋɔɔ, moŋ lɛ, . . . nɔ ni misusuɔ mikɛɔ nɛɛ.”Mateo 19:11; 1 Korintobii 7:25, shishigbɛ niŋmaa.

Kɛfata he lɛ, Biblia lɛ hãa wɔnaa akɛ, Kristofoi ni hi shi yɛ klɛŋklɛŋ afii 100 lɛ mli lɛ ateŋ mɛi babaoo, ni bɔfo Petro hu fata he lɛ, bote gbalashihilɛ mli. (Mateo 8:14; Marko 1:29-31; 1 Korintobii 9:5) Anɔkwa, akɛni bɔlɛnamɔ jeŋba sha tee nɔ waa yɛ Roma, yɛ nakai beiaŋ hewɔ lɛ, Paulo ŋma akɛ, esa akɛ Kristofonyo nɔkwɛlɔ ni ebote gbalashihilɛ mli lɛ afee “wu ni yɔɔ ŋa kome,” ní “ebii ŋɔɔ amɛhe amɛwoɔ eshishi.”1 Timoteo 3:2, 4.

Ekã shi faŋŋ akɛ, no mli lɛ aawie mɛi ni ebote gbalashihilɛ mli ni náa bɔlɛ lɛ ahe, ejaakɛ Biblia lɛ feɔ lɛ faŋŋ akɛ, esa akɛ “wu afee eŋa lɛ gbɛnaa nii ehã lɛ,” ni akɛ, esaaa akɛ mɛi ni ebote gbalashihilɛ mli lɛ ‘kɛ amɛhe kamaa amɛhe’ yɛ bɔlɛnamɔ nifeemɔi amli. (1 Korintobii 7:3-5) Eyɛ faŋŋ akɛ, Nyɔŋmɔ biii ni mɔ ko ahi shi akɛ oshija, asaŋ ejeee taomɔnii kɛhã Kristofoi.

YƐ SANE KPAKPA LƐ HEWƆ

Kɛ́ oshijayeli jeee taomɔnii lɛ kɛhã Kristofoi lɛ, mɛni hewɔ mɔ ni Yesu kɛ Paulo jie yi waa nakai lɛ? Ejaakɛ oshijayeli baanyɛ ahã mɔ ko aná hegbɛ babaoo ni ekɛ mɛi krokomɛi agba sane kpakpa lɛ he sane. Oshijafoi baanyɛ atsu babaoo, akɛni nibii ni hãa mɛi ni ebote gbalashihilɛ mli lɛ feɔ yeyeeye lɛ eko gbaaa amɛnaa lɛ hewɔ.1 Korintobii 7:32-35.

Susumɔ oblanyo ko ni atsɛɔ lɛ David, ni kpɛ mli akɛ ebaakpa nitsumɔ ko ni etsuɔ yɛ Mexico City ní awoɔ lɛ nyɔmɔ waa lɛ, koni eyahi akrowa ko yɛ Costa Rica, ni etsɔɔ mɛi Biblia mli saji lɛ niiashikpamɔ lɛ he okwɛ. Ani David nu he akɛ oshija ni eji lɛ hewɔ enyɛ efee nakai lɛ? Ekɛ nɔmimaa wie akɛ, “Hɛɛ. Ebɛ mlɛo akɛ makase shihilɛ hee, shi akɛni mikome pɛ miyɔɔ hewɔ lɛ, miná lɛ mlɛo kɛfee tsakemɔi ni sa lɛ.”

Oblayoo ko ni atsɛɔ lɛ Claudia, ni eji Kristofonyo oshijafo, ni fã eyahi hei ni shiɛlɔi ahe miihia waa yɛ lɛ kɛɛ akɛ: “Miyɛ miishɛɛ waa akɛ miisɔmɔ Nyɔŋmɔ. Kɛ́ mina bɔ ni Nyɔŋmɔ yeɔ ebuaa mi lɛ, ewajeɔ mihemɔkɛyeli lɛ, ni ehãa wekukpaa ni yɔɔ mi kɛ lɛ teŋ lɛ mli waa.”

“Kɛ́ obote gbalashihilɛ mli jio, oji oshija jio lɛ, obaanyɛ oná miishɛɛ kɛ́ okɛ onyɛmɔ fɛɛ sɔmɔ Yehowa Nyɔŋmɔ.”Claudia

Esaaa akɛ oshijayeli feɔ jatsu kɛhãa mɔ ko. Claudia kɛfata he akɛ: “Kɛ́ obote gbalashihilɛ mli jio, oji oshija jio lɛ, obaanyɛ oná miishɛɛ kɛ́ okɛ onyɛmɔ fɛɛ sɔmɔ Yehowa Nyɔŋmɔ.”Lala 119:1, 2.