Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

 SANEYITSO LƐ MLITSƆƆMƆ | ANI OBAAKPƐLƐ NYƆŊMƆ NƆKEENƆ NI FE FƐƐ LƐ NƆ?

Nɔkeenɔ Ko Ni Fe Fɛɛ

Nɔkeenɔ Ko Ni Fe Fɛɛ

KƐ́ OKWƐ shapina ni afee lɛ tamɔ meele ni Jordan hiɛ lɛ, etamɔ nɔ ni ejeee nɔ ko tsɔ. Kɛ̃lɛ, eji nibii ni Jordan shwɛɛɛ he kwraa lɛ ateŋ ekome. Jordan wie akɛ, “Nuu onukpa ko ni atsɛɔ lɛ Russell, ni eji wɔweku lɛ naanyo lɛ ji mɔ ni kɛhã mi; no mli lɛ mi ji gbekɛ fioo.” Be ni Russell gbo sɛɛ lɛ, Jordan baná ele akɛ Russell ye ebua lɛ Jordan lɛ nii kɛ efɔlɔi waa, ni eshɛje amɛmii yɛ jaramɔ beiaŋ. Jordan wie akɛ, “Amrɔ nɛɛ ni mibaná mile nibii pii yɛ Russell he nɛɛ, mibuɔ nɔ ko bibioo ni eke mi nɛɛ akɛ nɔ ko ni jara wa waa.”

Taakɛ Jordan niiashikpamɔ lɛ tsɔɔ lɛ, mɛi komɛi baanyɛ abu nikeenii ko akɛ ejeee nɔ ko tsɔ loo sɛɛnamɔ bɛ he. Shi kɛhã mɔ ni hiɛ sɔɔ nii lɛ, ebaanyɛ efee nɔ ko ni jara wa waa. Biblia lɛ wieɔ nɔkeenɔ ko ni jara wa waa lɛ he yɛ wiemɔi ni ale waa nɛɛ mli akɛ: “Ejaakɛ Nyɔŋmɔ sumɔ je lɛ jogbaŋŋ aahu akɛ eŋɔ e-Bi koome lɛ ehã, koni mɔ fɛɛ mɔ ni jieɔ hemɔkɛyeli kpo yɛ emli lɛ hiɛ akakpãtã shi moŋ ená naanɔ wala.”Yohane 3:16.

Eji nɔkeenɔ ko ni baanyɛ ahã mɔ ni nine shɛɔ nɔ lɛ aná naanɔ wala! Ani nɔkeenɔ ko yɛ ni jara wa fe enɛ? Ekolɛ mɛi komɛi enaŋ bɔ ni nɔkeenɔ nɛɛ jara wa hã, shi anɔkwa Kristofoi buɔ lɛ akɛ eji nɔ ko ni “jara wa” waa. (Lala 49:9; 1 Petro 1:18, 19) Hewɔ lɛ, mɛni hewɔ Nyɔŋmɔ kɛ e-Bi lɛ wala hã je lɛ akɛ nɔkeenɔ lɛ?

Bɔfo Paulo tsɔɔ nɔ hewɔ lɛ yɛ wiemɔi ni nyiɛ sɛɛ nɛɛ mli akɛ: “Gbɔmɔ kome nɔ esha tsɔ kɛba je lɛ mli, ni gbele tsɔ esha nɔ kɛba, ni no hã gbele tsɛŋe gbɔmɛi fɛɛ.” (Romabii 5:12) Adam, ni ji klɛŋklɛŋ gbɔmɔ lɛ, fee esha kɛtsɔ Nyɔŋmɔ nɔ toi ni eje gbɛ egbo lɛ nɔ, ni enɛ hã egbo. Kɛtsɔ Adam nɔ lɛ, eshwiei, ni ji adesai fɛɛ lɛ hu gboiɔ.

 “Esha dɛŋ nyɔmɔwoo ji gbele, shi nɔkeenɔ ni Nyɔŋmɔ kɛhãa ji naanɔ wala kɛtsɔ Kristo Yesu, wɔ-Nuŋtsɔ lɛ nɔ.” (Romabii 6:23) Nyɔŋmɔ tsu e-Bi, Yesu Kristo kɛba shikpɔŋ lɛ nɔ koni ekɛ ewala ni eye emuu lɛ abashã afɔle kɛkpɔ̃ adesai kɛjɛ gbele fɔbuu lɛ mli. Kɛtsɔ nakai afɔleshaa ni atsɛɔ lɛ “kpɔmɔnɔ lɛ” nɔ lɛ, mɔ fɛɛ mɔ ni baajie hemɔkɛyeli kpo yɛ Yesu mli lɛ baaná naanɔ wala.Romabii 3:24.

Paulo wie jɔɔmɔi fɛɛ ni Nyɔŋmɔ tsɔɔ Yesu Kristo nɔ ekɛhãa ejálɔi lɛ he akɛ: “Shidaa ahã Nyɔŋmɔ yɛ eduromɔ keenɔ ní anyɛŋ naa atsɔɔ lɛ hewɔ.” (2 Korintobii 9:15) Hɛɛ, kpɔmɔnɔ lɛ jara wa aahu akɛ, wɔnyɛŋ naa wɔtsɔɔ kɛmɔ shi. Shi yɛ nibii kpakpai fɛɛ ni Nyɔŋmɔ kɛduro adesai lɛ ateŋ lɛ, mɛni hewɔ kpɔmɔnɔ lɛ sa kadimɔ waa nakai lɛ? Mɛɛ gbɛ nɔ esoro no kwraa yɛ nibii krokomɛi ni Nyɔŋmɔ kɛduro wɔ lɛ he? * Ni te esa akɛ wɔfee wɔ nii yɛ he wɔ hã tɛŋŋ? Wɔmiifɔ̃ bo nine ni okane hetoi ni Biblia lɛ kɛhãa lɛ yɛ saji enyɔ ni nyiɛ sɛɛ lɛ amli.

^ kk. 8 Yesu jɛ esuɔmɔ mli “eŋɔ ewala eŋmɛ shi ehã wɔ.” (1 Yohane 3:16) Shi akɛni nakai afɔleshaa lɛ fata Nyɔŋmɔ yiŋtoo lɛ he hewɔ lɛ, saji ni nyiɛ sɛɛ lɛ baahã wɔna akɛ, Nyɔŋmɔ ji Mɔ ni kɛ kpɔmɔnɔ lɛ hã.