Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Afrikabii ni ahɔ̃ɔ amɛ akɛ nyɔji kɛtee Amerika lɛ bafee nitsumɔ ni shika yɔɔ mli waa

Heyeli Kɛmiije Nyɔŋyeli Mli—Yɛ Blema kɛ Ŋmɛnɛ

Heyeli Kɛmiije Nyɔŋyeli Mli—Yɛ Blema kɛ Ŋmɛnɛ

Awo oblayoo ko ni atsɛɔ lɛ Blessing * lɛ shi akɛ akɛlɛ miiya Europe ni eyatsu nii akɛ yitsɔifeelɔ. Shi be ni eyashɛ jɛmɛ lɛ, anyɛ enɔ ni eyafee ashawo, shi akɛni esumɔɔɔ hewɔ lɛ, ayi lɛ jogbaŋŋ gbii nyɔŋma sɔŋŋ, ni awo ehe gbeyei akɛ kɛ́ efeee lɛ, abaahã aye eweku ni eshi yɛ emaŋ lɛ awui.

Blema Ejipt nyɔji ahe mfoniri ni akpɛ

No mli lɛ, Blessing nuŋtsɔ lɛ kɛɛ lɛ akɛ afite euro 40,000 yɛ egbɛfãa lɛ he, hewɔ lɛ esa akɛ ená euro 200 kɛmiimɔ 300 daa gbɛkɛ koni enyɛ ekɛwo nakai nyɔmɔ lɛ. * Blessing wie akɛ: “Bei pii lɛ, mikaa akɛ majo foi, shi misheɔ nɔ ni amɛbaafee miweku lɛ gbeyei. Minyɛɛɛ mafee shihilɛ lɛ he nɔ ko kwraa.” Jeee Blessing pɛ etsɔ shihilɛ ni tamɔ nɛkɛ mli; amɔmɔ mɛi aaashɛ akpekpei ejwɛ yɛ jeŋ fɛɛ koni anyɛ amɛnɔ ni amɛfee ashawo.

Aaafee afii 4,000 ni eho nɛ lɛ, oblanyo ko ni atsɛɔ lɛ Yosef lɛ nyɛmimɛi hii hɔ̃ɔ lɛ. Eyagbe naa akɛ nyɔŋ yɛ Ejiptnyo kpanaa ko shĩa. Shishijee lɛ, kulɛ Yosef nuŋtsɔ lɛ waaa lɛ yi tamɔ afee Blessing lɛ. Shi be ni enuŋtsɔ lɛ ŋa lɛ bi lɛ suɔmɔ ni ekpɛlɛɛɛ lɛ, afolɔ enaa akɛ kulɛ eeetao eto enuŋtsɔ lɛ ŋa lɛ kabonaa. Ayawo lɛ tsuŋ, ni akɛ lɛ yawo dade mli.1 Mose 39:1-20; Lala 105:17, 18.

Yosef ji nyɔŋ yɛ blema; Blessing ji nyɔŋ yɛ afi 2000 afii nɛɛ amli. Shi amɛ fɛɛ lɛ, amɛji gbɔmɛi ni ahɔ̃ɔ amɛ tamɔ ahɔ̃ɔ nibii lɛ; ahã amɛyatsu nii dɛŋdɛŋ amɛhã mɛi ni hé amɛ lɛ ní awooo amɛ nyɔmɔ. Nifeemɔ nɛɛ ji nɔ ko ni etee nɔ afii babaoo.

TA HÃA NYƆJI AHƆ̃ƆMƆ BAFEƆ NITSUMƆ NI SHIKA YƆƆ MLI WAA

Ta bafee gbɛ ni yɔɔ mlɛo ni maji pii tsɔɔ nɔ amɛnáa nyɔji. Abɔ amaniɛ akɛ, yɛ ta ko ni Ejipt Maŋtsɛ  Thutmose III lɛ yawuu yɛ Kanaan lɛ mli lɛ, ekɛ mɛi 90,000 ku esɛɛ akɛ gboklɛfoi. Ejiptbii lɛ hã amɛtsu nii akɛ nyɔji, ni amɛtsa jwetrii, amɛmamɔ sɔlemɔtsui, ni amɛgbagbai nujɔi.

Yɛ Roma Nɔyeli lɛ shishi lɛ, tai srɔtoi ni awu lɛ hã amɛná nyɔji babaoo, ni nyɔji ni maji komɛi taoɔ lɛ hewɔ lɛ, amɛwuɔ ta bei komɛi. Akɔntaa ko ni abu lɛ tsɔɔ akɛ, be ni shɛɔ klɛŋklɛŋ afii 100 lɛ, no mli lɛ Roma maŋ lɛ fã kpotoo ji nyɔji. Aye nyɔji ni yɔɔ Ejipt kɛ Roma lɛ babaoo anɔ dɛŋdɛŋ. Akɛ nɔkwɛmɔnɔ lɛ, nyɔji ni tsaa jwetrii yɛ Roma lɛ awala sɛɛtsɛlɛ ji aaafee afii 30 pɛ.

Be ni be shwieɔ mli lɛ, nyɔji ahɔ̃ɔmɔ lɛ mli bawo wu. Kɛjɛ afi 1500 afii lɛ amli kɛyashi afi 1800 afii lɛ amli lɛ, Afrikabii ni ahɔ̃ɔ akɛ nyɔji kɛtee Amerika lɛ bafee nitsumɔ ni shika yɔɔ mli fe fɛɛ yɛ shikpɔŋ lɛ nɔ fɛɛ. Amaniɛbɔɔ ko ni UNESCO kɛhã lɛ tsɔɔ akɛ, ‘Kɛ́ hooo kwraa lɛ, amɔmɔ hii, yei, kɛ gbekɛbii akpekpei 25 kɛmiimɔ akpekpei 30 ni ahɔ̃ɔ amɛ.’ Amɛteŋ mɛi akpei ohai abɔ gboi be ni akɛ amɛ foɔ Atlantik Ŋshɔ lɛ. Olaudah Equiano, ni ji nyɔŋ ko ni yi na wala lɛ wie akɛ: “Yei lɛ abolɔmɔi, kɛ mɛi ni gboiɔ lɛ akɛmɔmɔ lɛ hã gbeyei ni naa wa waa mɔmɔ wɔ fɛɛ.”

Shi dɔlɛ sane ji akɛ, nyɔji ahɔ̃ɔmɔ jeee blema sane ko ni yɔɔ mɔbɔ kɛkɛ. International Labour Organization lɛ bɔ amaniɛ akɛ, kɛ́ hooo kwraa lɛ, hii, yei, kɛ gbekɛbii aaafee akpekpei 21 kã he amɛmiitsu nii dɛŋdɛŋ akɛ nyɔji, ni nyɔmɔ fioo ko pɛ awoɔ amɛ, loo awooo amɛ nyɔmɔ ko kwraa. Mɛi ni tsuɔ nii akɛ nyɔji ŋmɛnɛ lɛ ekomɛi tsaa jwetrii, ekomɛi feɔ mama, ekomɛi foɔ blɔgi, ekomɛi tsuɔ nii yɛ mɛi ashĩai amli, ni ekomɛi hu tsuɔ nii akɛ ashawoi. Etamɔ nɔ ni nyɔŋyeli ni tamɔ nɛkɛ lɛ mli miiwo wu waa, eyɛ mli akɛ mla fĩii sɛɛ moŋ.

Mɛi akpekpei abɔ miitsu nii akɛ nyɔji lolo

HEYELI KƐMIIJE NYƆŊYELI SHISHI

Akɛni akɛ nyɔji ye dɛŋdɛŋ hewɔ lɛ, amɛteŋ mɛi babaoo wu koni amɛná heyeli. Yɛ klɛŋklɛŋ afii 100 D.Ŋ.B. lɛ, nuu ko ni atsɛɔ lɛ Spartacus, ni ekɛ kooloi nɔɔ kɛjieɔ mɛi ahiɛtserɛ lɛ kɛ nyɔji aaafee 100,000 bɔ mɔdɛŋ akɛ amɛbaatse Roma nɔyeli lɛ hiɛ atua, shi amɛyayeee omanye. Yɛ afi 1700 afii lɛ amli lɛ, nyɔji ni yɔɔ Caribbean ŋshɔkpɔ ni ji Hispaniola lɛ nɔ lɛ te shi amɛshi amɛnuŋtsɔmɛi lɛ. Bɔ ni akɛ nyɔji lɛ ye dɛŋdɛŋ be ni amɛtsuɔ nii yɛ shɛ̃ ŋmɔji lɛ amli lɛ tée ta ko shi; awu ta nɛɛ afii 13 sɔŋŋ, ni no ji nɔ ni hã Haiti maŋ lɛ ná heyeli yɛ afi 1804.

 Gbɛ nɔ ni Israelbii lɛ tsɔ amɛshi Ejipt lɛ ji gbɛ ni fe fɛɛ ni nyɔji etsɔ nɔ amɛná heyeli yɛ yinɔsane mli. Eeenyɛ efee akɛ, ahã mɛi akpekpei etɛ—ni ji maŋ muu fɛɛ—ye amɛhe kɛje nyɔŋyeli mli yɛ Ejipt. Hɛɛ, eja jogbaŋŋ akɛ amɛbaaye amɛhe. Biblia lɛ wie shihilɛ mli ni no mli lɛ amɛyɔɔ yɛ Ejipt lɛ he akɛ, akɛ ‘nyɔji ahiɛmɔ shɛii hiɛ amɛ.’ (2 Mose 1:11-14) Farao ko po fã ni agbe gbekɛbii hii fɛɛ ni Israelbii lɛ baafɔ lɛ koni amɛyi akafa.2 Mose 1:8-22.

Kpɔ̃mɔ ni akpɔ̃ Israelbii lɛ kɛje Ejiptbii lɛ anɔyeli dɛŋdɛŋ lɛ shishi lɛ yɛ srɔto kwraa, ejaakɛ Nyɔŋmɔ diɛŋtsɛ ni kpɔ̃ amɛ. Nyɔŋmɔ kɛɛ Mose akɛ, ‘Mile amɛnidɔɔnii lɛ. Ni makpleke shi mayajie amɛ.’ (2 Mose 3:7, 8) Kɛbashi ŋmɛnɛ lɛ, Yudafoi ni yɔɔ je lɛŋ fɛɛ lɛ yeɔ Hehoo lɛ daa afi kɛkaiɔ nakai nifeemɔ lɛ.2 Mose 12:14.

BE NI ABAAFO NYƆŊYELI SƐƐ KWRAA

Biblia lɛ kɛɔ akɛ: ‘Yehowa, wɔ-Nyɔŋmɔ lɛ, kutumpɔo bɛ ehe,’ ni ekɛɔ wɔ hu akɛ, Nyɔŋmɔ tsakeko. (2 Kronika 19:7; Maleaki 3:6) Nyɔŋmɔ tsu Yesu kɛba koni ‘ebajaje etsɔɔ nomii lɛ akɛ amɛbaaye amɛhe, ní ehã mɛi ni ekumɔ lɛ aye amɛhe.’ (Luka 4:18) Ani enɛ tsɔɔ akɛ nyɔŋ fɛɛ nyɔŋ baaye ehe? Dabi kwraa. Atsu Yesu ni ebakpɔ̃ mɛi kɛje esha kɛ gbele nyɔŋyeli shishi. Sɛɛ mli lɛ ewie akɛ: “Anɔkwale lɛ baahã nyɛye nyɛhe.” (Yohane 8:32) Ŋmɛnɛ po lɛ, anɔkwale ni Yesu tsɔɔ lɛ hãa mɛi yeɔ amɛhe yɛ gbɛi srɔtoi anɔ.—Kwɛmɔ akrabatsa ni yitso ji, “ Heyeli Kɛmiije Nyɔŋyeli Kroko Shishi” lɛ.

Yɛ anɔkwale mli lɛ, Nyɔŋmɔ tsɔ gbɛi srɔtoi anɔ eye ebua Yosef kɛ Blessing ni amɛye amɛhe kɛje nyɔŋyeli shishi. Obaanyɛ ona Yosef he sane ni yɔɔ miishɛɛ waa lɛ yɛ Mose Klɛŋklɛŋ Wolo lɛ yitso 39 kɛyashi yitso 41 lɛ. Nakai nɔŋŋ hu gbɛ nɔ ni Blessing tsɔ eye ehe lɛ yɛ miishɛɛ waa.

Be ni ashwie Blessing kɛjɛ Europe maŋ ko nɔ lɛ, etee Spain. Be ni eyɔɔ jɛmɛ lɛ, ekɛ Yehowa Odasefoi lɛ kpe, ni ekɛ amɛ bɔi Biblia lɛ kasemɔ. Akɛni eesumɔ ni etsake ejeŋba hewɔ lɛ, eyatao nitsumɔ kroko, ni ekɛ etsutsu nuŋtsɔ lɛ wie koni etse shika ni ewoɔ daa nyɔɔŋ lɛ nɔ fioo ehã lɛ. Gbi ko lɛ, Blessing tsutsu nuŋtsɔ lɛ tswa lɛ. No mli lɛ, eetao ni efo nyɔmɔ ni Blessing woɔ lɛ mli, koni ekpa lɛ fai ni ekɛ ehe eshai ake lɛ. Mɛni hewɔ etswa lɛ lɛ? Lɛ hu Yehowa Odasefoi lɛ kɛ lɛ ebɔi Biblia lɛ kasemɔ! Blessing kɛɛ akɛ: “Anɔkwale lɛ hãa oyeɔ ohe yɛ gbɛi ni yɔɔ naakpɛɛ waa nɔ.”

Be ni aye Israelbii lɛ anɔ dɛŋdɛŋ akɛ nyɔji yɛ Ejipt lɛ, edɔ Yehowa Nyɔŋmɔ waa; ekã shi faŋŋ akɛ nakai nɔŋŋ enuɔ he yɛ efɔŋ ni afeɔ mɛi ŋmɛnɛ lɛ he. Anɔkwa, dani abaanyɛ afo nyɔŋyeli srɔtoi fɛɛ sɛɛ lɛ, esa akɛ afee tsakemɔ kpele yɛ adesai ashihilɛ mli. Shi Nyɔŋmɔ ewo shi akɛ, ekɛ nakai tsakemɔ lɛ baaba. Biblia lɛ kɛɔ akɛ: “Yɛ eshiwoo lɛ naa lɛ, wɔmiimɛ ŋwɛi hee kɛ shikpɔŋ hee, ni nomɛi amli jalɛ baahi.”2 Petro 3:13

^ kk. 2 Atsake gbɛ́i lɛ.

^ kk. 3 Nakai beiaŋ lɛ, euro lɛ jara kɛ dɔla lɛ jara miihe afee pɛpɛɛpɛ. (Ni tsɔɔ akɛ, no mli lɛ, shika ni akpaa gbɛ akɛ ewo lɛ ji Ghana Cedi 34,000)